[بقآيآ .. حرف]

يهز الليل غصن الشوق ..يطيح من العذق عمري
تلقّفه السراب اللي تفيأ بعتبة دارك

شبابيك الوصل فوقي.. ونارك بالجفا حدري
أمد الشوف ويغشاني ضباب(ن) عاش بأسرارك

تموت أجمل أماني عشقي العذري ..بلا عذري!!
وأنا فيني مدينة حب من أسوارك إلى أسوارك

تحريتك ..وخان الليل شاعر حرفك السحري
كتب لك بالذهب (أربع حروف) وزاد مقدارك

حبيبي وأنت ماغيرك ياغير الناس بي تدري
كثر مااشتاق لك كلك..حنينك..صوتك..أخبارك

أحسك في عروقي لا ولهت وجيت لك بدري
ألملم طيفك المنثور في روحي من أسفارك

تعبت ومابقى إلا الحنين اللي كسى

شعري
كتبت ومابقى إلا أغيب بدفترأشعارك

ألا ياعشقي الفاخر ألا ياضيفي الفخري
ألا ياضحكة القمرا.. ذبل عمري تحت دارك

يفوح من الهدايا اللي ورى شباكها عطري
يجف من الضما وردي..ويشح الغيم وأمطارك

حبيبي لاتخليني دخيلك يابعد عمري
نضبت ومابقى فيني سوى حبك وتذكارك