قصيدة لها مناسبة كُتبت للتو أتمنى تنال القبول
وهي أن أخي ارسل ابله لنا بالقصيم بعد أن كانت بالخرج
بين المخططات والمزارع وكانت هذه الأبيات
؛
الوضح بالوادي تقاود مطاليق ،،، ما حدهن شبك وحدتهن عماره
مستانسات وطيبات ومفاهيق ،،، بين الشعيب وبين هاك السماره
طابن من الله يوم راحن عن الضيق ،،، الحجر هو عوق البعير ودماره
الله يكفيهن شرور المطافيق ،،، عسى نضول العين يبطي مزاره
ولا مر كلمات ٍ من الله مواثيق ،،، تقمع حسد عينه وتطفي شراره
متوكل ٍ بالله خصيم المخاليق ،،، اللي حفظ راع الرساله بغاره
يا زين مدهال النياق المناتيق ،،، في خايع ٍ زان وتنامى خضاره
نوار عشبه له زهور وزماليق ،،، غاية شغوف القلب راع الصقاره
من رايحٍ ما هو رشاش وتساويق ،،، حقوق وبله لا تهشم غزاره
نوه توالا بالمزون المصاديق ،،، غيث ٍ ولي الكون ساقه بشاره
يرتاح بال اللي هجوسه مغاليق ،،، لا من تمشى فيه تالي نهاره
يحس في نشوة تزور المعاليق ،،، لا سج واستانس على جال ناره
مع خوة ٍ للطيب شم ومزاريق ،،، شرواكم الطيب عزيز ٍ وقاره
يا ماحلا الفنجال بالكيف لا سيق ،،، في مجلسٍ حلو السواليف كاره
بنه ينومس راعي الذوق لا ذيق ،،، يقطع عماس الرأس فايح بهاره
مع هرجتن ما هي شموت وملاحيق ،،، ماحدٍ على الغرات جاب العياره
سوالف ٍ عذبه وحكمة مناطيق ،،، قصة وفاء ما بين جار ٍ وجاره
ومد النظر يم الجبال الشواهيق ،،، وشوف القمر لا طل وأنور مداره
هذا مرادي كان للشوق عشيق ،،، عندي يساوي كل فن الحضاره
2013-05-24, 12:56 AM
الوضح
العرض العادي
