يوم ان صدري شب له والغلا فاح
شال القدر سيفه وقطع صلاته
ياقرب طعم الفقد من نزع الارواح
لا صرت اقلب في يدي ذكرياته
لو كل هم نهايته "هم وانزاح"
ما لفني همي غلا في عباته
لو كل جرح نهايته "كف جراح"
ما قر فالخفاق واعلن ثباته
ياعاذلي لا تلحق الجد بمزاح
تحمد النعمه وقل لا شماته
شف سالفة عيني وش تقول للراح
تكفيك عن شح الكلام وشتاته
الرجل دمعه صعب لكن اذا طاح
مايجحده من طيب عينه وذاته
وشلون يجحد دمع عينه ويرتاح
اللي فقد قلبه شريكة حياته