[سحاب شقراء]

السلام عليكم ورحمه الله وبركاته
يالله تحييهم جميع كبيركم وصغيركم ذكركم ونثاكم وليا حيا كثر وتنثر وتزبر بعد

يقولي واحد من الغالين تكلم عن حيات منول والحرمه وش كانت مسؤليتها وقلت ابشر

عن الحرمه منول وش اقول وش اخلي هي الي قايمه بالبيت كله من صلات الفجر الين تغاب الشمس تطبخ وتنفخ ومنول مافيه شي اسمه مطبخ يسمونه الموقد لانهم يوقدون فيه النار ويسوون القرصان والمراصيع والمرقوق والجريش اذكر الجريش له معصاد من الخشب يعصدونه وسط القدر والعصد يالتوالي هو التحريك بشكل دائري هذا انت يالجريش بس وغيره يطبخونه بدون عصد
والرجال يطلع من بيته الفجر يصلي ثمن يروح لشغله ولا يرجع لبيته الا بعد المغرب
تصدقون ان بعض الرجال مايشوف بزوره يعني عياله ايام تتلا ايام يروح لشغله وهم نايمين ويرجع من شغله ويلقاهم نايمين لانهم من المغرب وهم نايمين ماعندنا سهر منول كلش على سنعه وجعلنا الليل لباسا وجعلنا النهار معاشا
وهلحين اللهم صلى على محمد انقلبت الدعوا ولا عاد يرقدون الا الفجر وياكلون البرقر الي نفخ خدودهم وصدورهم الله يدفع البلا وصارو يترج رجون وهم يمشون مثل الجلي الا حركته

والحرمه ماترقد وتخلي رجلها تصير مولمه القهوه والعشا وتحتريه الين يجي وتقهويه وتعشيه وهي تنافض لياه يزعل بس
منول للرجال هيبه الى سمعوالباب مفتوح يخمدون البزور ولا يطلع منهم صوت
وهلحين الله يخلف تلقا الرجال نايم في غرفته والبيت صيحه وصجه وولهم حرمته تنادي على عيالها بالصوت الرفيع وعند باب غرفه الرجال وهي تدري انه نايم وفنك تقول شي

منول غير وهلحين غير الله يخلف

وبالنسبه للغنم منول والله العظيم مابقا شي ويتكلمن
كل بيت فيه غنم ولا اصبحنا يفتحون لهن الباب ويطلعن للسوق ويلقن غنم الجيران ويمشن مع بعض كنهن رايحات للمدرسه
وسبحانك ربي يروحن يم بيت الشاوي كل غنم اهل الديره ولا معهن احد يسوقهن او يدلهن هن عارفات الدرب وشلون يدرن ان هذا بيت الي يطلع بهن برا الديره ويرعاهن مدري ولا جا مسيان يعني عقب العصر يعني حول المغرب يهظلن يعني يرجعن للديره وكل غنم ناس يروحن مع بعض لبيت اهلهن اذكر الا صرنا حول المغرب يقولون افتحوالباب خلوه مفتوح للغنم يدخلن ويجن ويدخلن ون لقن الباب مصكوك يقعدن يثاغن عند الباب يعني افتحولنا الباب نبي ندخل منيب اقول لكم معاد الا شوي ويتكلمن الغنم منول
وحيان يظيعن بعض الغنم بيوت اهلهن او يصير فيه حالات عشق بينهن ويروحن مع بعض ثمن يقعد يدورهن راعيهن ويمشي في السكيك وهو يقول من عين الشاه جزاه الله خير ولا يقول من عين العنز الصمعا جزاه الله خيروالصمعا يعني الي اذانها صغار يسمونها الصمعا يعني يوصفون غنمهم الي ظايعات والناس الا سمعو الي ينادي كلن يروح يشوف غنمه لياهن معهن ويطلعونهن

وبالنسبه للوسم ونزول المطر
الا قالو بكرا يدخل الوسم تمطر الليله لانهم مرضين ربهم سبحانه وهومرضيهم الرحمن الرحيم
ولا شافو قطعه غيم صغيره قالو جاكم السيل وكلن يروح ينزل الي في سطحه كانه ناشر شي في الشمس وينظفون المثاعب ويرقون بالبن الي يبنون بهن ويحطونهن في الطايه علشان لو يخر شي عليهم يسدون به الشقوق
ياحيات الشقا منول الا جاهم المطر يفرحون ويخافون كلهن مع بعض
يفرحون انه يسقي نخيلهم وينبت العشب لغنمهم وبقرهم
والي مسوي بعول تنبت بعوله والبعول هي طال عمركم الا تحرو للوسم يدخل يطلعون للبر ويحرثون الارض وينثرون البذر ويجيه المطر ويسقيه وينبت وهم ماتعبو فيه ولا سنبل يجونه ويحصدونه ثمن يذرونه ثمن يطهرونه يعني يخرون منه الحصا والعودان الصغار ثمن يملحونه ثمن يجرشونه بالرحا ثمن يعجنونه ويخبزونه وياكلونه

ومنول كل بيت فيه بقره هذا شي اساسي منها الحليب ومنها الزبد ومنها الروب او الزبادي ومنها اللبن الي يجي فيه قطيعات زبد وش طعمهن وكلش طبيعي وكلش صح
ترا البقره احيان ترضع روحها وتشرب حليبها وفي ذا الحاله نقوم ونحط عودين مع جنوبها نسميهن السواجير
ولا جت تلتفت تبي تشرب حليبها يدق العود في رقبتها ولا تقوا معاد الا هي تشرب الحليب
الحليب مهوب لها الحليب حقنا انحن
انا اذكر ونا توني صغييير يعني جذيع غثتنا بقرتنا تثاغي ماتخلينا نرقد لا في ليل ولا نهار قبلها تثاغي وهذا معناه ودوني لرجلي الثور ابيه ولا ماخليتكم ترقدون
قال ابوي جعله للفردوس ياسحاب قلت سم يبه قال تعال ونا ابوك نبي نربط البقره ونوديها للثور ويربطها ابوي بحبل يجيله خمسه امتار وقالي جودها ونا ابوك لياها تنحاش قلت طيب ابشر وقوم وربط طرف الحبل في يدي كله اخاف تنحاش
المهم والله يعينا على المهم
هي شافت الباب مفتوح ولا ماشافته وهي تجيك منطلقه انتم تسمعون الا قالو شوط بقره
وهي تكون البقره مربوطه طول السنه ولا انفكت تنطلق بسرع شي ممكن ثمن تاقف بعد فتره الا قصرت من الركض وهذا شوط البقره
المهم سحاب رابط الحبل في يده من زود الحرص لياها تنحاش وهي الي تجرجرني وتسحبني في السكيك وبوي يركض وراي وكل من شافنا يلحقنا وسحاب صار خرقه وراها سحبتني الين صب الدم من مرافقي وركبي وسيقان سلوا بعد ماسلمن يعني سيقاني يصبن دم
ومن سكه في سكه الين مسكوها بعض الناس وبعد نص ساعه توه ياصلني ابوي قال عساك سالم قلت لا انا سحاب تراي اتميلح هلحين

والحمير منول لهن اهميتهن ويباعن ويشرن بالدراهم
اذكر منول نحط على ظهر الحمار وثاره وهي خيشه مليانه تبن ولا قماش ونحطها فوق ظهر الحمار ونركب عليها لان للحمار دبره وهي العمود الفقري يكون بارز ولا ترتاح عليه ابد يوجعك العصعص الين تحط الوثاره

وتقول وشي المنحات ونت تعرفها وشي بس تذيهن علي
المنحات هي مكان الصدر منول ايام كانو يطلعون الماء بالبعارين مهنا مكاين
فيه سالفه حاصله موووووبطي ايام الصدر
كان فيه رجال عنده بقره وحمار يصدر عليهن يعني يطلع الماء بهن
ويوم جا عقب العصر قال لحرمته خلاص روحي ادخلي الحمار والبقره في الحوش وتروح الحرمه وتدخل البقره والحمار وتصك الباب عليهن ويجيك الحمار يهوش الباب براسه يعني ينطح الباب براسه ذهين بعد مهوب يلعب
ومع نطحه الباب انفتح وطلع الحمار ونحاش ويوم جا من بكرا ويجي الرجال ويلقا الحمار منحاش ويقعد يهوش على حرمته يالي فيك ملا فيك يومنك ماتصكين الباب زين وتخلين الحمار ينحاش يالي فيك مايخطيك ثمن قال لحرمته تعالي صدري مع البقره مكان الحمار ويربطها والله مع البقره ويجلس يصدر عليهن حرمته والبقره
والحرمه منول ماتقدر تقول بم للرجال هيبه سبحان الي حاطها في قلوبهن
وهلحين اسكت انقلبت الدعوا الله يكفينا شرذا الدنيا

وسع الله صدوركم ونفوسكم وجعلكم من اسعد خلقه وسامحوني على القصور
وفي النهايه مااقول الا
سبحان الله والحمد لله ولا اله الا الله والله اكبر عدد خلقه وزنه عرشه ومداد كلماته