|
السلام عليكم ورحمه الله وبركاته هلا بالغالين ومرحبا اليوم والله شفت صوره وضيقت صدري بالحيل شفت طال عمركم صوره فيها يجي 20 بنت وكبار مهنب صغار مصورات قدام بيت السبيعي التراثي في شقراء وكلهن فاتشات ماتغطن ومطلعات شعورهن وشكلهن مهنب سعوديات شكلهن سوريات والله العالم ومهما كان ومهما صار ماتاصل الامور الا كذا ابد ولا نقبله ابد الله لا يخزينا بس وكان هذا التطور والتحظر مانبيه ابد الله لايبه والله لوني شايفهم شوف العين اني مااخليهم معاد الا هي بعد ولوهن جايات ومحتشمات كان بصرهن خلهن يتفرجن على البيوت القديمه الي صلحوها هلحين وصارت توسع الصدر لا عادت على دنيا تبي تصلخنا من جلدنا ترا مابقي في الدنيا الا السعوديه متمسكه بعباده الرحمن الرحيم ونجتنب مايغضب وجهه سبحانه وكلن ترا حاسدنا ودهم تتغير النعمه والفظل الي انحن فيه - كل ذو نعمه محسود - ولوهم عايشين معنا يتمنون زوال النعمه الله يزيلهم عنا ويريحنا منهم ولا اوصيكم يالغالين كلش ولا دينا وعاداتنا الصالحه وبلدنا هذولي لا تجاملون احد فيهن ابد والله العظيم شوفوني احلف ان الشعب السعودي من اطهر ونقا وكرم ورحم شعوب الدنيا كلها وتراي ماقلته الا من تجاربي عشرات السنين وبخص الي انا اقوله بس تغيرطبع بعض السعوديين مع كثره الاجناب الي جونا وجابو معهم الغش والكذب والخيانه وكل هذولي ماكنا نعرفهن في السعوديه قبل الطفره ولاكن مهما حصل النخوه والفزعه والكرم والرحمه لازالت تصيطر على السعوديين وهذي نعمه من رب العالمين والله خير حافض سبحانه وخل اعلمكم بشي ونتم اعرف مني بس للتذكير احفظو صلاتكم وحفظو كلامكم وحفظو افعالكم هذولا اذا تمسكتم فيهن فبشرو بالخير في الدنيا والاخره ولا شاف الواحد منكم احد مسوي شي غلط يقول الحمد لله الله يهديه وبس ترا الي باليه مهوب عجز عنك يبلاك مثله خل اعلمكم وشي موصيتني جدتي يومني توي صغييير جعلها للفردوس وكنت انا وياها ساكنين في نخلنا في شقراء وكان جدي الله يرحمه باني عند الباب الجنوبي للنخل كان باني مسجد من طين طبعن وباني مسجد ثاني عند الباب الغربي وتوصيني جدتي وتقول اسمع ياولدي لا تخلي صلاتك ونا امك ابد ون جاك محتاج لا تخليه يروح الا انت معطيه ولا سمعتا كلام في الناس بالك تخوض فيه وترا الدنيا خيبه للهي له ونا امك مهيب خلفه ترا ذا الكلام قبل لا تنولدون كلكم الا كان راعي البراري ابو ناصر هو الي عود مثلي الله يمتعنا وياكم متاع الصالحين ولا يظهرنا من الدنيا الا وهو راضي عنا ويختم لنا بالفردوس قولو امين |
الله يصلح الحال ويهدي ضال المسلمين
شرفنا تواجدك يالغالي كل التحايا |
اقول ابوسيرين له فقده جعل ربي يسلم قلبه من كل شر |
غاب له مدة ولا ادري وين خده
جعل ربي يسعده كانه مسافر وكان غايب من عذر الله يرده العفو والصفح والله خير غافر |
اقتباس:
هلا ومرحبا بالركام الغالي الله يجزاك خير على الرد والله يستر عليه ويرده سالم |
السلام عليكم ورحمة الله وبركاته
ودنا تحدثنا ياسحاب شقراء عن الابار التي يصب فيها السيل في شقراء وهل سبق ان امتلاءة هذه الابار بالسيل وماهي الفؤاىد الملموسة وشكرا 🌹🌹🌹 |
اقتباس:
هذي والله الساعه المباركه يالركام ابشر ابا اعلمكم بس بعد ساعه انشاء الله تعالى لاني مشغول شوي |
غالي والطلب رخيص يالركام يازين كذا تعلموني وش تبوني اسولف عليكم وبشرو بالخير وتغانموني قبل اودع منيب باتل عندكم :clap: فيه مزرعه في شقراء معروفه اسمها الحميضيه وفيها قليب طال عمرك من عمر الدنيا ايام الصدر والناس ياخذون منها الماء وخص الحريم يجن طال عمرك ومعهن قدوره ويصير معها وقات هذي طال عمرك تحطها الحرمه فوق راسها مثل العقال بس هي يسمونها الوقات وهي من القماش او من الشيله يلفونها علشان توقي عن الراس الا شالت القدروفيه ماء تصدق ان الحريم كني اشوفهن هلحين تمرك والقدر مليان بالماء وهي شايلته على راسها وهي مامسكته بيديها :038: علشان الوقات مركده القدر على الراس وتسولف مع رفيقتها وتشر بيديها وتلتفت يمين ويسار ولا يطيح القدر مبطيت مذكر عجوز في شقراء وقولها الله وكبر يم فلان تذكرين يومنك تروين من الحميضيه وتشيلين القدر مليان بالماء وهلحين مايردك الا سريسرا يعني سويسرا بس هي الي تقول الا نشدتها وينك فيه يم فلان الصيف الي راح قالت في سريسرا مع وليدي مسفرني يم البراد المهم نسيت السالفه ههههههه المهم قليب الحميضيه جعل اهلها للفردوس وكل مسلم حاطين نص الشعيب يصب في القليب والنص الثاني يسقي النخل الا يومنا هذا ومنول طال عمرك الا جانا السيل وصب في القليب تمتلي القليب ويخافون على الطوي الحصا لياه يطيح ثمن تنهد القليب يروحون ينادون شايب جعله للفردوس وذا الكلام ايام الصدر ولا نادو الشايب قالو له يبو فلان قليب الحميضيه تبي تفيض يجي معهم وياخذ كسره جمش الطين اليابس اسمه جمش :a_laugh2: ويقرا عليها من كتاب الله ايات ثم ينطلها في وسط القليب وشوي وتشوف الماء نازل سبحانك ربي وترا سالفه الشايب انا ماحظرتها بس معلمني بها شايب جعله للجنه متوفي من سنين ولا ادري هو من القرائه ولا تنفتح المجاري الي فسفل القليب ثمن يروح الماء العلم عند الله سبحانه ولا قط قالو الناس الا شارب من الحميضيه وهذا مثل يظرب منول في شقراء لان ماها حلو بالحيل وطبعن قلبان شقراء كلهن يلتقن مع بعض سبحانك ربي ويزيد الجم في القلبان كلهن الا جانا السيل وصب في قليب الحميضيه ونت خابر منول مافي شقراء سد الا سد عزيز ابن ربيع جعله للجنه الي في الحسيان تحت الجبل الشمالي ولا حطه الا السنين التوالي بعد وهو من التراب مهوب مسلح وفيه بعد قليب بين بيوت الطين يصب فيها السيل الا جانا يعني سيل السكيك والبيوت مهوب شعيب بس والله مايحظرني شي عنها ولا عن اسمها نسيتها ماورا مني بعد الي اذكر بعض الامور انت خابر المحال يدرج والحسابه تحسب يالله حسن الخاتمه والله اني اذكر ونا في نخلي في شقراء اشغل المكينه البلاكستون الهنديه تعرفها اكيد :a_ok: المهم والله يعينا على المهم اشغل المكينه من الساعه 7 الصبح انت خابر اروس يعني اسقي النخيل الين مسيان يعني حول المغرب ولا طفيتها طال عمرك الاي اسمع صوت وشيش وصوت الماء يهدر في القليب وذا الكلام والشمس غايبه وباقي شفقها احمر في القبله وذكر يوم سمعت الصوت وويق في القليب ولا فيه شان يعني مجرا للماء يصب وسط القليب الين ياصله الماء ويغطيه سبحانك ربي لا اله الا انت والقليب يجي في اسفلها توسعه من الجوانب تحت الطوي نسميها السلال والمجرا الي يصب في القليب نسميه شان وصلى الله على نبينا محمد وهذي سالفه السيل والقليب يالركام الغالي الله يسمعنا خير عن ابو سيرين الله يكفينا شر الدنيا وفي الختام احسن شي نقوله سبحان الله والحمد لله ولااله الا الله والله اكبر عدد خلقه وزنه عرشه ومداد كلماته ورضى نفسه |
جزاك الله خير
وفيت وكفيت ومافصرت وكل سواليفك زينة |
اقتباس:
انت الي ردودك زينه جعل ربي يسعد قلبك ولا خطرفي بالك موضوع علمني وعلمك بالي اعرفه عنه ابشر |
جزااكم الله كل خيرر الف شكر لكم
|
اقتباس:
يالله تحييه وزارتنا البركه يالغالي تركي جعل ربي يسعد قلبك والف شكر لك على مرورك بس هاه لا تخلينا شارك معنا |
السلام عليكم ورحمه الله وبركاته يالله تحييهم جميع كبيركم وصغيركم ذكركم ونثاكم وليا حيا كثر وتنثر وتزبر بعد:038: يقولي واحد من الغالين تكلم عن حيات منول والحرمه وش كانت مسؤليتها وقلت ابشر عن الحرمه منول وش اقول وش اخلي هي الي قايمه بالبيت كله من صلات الفجر الين تغاب الشمس تطبخ وتنفخ ومنول مافيه شي اسمه مطبخ يسمونه الموقد لانهم يوقدون فيه النار ويسوون القرصان والمراصيع والمرقوق والجريش اذكر الجريش له معصاد من الخشب يعصدونه وسط القدر والعصد يالتوالي هو التحريك بشكل دائري هذا انت يالجريش بس وغيره يطبخونه بدون عصد والرجال يطلع من بيته الفجر يصلي ثمن يروح لشغله ولا يرجع لبيته الا بعد المغرب تصدقون ان بعض الرجال مايشوف بزوره يعني عياله ايام تتلا ايام يروح لشغله وهم نايمين ويرجع من شغله ويلقاهم نايمين لانهم من المغرب وهم نايمين ماعندنا سهر منول كلش على سنعه وجعلنا الليل لباسا وجعلنا النهار معاشا وهلحين اللهم صلى على محمد انقلبت الدعوا ولا عاد يرقدون الا الفجر وياكلون البرقر الي نفخ خدودهم وصدورهم الله يدفع البلا وصارو يترج رجون وهم يمشون مثل الجلي الا حركته والحرمه ماترقد وتخلي رجلها تصير مولمه القهوه والعشا وتحتريه الين يجي وتقهويه وتعشيه وهي تنافض لياه يزعل بس منول للرجال هيبه الى سمعوالباب مفتوح يخمدون البزور ولا يطلع منهم صوت وهلحين الله يخلف تلقا الرجال نايم في غرفته والبيت صيحه وصجه وولهم حرمته تنادي على عيالها بالصوت الرفيع وعند باب غرفه الرجال وهي تدري انه نايم وفنك تقول شي منول غير وهلحين غير الله يخلف وبالنسبه للغنم منول والله العظيم مابقا شي ويتكلمن كل بيت فيه غنم ولا اصبحنا يفتحون لهن الباب ويطلعن للسوق ويلقن غنم الجيران ويمشن مع بعض كنهن رايحات للمدرسه وسبحانك ربي يروحن يم بيت الشاوي كل غنم اهل الديره ولا معهن احد يسوقهن او يدلهن هن عارفات الدرب وشلون يدرن ان هذا بيت الي يطلع بهن برا الديره ويرعاهن مدري ولا جا مسيان يعني عقب العصر يعني حول المغرب يهظلن يعني يرجعن للديره وكل غنم ناس يروحن مع بعض لبيت اهلهن اذكر الا صرنا حول المغرب يقولون افتحوالباب خلوه مفتوح للغنم يدخلن ويجن ويدخلن ون لقن الباب مصكوك يقعدن يثاغن عند الباب يعني افتحولنا الباب نبي ندخل منيب اقول لكم معاد الا شوي ويتكلمن الغنم منول وحيان يظيعن بعض الغنم بيوت اهلهن او يصير فيه حالات عشق بينهن ويروحن مع بعض ثمن يقعد يدورهن راعيهن ويمشي في السكيك وهو يقول من عين الشاه جزاه الله خير ولا يقول من عين العنز الصمعا جزاه الله خيروالصمعا يعني الي اذانها صغار يسمونها الصمعا يعني يوصفون غنمهم الي ظايعات والناس الا سمعو الي ينادي كلن يروح يشوف غنمه لياهن معهن ويطلعونهن وبالنسبه للوسم ونزول المطر الا قالو بكرا يدخل الوسم تمطر الليله لانهم مرضين ربهم سبحانه وهومرضيهم الرحمن الرحيم ولا شافو قطعه غيم صغيره قالو جاكم السيل وكلن يروح ينزل الي في سطحه كانه ناشر شي في الشمس وينظفون المثاعب ويرقون بالبن الي يبنون بهن ويحطونهن في الطايه علشان لو يخر شي عليهم يسدون به الشقوق ياحيات الشقا منول الا جاهم المطر يفرحون ويخافون كلهن مع بعض يفرحون انه يسقي نخيلهم وينبت العشب لغنمهم وبقرهم والي مسوي بعول تنبت بعوله والبعول هي طال عمركم الا تحرو للوسم يدخل يطلعون للبر ويحرثون الارض وينثرون البذر ويجيه المطر ويسقيه وينبت وهم ماتعبو فيه ولا سنبل يجونه ويحصدونه ثمن يذرونه ثمن يطهرونه يعني يخرون منه الحصا والعودان الصغار ثمن يملحونه ثمن يجرشونه بالرحا ثمن يعجنونه ويخبزونه وياكلونه ومنول كل بيت فيه بقره هذا شي اساسي منها الحليب ومنها الزبد ومنها الروب او الزبادي ومنها اللبن الي يجي فيه قطيعات زبد وش طعمهن وكلش طبيعي وكلش صح ترا البقره احيان ترضع روحها وتشرب حليبها وفي ذا الحاله نقوم ونحط عودين مع جنوبها نسميهن السواجير ولا جت تلتفت تبي تشرب حليبها يدق العود في رقبتها ولا تقوا معاد الا هي تشرب الحليب الحليب مهوب لها الحليب حقنا انحن انا اذكر ونا توني صغييير يعني جذيع غثتنا بقرتنا تثاغي ماتخلينا نرقد لا في ليل ولا نهار قبلها تثاغي وهذا معناه ودوني لرجلي الثور ابيه ولا ماخليتكم ترقدون قال ابوي جعله للفردوس ياسحاب قلت سم يبه قال تعال ونا ابوك نبي نربط البقره ونوديها للثور ويربطها ابوي بحبل يجيله خمسه امتار وقالي جودها ونا ابوك لياها تنحاش قلت طيب ابشر وقوم وربط طرف الحبل في يدي كله اخاف تنحاش المهم والله يعينا على المهم هي شافت الباب مفتوح ولا ماشافته وهي تجيك منطلقه انتم تسمعون الا قالو شوط بقره وهي تكون البقره مربوطه طول السنه ولا انفكت تنطلق بسرع شي ممكن ثمن تاقف بعد فتره الا قصرت من الركض وهذا شوط البقره المهم سحاب رابط الحبل في يده من زود الحرص لياها تنحاش وهي الي تجرجرني وتسحبني في السكيك وبوي يركض وراي وكل من شافنا يلحقنا وسحاب صار خرقه وراها سحبتني الين صب الدم من مرافقي وركبي وسيقان سلوا بعد ماسلمن يعني سيقاني يصبن دم ومن سكه في سكه الين مسكوها بعض الناس وبعد نص ساعه توه ياصلني ابوي قال عساك سالم قلت لا انا سحاب تراي اتميلح هلحين والحمير منول لهن اهميتهن ويباعن ويشرن بالدراهم اذكر منول نحط على ظهر الحمار وثاره وهي خيشه مليانه تبن ولا قماش ونحطها فوق ظهر الحمار ونركب عليها لان للحمار دبره وهي العمود الفقري يكون بارز ولا ترتاح عليه ابد يوجعك العصعص الين تحط الوثاره وتقول وشي المنحات ونت تعرفها وشي بس تذيهن علي المنحات هي مكان الصدر منول ايام كانو يطلعون الماء بالبعارين مهنا مكاين فيه سالفه حاصله موووووبطي ايام الصدر كان فيه رجال عنده بقره وحمار يصدر عليهن يعني يطلع الماء بهن ويوم جا عقب العصر قال لحرمته خلاص روحي ادخلي الحمار والبقره في الحوش وتروح الحرمه وتدخل البقره والحمار وتصك الباب عليهن ويجيك الحمار يهوش الباب براسه يعني ينطح الباب براسه ذهين بعد مهوب يلعب ومع نطحه الباب انفتح وطلع الحمار ونحاش ويوم جا من بكرا ويجي الرجال ويلقا الحمار منحاش ويقعد يهوش على حرمته يالي فيك ملا فيك يومنك ماتصكين الباب زين وتخلين الحمار ينحاش يالي فيك مايخطيك ثمن قال لحرمته تعالي صدري مع البقره مكان الحمار ويربطها والله مع البقره ويجلس يصدر عليهن حرمته والبقره والحرمه منول ماتقدر تقول بم للرجال هيبه سبحان الي حاطها في قلوبهن وهلحين اسكت انقلبت الدعوا الله يكفينا شرذا الدنيا وسع الله صدوركم ونفوسكم وجعلكم من اسعد خلقه وسامحوني على القصور وفي النهايه مااقول الا سبحان الله والحمد لله ولا اله الا الله والله اكبر عدد خلقه وزنه عرشه ومداد كلماته |
اسعدتنا ياسحاب بماض الازماني
سوالف وين من يسأل عن الماضي الله يسعدك ويعافيك ياشيخنا سحاب واسمح لي تراني اقوم بنسخ بعض السوالف ونشرها عبر الواتس لمجموعة من القروبات 🌹 |
اقتباس:
ياهلا ومليون مرحبا للركام الغالي الله يسعد قلبك دنيا ودين امين ولا يبي لك سماح حلالك ونسخ وسو الي تبي كم عندي من ركام :hlaqla: |
قال الراوي
كان هناك صاحب مزرعة فلاح عنده صبي في المزرعة والصبي يشبه اليوم العامل في وقتنا الحاضر وكان هذا الصبي يصدر على السواني ليسقي النخل وكان الوقت برد جدا وغيم والهواء صبا باردة وكانت اطرافه متيبسة من البرد وعيونه تذرف من شدة الهواء البارد ونزل عليه صاحب المزرعة ( زيد ) من الروشن حيث كان حديث عهد بالزواج ولما نزل واحس ببرودة الجو فسأل الصبي وهو راجع ثانية الى روشنه قال وش مهبها ياصبي فقال هذه البيتين هني زيد مادرى وش مهبها ................. في حضن غطراف حشاه رهيف شرقية يازيد تقعد لها الصبا ...................... ودموعنا من لفحها ذريف ويقال ان الروشن بعد ترديده هذين البيتين طاح وتهدم على من كان فيه -------- شرقية تقعد لها الصبا جنوبية شرقية 2011-01-24, 02:08 هذه الرواية نقلتها من الراوي واعدت نشرها في موضوعك ياشيخنا سحاب وودي انك تسولف لنا عن ايام البرد في الماضي وجزاك الله خير https://www.albrari.com/vb/archive/in...p/t-52480.html |
ياهلا ومرحبا يالركام الغالي ذا السالفه سامع فيها من سنين مبطيه الله يكفينا شر العين ومنول راحمنا الله سبحانه ببيوت الطين تصير دافيه بس انكان فيها مطر ومهبها صار نسري ماتسر بيوت الطين كلش بجللد الا خلوه المسجد علشانها تحت الارض تصير دفا بس مايخلونك ترقد فيها ونت خابر مهناش منول لا لبس ولا غيره ولا اشتد البرد علينا نرقد في الصفاف يعني الغرفه بس منول نسميهن الصفه ونت خابر نصير قاشعين الروض بالمقشعه وحاشين الصبط حق العام ونحطه في وحده من الحجر ولا اشتد البرد علينا ذيك الليله نحط فراش على الروض والصبط ونرقد عليه يصير دافي احسن من غيره ونت خابر منول يصير ماعلينا الا مقطع يعني ثوب وماتحته لا صروال ولا فنيله مانملك الا هو وفيه شي يخيطونه من الصوف منول يسمونه البيدي ويصير عند بعض الناس بس الا حطيته فوقك ماتقدر تنقلب على جنبك الثاني من ثقله هههههههه فيه واحد وهو وحيد امه وبوه يقول عندنا بيدي منطول في الطايه يعني السطح ويقول مليان البيدي بالتراب وصاير ثقيل ويقول وحنا في الصيف ونرقد انا ومي وبوي بالسطح ويقول الا صار فيه عمليه تكاثر عند امي وبوي قامو وسحبوالبيدي وحطوه فوقي ثمن معاد اقوا اتنفس ون تنفست الا كله تراب ويجيني ضيق تنفس ويقول يوم جا ابوي ليله من الليالي يبي يحط البيدي فوقي قمت من فراشي وقلت تكفا يبوي ابا احول تحت وفكني من البيدي هذا وترابه والله اني اشارف على الموت يقول ابوي ماردها علي ولا بكلمه لقاني ضهره وراح لمرقده ونام ونا حول ورقت في المجبب :clap: |
قصيده أعجبتني
الأجواد واجد والمراجل لها كساب لكن واعد العشره ليا صرت جمالي يطير الشرار وكل ناراً لها شباب ومن ولع النيران يصبرعلى الصالي تجارب حياتي معجزة والدروب صعاب ولقيت الرجال أنواع وألوان وأشكالي صديق الشدايد لاخذا منك علم وجاب وسيع الصدر يضحك ولا هو بزعالي صديق الشـدايد ما ينافق ولا يغتاب يدله غـريب الدار ويزّبن الجالي وصديق الرخاء عقّاب ومصادقه عقّاب شجاع الحكي والمدح بالقيل والقالي صديق الرخاء ماغير صوره ولبس ثياب ياليته يبرقع ماله شماغ وعقالي وعندي نصيحة جد ماقلتها لعاب أقول الصحيح ونايم القلب يصحى لي ترى خوة أهل الطيب يالطيبين أطباب يطيب السقيم وخوة اللاش سلالي تغانم شبابك يا أبيض الوجه دامك شاب ترى البدر لو يطلع قمر عود هلالي فلا تهجر المسجد وخلك وراء المحراب ترى روضة المسجد لها منزل عالي ولاتترك اللي يزهمك خايفٍ مرتاب ترى الذل ما نجى الثعل بالتحيالي ولا للنداء غير الفداء لو تروح إرقاب ومن ضاع شوره ياخذ الشور ويمالي ومن باشرك بالعذر لا تلحقه بعتاب ولا تشوف نفسك شيخ والناس عمالي ولاتهين نفسك لوتجي بين ضرس وناب وهيبتك لا تنقص ولو ربع مثقالي وبنت الردي لا يعجبك زينها الجذاب تراها كما المخيال خيل وتخيالي ولوشفت حمر خدودها والثمان إعذاب لابدك تمنى ليت ما جالك عيالي ولدها ليا شاف اللقاء والملاقى هاب ذليلٍ بخيلٍ فيه خفخاف وجفالي أخذ بنت قرم طَيباً ساسها ما عاب إتنومسك بنت الشبل ويجيلك أشبالي عيال الذياب تصير مثل الذياب ذياب وعيال الثعالب مثلها زهر الأذيالي وفرخ الصقر مثله وفرخ الغراب غراب وبوم الخراب يقابل العش ويلالي ليا صار راسك فوق ياطيب الأنساب فلا ينحني لـ أقدام رجلين ونعالي لكن الله اللي يكتب الرزق ياخطاب هو اللي يفك الباب ويقص الأقفالي ولا يهمل إلا واحداً عايفاً لـ أسباب ولا ضيع حقوق البشر غير الإهمالي وترى للقصايد كيف والكيف له شراب وأنا ما أشرب إلا كيف راسي بفنجالي ولا أطاوع الجاهل ولا أجامل النصاب أقدم يمين الحق و احط معدالي |
السلام عليكم ورحمه الله وبركاته جهازي خرب وصلحته بس معاد يطيعني ادخل عليكم حاولت وحاولت ولا فاد بس مواعدني واحد يبي يجي ويصلحه ان شاء الله سبحانه ونا اكتب لكم بجهاز ثاني مهوب لي والقصيده الي فوق صح لسان قايلها ونا قلها بعض القصيد يفيد بنصايحه بس وين الي ياخذ بالنصايح الله يعفو عنا وعن كل مسلم اذكر سنه من السنين موووبطي جانا سيل وصارت السكيك مناقع والشياب مغير وين فلان يقولون فلان زالق في نقعه سيل ومنكسره رجله ولا جايه رضوض ومتعور ونا امشي مع احد السكيك ولا فيه شايب جاي يمشي وقالي تعال ياولدي اقضب يدي الين اتعدا ذا النقعه من السيل اخاف ازلق وجي ومسك يده ويده الثانيه ماسك عصاه ونمشي وهو عجل او سريع في مشيه شوي وقوله لا تعجل امش بشويش لياك تزلق قالي اقضب يدي ولا تكثر البربره ههههه ونحن نمشي ومادريت الا يوم زلق ونفلت من يدي ويجيك على جنبه وبطنه هههههه قالي لا يالحمار وراك ماجودتني قلت انت الي تمشي عجل وقولك لا تعجل ولا تاخذ العلم قال انا الي ما اخذ العلم قلت ايه قالي تعال جودني وضهرني وجي ومسك يده ويالله قوا يقوم ويوم طلعته وهو الي يمحطني بعصاه بقوا شي وقالي اجل انا الي منيب اخذ العلم وروح عنه بعيد شوي ونا الي احوته بالحصا ههههه ويوم التفت علي وهو يهوش ويزلق ثانيه هههههه الله يغفر له ويرحمه ويروح يم ابوي يشكيني عليه ويوم جيت للبيت المغرب ولقا ابوي جالس يتقهوا وقالي ماتقولي يالحمار المتين يومك تدز فلان في نقعه السيل قلت مادزيته هو الي زالق وقال جايني مسكين يوريني ركبه وسيقانه متزلغات ويصب الدم منهن ويقول هذا فعل ولدك في ويقوم ابوي جعله للجنه يبي يطقني ونحشت وبعد يومين علمته بالي حصل كله وفهم ابوي وقالي اياني وياك يجيني احد يشتكي منك قلت انشا الله ياباب وبس هذي على طاري السيل وسلامه قلوبكم من كل شر |
على وين ياللي راحلين بلا عـنـوان
نبي منكم الجوال عندي تضيفـونه نبي نعرف الاخبار افراح ولا احزان ومن شـعركـم عني بعد لا تخـبـونـه ترا عقبكم مانكتب الا بيوت اشجان ولا نـبـغي اغـيابا بعـد ذا تـطـرونـه هذه البيتين تم طرحها في دكة الشيبان للسؤال عنكم وعن الجميع وحياك الله ياسحاب شقراء |
السلام عليكم ورحمه الله وبركاته الا بذكر الله تطمئن القلوب لااله الا الله وحده لا شريك له يالله تحييهم وليا حيا كثر وليا كثر تنثر بكم كلكم صغيركم وكبيركم وذكركم ونثاكم قلت اطل عليكم مع اول ايام السنه الجديده الله يجعلها سنه خير ورزق وعافيه واامن ومان وعفو وغفران امين يارب العالمين انا انقطعت عنكم لظروف خاصه والحمد لله من قبل ومن بعد خل اعلمكم عن سالفه ذا الشايب وعلموني وش اسوي فيه تكفون اتصلت عليه ومادريت الا يوم انطلق علي ويقولي اياني وياك تتصل علي ونا اسوق الموتر قلت له ونا وش يدريني عنك وينك فيه قالي تحرا هه هه اني منيب اسوق وكلم علي ههههههههه هذا وش اسويبه تكفون وقالي اول امس اسوق الموتر وتصلو علي عيالي ويوم رديت عليهم ولاي طامر الرصيف وناشب بين سيارتين وهذا ونا معلمهم لا يكلموني ونا اسوق ابد ابد والي مزينه انه من تغاب الشمس معاد يسوق والمفروض يمنع من السواقه هذا خطر على المسلمين ماوالله يلقا ساهر من وراه ريال مهوب يتعدا 60 لو يدفونه دف جا على بالي شايب ثاني ذكرته والي معلمني بناته عنه يحلفون بناته الا ساق فيهم انه يقولهم الا ولعت الاشاره خضرا علموني امشي هههههههه هذا وشلون يسوق او على الهجس الله الحافض وبس سبحانه وفي حفض الرحمن الرحيم انشاء الله وفي الختام مانقول الا سبحان الله وبحمده سبحان الله العظيم عدد خلقه وزنه عرشه ومداد كلماته ورضا نفسه |
السلام عليكم ورحمة الله وبركاته
حياك الله ياسحاب شقراء شرفت بعد طول الغياب الحمدلله على السلامة |
اقتباس:
يامرحبا ومسهلا بالغالي الله يسلم قلبك من كل شر ويسعدك امين دنيا ودين |
يالله تحييهم جميع كبيركم وصغيركم ذكركم ونثاكم وليا حيا كثر والله ياجماعه الخير مدري وش صار بالدنيا اختلفت عن منول منول الا قالو بكرا دخول الوسم تمطر الليله وهلحين يجي وسم ويروح وسم ماشفنا شي الله يرحمنا برحمته اذكر منول ايام بيوت الطين اكثر مايجينا المطر بالليل ثمن تعال شف الشياب اهل النخل كل واحد فوق راسه خيشه عن المطر وفي يد سراج والثانيه مسحات ثمن يروح لنخله يعدل السيل وكثرهم يروح وهي الروحه الين الصبح يحجره السيل ويقعد يرجف من البرد الين الصبح ويرتاعون عليه اهله عسا ماجاه شي وبعض المرات نروح بالليل ندوره ونصوت له يافلان يافلان الين يرد علينا ثمن نبدا نهوش عليه انت وش حادك تطلع بالليل والشعبان تمشي وكلش يصب ونت كنك تبي تسوي شي هذا سيل الا جاك جاك كانك مصللح مسايله فزين على زين ونكانك توك تبي تعدل وتبدل مالك سنع ابد اذكر واحد يوم رحنا ندور عليه ولقيناه في نخله ولا معنا الا سراج على القاز وكل شوي هابدين في جفره سيل الين سبحنا ويوم وصلناه ولا الشعبان توها تاصل بكامل قوتها ومنول نرتاع ونخاف من السيل وخص الا طول علينا كم يوم نخاف تطيح بيوتنا ولا اصبحنا ولا كلن ينشد الثاني عساكم بخير عسا ماصار لكم شي ثمن نقول ابد لله الحمد والشكر خرخرت علينا ولطسناه بالطين يعني سديناه المهم والله يعينا على المهم يوم لقينا الرجال في نخله وحجرنا السيل معاد لنا ممشا ابد ابد رحنا طال عمركم لبيت النخل وهو يهز نخاف يطيح علينا ونجلس في قهوته ومنول نسمي مجلس الرجال القهوه علشانهم يتقهوون فيه وجلسنا الين اصبحنا ونحن ننتفض من البرد وشبينا الضو بس ولو الجوع يخليك تبرد اكثر والحمد لله والشكر لله تمر الايام والسنين ونحن في نعمه من ربن كريم وتمضي السنين على العابدين والله العظيم ياجماعه الخير ان القلوب منول طاهره وعلى الفطره والناس حريصين على الصلات تراها هي كل شي وهي عامود الدين والبيت والله ياجماعه الخير منول نشعر بالسعاده بالدنيا ولذتها وبيوتنا منول تلقاها خمسين وستين متر ونقول تطارد فيها البعارين من كبرها ربي سبحانه موسعها في عيونا والله العظيم اني صادق الله الله بالصلات ونتم اخير مني وما تشوفون من الرحمن الرحيم شر وبس هذا الي عندي الليله والله يحفظكم من كل شر وفي النهايه مانقول الا سبحان الله العظيم سبحان الله وبيحمده عدد خلقه وزنه عرشه ورضا نفسه ومداد كلماته |
ورا مافيه احد يرد علي الله يدفع البلا وكاني مضايقكم ابشرو بالسعد اروح وخليكم |
اقول مافيكم حل هههههههههههه طيب الي يعرف اكلتي المفضله له مني قصيده حنانه رنانه وكلن يسمعها وش رايكم وخلي راشد الفارس يغنيها وش رايكم |
اهلا بسحاب شقراء
قلوا الكتاب وقل الزائرين ومابقى غير التذكر والحنين |
ياجعل ربي يحفظك يالركام محد يرد |
سحاب شقراء متواجد
مر السحاب ولا لقينا له اثر يالله عساه يعل ويهل المطر يكتب لنا اشعار والا لو نثر بننتظر لعل يلفحنا عطر |
اقتباس:
هلا ثم هلا ومليون مرحبا انت العطر ليمن مسحته ونتثر ونت الركام الي يوسع ذا الصدر ونت الحيا جعل الحيا ما يندثر ونا السحاب ونت الركام الي صدر هلا بالغالي وش فيهم الناس لا هين عنا يدافع البلا:clap: |
اهلا وسهلا بالسحاب
كل يناظر له بشوق عالي ومن دونه رباب يمشي برفق دون عوق |
اقتباس:
اهـلا هـلابك يالـركـام اسمع رعوده والبروق وطير السعد بالجو حام وتكفخ جناحينه خفوق انت الحيا ونت المرام ياشاعرن قافه يروق ابصم بعشري بالتمام ان الطهاره بك لبوق يالله عسا عمرك سلام والخير من ربك يسوق وهلحين هـلي يالغمام وسقي ثراها بكل شوق اقـولـها ومالـي مــلام احساس شايب مايبوق سحاب شقراء اسم الدلع سحسح |
تعيش يالشيخ الامام
في كل فن لك طروق والشكر لك والاحترام ماشيف لمع للبروق من رافقك ماله ملام يلقى علوم وزين ذوق واقول يوم الطير حام يرقى على متنك بشوق وش قال لك من الكلام وش قلت له من الطروق |
ههههههههههه ماقالي شي ولا قلت له شي انا خابر منتاب مشيها سالفه الطير :a_laugh2: |
السلام عليكم ورحمه الله وبركاته على طاري الطير يالغالي الركام ذكرت سالفه حاصله لي ونا توني بزر يمكن تسع سنين وحولها كان عندنا بيت طين كبير وذكر عدد درجات الدرجه 44 زلفه ونا راقي في الطايه او السطح اذكر ونا جاي احول شفت على الفتاش الفتحه الي يطلع معها الدخان نسميها في شقراء الفتاش او النبر وهل الزلفي يسمونها السماوه المهم شفت على الفتاش رجال صغييير ونا شفته ولا ماشفته وجيك منطلق مع الدرجه وتدربا الين وصلت المجبب من الروعه ولا هذا ابوي جالس يتقهوا وقوله رجال صغيير رجال صغيير قاعد على النبر ويجيك ابو ياملا الفردوس يركض يقول تعال ورني ذا الرجال وركض معه يوم جينا ولا هذا هو ماراح ويوم شافه ابوي قال هذا رجالك قلت ايه شفه قال هذي الله يصلحك بومه :z-attack:مهيب رجال الله يصلحك ونا وش دراني عن البومه ان هذا شكلها اذكر الا نمنا في الطايه ايام الصيف نشوف طير ويقولون هذا طير العشاء ولا ادري وشو بعد طير العشاء وسلامه قلبك يالركام الغالي |
يالله تحييهم توي كاتب سواليف ساعه ونا اكتب والله يخلف يوم جيت اثبتها قال ماسجلتا الدخول ونا مسجل وطارت الطيور برزاقها الي جاي احسن انشاء الله تعالى |
بسم الله الرحمن الرحيم الا بذكر الله تطمئن القلوب- لا اله الا الله وحده لا شريك له يالله تحييهم وليا حيا كثر ولا كثر تنثر من زود حبي لكم جميع ادري اني ابطيت عليكم جعلكم ماتفقدون غالي ولا رخيص وش زوده الله يحفظكم ويجعلكم من اسعد خلقه كبيركم وصغيركم ذكركم ونثاكم امين يارب العالمين انتم ماتدرون وش الي جرالي رحت يم اماره الرياض كلكم تعرفونها وش السوق الي قبال الاماره هو اسواق المعيقليه انتبهو وعلمو ربعكم لا احد يروح للمعيقليه في الليل حتا شوارعها الي حولها ونتبهو للمواقف الي تحت جعلكم ماتشوفون شر فيه اثيوبيين او عيال عمهم مدري بس نفس البويه انتبهو اكثر شي لراعي الدباب يجون اثنين ولا وصلوك يخمط مخباتك الي في الصدر بالي فيها تدرون ان مخبات الصدر نسميها مخبات الساعه منول يحطون فيها الساعه المهم والله يعين على المهم رحت يم اسواق المعيقليه وموقف بعيد وجيت امشي ونا هلحين قريب من المعيقليه وهواجيس رايحه وهواجيس جايه بالحالي رايح وقبل اقطع الشارع ودخل المعيقليه ويجوني اثنين على دباب ويقرب مني ونا ياغافل لك الله وبلمح البصر ولا كل المخبات معهم راحت قريشاتك ياسح سح هذا اسم الدلع سحسح ومن قو سحب المخبات طحت على بطني كل هذا كوم والروعه كوم:p (18): ويجون الناس سالم سالم ويوم كثرو الناس ونا على طيحتي وتسببت بزحمه السيارات لان عصاقيلي وسط الشارع ولا فيه واحد من بعيديقول هو حي ولا ميت وجلس على حيلي وقول وين انا فيه وشجايبني فيذا :p (18): انتم خابرين الروعه خل ادعي عليهم يالله اني ادعوك جعل مايقبل احد فلوسي وجعلهم للفقر الي اضوق من خرم الابره وقبل امس في تويترشايب ويصورنه بناته يقول رحت للمعيقليه وسرقوني مخبات الصدر راحت كلها نفس طريقه سرقتي بس فلوسه واجد يقول صرفت 5 الاف وشريت غرضين بس والباقي خذوه وفيه يماني يقولي هم اثيوبيين ويقول اخطر شي لو تاقف في المواقف الي تحت السوق بعظها مظلم ويجونك بالسواطير وياخذون الي معك وعلم واحد من ربعي قالي انا سرقوني في شارع الخزان وشوا يوم لحقتهم انطلو بطاقاتي يقول هن اكبرهمي وبطاقه الاحوال معهن العجيب مارحنا نشكي للشرطه انا ورفيقي مدري عن الشايب كانه شاكي خل اعلمكم اي شكوا اذامافيه شهود او تصوير كمره مراقبه لا تتعب نفسك اقوا حكم عليه يحلفونه فقط ويطلق سراحه هذا شي جربته انا اقول لو علمتكم بشي صاير لي تكفون لا يدري احد وهو حلم حلمته وحترت فيه حلمت اني في سكه بيوت الطين وشوف بليس جاي يمشي وعليه نعال في رجله اليسرا والثانيه ماعليها شي يمشي حافي ونا وقفت على جنب وناظره وهو مهوب طويل بس عريض المنكبين وهو يمشي مطمن راسه وفيه من الهم ماالله به عليم وشوف بيوت الطين اهلها وبزارينهم يطلون يشوفون ابليس راسه كبير وجسمه عريض ويديه تاصل ركبته وهو يمشي ونا واقف ويمر من عندي وهو يناظر الارض بس وجهه ماشفته مطمن راسه وعلى ممشاه وش ظنكم يالغالين فيذا الحلم والي يعرف تفسيره يعلمني زين ولا شين مايهمني بس اعرف وشوذا الحلم ونا اعتبره رئيا لاني اذكره كنه قدامي هلحين نرجع للاولين الله يسكنهم الفردوس اجمعين الي نعرف والي مانعرفه هذا حقهم علينا مرت سنين على نجد ماشافو القطر يعني المطر ويقولي جدي ياملا الفردوس انها خمس سنين متا تاليه يعني ورا بعض ونتم خابرين حاجه الناس للمطر كلش على الله وثم المطر وصارت العنز وعيالها اثنين بخمسه ريال ولا احد يشري وفي السنه السادسه جاهم الامطار وفرحو اهل النخيل وهل الغنم وفيه ناس واجد يبعلون يعني ياخذون صاعين قمح ويروحون للبر ويعزقون الارض يعني يحرثونها ثمن يبذرون العيش الي معهم ويرجعون لديرتهم الله سبحانه هوالي يسقيه بالمطر ولا تحرو حصاده يروحون الرجال والحريم وبزورهم يحصدون القمح البر ويبارك الله في زروعهم وبو صاع يحصل عشره بس الي افكر فيه تمر الغنم والبعارين ويردونهم اهلها وهم في بر ولا حولك احد بس الذمه ومخافه الله سبحانه بين عيونهم وبس تراي قصرت:clap: وااخر دعوانا ان الحمد لله رب العالمين وسبحان الله وبحمده سبحان الله العظيم عدد خلقه وزنه عرشه ومداد كلماته الله يحفظكم من كل شر وياقاكم |
الحمدلله على سلامتك
والحمدلله على رجوعك وفي انتظار جديدك 🌹🌹🌹 |
هلا ومرحبا ومسهلا فيك يالركام الماطر الله يسلم قلبك الطاهر من كل شر وبشر بالسواليف القديمه الي توسع الصدر وسالفه المعيقليه ابي الناس ينتبهون منذا الحمير وقبل امس سارقين الرجال بنفس الطريقه ومصور ثوبه راحت المخبات ونص الثوب انشرح نصين الله يعوضه خير |
بسم الله الا بذكرالله تطمئن القلوب -لا اله الا هو الحي القيوم يالله تحييهم وليا حيا كثروليا كثر تنثر لكبيركم وصغيركم وذكركم ونثاكم خل اعلمكم برمضان منول ايام بيوت الطين الصغار يفرحون بليل رمضان علشان يسهرون الين الساعه تسع باليل وبعظهم مايقاوم النوم يرقد قبل يالمسلمين انتم مثلنا ماتاكلون المكرونه الا برمضان ولها طقوسها بعد مثل ماناكلها الا في صحون نسميهن صحن بلم وهي مصنوعه من ماده نسميها الصين وهي تجي مستطيله الشكل وسريعه الكسربعد وهذا هو البلم والظاهر لو ماعندنا بلم ماناكل المكرونه وفي رمظان فقط ناكل المحلبيه والتوت ونحبهن كلنا كبيرنا وصغيرنا وش فيها لو اهلنا يعطونا مكرونه في جماد ثاني ولا في بدايه السنه كنه حرام اذكر اهلي ونا جذع قالو لي رح اشتر لنا كيس رز اول مره يوصوني اشتري وذكر كان فيه ازمه للرز ولا فيه الا رز ابن رصيص شريت كيس وطبخت منه امي ياملا الفردوس وتناديني تقول هذا وشو قلت رز مافي السوق الا هو قالت باتله ازيده بالماء ولا سر فيه حبته منتفخه وطعمه غير مهوب زين ذكرت شي خل اعلمكم اول ماجانا جبن كرفت شي حجمه كبير وسعره بريال ونص وحجم وسط بريال والصغير بريال الا ربع منول عندي بسطه ناوي التجاره ومن البظاعه علبه عليها صور الفنانين اختر منهم وخفس على الصوره وحظك ونصيبك والصور لطلال مداح وسميره توفيق وهيام يونس ذيك الي يالله تفتح عيونها وخسرت البسطه كلها لان ماعندي حسن تصرف كل ما ابيع شي اشتري حلاو الساعات الي يتهتمن ما اقاومهن ومع الايام اندثرت التجاره والسبب حلاو ساعات اذكر العجيزات جمع عجوزقبلهن في السكيك يسيرن على بعض وفيهن حبهن للخبر تجي تمشي من عندي وهي مطلعه عين ومغطيه عين وتقولي مننت وليده وقول مدري منيب معلمك خلاص اصبحنا اعداء هلحين وتبدا تهددني الا علمني من انت وليده ونا رافض اعلم عناد ون طاولتني الا علمني يبدا الكر والفر بينا هي تكب علي تراب ونا اجيها من ورا ووطي على عباتها ثمن حول ماتشنقل على ورا وتبدا بالصلح قصرت ظعيفه تبي الفكه ونا لا يمكن اقبل الصلح الين تدخل بيتها اسكنهم الله الفردوس وميمتي وبيي وخيي وجدي ونا ونتم امين وكملت ودملت وركبت حميرها وشنقلت يعني طاحت على وراها هذي شنقلت يالتوالي كلش ماتعرفونه ونا كني من اصحاب الكهف اشرح كلامي وفي وداعه الرحمن الله يحفظكم وعيالكم من كل شر وسبحان الله وبحمده سبحان الله العظيم -عدد خلقه وزنه عرشه ومداد كلماته ورضى نفسه |
| الساعة الآن 01:57 AM |
Powered by vBulletin .
جميع الحقوق محفوظة © لشبكة ومنتديات البراري 2010