[صالح الربيعان]

المشاركة الأصلية كتبت بواسطة برق السناف

والله يا أم الدانة إنك حيرتينا لأن الجرائم كثيرة جدا ومنوعة لكن نذكر بعضها على سبيل المثال طبعا كلها سويتها وأنا عمري مايتعدى 10 وإلا كان بالسجن جالس إلى الآن وعموما لي عودة على الموضوع بس خلينا نشوف ملف الجرائم على شان نتذكرها زين ههههههه

الجريمة الأولى : كنت بالصف الرابع ابتدائي وكنا نبي نروح أنا وأمي لخوالي وكنت مبسوط وقبل ماروح جانا حريم لأمي بدون موعد سابق [ المسايير زمان أول كانوا يجون بدون موعد ]المهم إني انقهرت لأني لن أروح لخوالي فجلست أمي مع الضيفات ثقيلات الطينة وعطتن أمي عشرة ريالات على شان أجيب ببسي ورحت أجيب الببسي بنفسن شينة وقبل ما أعطي الببسي أمي قمت برجه بقوة عدة مرات على شان يطيش بوجه الضيفات بعد فتحه وما هي إلا لحظات وأنا أسمع الصراخ والعويل أثرهن فكن الببسي وخذ طيشان على روسهن وعلى شعرهن المدهون والمكدود والحمدلله انتقمت منهن

الجريمة الثانية : جانا ضيف عند أبوي وقال لأبوي تراي شايف ابنك صالح يلعب بالمسجد وطبعا سمعت أنا اللي قال وكانوا جالسين يتقهوون بعد العصر بالحوش المهم إني فكرت أنتقم وجلست أفكر وأفكر وأخيرا رحت للدجاج وأخذت كم بيضة وكسرتهن ولطشت بهن قزازة سيارته حتى صارت صفراء ويوم دري أبوي جلدني لين شفت النجوم بالنهار

الجريمة الثالثة : كانت امي تسوي الغداء ويوم طلعت من المطبخ جيت أنا ووضعت قوطي الصلصة على النار على شان إذا فكته أمي يطيش على الجدار وبعد ما أبعدته عن النار وبرد شوي جت امي وفكت القوطي وهو يطيش بوجهه وعيونه ههههههه وتقعد تهاوش نفسه وتقول هذا اللي جان من العرس طبخ ونفخ وصلصة تطير بالوجه

الجريمة الرابعة: كان عند أمي عزيمة وقالت خذ اخوك الصغير خله عندك المهم أخذت أخوي وكان عمره سنة وأشغلني بالبكاء وأنا كنت أناظر التلفزيون ويوم شفته طول الصياح أخذته ووضعته في سطل الطحين وتعرفون الطفل يحب اللعب وقعد يشيل من الطحين الأبيض ويحط على رأسه ووجهه وصار أخوي أبيض كنه قالب ثلج ومن سوء الحظ دخل ابوي ويوم شاف الوضع كذا راح لأمي وأنواع الشتيمة والهوشات لأمي المسكينة وهربت أنا عند جدي

الجريمة الخامسة : كان عندنا بقرة وكانت جدتي هي اللي تحلب البقرة وقالت لي تعال ياوليدي أبيك تحك رقبة البقرة وتلمسها على شان تركد البقرة وأقدر أحلب المهم إني قعدت أحكك البقرة وأتدلل عليها وجدتي تحلب ويوم بغت جدتي تقضي من الحلب وكانت طاسة الحليب مليانة قمت أنا وقبصت [ أو بمعنى آخر مرست ] رقبة البقرة بأصابعي فهاجت البقرة وتحركت بقوة وكبت طاسة الحليب على جدتي والحمدلله لم تكتشف جدتي أنه أنا السبب

والجرائم كثيرة جدا بس والله خايف تأخذون عني فكرة سيئة هههههه [ تراي كنت ورع صغير وأحب المزح وهذا طبعي حتى يوم كبرت ]