شبكة البراري

الشعر يامحمد مواقف وحزات
--
والندّر الجزلات حظ وتوافيق
--
والصيد مايلقى على كل الاوقات
--
يِتعب قدم راع الولع بالشواهيق
--
لو كل من يقنص يصيد الجزيلات
--
ماصار بن جدلان في قمة طويق
--
بعض الهجوس اللي تعبر المحيطات
--
تروح وتعود لقايط وتلفيق
--
ماتو هل الشعر الحقيقي وهو مات
--
ماباقي الا اللي بالافلام توثيق
--
ونوادرً حيين لو عصرهم فات
--
الكل منهم قال مااقدر ولا اطيق
--
اللي نشوفه منتشر بالقنوات
--
سامج ومر ويجلب الهم والضيق
--
ناسً تبي لنفوسها تثبت الذات
--
وثلاثة ارباع الجماهير تصفيق
--
تشجيع دون ادراك معنى الكلمات
--
يعني خذ الموضوع من دون تدقيق
--
والشعر احاسيسً تترجم عبارات
--
ولا يفهم المقصود ياكود ذويق
--
اليوم يامحمد خذ العلم بثبات
--
كانك تبي فك القفول المغاليق
--
عليك يامحمد بالاشياء المهمات
--
القاف والمعنى ووزن الطواريق
--
هذي نصيحه واستمع شطري الآت
--
ترى الحباري ماتعود غرانيق

التراثي / سعد السهلي