اقتباس:
المشاركة الأصلية كتبت بواسطة الإستراتيجي
أخوي حدد ميزانيتك وعدد الأشخاص
وهل لديهم قابلية للسفر لهذه المناطق بعدد هذه الأيام
تأكد أكثر ولا يزيد العدد عن 4 نصيحة ههههههه
وإلي يهمك في زيارتك هل هو الربيع أو الترحال
إن كان الربيع فما أنصحك تنزل الرياض لأنه ما يوجد ربيع والله أعلم
وخلك في الشمال و المناطق الشمالية من حايل و فوق
أما من ناحية التمشية
فعندي ملاحظة : شكلكم ما راح توقفون ولا تكشتون 15 يوم تزورون مناطق كثيرة
إن كنتو بتتوقفون في
الساحل الغربي الشقيق - القنفذة - مكة المكرمة - جدة - ينبع - أملج (احتمال زيارة جزيرة جبل حسان) - الوجه - ضبا - شرما - رأس الشيخ حميد - مقناء - حقل
يعني كل واحدة بتوقف راح تروح عليكم الرحلة
أعتقد شيل الشقيق و القنفذة وأتجه مباشرة لمكة
خذ عمرة وأجلس فيها اليوم الأول والثاني و الثالث حرك منها
تعد جدة وأتجه ينبع مباشرة و ريح فيها والصباح أتجه لأملج
أنا أعتقد لو تريح في أملج أحسن بس على حسب تحريككم ومروركم بجدة هل تمرونها الصباح بدري و تتركونها وتتركون ينبع
لأني محب لأملج وأشوف أنها الأنسب بس ينبع وأملج ممتازات للرحلة يعني أختر واحدة وأكشت بها وريح فيها اليوم كله
4 أيام راحت عليك باقي 11 يوم
الوجه وضباء أعتقد خذها سريعه ولو تبي رأيي الشيخ حميد معها خذها خطافي أتجه حقل وريح في حقل يوم أو أثنين
قول يومين 9 أيام باقية
حرك من حقل قبل الفجر وأتجه للديسة وأكشت بها والعصر أتجه خارجا منها للعلاء
أنصحك ثلاث أيام في العلاء حلوة وجميلة ولو كثير أجلس يومين على الأقل
يبقى لك 7 أيام
عاد انت بالخيار تروح حائل أو تتجه شمال بصراحة تعجبني دومة الجندل و مناطق هناك مع أنها باردة ويصلح فيها 4 أيام
لكن ما دام أنك تبي القصيم فالقصيم جدا جميلة و الجلسه فيها تشرح الصدر
وجرب تزور بعض المنطاق فيها مثال : (( بعض السيارات القديمة متحف هناك ))
جرب الطرق القديمة في تنقلك بين العلاء وحائل أو القصيم وحائل حلوة التفرجة فيها أونس من الخط السريع لكن لو كنت تزمل من التريلات فخلك على الخط السريع
بصراحة أنصحك بالتوجة للساجر والدوادمي و القويعية حلوة من هناك منظرها وبعض تضاريسها
وإن كان زي ما قلت تهمك الخضرة فلا تمشي الآن خلها بعد المربعانية أو أسأل أهل الديار الممطورة يفيدونك هل ربعت وأطلب صور من العضويات الموجودة لأنه للأسف بعض الشباب يقول ربيع وتوها ما شفت ربيعها الحقيقي يعني تحصله توه فاز
لكن الحقيقة أني أعرف الربيع بعد شهرين تقريبا من الآن في مناطق نجد الربيع إلي ينكشت فيه ويختلف من منطقة لأخرى ومن الديار الممطورة السايلة و المناطق التي مطرت بس مطر متأخر .
كل هذه حطها في الحسبان و الثلوج يفيدونك الأخوان في الشمال ولو نفسك في ثلج لا يردك إلا أوربا أطلع لها وونس عمرك
|
هلا وغلا بك أخوي
رحلتنا بتكون 4 أشخاص فقط
بنريح يوم في كل مدينة مكة وجدة يوم وضباء يوم وحقل يوم وتبوك والديسة يومين
المناطق اللي بينها مرور عليها فقط
ويومين بتكون للتنقل بين هذه الأماكن
بعدها العلا بنجلس فيها يوم
بنمر حائل والقصيم والرياض إذا كان وقت ربيع إذا فيه فرصة بنريح فيها
بإختصار أغلب رحلتنا بتكون مسير والتمتع بالنظر في جمال ماخلق الله
مع الراحه يوم لكل مدينة كما ذكرت مكة وضبا وحقل وتبوك
اللي معي بإذن الله لديهم سعة بال ويمكن نطول
أما الثلوج فواحد قال لي بداية نزول الثلج بيكون أول شهر شباط
ويوافق نهاية شهر ربيع الأول
وأما رحلتنا فالوقت اللي نسقناه بأنها بتكون أول شهر صفر
ولكن ماأستغني عن نصيحتكم
ولكم جزيل شكري