يا بعـد نجم سهيل ما اطولك ياليـل
الله يعين اللي يحـــب الصقـــــــاره
شديت برقعها على عين دربيـــل
ونزلتها لا تحتــــرق بالغمـــاره
مادون خمس شهور غير البهاذيل
الحر جاك الحر يقـدح شـــــراره
لا تلمس المفتاح من دون منديل
تراه يحرق من لهيب الحــــراره
طول المسافه للمصايف غرابيل
والذيب ساهر مستلم بالخفـــاره
ساهر على دربك يحاسبك بالكيل
ياويل ويلك لو قطعت الاشـــاره
يارب سترك لا ضرب حامي الويل
والا عرض لك في طريقك سماره
وأهل المصايف ناصبين المحابيل
حتى هواء ربي لقوبــــــه تجاره
هذا يقول ارحب هلا فيك يالسيل
يعلها تفـــداك كــل العمــــــــاره
يامرحبا بك ألف أهلا هلا هيل
إدفع بسرعه خل عنك الشطاره
روس الجبال ومسكوها الرياجيل
واللي تحت تطلع علينا خساره
ما ازين من الخيمه بذيك الهماليل
الأرض خضراء والمطر والطهاره
ألله على الجلسه بجنب الغراميل
والله على من شب بالبرد نــاره
اطلع من الروتين صوب التعاليل
كسر قيود المجتمع والحضــاره
واليا لمحت سهيل شيل المعاميل
وارجع ترى الرايس لقوبه حباره
في الملتقى ..