ما احتاج منـّك كلام ..احتاج منـْك إهتمام
حلاته الحب في صدقه وعفويـّته
لو ازهرت في ثرى سمعي غصون الكلام
دون [ إهتمام ] ومودّه كنّها مـيّـته
نظره وبسمه تكفّي عن كلام الأنام
اللي يـبـيّـن غلا قلبك وحنيّته
لو إنّ كسر الخواطر مثل كسر العظام
كلآ جبر خاطره واقفى على نيّته
لكن عليّ الملام ولا عليك الملام
يستاهل الجرح من يرضى بماريّته
وليا انكر الغصن لأوراقه وطار الحمام
ماعاد يُغريه لا لونه ولا فيّته
والله لو اني صحاري وانت وصلك غمام
ماني شفوق ٍ على شوفه ولاجيّته
اللي حطبي بفاسه ما تركني حطام
اشعل هشيم الضلوع بنار وحشيّته
ابسأله بعد هذا كيف عينه تنام
ماكل من هو ( طليق ) يعيش حُريّته
اهل القصور اتمنى راحة اهل الخيام
والفقر ملعون لا من سل جنبيّته
ياصاحبي صاحبك لو طال فيه المقام
على ( دروب الوصال ) وخط مرثـيّته
غلاك ما مر في صدره مرور الكرام
لكن خطاك ايتصادم مع مثاليّته
لك ( غصن تقدير ) في صدره وعذق إحترام
ما ينكر العهد لو ان الضمى بـيّته
وان كنت تحسب على ضعفه يجيك انهزام
والله لِيتعبك ماشفت انهزاميّته