بعد الحادث كتبت هذي المعانات

[عبدالمحسن الرحمه]

‏بعد الحادث اللي حصل لي كتبت هذي المعانات
الحديد بداله حديد والنفس مالها عوض


الهم ذيب ن والمحاني رجومه
من فوقهن يقنب وحالي امهزومه
هذي حياة اللي يعاني من الهم
منهو يلومه لا بكاء من يلومه
حده زمانه والليالي تحده
حارت به أفكاره وقلت عزومه
محتار من حاله ودمعه تنثر
في ليله المظلم يسامر نجومه
يصارع الدنيا وحيد ن لحاله
لوهو بنى الآمال جات إمهدومه
همه جليسه في نهاره وليله
معذور ياأهل العرف لاقل نومه
إن قال عندي لقمة العيش صعبه
هذي حقيقه جل وقته يصومه
دايم يهوجس في معيشة عياله
ماله جدى إلا الدمع غرق كمومه
ضاقت عليه وضاق بالحيل صدره
تصدقوا ياأهل القلوب الرحومه
حصل عليه بقدرة الله حادث
سيارته مع كل ركن إمهشومه
تكفون يااهل الجود والطيب فزعه
الدين بحر ن ماقدرنا نعومه
لكن على ماقدر الرب صابر
لو قل ماله ماتغير سلومه
وإذا ذهب للسوق محتاج حاجه
لو يعجبه تمر الحسا مايسومه
مسكين منهو حالته مثل حالي
يروح يرجع مايقضي لزومه
خطر ن يجيه إحباط مماجرى له
هذي ترى حال الرجال الكتومه
عطيتكم عن حالي اليوم موجز
والخافي أعظم والسعاده نرومه
‏شكيت وضعي للولي ثم لامي
اللي لها بالطيب جلسه وقومه
أطلب دعاها لي وهي ماتقصر
شيهانة يعجبك بالجو حومه