[التمثال]

يوم الأحد 6 ذو القعدة /27 نوفمبر
قمنا الفجر والشوارع ماشية والمرازيم صابة بالرياض ,, أمطار غزيرة وبروق ورعود على الظهران الدمام الخبر القطيف ومديمة على الأحساء ,, الجبيل امطار غزيرة ومستمرة من البارح السبت وحتى الآن ,, بعد الظهر خف السحاب وماعاد فيه الا نفيض ورذاذ خفيف على الرياض ,,, ثم خف النفيض واصحت السماء ,, هواها كنه شمالي

يوم الأثنين 7 ذو القعدة / 28 نوفمبر
الجو فيه سحاب متفرق والهواء نسري والوضع مبشر ولله الحمد ,, ركب السحاب الساعة 7 الصبح وقام يرشرش خفيف ,,, وجت اخبار مطر في الدوادمي صبت منه المرازيم الساعة 7.15 الصبح ,, رش طيب على البكيرية والخبراء الساعة 11 قبل الظهر ,, بعد الظهر رش خفيف على شقراء ,, الخيال قام يتكبر على جنوب حائل وارعدت سحابة وجا منها مطر متوسط ,, بعد العصر امطار على الرس حدرت بعض الشعاب ,, امطار خفيفة على الزلفي ,, أمطار على عنيزة مع برق ورعد ,, مديمة على بريدة ومعها بروق تشاف من جنوب ,, أمطار على النبهانية سالت شعبانها ,, امطار متوسطة على الشيحية مع برق ورعد ,, مطر طيب على البكيرية معه بروق ورعود ,, امطار خفيفة على المجمعة ,, امطار شديدة على تمير ,,, بعد المغرب بروق قوية على المجمعة ومطره غزير جدا ومعه شبوب ,, برق شمال المستوي والسحابة سحابة برد كما ذكر ,, بروق غرب الخرج واخرى غرب الحريق ,, الزلفي مطره طيب روضة سدير مطر غزير وبروق ورعود ,, بعد العشاء اشيقر امطار جيدة ,, امطار غزيرة ومعها شبوب على شمال الدوادمي سالت شعبانها ,, امطارخفيفة على القويعية ,, مطر على الصفرات وسيل شمال الديرة ومعه برد ,, امطار غزيرة على القصب ,, امطار غزيرة على الغاط وسالت الشعاب ,, رش خفيف جدا في ليلى التابعة للأفلاج ,, امطار غزيره على البير سالت الشعاب ,, مطر ومعه برد على ثادق ,, بعد منتصف الليل برق غرب شقراء ,, برق غرب المجمعة ,, بروق مقبلة على الدوادمي ,, والجو يبشر بالخير ..

يوم الثلاثاء 8 ذو القعدة / 29 نوفمبر
رش خفيف ومتقطع على الرياض تسود الشوارع ,, امطار غزيرة ومتوسطة صباحا (7.15) على الدوادمي التلاع تمشي والدعوب والعبارات وحدرت بعض الشعبان الشمالية ,, امطار خفيفة تقعت بالشوارع جنوب ليلى 20كم ,, امطار ومعها رعود وسط الرياض ,, مطر ديم على الثمامة مطر ديم عم الرياض ,, مطر وبرد غرب الرياض (حول الجسر المعلق) ,, مطر خفيف في الخرج قبل الظهر نقعت الشوارع وصبت المرازيم ,, امطار خفيفة على رغبة ,, أمطار متوسطة وغزيرة على القراين جنوب شقراء حدرت بعض الشعيبات وشقراء نفسها رش ,, البرة سيله طيب ومطرة طيب ,, مطر طيب على ثادق حول الساعة 2 ظهرا ,, الخيال خف وقل وراح شرق ,, تالي الليل رش خفيف على الدوادمي تحولت الساعة 1.20 ليلا الى ديمة طيبة ,, رشوش على غرب وجنوب الرياض ,, ومطرة طيبة جت على شمال وشرق الرياض الساعة 2 ليلا

يوم الأربعاء 9 ذو القعدة / 30 نوفمبر
مطر ديم خفيف على الرياض فجرا ,, مطر طيب على الثمامة بعد الفجر ,, امطار على صلبوخ وملهم ,, في حينا (السويدي الغربي) هلت هلة قوية لمدة 10 دقائق وقصينا اثرها من شمال وجنوب ووجدنا انها هي الاقوى عندنا لكن ليست عريضة ,, في الرياض قامت السحب ترعد وبعضها مطره غزير لكن مايطول ,, بعد الظهر سحب منخفضة ولم يذكر أمطار حتى غروب الشمس ,, السحاب مازال مركب ولا أمطار ..

يوم الخميس 10 ذو القعدة /1 ديسمبر
السحاب منخفض ومتفرق صباح اليوم ولم يذكر امطار ,,, بعد الظهر السحاب قام يكثر والهوا جنوبي شرق ,, بعد العصر جا علم من ام رقيبة بامطار خفيفة ويشاهدون البرق من جهة الصمان ,, مزون تشاهد من جنوب بريدة ,, بعد المغرب برق على غرب ام الجماجم ,, الملاحظ ان السحاب كلما راح شرق قام يخيل ويقوى ,, خيال منخفض وتنقيط على حايل ,, بعد العشاء الى منتصف الليل رش خفيف على النعيرية ,, امطار خفيفة على الزلفي .

يوم الجمعة 11 ذو القعدة/2 ديسمبر
امطار مع الفجر على الدمام ,, قرية العليا المرازيم تصب ورعد وبرق من البارح ,, صباح الجمعة امطار غزيرة جدا على الجبيل وبروق ورعود ,, المطر متواصل على الدمام غزير ,, بروق ورعود الساعة 9 الصبح على الخبر ومطره غزير ,, المطر متواصل على القرية العليا الساعة 10.30 صباحا من البارح ,, الظهران مطر طيب ,, الرياض سحب منخفضة ولا أمطار ,, مطر متوسط على المدينة العسكرية بحفر الباطن مع الخطبة ,, مطر غزير في الدمام مع صلاة الجمعة ودهم يجمعون مع العصر بس مايجوز وتواصلت الأمطار بغزارة بعد الجمعة ,, رش خفيف على القراين جنوب شقراء ,,
امطار شديدة على الخبر الساعة 1.20 ظهرا ,, بعد العصر قام السحاب يرتكم ويصير زي الجبال بس كنه يعود يخف في الرياض وتجي رشوش خفيفة ,,
قبل المغرب مطر طيب صبت المرازيم ومشت الشوارع عندنا في الرياض بالتحديد حي السويدي ,, جمعوا المغرب والعشاء في الظهران من قو المطر ,,
الخبر امطار غزيرة مع المغرب ,, هواها شرقي في الرياض يوم صلينا العشاء طلعت من المسجد وانا راجع للبيت اشوف نوض بس ما تأكدت منه واسمع عقبه قرقعه وتوقعت انه برق ,,, والسماء كلها نفيض مليان تمام ,, شوي وارعدت فوقنا وقام الرش يطيح علينا ,, كلمت خالتي علي من حي العريجاء وتقول ان عندنا مطر قوي والمرازيم تصب والشوارع ماشية ماخذينا خمس دقائق وجا منه مطر غزير مصحوب بالرعود اللهم لك الحمد استمر المطر حتى بشكل متقطع على شكل كمخات طيبة تمشي الشوارع وتصب المرازيم بدون برق ورعد ,,, امطار خفيفة على حوطة بني تميم ,, قبل منتصف الليل استمر المطر الخفيف على الشرقية واحيانا يزيد ومعه برق ورعد ,, مطر متوسط متقطع على الخرج والحريق .

يوم السبت 12 ذو القعدة/3 ديسمبر
اليوم الجو غير رذاذ والنفيض والضباب والجو بارد على الرياض والدوادمي والقويعية والخرج والحوطة ,, عقب الظهر صفى الجو وخف الخيال تماما
ثم اصحت وهبة شمالية غربية صلفة وباردة .. استقرار في الجو

يوم الأحد 13 ذو القعدة/ 4 ديسمبر
صحو واستقرار تام في عناصر طبقات الجو العليا ..

يوم الأثنين 14 ذو القعدة/ 5 ديسمبر
اليوم الجو صافي تماما والسماء زرقا وجمدة الحرارة 7 في الرياض والقصيم بعد الفجر من 4 الى 5 درجات حائل 1 دون الصفر
واستقرار تام في عناص الجو ..

يوم الثلاثاء 15 ذو القعدة/ 6 ديسمبر
الحمد لله أول الغيث قطرة ,, رش خفيف ومستمر على المنطقة العسكرية بحفر الباطن من قبل صلاة الفجر الى الصبح ,, غيوم منخفضة ومتفرقة على الرياض وكذلك الدوادمي والجو يبشر بالخير .. ماطاح مطر يذكر .

الأربعاء 16 ذو القعدة/ 7 ديسمبر
الجو يبشر بالخير والوضع ان شاء الله طيب ,, رش خفيف صباح اليوم على الزلفي ,, جو غائم كلي في دخنه ورش خفيف متقطع ,, امطار متوسطة بين قبة شمال القصيم وسامودة ,, رش خفيف جدا شمال الرياض ,, ديمة طيبة على المنطقة السكرية بحفر الباطن ,, امطار على الخرمة ,, رش خفيف على راس تنورة والدمام والخبر .. الجو بارد ليلا والرياح شمالية على الرياض

الخميس 17 ذو القعدة/ 8 ديسمبر
اليوم الجو بارد وجت اخبار امطار ورشوش خفيفة صباحا على البديع بالافلاج ,,, رش خفيف على حريملاء ,, امطار خفيفة على الاحساء ,, امطار طبية وبروق ورعود على الظهران بعد الساعة 3 العصر ,, رشوش متفرقة على الرياض ,, الهواء شمالي الى نسري ,, الخبر امطار طيبة مع رعود وبروق الساعة 4 ألا عصرا ,, والجو يبشر بالخير ..

الجمعة 18 ذو القعدة/ 9 ديسمبر
السماء صافية والجو بارد والهواء نسري ,, الخيال قام يتكون بفضل الله تعالى والمهب تمام ,,, وجاءت أخبار بعد العشاء رش طيب على الخرج ,, خف الخيال واصحت السماء تمام والجو يبشر بالخير ..

السبت 19 ذوالقعدة/ 10 ديسمبر
السحاب اليوم قليل وفي رجاء خير ان شاء الله ,, مامن علوم مطر هذا اليوم ..

الأحد 20 ذو القعدة/ 11 ديسمبر
الجو اليوم دافي وفيه خيال خفيف ,, امطار غزيرة على القريات ,, امطار غزيرة على عرعر ومشت الوديان واهمها وادي بدنه ,, امطار غزيرة على رفحاء مع بروق ورعود ,, امطار على الاسياح شمال القصيم ,, امطار على قصيباء شمال بريدة ,, رشة طيبة على الزلفي ,, امطار ديمية على حفرالباطن,, ديم وامطار خفيفة على مكة ,, رشة طيبة على بريدة صبت المرازيم ,, ديمة طيبة على الخفجي ,, الخرمة مطر مشى الشوارع ,, امطار طيبة على السيح حقت الزلفي ,, امطار خفيفة على الغاط مشت الشوارع وصبت المرازيم ,, بعد المغرب مديمة على قرية العليا ,, كمخة طيبة على المجمعة ,, رعد وبرق على الدوادمي وكفخة طيبة نقعت بالشوارع والمطر اقوى شمال الديرة حولت الدعوب والتلاع ,, جلاجل كمخة صبت منها المرازيم ,, الخيال سريع جدا ,, مطرة طيبة على دقله ,, رش على القويعية ,, مطر خفيف على القراين جنوب شقراء ومطر غزير ومعه شبوب بس ماطول على ثرمداء واثيثية سالت شعاب ثرمداء ,, مطر طيب بالحيل على تمير وجنوب حدرت التلاع والدعوب ,, مطر حليل على حريملاء الى صلبوخ الساعة 9 مساءا ,, بروق ورعود على القطيف والجبيل والدمام والظهران وامطار طيبة بالحيل ,, امطار طيبة على العيينة ,, مطر طيب على ضرماء ,, امطار متوسطة على رغبة وصبت المرازيم الساعة 11 مساءا ,, كفخة طيبة على الرياض صبت المرازيم حي السويدي الغربي وشبرا والشفاء ,, ولله الحمد بروق تشاهد على المنشا في الافلاج وارتفعت وامطرت ونقعت بالارض وحدرت الدعيبات ,, رش خفيف على الدلم ..

الأثنين 21 ذوالقعدة/ 12 ديسمبر
اليوم هواء شمالي بارد جدا والسماء مغطيها النفيض ,, جا علم رش خفيييف على الحوطة ,, شوهد البرق شرق وجنوب شرق الحوطة الساعة 9.15 مساءا ,, رش على البديع والبرق من غرب طامن ,, الجو باااااارد والهوا شمالي

الثلاثاء 22 ذوالقعدة/ 13 ديسمبر
اليوم برد يقص العظم في الرياض 4 درجات وفي حائل 1- ,, السماء زرقاء ..

***********************************************
هذا تقرير مختصر لما حصل في الوسم من أحداث والله تعالى أعلم
والسموحة منكم على القصور
أخوكم
التمثال