|
اقتباس:
هههههههه :038: أجل عبد الله السدحان من شقرا هههههه والله يا كثر ما ضحكني هالآدمي هههه خصوصاً شخصية العود يتقنها صح ..... ليته استمر على هالشخصية وترك عنه الخرابيط اللي ما لها سنع ... احياناً الأمر إذا زاد عن حده انقلب ضده . ههههههه ذكرتني بسالفة الرادو بقصة يتم تداولها عندنا .... يقول رواتها أن الملك عبد العزيز رحمه الله أتى بمن يحرم الرادو وأسمعه القرآن الكريم من إذاعة الرادو فاقتنعوا بجوازه :038: . ترى يا عم سحاب العلماء عليهم مسئولية عظيمة في دفع البدع والمنكرات فما يلامون يوم يكونوا حذرين من أي جديد ومستحدث في الحياة ... لأنهم في النهاية سيقفون أمام الله سبحانه وتعالى وسيحاسبهم عن كل ما صدر منهم ... وأنت أيضاً ستحاجهم أمام الله بما أفتو به ... لذلك هم حذرين من هالناحية والله يجزيهم عنا كل خير . تحيتي وتقديري |
السلام عليكم ورحمه الله وبركاته اليوم جايكم ومعي ثلاث مواقف حاصله معي يومني صغير ايام بيوت الطين فيه عجوز اسمها حليمه كانت تجي عند امي جعلها للفردوس وكانت تجي من مكه وتجلس في شقراء كم شهر ثمن ترجع لمكه المهم يوم جت ذاك اليوم عند امي وهم جالسين يسولفون الضحى ويتقهوون جيت وجلست حنب امي وجلس اناضر حليمه ومبحلق بعيوني فيها قالت حليمه لامي وشفي وليدك يناضرني كذا قالت امي سحاب انت وش فيك تناضر حليمه ومبحلق بعيونك فيها وش فيك تراك خوفتها قلت لمي هذي الي ارضعت الرسول صلى الله عليه وسلم يوم تقطعت بطونهم من الظحك علي ثمن قالت امي لا ياوليدي هذي حليمه ثانيه والي ارضعت الرسول صلى الله عليه وسلم ثانيه وميته - تدرون ليش حسبتها مرضعه الرسول صلى الله عليه وسلم لان اسمها حليمه وجايه من مكه المكرمه وش اسوي حسبتها هي ههههههههههه الموقف الثاني طال عمركم اذكر فيه واحد في شقراء وعزوبيي والناس منول حريصين على صلات الفجروياويلك ياسواد ليلك ان ماقمتا وصليتا الفجر في المسجد لانهم يتفقدون يعني الا قظو من الصلات يبدا الامام فلان ابن فلان موجود وزي كذا والي يقول اسمه ولاهوب موجود الا جا من بكرا وشافوه كان عليه بشت خذوه ولا خذو شماغه انت خابر منول تلقا الواحد ماعنده الا شماغ واحد وبشت واحد مهنا دنيا فقر منول وياخذونهن علشان الا شافوه الناس درو انه ماصلا الفجر في المسجد هذا في اول مره ولا لو يكررها جلدوه كم عصا ههههههههه ماعندهم لعب الاولين وهل شقراء مشهود لهم بالصلات حتا الشعار قالو فيهم قصايد اذكر بيت من الشعر يقول والله اني -- منسا حب ساره الين اهل شقراء يخلون الصلاتي -- المهم الرجال نومه ثقييييل مره تدري وش سوا قال لجاره تكفا يبو فلان الا قمتا تصلي الفجر ومريتا من عند الدريشه هذي وهي دريشه على السوق يقوله ابا اربط رجلي في حبل وبا اطلعه مع الدريشه وبيك ونت رايح للمسجد تجر الحبل الين اقولك خلاص قمت لان نومي ثقيل قال جاره ابشر وعلى ذا الحاله كل ماراح جاره يصلي الفجر يجر الحبل الين يقوم من نومه المهم ويدري واحد من القشران عن الحبل وهو الي يجيه ليله من اليالي في نص اليل او قبل وهو الي يجر الحبل والرجال يقول طيب يبو فلان قمت قمت وذا الاقشر يسحبه بحبله الين وصله الدريشه وهو يجره جر وينحاش ويخليه ههههههههههههه الموقف الثالث طال عمركم كلكم تعرفون سياره الفليت وملا حق البزور لها اذكر واحد يلحق سياره الفليت هو ومعه مجموعه تصدقون ان شنباتهم طالعه ويلحقون سياره الفليت ههههههه بس ماعندك احد المهم ذا الواحد يركض ويركض ورا السياره وداخل في الغمامه من الدخان وركض ومادريت يوم راحت سحابه دخان الفليت الا بالي طايح في الارض ومغما عليه وربعه راحو يالحقون سياره الفليت مادرو عنه مايشوفون شي ابد كلش دخان وجي يمه وحاول اصحيه يوم صحا ولا في وجهه مثل الدائره الكبيره موسمه في وجهه وشاويته شوي ضعيف تدرون وش صار للضعيف هماه يركض ورا سياره الفليت ولا هوب يشوف شي اثر سياره الفليت وقفت وهو جايك على سرعته مادرا انها واقفه كلش دخان ولا يرد وجهه الا ماصوره الفليت الي يطلع منها الدخان ههههههههههههه وهي الي وسمت في وجهه هههههههههههههههههههههه |
هههههههههههه
الله يسعدك قصص جميله بارك الله فيك ي سحاب شقراء |
متابعينك ياأبونا أول بأول ..
الله يسعدك يارب مثل ماأسعدتنا بالقصص الجميله والمضحكه .. |
اقتباس:
ياهلا ويامرحبا بالغالي شرفتني شرف الله مقامك |
اقتباس:
هلا ومرحبا بالغاليه رذاذ شرفتيني بحظورك |
يالله تحييهم وتبييهم كلهم كبيركم وصغيركم هذي السالفه ايام الدوس من سنين وبنين والسالفه مهيب طويله بعد عن الدوس قصدي دوس العيش بس فيها العبره وفيها انكم تحمدون الله سبحانه على النعمه الي انحن فيها اذكرني ادوس العيش ومعي بقره وحمار تكرمون نحط العيش تحت ونمشي عليه الين نطلعه من سنابله ندور عليه دوران تقول بنتي وراكم ما تدوسون بالغنم قلت لها والله ونا ابوك كان تطلع الشمس من مغربها ما طلع العيش من سنابله العيش يبي شين ثقيل يمشي عليه المهم معي سحله او غظاره معي تدرون ليش علشان الا جت البقره او الحمار يبولون احطه تحتهن ونحن ندوس ونصه يصب على العيش مهوب يخالف ابد اطعم له خل اقول الصدق ونحن بعد الا جا نا تكرمون بوله نصها على العيش من العجله تراي اقول الصدق المهم الا جت البقره تكرمون تخثي تدرون وش اسوي اتلقاه بيدي وفي اقرب جدار اخبطه فيه علشان الا يبس نقشعه من الجدار ويشبون به الحريم تحت المقرصه ما عندنا شين ينطل ابد وعلى ها الشغل ولا ذاك تربض البقره وتعيي تقوم تقصر ظعيفه تدرون الا عجزت اقومها وش اسوي بها اعض ذنبها عض بسنوني عض ويالله تقوم يخوي تقول منحنب اوادم اجل اعض ذنب البقره قد شفتو احد يعض ذنب البقره الا انا والي مثلي منول وين عيال ها الوقت يشوفون وش انحن نسوي من بطولات هههههههه اتحدا واحد هلحين يعض ذنب البقره بسنونه هههههههه ولا دسنا العيش طال عمركم نقوم ونحتري الهوا يهب علينا ثمن نذراه وشلون نذراه يعني نشيله في محفر وش المحفر هو الزبيل ونكبه من فوق ويطير القشر ويبقا العيش هذا الا قالو نذرا العيش ثمن نعطيه الحريم او انحن نقوم نطيبه وشلون نطيبه يعني ننضفه من الحصى الصغيرات والعودان الصغار هذا تطييب العيش ونجرشه على الرحى ودق فليفل ياكمون هههههههههه يعني ونا كله وبس استودعكم رب العباد وفي حفظه ودعولي طلبه تراي بحاجه دعواتكم لاني تعيبان والكبر شين وفي حفض الله ابا اقول للي يصيبهم الياس والقنوط الا ماجاهم المطر والسيل - لا تقنطو من رحمه الله التي وسعت كل شي سبحانه وبعدين ترا العافيه والصحه في الابدان اكبر نعمه نشكر الله سبحانه عليها ومسكين يالي تحسب الواجد شوي العافيه لو تنشرا وش ثمنها |
يا الله لهالدرجة كانت الحياة الأولين لو شافونا اليوم وش بيقولون عنا ههههههه أكيد بيسمونا التعوسيين ههههههه والله يا عم سحاب خوفونا من كل شي ... تلوث وبكتيريا وجنون البقر هههههه حاصرونا من كل جهه أحس لو مشيت حافي بلاوي الدنيا كلها تجي هههههه ويوم أسمع حياة الأولين استغرب كيف ما انقرضوا هههههه أنا لو خيروني بين الحياة الآن والحياة سابقاً لاختار السابق لأنها على ما فيها من مآسي وجوع إلا أنها أفضل ويحس الإنسان فيها بطعم الحياة جُزيت خيراً وزوجت بكراً يا عم سحاب |
اقتباس:
الاولين معطيهم رب العالمين لذه في الحيات وموسع الله في عيونهم منازلهم على قد نيتهم الطيبه والله يبو سيرين منول الا قالو بكرا يدخل الوسم انها تمطر ذيك الليله مايتئخر عليهم ابد وهلحين الله يرحم الحال يدخل وسم ويطلع وسم ماشفنا شي الله يدفع البلا |
يالله تحيي الغالين كلهم ايه انتم يالي تقرون تراي ابطيت ماكتبت شي علشاني مصيخين ونتم خابرين الكبر مامعه عيشه ابا اتليقف عليكم شوي ونتم اعلم مني برو بوالديكم وحرصو على صلاتكم والله العظيم ماتحسون بالراحه والطمئنينه الا بهن وبدونهن ماوالله تذوق الراحه ومعهن الاستغفار ترا له شان عظيم عند الله سبحانه ويحبه العزيز الحكيم جعل ربي يسعدكم وذرياتكم ونا معكم وذريتي بغيت انسا روحي هههههه ويجمعنا مع والدينا بالفردوس الاعلى من الجنه امين بدت السواليف هههههههه اذكر سنه من السنين مووووبطي ههههههههههه كنت رايح عند عجوز ابا اعطيها غرض معي المهم طقيت الباب وقالت من عند الباب قلت انا قالت ترا الباب مطرف ادخل يعني ترا الباب مهوب مصكوك هذا معنا مطرف و دخلت عندها ياملا الجنه ونا توي صغيير منيب كبير وتهلي وتمرحب بي تدرون وش انا جايب لها معطتني امي جعلها للفردوس قدر صغير ومليان مخامير ذيك الي يجي فيها حليب يم يمي ههههههههه اشتهيتها هلحين المهم يوم جيت عند العجوز وجلست لقيتها مسويه قهوه وجالسه تقهوا على ذاك الحصير الي من الخوص الي الا جلستا عليه وقمتا ولا حزوزه في رجليك ههههههههههه ما عندنا نعومه منول انعم شي نجلس عليه منول الرمل هههههههههههه المهم والله يعينا على المهم وتقوم يوم جيت وتروح للجصه والجصه يالغالين هي الي يحطون فيها التمر منول وتروح للجصه تبي تجيب تمر طبعن المهم كانت حاطه تحت باب الجصه خرزتين حقه السواري الي يبنون بها السواري وهن حصا يجن مدورات الشكل هذا الي نسميها منول الخرزه وهي حاطتهن علشان تطول تجيب التمر ونا خبري بها داخل نصها وصط الجصه لان التمر صاير بعيد ولا دريت الا بالعجوز تصارخ ههههههههههه طاحت وسط الجصه ظعيفه راسها تحت ورجليها فوق وهي تقولي تكفا ياوليدي تعال جرني ههههههههههههه وجي ابا اجرها اناكنت مرتاع من الموقف المهم وجي ابا اجرها مع ثوبها بقوه ولا دريت الا بالثوب يوم انشق ههههههههههه المهم وجود رجليها وجرها ويوم طلعت ولاها تقاطردبس منقلبه نطفتها ظعيفه وتقعد تهوش علي وراك تشق ثوبي ههههههههههههه انا وش اسوي بها مدري مع وين اجرها الله يغفرلها بس اصلن ثوبها حرقان من سنين الاستعمال تبيه يبتل ههههههه المهم طلع شكلها مرعب مع الدبس ونحاش وخليها وهي حسها تناديني تعال تعال وش اجي طلعت كنها جنيه هههههههههههه الله يغفرلها ويرحمها وميمتي وبيي وخيي وجدي ونا ونتم وكل من شهد ان لا اله الله وان محمد رسول الله - الله يالدنيا تصدقون فيه هلحين قاظي في هيئه التمييز كان منول يدربيني على كفر القلابيات ههههههههههه وكنا نجيب الكفرات منول ودخل في الفتحه الي في وسطها ثمن يجي ذا الشيخ يدربيني كنه مهبول فيذا السكيك ولا هيب مره ولا عشرين مره وهو يدربيني بالكفر وشفته مره في مقر عمله ويوم شافني عرفني ويغشا علي من الظحك وقلت له وشرايك نسويها في طريق الملك فهد الي في الرياض وجلس يظحك الله يوفقه - خل اعلمكم بشي ما علمتكم به انتم دارين اني باغي اموت من موووووبطي يومي فالح نخلي بشقراء صدق الي باقي له عمر يعيش وبس المهم قولول وشلون اقول لكم وشلون هماي مره من المرات كنت جالس احصد زت اقول برسيم اريح مهوب ينكتب اجل زت ههههههه المهم جالس احصد ونا طول منا جالس احصد اسمع شي يقول طق طق طق صوت شي يطقطق بشويش ونا عاد انتم خابرين راعي النخل كلش يطقطق عنده وعسبان النخل تخرفش مع الهوا المهم مالقيت للطقطقه بال ابد وحصد وحصد يوم تعديت جذع النخله الي انا جالس تحتها احصد ولا يوم خبطت النخله مابيني وبينها شي ابد حتا وحده من الكرب مشختني يعني جرحتني مع ظهري بس جرح بسيط لله الحمد والمنه ولا كان ما تلقون هلحين سحسح يسولف عليكم كان صاير مظاغه تحت النخله بس عمر الشقي بقي زي مايقولون المصاريه وفي النهايه اقول سبحان الله والحمد لله ولااله الا الله والله اكبر |
وفيه سالفه مالحقت احطها مع الي قبل وهذي يالغالين عن السحاب والامطار وهي جند من جنود الله جلا جلاله مااعظم شانه هذي سالفه واقعيه وهي للعبره فعتبرو يا اولل الالباب - يالله عرفت اكتبها ههههههه السالفه فيه مزارع قبله يزرع عيش يعني قمح ورزقه على الله ثم عليه ونتم خابرين القمح الا استوا وسنبل وجا وقت حصاده يجي في نفس الوقت بمر الله سحاب الصيف وكثره البرد يعني البردي الثلج وكل سنه وذا الفلاح رافع كفوفه للسماء يطلب من الله مايجيه برد ثمن يروح جميع مازرع هباء منثورا ويوم جت سنه من السنين وهو الي يحصد القمح ويحطه في صوامعه يعني في مخازنه وتمر ذيك السحابه الي مهيب كبيره وهي ترعد وتبرق قال المزارع تطرطعين ولا ماتطرطعين يقصد السحابه ورعدها وقال العيش وحصدناه وحطيناه في مخازنه طرطعي يالسحابه لين تملين ثمن ومرها الله جلت قدرته وهي تمطر مطر اعاصير ثمن شالت المزرعه والصوامع مع عيشها وشالت البيت كله وجعلت المزرعه وادي او مجرا وادي ولم تترك شي سبحانك ربي لااله سواك فيجب ان نتئدب مع الله في اقوالنا وعمالنا ونوايانا وماتخفي الصدور سبحان من رحمته وسعت كل شي ونا اشوف الناس تنشد الناس عن الامطار ومتا تنزل على البلد الفلاني وهذا الشي بيد الله وحده لااله سواه ويقول جل جلاله وسقناه الا بلدن ميتن فااحييناه ويقول عز من قائل وقل استغفرو ربكم انهو كان غفارا ينزل السماء عليكم مدرارا ويجعل لكم جنات ويجعل لكم انهارا ويرزقكم بي اموال وبنين الله اكبر شوفو كثر ثواب الاستغفار جميع زينه الحياه الدنيا تحصل عليها من الاستغفار لااله غيرك ياملك الملوك عاد انا قلت من خريبطاتي على قوله جدتي جعلها للفردوس يناشدن عن السحاب و حقوقــه بمره ترا ينشا وبمره يجي سمك وفتش عن عقوق البشروالعقوبه يالله بمانك رحمتن مالـهاعنـك سحاب شقراء اكثرو من الاستغفار فهومفتاح المغاليق اللهم اغثنا يامغيث ياجواد ياكريم |
وين الحبايب يالي تسيرعليه غبتووغابت شمعه النوربالنور ومنولن تلفون عندي هنيه وفرح بشوفتكم عسامابي قصور والعمرولا وناوش في يديه وللعود حقن وعساماهو يبور سحاب شقراء خلكم هجيتكم ههههههه:anger2::anger2: |
جـيـنـاك يـا شــيـخ ونـدق الـتـحـيه يا عـم سـحـاب الله يصبحك بسرور يا شــيخ مــا غـبنا بصـبح وعشيه نـمـر هالـديره ومـا فـيها مــن دور والـحـمـد لله جــــابـك الــيـوم لــيه شفـتك بـعـد مـا غبت أيـام وكسور عطنا مـن عـلوم الـزمـان الـخـفيه زمان من كانوا على الطيب مبذور :ordh: |
اهلا هلا بالي مكانه في ذيه بين المحاني باني قصورمع دور جاني تعب وضيق خفوقي عليه وذي عادته ليجا به الضيق مصرور هلا ومرحبا يبو سيرين ياجعل ربي مايحرمني محبتك امين |
تحدث حتى نسمعك حينها
نعرف ان ما زال للحكايات بقية اخي سحاب ربما انا وانت تجاوزنا مراحل عمرية لا نريد غير الحديث مع من نعرف واحببناهم خلف لوحة هذه الشاشة ويشهد الله عندما يغادر احد الكوادر التي الفناها نشعر بالضيق كيف لا ونعد الصغير منهم في مقام الأبن ومن كان حولنا في العمر فنعتبره اخٍ عزيز انها سنة الحياة تجمع وتفرق ولله الأمر من قبل ومن بعد.. تقبل خالص تحيتي |
اقتباس:
هلا ومرحبا ومسهلا بالشايب ههههه انت صادق يالغالي والفراق اقشر ومثلي انا وياك والي بعمرنا جربناه واجد وصرنا نخاف منه والواحد الا كبر يصير بنزول من راس الهرم يعني كل يوم بنقصان الا من رحمه ربي سبحانه الله يكفينا شر الدنيا يالغالي والناس صعب ترضيهم كلهم مهما سويت الله يرجع الغايب اقول خلنا بسواليفنا وش رايك فيهن ولا ماقريتهن هههههه قل امين ابا ادعي لك يالله انك توسع صدره وتجلي همه وتمتعه متاع الصالحين امين وتجمعه مع حبايبه ووالديه بالفردوس الاعلى من الجنه ونا معكم ووالدي وجميع حبايبي امين ياارحم الراحمين والله يحفظك من كل شر ولا تخليني تراي اشوفهم مهمب يمي ههههههه |
لاتقول مهم بيمّي
حنّا متابعينك الله يحفظك ياوالدنا حتى وان حدّتنا الظروف أحيان .. تبقى زاويتك على العين والراس دعواتك ياشاعرنا .. |
نافذة الابداع والتميز ..
ممتع فيما تقدمه لنا والدي ( سحاب شقراء ) .. تقبل محبتي وتقديري يالغالي .. ولاتشيل هم المتابعة متابعينك لأنك عنوان التميز .. فالك السعادة في الدنيا والجنة في الاخرة ،،،، |
اقتباس:
انتم وينكم يالغاليه رذاذ روعتونا عليكم ولولا غلاكم ماسئلنا عليكم ويسلم راسك وتسلم عيونك يالغاليه ولا صرتي طيبه بالدنيا كلها الله يحفظك من كل شر ويوفقك |
اقتباس:
هلا ومسهلا عابرسبيل هلا بالي دمعت عيني بسبته يوم تكتب لنا انك تبي تخلي الاشراف والله العظيم ضاق صدري وسموالمشاعر ضاق صدره ويسئلني وينهم ونا اقول مدري وش فيهم ولاكل من صد نسئل عن سبب صده ولاكل من غاب ننشدعنه في غيابه ومثلك وشرواك نسئل عنه ونوده ونغاب قلنا عساالمكروه ماصابه ولا تشره يالغالي ترا الي في القلب على طرف لساني علمتني الحياه اقول الحقيقه ولا تقاطع جعل ربي يسعد قلبك ويجعلك من اسعد خلقه امين |
هلاا بك زود يااالغالي ...
لاتشيل هم انا متواجد ومتابع معك ولقسم الشعر .. يعلم الله يابومشاعل ان لكم في القلب محبه ومعرفتكم اكبر مكسب لي .. عساااانا مانفقدكم جميع مبدعين واحة الشعر في البراري ،،،، |
اقتباس:
جعل ربي يطمن قلبك ويسمح امرك ويلبسك ثوب الصحه الدائمه امين |
السلام عليكم
جزاك الله خير يا عابر سبيل دليتنا على هالصفحة الطيبة و الشيخ سحاب شقراء يستاهل العنوه بس الوقت متأخر و لنا عودة و مشاركات تروق لكم بحول الله |
السلام عليكم ورحمه الله وبركاته يالله تحيي الغالين وكلن بسمه وليا حيا كثر وليا كثر تنثر بعد والله العظيم لي يومين ونا على فراشي ماتعديته سبحان الله العظيم يجيني خمول ومعه ضيقه صدر جعلها ماتجيكم ونا متعود عليها من سنين ضيقه الصدر وقعد اصيح منها وش اسوي تبون الصدق هذا الصدق هههههههه هماي اقول ذاالباب صكوه وطلبه لا تهجونه خلوني ابكي وهل الدمع بالحالي احس انا بشي انتم ماتحسونه وبطوح الصوت كني من العقل خالي والثانيه اقول فيها يا ظـيـقـتـن بالحـشى يالله فـــرجها يا ويل حالـي من الظيقه برت حالي يا الله طلبـتـك تـوسع لـي مخا رجها ما فـيــه غيــرك يوسع ظيقـه البالي احـس انا بشي فـي حالـي يـدرجـها نوبن على النار ونوبن يلهب الصالي يا الله روحــي مـن الــدنـيا تخـرجـها مـعاد ابــيـها حــيا تــن ما لــها تالــي وخيــول هـمــي طلبـتـك لا تسرجـها معاد بـي حيــل على الغا رات منتالـي يا الله دمـعـي علـى الخـدين محرجها وبـيـن علـى الخــد مجـرا وبلها سالي والنفس صارت توسوسلي سواهجها يا الله اعـوذك من الوسواس لو جالـي عبــدك لـجابـك وروحــه لا تـنـسجــها اطـلــق قيـــوده عسا ها تسعـــده تالي مظى العمـر منه وشيـبه صار يفلجها واحــر قـلبــي وحسبـنــي انا الغالــي دنيا الشقى ما عـرفـنا اليــوم منهجها ناسن تحـتـها ونا سن باالسما العالــي يا الله روحـي مـريـظـه ونـت عا لجـها ما فيه غيــرك عظيمن ونت لي الوالــي ونـكان لــي حــق دروبــي لا تعـرجها ابـي حقـوقــي ولا تـنـقـص تــوفالـي ونـكنـت مــذنب الاهــي رحمتك جبها واسعــد حالــي اذا الــرحمــه تهـيالي سحاب شقراء اسمعوني جعل ربي يسعدكم ويوفقكم الاولين يقولون عن الصلاه 1- نور في الوجه 2- سعه في الرزق 3- طول في العمر شوفوني شايب وتمنا لكم مااتمنا لنفسي وربي يشهد علي احرصو على صلاتكم برو بوالديكم تجنبو اعراض المسلمين للي مايصلي لا تحلم بسعه الصدر لو تسوي الي تسوي ولا تنسا نسو الله فاانساهم انفسهم وقول للي امه حيه يعني موجوده في الدنيا شوري عليك شوري عليك بر فيها وحب راسها ويدها كل صبح ومسا وشلها في عيونك وتشوف في دنياك الي ابا اذكر لك هلحين لان البر بالوالدين ثوابه تشوفه في دنياك اول شي تبي تشوف عيالك يبرون فيك ثاني شي تبي تشوف سعه في الرزق ويبي يغنيك ربك ثالث شي ماينغلق من دونك باب من ابواب رزقك ولا حوااجك وكلامي هذا تراه عن تجارب ونشاء الله تعالى اذكرها لكم وهي عن البر بالوالدين هاه وش رايكم اصلح شيخ او داعيه ولا على شحمه وسكت احسن هههههههههههه اذكر من زمااااااان يومني توي شباب قبل اشيب يالله حسن الخاتمه وبس هلحين يالله اقوا امشي ياعجل ماكبرنا ونحن مادرينا انتم تدرون منول ايام بيوت الطين مهنا دنيا كلش فقر في فقر وذكر منول ماعلينا الا الثوب بس وترانا مانسميه ثوب الا يوم تمدنا نسميه مقطع وبس وذكر انا علي مقطعي مافيه غيره مهوب انا بس لا كل الناس كبيرهم وصغيرهم حتا الحريم مهنا الا الثوب بس - تذكرون ثيابنا الي منول يجي فيها رفاعه في كل كم ومن تحت تدرون ليش لانه ثوب العمر علشان الا كبرنا ننقض الرفاعه الي في الكموم والي تحت علشان يصير قدنا مهوب قصير - ودكم تشوفون مقطعي منول الا فكينا الرفايع هما الثوب يصير مع السنين اشهب تعال شف الرفايع يطلع لونهن ابيض ناصع لانه مسفوط من يوم خيط وباقي الثوب بيج وعادي تمشي يالواحد كنك خروف ابرق عادي المهم الا صار فيه طيور اروح اصيد ولا الدنيا بدت تتحسن شوي ومادريت ذاك اليوم الا يوم قالت امي جعلها للفردوس سحاااااب ياسحااااااب على طول انا اقول سمي لبيه منيب مثل غيري اقول هاه وش حليلي هكا الحين المهم يوم جيت للوالده الله يغفر لها ولا في يدها قطعه قماش قلت وش تبين ياماما امزح ماقلت ياماما كان هي ماتدري وشنا اقول المهم انا كنت ابا اروح اصيد طيور جاي البارح نزل نسميه منول نزل قالت امي تعال ونا امك البس ذا الصروال وقعد اقول يمه وشو الصروال قالت ادخل رجليك بس وعلمك ويوم دخلت عصاقيلي ونتم خابرين مافيه شي اسمه مغاط مافيه الا حبل وهي الي تربطني بالحبل مع وسطي كل هذا وشنبي خاط ثمن قالت هلحين رح ونا امك وعيي ماابيه وتغصبني جعلها للجنه وعيي شي غريب هذا ثمن قالت لي والله العظيم ان عييتا تلبسه اني لعلم ابوك يرنك الين يغني حمار بطنك - خل اعلمكم وش كبري يوم يصير ذا الكلام ونا خاط شنبي بس ماعندك احد مهوب انا بس لا كل الناس منول مثلي تراهم ذاك الوقت في شقراء مسكو واحد عنده رادو اول ماجت الروادو ومسكوه النواب الي مثل الهيئه هلحين ويوم مسكوه ويقودونه كنه مرتكب الجرايم كلها لانهم يقولون الي صانعه الشيطان المهم راعي الرادو جلدوه 70 جلده مطهره له والرادو صار طحين لان القاظي قال ويكسر عمل الشيطان امام الناس ويشتركون الناس في تكسيره علشان الشيطان ييس من اهل الديره مافيه احد يتبعه المهم نرجع لصروالي ونتم خابرين اول مره البس صروال تحس فيه شي مقيدك معاد فيه حريه مثل منول تصدقون اني ماعرفت امشي وهو علي اختلفت مشيتي وصرت كل ماجيت اروح اصيد وكنا ساكنين وسط النخل يعني مزرعه فيه اثله وش كبرها في اخر النخل من شمال اروح وفصخ صروالي ودفنه تحت هدب الاثل ثمن انطلق تصير المغطه غير وتحس براحه وروح اصيد ولا اصيد ولا دخله مامعي الا نباطه والشنب خاط وينك فيه ياسحاب رايح اصيد وينك جاي ياسحاب جاي مصيد ولامعي ولا حتا ريشه والحمام يبي يقعدلي الين اصيده يطير على بعد كيلو ولا رجعت رحت لصروالي ونفظته من العودان والتراب ولبسته ورجعت للبيت ثمن على طول من يوم تشوفني امي جعلها للفردوس تقولي سحاب ارفع مقطعك ورني صروالك تخاف اني فاصخه ثمن ارفع مقطعي ولاذاك قالت هذا الولد السنع ونا في حاله نفسيه شديده جدا بسبب الصروال ان جيت امشي ماعرفت ان جيت اجلس ماعرفت ان رحت اجيب تمر من الجصه ولا كن فيه واحد يسحبني هذا شي مهوب لي ونا منيب له بس بلوا المهم جا يوم من الايام قالت لي امي جعلها للجنه تعال ياسحاب ابيك ونا امك تروح للبلاد يسمون الديره منول البلاد ونحن عايشين وصط النخل او المزرعه المهم قالت لي ابيك ونا امك تروح للبلاد وتروح لبيت الفلان وتطق الباب ولا طلعت عليك امهم قلها انا ولد فلانه وتسلم عليك امي سلامن كثير وتقولك كان البيزه جمع بيز الي نمسك الدله بها وهي حاره كان البيزه امداك تخيطينهن عطيناهن المهم قلت طيب ابا اروح ومن يوم طلعت من النخل افصخ الصروال ودفنه يافي رمل يافي شق في جدار المهم اني افصخه ووزيه المهم ويوم دفنته ونا الي اركب سيارتي تدرون وش نوعها عسيب نخل مليان شوك بعد ثمن اجيك امشي طبلوني رايح للبلاد والغبار متعدي الغيم ونتم خابرين منول شباب ونشاط وعلى سرعتي ادخل البلاد والعسيب تحتي ونا ماسكه من عند الكربه وش اسوي هذي سياراتنا منول وكل راس سكه اقول ط ط ط لاني الف على سرعتي في السكه وط ط ط علشان كان فيه احد يمشي ينتبه المهم جيت حول بيت راعيه البيزه ونا الي الف على سرعتي ماقلت ط ط ولاي وجه لوجه مع شايب شايل على راسه تنكه مليانه غسال يعني بقايا الاكل من قشرجح وجراوه وتمر مريس لبقرته المهم محترينا بقرته وجه لوجه ولا راسي في وسط التنكه كبها علي وهو مادرا وطحت انا وياه في الارض وياخذ عصاه ويمحطني لا يالهيس الاربدي يالحمار المتين كسرتا ظلوعي ونا الدنيا عندي مختلفه لان التنكه ضربتني بزاويتها وصرت مدري ويني فيه والعود يطقني ونا جالس وناظر فيه ونا الي اطمرذيك الطمره ومسك عسيبي الا يوم خاف الشايب اني اطقه ومادرا الا يوم فحشت على العسيب ونطلق رايح لراعيه البيزه وهي عجوز حمقيه الله يغفرلها المهم يوم وصلت باب راعيه البيزه وهو باب خشب مهوب صغير ولاهوب كبير وسط ونا الي ارجف الباب برجلي يمكن انكم جربتو تطقون باب خشب يالله يسمعونك اهل البيت بس انا برجلي اقوا شي اثرها حول الباب وهي الي تفتح الباب وتتفل بوجهي وهي تقول كسار يكسرك بغيتا تجدع الباب مع محامله قلت تسلم عليك امي سلامن كثير وتقول عطينا البيزه حقتنا ولا كنها تافله بوجهي ولا شي سبحان الله صح زايد ولا تنسون شنبي خاط بس عادي وكل الاحداث وعادي مدري وشو الي فينا منول ذاك مهوب صح وبس شي ماعرفت وشو الا هلحين المهم وحط البيزه في وسط شقي وركب العسيب وطلع من البلاد على سرعتي والعسيب يسحب وراي وروح لصروالي ودوره ودوره ولاه ماخوذ فيه جره واحد جاي وماخذه عاد منول نعرف الجره ولاها جره ابوي جعله للجنه اثره شايفني يوم افصخه ودفنه وجا وخذه ياويلتاه ياويلتااااه انا وين اروح هلحين المهم جدعت العسيب ورحت امشي وشقي مليان بيزه ويوم دخلت النخل ولا هذا ابوي جالس هو والوالده جعلهم للجنه تحت ظلال جدار ويوم شافني قالي ارفع ثوبك ابا اشوف صروالك وثوبي مرفوع خلقه حاط فيه البيزه ويمسكني ابوي وياخذ البيزه ويعطيها امي ثمن قالي ماتقولي يومنك تفصخ صروالك وتدفنه وتنطلق على عسيبك كنك شاعوف ياحصان بليس اقعد البس صروالك ون شفتك فاصخه تراي ابا احمي مطرق حديد وكويك به ومن عقب المطرق الحامي معاد فصخته وفي الاخير اقول جمعني الله وياكم في الفردوس الاعلى من الجنه امين وسبحان الله العظيم سبحان الله وبحمده عددخلقه وزنه عرشه ومداد كلماته ورضا نفسه |
اقتباس:
في السنه عيدين وهذا الثالث ياتميم بن محمد اسفرت ونورت وعابر سبيل كله خير وبركه جعل ربي يسعده بس هاه تراك وعدتنا بالعوده والمشاركه ونبي نحتريك قل هذا والله النشبه هههههههههه بس ولو ترانا نحتريك وعين فراش وعين لحاف ياتميم شرفتني شرف الله مقامك |
الظاهر مغير انا وياك نصبر بعض وان كان معانا تميم بن محمد يبدو انه قريب منا فخلنا نتونس وحبايبنا ما هم بعيد حسب وعودهم
فيه ابيات من غناء ايوب طارش اليمني حافظ بيت منها يقول: ارجع لحولك كم داعك تسقيه والزرع اخضر والقهيش بلحجان تنطبق على اللي غادرونا وما عرفنا ويش الاسباب لكن نتمنى لهم التوفيق اينما كانوا واينما حلوا تحيتي |
اقتباس:
|
اقتباس:
اناودي ادري وشلون جت في بالك ذا الاغنيه ههههههههههههههه ارجع لحولك كم دعاك تسقي ورد الربيع منله سواكا يسقي والزرع اخظر والقهيش فلحقان --- كلشي عرفته الا القهيش فلحقان مدري وشي ولا الثاني الي يقول من يبايعني بقلبه ويردون عليه انا بياع اذكرهم يجيبونهم في التلقزيون اول ماطلع يوم جبتا طاري اخوانا اليمنيين خذ ذا السالفه فيه يماني يشتغل في الرياض وحرمته في اليمن وجاها خبر ان رجلها يبي يروح لمصرللخنبقه هههههه ورسلت له قصيده وتقول فيها يارايح لرض المملكه مرو علي عندي خطاب وصله لحضرته شف بوك ومك حاربو منزلي ونا رهين الليل في طاقته مشتي ذهب منه ويحرم علي اشتي انا اجلس ورا نضر ته مدري وشي تقول وعلى مصر يشتي رحلته ويوم وصله مكتوب حرمته مثل الصاعقه هههههههههه خرب مشروعه هههههههههه ويرد عليها المغترب يامرحبا ويامسهلي لبيات لاقدجات في عزبته يامرحبابك عد مايهملي اوماذرا الفلاح في جربته هذا الي اذكره بس كفشته قبل مايسافر ههههههههههههههه |
أسعدك الله ياسحاب شقراء وين ماكنت ..
هههههه وصح لسانك على الأبيات حتى ترضى .. نحنُ بالقرب منكم دوماً أنت وسموّ المشاعر فأنتم روح المنتدى .. كونا دوماً بخير رذاذ |
من لديه كل هذه الروح الطيبة لا تأتيه ضيقة الصدر بس أنت تدلع علينا هماهم يقولون الشايب يبي كل واحد يحن عليه ويحبه ويدلعه هههههه شكلك من الصنف هذا لكن احمد ربك الله طرحك في أبو سيرين ورذاذ وعابر سبيل وسمو المشاعر وكل الشباب والصبايا هون كل شوي نمر عليك ونسلم ونقرى قصيدك وقصصك ولو انت قدامنا كان صار اكثر من ذلك . وبالنسبة للسراويل هههههههههههه مت ضحك يوم عرفت انها بحبال ذكرتني في عبسي خوي عدنان هههههه كانت سراويله بحبال ههههههه وانا اقول ليش الدنيا حر أثر السراويل هي السبب ههههههه أكيد محتفظ بسروال للذكرى خخخخخخخ الله يسعدك يا عم سحاب ويوفقك وين ما تروح . واذا عندك سروال من القديمات أرسلهن لي للاحتفاظ فيها للذكرى ولمعرفة كيفية عملها لأن احتمال يوم نعود لها ههههه ولا ترسل من اللي تعرضوا للدفن خخخخخخ . الله يسعدك يا عم سحاب :ordh: |
اقتباس:
شاكر ومقدر لك يااالغالي ،،، |
اقتباس:
ابشر يالغالي وتوبه اني اكتب شي ونت والله صادق في كلامك كلش الا كلام رب العالمين استغفرك ربي واانت علام الغيوب سبحانك ماكنت اقصد وربي يشهد بيض الله وجهك يالغالي الي نبهتني وهذا دليل على طهاره قلبك وقوه ايمانك بربك لا حرمك الاجر امين |
اقتباس:
ياجعل ربي يسعد قلبك امين لا خلا ولا عدم منكم كلكم جعل ربي يلبسكم ثوب الصحه الدائمه جميع الاعضاء من المديرالعام الين سحاب شقراء علشاني اصغركم |
اقتباس:
قل امين يبو سيرين الله يجمعنا عنده بواسع رحمته بالفردوس الاعلى من الجنه وكل من شهد ان لا اله الا الله محمد رسول الله بلا حساب ولا عذاب امين ياارحم الراحمين هههههههههههههه ابو سيرين اول مالبسته كني مقيد ههههههههههههههههههههه خل اعلمك بسالفه قالي واحد من الشياب يوم من الايام ترا فلان وهو شايب بعد تراه قايلي كم مره وراك ماتسير انت وسحاب يمي في نخلي وتقهوون عندي اني حاط عريش من عسبان النخل وفارش ارضه بالرمل قلت يالله قوه نتقهوا عنده ونشوف وشو مسوي بالعريش انت تذكر يبو سيرين يوم توه طالع صروال الاوميك هههههههههههههه كثير من الغالين يبي يذكرونه المهم الشايب الي عازمنا يوم شافنا من بعيد جايين يمه ويطمر لبيته ويلبس الاوميك الجديد وهو اول مره يلبسه ويجينا في العريش يتمذرع قدامنا مالبس الا هو وفنيله يبي يوريناه يعني شوفوني لابس جديد المهم هو حاط في العريش مثل الوجار يشب فيه ويسوي القهوه ويوم جا يبي يزل القهوه في الدله ويلقينا ظهره ويطمن يزل القهوه كله علشان نشوف الجديد ومادريت الا الشايب الي جنبي يدق كتفي ويشر على الرجال وهو يقولي ياملا المطرق الحامي ويوم شفته ولاي وش اشوف وش اخلي ابي امسك نفسي ولا مافيه مسكات ونفجر من الظحك وشايبي مثلي ولا حسه يقول بكل ثقه وراك ماتترك العياره عنك ياسحاب قلتله يبو فلان لابارك الله فيذا الصروال الي انت لابسه قالي وراه قلت كراه رح لبيتك ولا رح ورا العريش وفصخه وقلبه تراك مخلي الفتحه من ورا قالي هو فيه فتحات قلت مدري او انه منشق هههههههههههههههههههه |
ويوم شفته ولاي وش اشوف وش اخلي ابي امسك نفسي ولا مافيه مسكات ونفجر من الظحك وشايبي مثلي
ولا حسه يقول بكل ثقه وراك ماتترك العياره عنك ياسحاب قلتله يبو فلان لابارك الله فيذا الصروال الي انت لابسه قالي وراه قلت كراه رح لبيتك ولا رح ورا العريش وفصخه وقلبه تراك مخلي الفتحه من ورا قالي هو فيه فتحات قلت مدري او انه منشق ههههههههههههه الله يسعد قلبك واضحك الله سنك لقد ضحكت كثيراً .. تحيتي |
يا سحاب اتصل لا ضاق صدرك قليل اتصل واشتكي لي لـو همـومك جبال عـبـر واتسـاب والا رقـمـنـا بـالـدليل الـمـحـبـه تـشـد الـنـاس شــد الحبال :ordh: |
اقتباس:
ههههههههههههههه وش اسوي حوم كبودنا هههههههههههه وهويقول خل العياره عنك هههههههه تصدق مابغينا قهوته وهو مايدري الا صب الفنجال لي ولا للشايب الي معي نكبه من ورانا صارت كبدي تقلب الا ذكرت هههههههههههه |
اقتباس:
جعل حظك في يوم البعث ماهو قليل ياسند من تصرم من يديه الحبال |
اقتباس:
آمين وإياكم يا عم سحاب والله لا يحرمنا منك ومن مشاركاتك القيمة حفظكم الله ورعاكم وسدد على طريق الخير خطاكم |
الله .. الله .. الله
سواليف .. وقصايد .. وسراويل :038: هههههه الله يسعدك ياعم سحاب وصح لسانك ولسان أبوسيرين وبحضور سموّ المشاعر إكتملت السعاده هنا .. الله يحميكم جميع يارب .. رذاذ |
| الساعة الآن 06:46 AM |
Powered by vBulletin .
جميع الحقوق محفوظة © لشبكة ومنتديات البراري 2010