|
لياحام فـكـرك في السنين القـديـمــه
واليا شـكى قلـبـك وبين حنــيــنــــه وصارت حياتك دون طـعـم وقــيـمــه ومـلـيــت حاضــرك وتولاك شيـــنـــه وبـين علـيـك الكـبر وقــل الـعزيــمــه وقـل الـنـظـر قـريــب وتـقـول ويــنــه ورجلك بدت تقصر ولا هي سليـمـــه وشكيت سمعك كن في الاذن طيـنــه وبديت تشكي امراض جسم اليـمــه تراك بـاد فـي ســـنــيـــن حـزيـــنــــه عشها على ماجات لو هي ظلـيـمــه ولو شفت فيها ميل ولوهي غبيـنــه الوقت لو يصفي يجي فـيه غيـمـــه والمـوت لو طـولـت ياتي بحـيــنــــه رجـواك في ماض تراهـا عـديــمــــه وسـجات فـكرك ماترجع سـنــيــنـــه مـابـه حـياة دايـــم مـسـتـقــيـــمــــه ومابه كـمال الا ونـقـصـه قـريـــنـــه شيمتك عن دنياك خصـله كريــمـــه ودنياك سـخـرهـا للاخرى عـويــنــه لا تـنـخـدع غـرقـان وتـقـول ديــمــــه هذي الحياة وسرعـهــا عارفـيــنــــه وصلاة ربي عد ماقــفــت مـقـيـمـــه واعداد مايقسى الزمن عقـب ليــنــه الركام |
لينه
صح لسانك شاعرنا الجميل الركام الحقيقة ابيات جزلة بالحيل كل بيت عن قصيدة |
السلام عليكم ورحمة الله وبركاته
|
السلام عليكم
وش العلوم الطيبة ما شاء الله اعتذر عن عدم مشاركتي معكم فيما سبق ولي عووودة بشيء مفيد للجميع ان شاء الله مشكوووووووورين سلام |
اقتباس:
وعليكم السلام ورحمة الله وبركاته يا هلا أبو ناصر حياك الله والله متشوقين نسمع قصص من الماضي والحقيقة إن عم سحاب ما قصر في هذا الموضوع ولكن نطمع في المزيد من القصص وإن شاء الله نسمع منك ما يفيدنا . تحيتي وتقديري |
وعليكم السلام ورحمة الله وبركاته
حي الله الشيخ عبدالهادي في انتظار مشاركاتك بارك الله فيك |
اقتباس:
صح لسانك يالغالي وعزالله انك قريتا الي داخلي لاعادتخلينا ترانا نفرح بشوفتك |
اقتباس:
ياهلا ومرحبا ومسهلا يبو ناصر هذي والله الساعه المباركه الي خلتك تجينا ترانا نحتريك عطنا من السواليف الطيبه الي مرت عليك ولا على احد ثاني شرفتنا بحظورك شرف الله مقامك |
السلام عليكم ورحمه الله وبركاته اللهم صلي وسلم على نبينا وحبيبنا محمد الابذكرالله تطمئن القلوب -لااله الا الله وحده لا شريك له يالله تحييهم كلهم صغيرهم وكبيرهم ذكرهم و نثاهم وليا حيا كثر وليا كثر تنثر وليا تنثر تزبر :038::clap: في يوم من الايام قبل تقريبن 20 سنه وكان ليلة خميس وديت عيالي عند جدتهم ورحت انا عندي شغل ورجعت الساعه 2 الصباح وخذتهم ورجعنا للبيت يعني مصبحين على الخميس يوم للخميس كار ماعطل طبعا كل واحد يحاول قدر المستطاع انه عند حرمته وعياله يكون هو الاسد والعيال يقتدون ببوهم بالشجاعة والاقدام والمرجله وركوب الخيل :z-attack: والعلوم الي ترفع الراس وصلنا البيت ووقفت السياره برا علشان ابا اروح اجيب غرض من بنده للبيت المهم .. فتحت الباب والحاشيه يمشون وراي طبعا ابوهم في المقدمه وصكوا الباب ودخلنا يوم انتصفت في الحوش ولا ذاك القطو اللي كبر ابليس ولو ماشفت بليس والله العظيم اني صادق انا شفته ولا ماشفته والله العظيم انه يشمخ على الجدار حق البيت باغي ياصل السطح لانه وحش واجيك راجع وبسرع مايمكن والعائله الكريمه وراي يصارخون بابا وقف بابا وقف اللي يصيح واللي طاح تقول لغم وانفجر فينا وانا عاض شماغي ورافع ثوبي ولا وقفت الا وانا قاطع الشارع هالحين مايدري وش السالفه شافوا الابو يركض ويصارخ وصابهم الرعب الله لايلومهم بصراحه وهم وراي ستر الله ماجاء سيارات وصدمتنا واول واحد ياصل سور البيت حق جيرانا اللي قطع الشارع انا كن المسئله سباق هههههههه ويجون ونصف عند جدار الجيران اللي مقابل بيتنا كنا صافين للصلاه اللي يصيح واللي يشاهق واللي يتعبر ما علمتكم امهم جتها ام الركب من يوم طلعت مع الباب ولاعاد تقوا تمشي ولاتكلم وتشر لي انا يابعلها تبيني اجي دوري غيرها اجي والله مارحت لها ياجماعه هالحين مايدرون وش السالفه وانا مغير يالله ابلع ريقي وافح يالله اقدر اتنفس وما اقدر اتكلم من الروعه والتعب من متى ماركضت من سنين ويتكلمون عيالي وشو ياابوي وشو وانا اشر لهم اقول اصبرو شوي خلوني ارد النفس وشفيك يابوي شايف حرامي وومي براسي بالنفي اقول لا وشو اجل قلت وانا اشر على الحوش قطو شايف قطو كبر الثور في الحوش وصارو يناضرون بعظهم عيالي مستنكرين كل هذا علشان قطو وقمت وفتحت باب مدخل السياره وانا قطع الشارع بالريموت ونجلس ساعه او اكثر ماطاع يطلع وفي الاخير يجي يمشي اقصى سرعه ويطلع ويروح جهة الحرمه وقامت تصارخ وهي جالسه ما قوت تقوم هذي ام الركب يسمونها بس صراحه معادلي هيبه ولا عاد لي وجه والا جيت اسولف عن منول وايام الشباب والشجاعه وانا سوينا وانا فعلنا تصدقون حول مايجون كل عيالي بصوت واحد دور غيرها يابوي هذاك اول ياالاسد لاني منول اذا خافوا من شي او من ظلماء اسوي نفسي واقول هالحين تخافون ومعكم اسد وصرت معاد اجيب طاري امور فيها شقاوه او فيها شي من الشجاعه ابد وكل مابغيت اقول شي قالوا هذاك اول يالاسد صدق معادلي هيبه والسبه قطو فضحني ولا فيه ابو يسوي كذا بعياله تصدقون حتى الحرمه هالحين اذا وديتها لمشوار وضايقني احد بالسياره اذا قلت له اخرعني الله لا يعافي العدو وانا معصب تقوم الحرمه وتشرلي بيدها تقول على هونك على هونك لا يطق فيك عرق يالقوي ثم ودي تنشق الارض وتبلعني بصر احه معادلي بعد هذي الحادثه اي وجه مار حقي وما جاني وبس خلصت السالفه وفي النهايه مانقول الا سبحان الله والحمد لله ولااله الا الله والله اكبر عدد خلقه وزنه عرشه ورضا نفسه ومداد كلماته |
السلام عليكم ورحمه الله وبركاته يالله تحيي الغالين كلكم صغيركم وكبيركم منول ايام بيوت الطين يفرحون الا جاهم المطر ويخافون بعد يجيهم خوف ربي اعلم فيه ليش يخافون لان البيوت عليها خطر الطياح ويخافون وتلقا اهل البيت مجتمعين في صفه يعني غرفه ومعهم سراج يبلص وشابين ضويتهم بالتصغير ولا هي ضو نار لهب بس عاد اهل شقراء يقولون ضويتهم الا جو يسولفون عن احد او مايسولفون بعد السياره يسمونها سييره تصغير ههههههه وبييلات وفنيجيلات وغضيرات وبليمات يسمون الصحون الي تجي مستطيله الي ماياكلون فيها الا المكرونه يسمونها بليمات جمع بلم وبويديات وتبي شويهي ولا شارب لبينه ومريصيعات وبريدقينات وتفيفيحات ومويزات وخويخات وجريوات وجحيحات شوفوني انا هلحين معي حليييبه مدري وشلون اكتبها بس معي حلييبه وغط عليها خبيزات وش تبون اكثر منذا بعد المهم ويجيهم صواعق في ذيك البيوت الي ترج من الصواعق وتهتز بعض الاحيان ولا طاول عليهم المطر وهم في الليل يجيهم خوف منه خص الا جت الشعبان والسماء يمطر يخافون تنقطع عليهم احد ذا الحيايل او الحيطان ثمن يدخل السيل على بيوتهم منعند الزرعي ولا منعند جفره طاحوس ولا منعند الجرعه وطول الليل وهم يرقلون يدافع البلا المثاعب تصب والسما تمطر والسكيك تمشي من السيل ثمن عاد تعال كانك ولد ابوك اطلع من بيتك كانك ساكن المجباب ولا الدويخل ولا اي سكه تراك تبي تمحط يعني تزلق ويبي ينزلط ساقك ويبي يوجعك جنبك وكتفك ويدك ويبي يرعف خشمك وتبي تصير تعرج بعد اسئل مجرب من قالك اظهر من داركم والسما تصب ولا فقدو في المسجد احد منذا العويد قالو زالق ومتعور الله يسامت علينا ولا وش يظهر ذا العود والدنيا زلق مغير يتهمع هو وعصاقيله الين يهبد في جفره ولا يزلق ثمن تعال متا يطيب عاد الله من شين النفس وتعال اسمعه قبله هواش مع عجوزه كنها هي الي دازته الا ابا انشدكم يالغالين ورا الشايب والعجوز ما يواطنون بعض او كلن مل من الثاني وهذا الوكاد شي اشوفه انا بعيني مغير تلفط تقول ضب توه مصيود سبحانك ربي وبس وترا بعض العجيزات حقنه ودندره وقبلها تشتكي وبليس يغفل وهي ماتغفل والعياذوبالله بس اكثر العجيزات حبيبات ورحيبات ووسيعات صدر مثل ذيك الي رايح رجلها للرياض وماخذتني ونا بزر تبيني اجسرها ورقد عندها ونا توي صغييير حتا الصروال مهوب علي من صغر سني تذكرون سالفتها يالغالين يوم انها تحط السحله الي فيها الماء على الحجا حق الباحه والحجا جدار صغيير والباحه فتحه من الصطح على المجبب نسميها الباحه المهم يوم انها تحط السحله غضاره بس كبير نسميها السحله تحطها على الجدار فوق روسنا وحنا راقدين تبي الا بغت هي تشرب ولا انا الاها قريبه يوم رقدنا ويجن قطاوه يتطاردن تقوله هي ولا انا راقد ماشفت شي المهم يجن القطاوه يتطاردن ويظربن السحله الي فيها الماء وينكب علي وعليها بس انا اكثر وقوم من نومي على طول منسدح ووقفت من هول الروعه وفاق اثمي اربعه بوص اصيح وتمسكني بسم الله عليك بسم الله عليك تخاف يزوغ عقلي ولا حس ام الجيران تنادي انتم خابرين الناس كلهم ايام الصيف يرقدون في الطايه ولا حس ام الجيران تنادي يافلانه يافلانه قالت العجوز سمي قالت ام الجيران عسا مافيك شي قالت العجوز ابد والله جن القطاوه وكبن الماء على الوليد قالت ام الجيران هو ماشاء الله جاك عيال عاد العجوز مايجيها عيال جعل ربي يعوضها في الفردوس بعد ام الجيران وشذا النشده ذا الحزه وش عليك منها جايها عيال ولا ماجاها الناس مرتاعين وذي تنشد المهم قالت العجوز لا هذيا وليد فلانه مخليته يرقد عندي ابونا رايح للرياض جعله للريح ولا بعد جا ههههههههههه عاد قد علمتكم بذا السالفه او تبوني اكملها طيب المهم وتقوم العجوز وتمسك يدي وتقول قوه انا وياك ادور لك شي تلبسه ونحول تحت وتجيب لي ثوب من ثياب شايبها ويوم رقينا للطايه وتقوم وتفصخ مقطعي ترانا منول مانسميه ثوب لا نسميه مقطع المهم وتفصخ مقطعي وتنشره على جدار الباحه تقول علشان اذا اصبحنا الاه يابس وتلبسني ثوب شايبها ولا عرفت امشي فيه على طول لبستني ورقدتني لوها مار جايبه فنيله كان تصلح لي ثوب بس ثوب عدل لو يشوفني احد يحسب مافي الثوب احد وهو يتحرك وبسم الله علينا وبس وفي الختام ادعولي جعل والديكم الجنه انه يسمح امري ومركم و كل مسلم وسبحان الله والحمد لله ولااله الا الله والله اكبر عدد خلقه وزنه عرشه ورضا نفسه ومداد كلماته |
هههههههه الله يا عم سحاب ... مسميات اندثرت لكن حنا إلى الآن نسمي الصحون المستطيلة أبلام أو بلم للمفرد لكن ما قلت لنا وش سبب تصغيرهم للأشياء والا أخذوها من أبائهم وما يدرون وش السبب وجزاك الله خيراً على هالسوالف اللي ذكرتنا بالماضي وصراحه أنا يوم أقرى هالقصص والله أحس وكأني في ذاك الوقت ربما لأنك تذكر الأشياء من حولكم ومسمياتها وحالة الأشخاص وكيف يتصرفون وما كانوا يلبسون والحقيقة كلمة شكر والله يا عم سحاب ما تكفيك ولكن ما نقول إلا جمعنا وإياكم في جنات النعيم وتقبل تحيتي وتقديري حفظكم الله ورعاكم |
الذين يشاهدون محتوى الموضوع الآن : 12 ( الأعضاء 2 والزوار 10)
الركام, سحاب شقراء |
اقتباس:
هذا يدل على أن موضوع العم سحاب يحظى بمتابعة من قبل الأعضاء شكراً لك يا الركام ونتمنى أن يعمل العم سحاب على إثراء هذا الموضوع أكثر وأن لا يترك شاردة وواردة إلا وذكرها لنا وبالتوفيق للجميع |
اقتباس:
ياهلا ومرحبا يبو سيرين سبب تصغيرهم للاشياء تمليحها بس السياره صارت سييره هذي احترت فيها الاولين يبو سيرين يقولون كل صغير مملوح يعني زين الا فرخ الداب مافيه ملح هههههههههه |
اقتباس:
ياهلا ومرحبا بالغالي الركام والله الشرف لي بطلتك جعل ربي يسعد قلبك بس يالركام عطنا من علومك وذكرياتك لا تخلينا |
صباح الخير ع الجميع..
الله يعطيكم العافية .. جميع ماتقدمونه جميل وراائع موضوع مميز بطرحكم وتواجدكم .. تقبلوا محبتي واحترامي ،،،،، |
السلام عليكم ورحمة الله وبركاته
|
تراني زعلان عليكم
لي سبوع احرج و انشد عنكم و طناش |
بس طاح الحطب و رضيت
يا مرحبا بالشيخ سحاب شقراء اللي متغلي علينا |
السلام عليكم ورحمة الله وبركاته
|
مافي الحمض أحد؟ يا سحاب شقراء شمسك عليها غيوم
عسى ما شر يا عمنا |
السلام عليكم ورحمة الله وبركاته
|
يا شين الوحدة
تستاحش لحالك هههه |
بقول سالفة مافي الحمض احد
هذا واحد كفيف يروح لشعيب حول بيته كله نبات الحمض و يوم من الايام وجد فتاة و تبادل الحديث معها و اعجب بسوالفها و صار كل يوم يجي للشعيب يدورها و كان خايف من اهله او احد يعرفه او يعرفها ان يدري بسالفته فصار كل ما جاء للمكان يصوت مافي الحمض احد لعلها ترد عليه و لكن لا حياة لمن ينادي و سلامتكم |
حياك اخوي تميم شكراً على السالفه ولو انها قصيرة ولكن مقبولة وبالنسبة للعم سحاب اشوف طول هالمرة عسى ما شر يا عم سحاب الله يردك لنا بخير // وتروح ضيقتك وتسـولف معانا لـو الأمـر في يدي آخـذك واطير // وننسى هموم الدنيا واللي بلانا :ordh: |
اقتباس:
صح لسانك مشرفنا الفاضل العم سحاب طرينا العرس و شكله جزم و اعرس وهو كان متردد الله يوفقه و يرزقة الذرية الصالحة (تأكيد انه معرس) اهم شي انتبه لهم من الشارع و السيارات ههه حياك ربي ابو سيرين و توه ينور المحل بقدومك:ordh: |
السلام عليكم ورحمة الله وبركاته
|
قال الراوي
كان هناك صاحب مزرعة فلاح عنده صبي في المزرعة والصبي يشبه اليوم العامل في وقتنا الحاضر وكان هذا الصبي يصدر على السواني ليسقي النخل وكان الوقت برد جدا وغيم والهواء صبا باردة وكانت اطرافه متيبسة من البرد وعيونه تذرف من شدة الهواء البارد ونزل عليه صاحب المزرعة ( زيد ) من الروشن حيث كان حديث عهد بالزواج ولما نزل واحس ببرودة الجو فسأل الصبي وهو راجع ثانية الى روشنه قال وش مهبها ياصبي فقال هذه البيتين هني زيد مادرى وش مهبها ................. في حضن غطراف حشاه رهيف شرقية يازيد تقعد لها الصبا ...................... ودموعنا من لفحها ذريف ويقال ان الروشن بعد ترديده هذين البيتين طاح وتهدم على من كان فيه -------- شرقية تقعد لها الصبا جنوبية شرقية نقلتها من الراوي https://www.4saud.pub.sa/brari/1435/t-52480.html |
صح لسانك يالركام قصة جميلة و معبرة
|
عطاهم عين الصبي هههههه قصة جميلة ومعبرة تعجبني القصص التي يتم دعمها بالأبيات والقصائد التي قيلت بسببها شكراً لك أخوي الركام |
تراي مصخن يعني تعيبان العذر والسموحه على الغيبه مهوب في يدي يالله تحييهم كلهم هلا بالحبايب الي احبهم وربي يشهد يالمسلمين منول نشب بعسبان النخل وبكرب النخل وصنوخ النخل وليف النخل وريحته عندنا كنها عود او دخون وذكر منول يصير فوق الوجار النبر او الفتاش الي يصير في الغما او السقف ويصير له حبل ممدود من فوق الين حول الارض الا جريته ينفتح الفتاش او النبر وهل الزلفي يسمونه السماوه يصير فيه وتد يعني عود مغزوز في الجدار ويربطونه فيه الا بغو يشبون ضوهم وقبل ذا الحبل يحرق وينقطع مع حراره الضو او النار الله ينجينا من النار وبيي وميمتي وخيي وجدي وخوالي ونا ونتم وكل مسلم ولا انقطع الحبل مالك الا ترقا للطايه او الصطح ثمن تربطه بس كلها سهالات يازينا منول ويازين ضونا ودي اصيح بس مهوب هلحين مدري وشبلاي الا ذكرت منول يحن قلبي ثمن اصير ودي اصيح مدري وشبلاي او الحنين الا الماضي صار عنوان كتاب ههههههه وذكر منول عندنا الساعه اول ماجت ويصير لها صندوق صغيير نحطها فيه انا عندي ساعه جدتي جعلها للفردوس وعندي سيف قديم ومحفور عليه وما النصر الا من عند الله - وان تنصرو ربكم فلا غالب لكم وعندي باب الجصه وعندي الموكرات الي يحطون فيها الجريش منول وهن بوادي حجمهن وسط ولهن غطيان بس هلحين اشوفهن عند ابو ريالين الي صار ابو الف ريال بس الاصليات القديمه يصير مكتوب تحت تشكسلو فاكيا هذا بلد التصنيع مهو الصين المهم كل ذا الي عديت عليكم اهديتهن لواحد رفيق لي قالي تعال زرني في بيتي اني باني مجلس من الطين وحاط فيه وجار ورحت يمه ومعي الفزعه هههههه رادو قديم بلبس والساعه ومنفاخ الهوا ذيك المكينه الاصليه الي تركب جنب الوجار ويمد لها ماصوره صغيره وتنفخ الضو وشوي وتصير جمر يتبارق المهم قشيت ذا التراثيات وهديتهن اياه وهو رجالن يستاهل اجل لي انا وياه خمسه وعشرين سنه ماتهاوشنا ولا مره الا ابا اعطيه كلش الله يستر ماتبدا المناوشات ثمن اتحسف هههههههههه امزح انا الا اعطيت ما اتحسف ابد وربي يعلم وبس هذا الي جا في خاطري وعلمتكم فيه وعلا سالفه الغالي الركام اي بالله عطاهم عين فيه سالفه على طاري العين الله يكفينا شرها وكل مسلم فيه راعي نخل يعني مزرعه وعنده عيال وعنده ولد اخوه متوفي ابوه وعمه خلاه عنده يربيه المهم الولد هذا عينه الله يدفع البلا وحده بوحده ماتخطي ابد يعني نضول وعمه يدري عنه المهم في يوم من الايام قاله عمه رح ونا عمك شف ذا القعود الي تونا شارينه شف هو ياكل ولا على صيامه ماطاع ياكل مدري وشبلاه المهم الولد قال ابشر ياعمي وطمر يم القعود ثمن جا يم عمه وقاله والله ياعمي لقيته بارك ويقرا الحمد ههههههههه وهو شايفه يجتر هههههههههه ثمن طمر عمه وخذ السكين وهو يقول مهيب هي ياولد اخوي ونحن شارينه نبيه للصدر ويوم وصل القعود ولاه على جنبه تبي تطلع روحه ويلحق عليه وذبحه اهبي ياعيونه ياملا الخفاس بلا ياملا الخفاس ابا اعلمكم بشي ونتم اعلم مني يالغالين ترا النضول اذا خفتا منه خس خسله يعني قله الخلا يالي فيك مايخطيك يعني تعاديه او تهاوش عليه بزعل تراه معاد يقدر يضرك لوه عابر القارات هههههههه تراالنضول مايقدر الا على الحبيب الي مابينه وبينه عداوه ولا عدوه مايقدر عليه ابد |
اقتباس:
وين انا والعرس وين جعلها بحملها تثور والذريه الصالحه ونتبه لهم عن السيارات هههههههه يافرقا عين هههههههههههههههه |
اقتباس:
|
اقتباس:
ياهلا ومرحبا ومسهلا ابد كا العاده مصخن وذا البرد صايرللعويد كنه الصيف للسيارات مايخربن الا في الصيف والحر والله اني الا هلحين ونا ماطبت وعلى فراشي جعل الشر مايجيك يالغالي بس قصرت منذا التعوب الله يشافيني وكل مسلم لاعاد تستنكر علي شي ون ابطيت واجد انا معلم بنتي تعلمكم لا قدرالله لو تنشت هههه يعني مت موصيها ابيكم عاد ماتذخرون بالدعاء خلوني اسفهل ههههه |
الحمد لله على السلامة يا عم سحاب وما تشوف شر |
السلام عليكم ورحمة الله وبركاته
|
بالغلط وضع هنا
من زود الحماس للمطر هههههه |
|
السلام عليكم ورحمة الله وبركاته
|
عليكم السلام يالغالي
وياهلا ومرحبا ومسهلا |
| الساعة الآن 01:00 AM |
Powered by vBulletin .
جميع الحقوق محفوظة © لشبكة ومنتديات البراري 2010