|
السلام عليكم ورحمة الله وبركاته
|
وعليكم السلام ورحمة الله وبركاته يا هلا ويا مرحبا اخوي تميم نورت المجلس والله ييسر أمرك ويعينك على ما ابتليت به تحياتي وتقديري :ordh: |
ســـــحــاب ويـنـك مختفي كـم ليله اشـتـقـت لـك شـوق الطفل للتسالي يـا عـمّ شــوفـك والـســوالـف قليله من دونك المجلس من الناس خالي :ordh: |
اقتباس:
يامرحبابك عد وبل المخيله وعداد براقن سرا باليالي عندي لبوسيرين حبن وشيله وحبن يجي في الله ياهملالي اطرب الا شفته يسوق الجزيله وبعض الشعريطرد هموم الموالي شفهاعيوني بالسهركل ليله تنثرمدامعها وعلى الخد سالي ورجي عظيم الشان يغفرلي ميله ويدمح لي الزلات دق وجلالي هذي خريبطاتي على قوله العجيزات منول:038::038: وبشر بالسواليف |
يالله تحييهم كلهم وليا حيا كثر وتنثر وتزبر بعد :z-attack::z-attack: هذي سالفه صايره لي وش رايكم فيها ونا اشهد ان الزمن يخلف ضنونك كنت مسلف احد الاصدقاء مبلغ 13 الف ريال اذكره اتصل علي وقالي ظروري جبلي المبلغ وقلت له وين اجي يمك فيه انا ماعندي ارتباط وقالي عند اسواق السلوم الي في الشفاء بالرياض حول بيتهم وهلحين هدوها من سنين اسواق السلوم المهم اعطيته المبلغ ورجعت لبيتي في اقصا الشمال منول وهلحين مخرج 9 حي الازدهار ومرت السنين تتلا السنين وتزوج الصاحب ورزق بعيال يعني لي معطيه الفلوس حول الخمس طعش سنه ويشهد علي ربي ماعمري فتحت فمي بكلمه من ناحيه الفلوس والتزم الرجال وصار له لحيه بعد العرس ولا تسمع الا الكلام الطيب يطلع منه وفرحت له ولهدايته والتزامه الشديد مهوب يخالف كلش فيه طاعه الله نفرح فيه وتصلت عليه في دخول العشر منذو الحجه من ثلاث سنين وباركت له وهو ماقصر بالحفاوه والترحيب وسكرت منه وبلحظه ويجيني اتصال من احد الربع يبي الفزعه الله لا يفزعنا وقلت له شوي وكلمك المهم ذكرت رفيقي الي انا متصل عليه اهنيه وذكرت ان عنده لي 13 الف ريال من سنه نوح عليه السلام وتصلت عليه ابو فلان والله ماجت في بالي الا بسبب مطلب رفيق وقلت له انا محتاجها جعلي معدمك وعلى طول قالي ابشر من عيوني بس عطني رقم حسابك في البنك ولا يكون خاطرك الا طيب وعطيته رقم الحساب وجلست انتظر وتصل ثانيه الي يبي المبلغ وقلت له فيه واحد توي مكلمه ويبي يحطه بس في الحساب وهو يعرفه ومن ربعه بس انا مخفيه منهوماله داعي كلش يدرابه ولو هم ربع هذا من زود محبتي لهم ونتظر ونتظر يوم يومين والي يبي المبلغ شاب علي ونا اصبره ويوم اتصلت على الي عنده المبلغ رابع يوم ولا الجوال مقطوع وبيته ماادله لانه كل سنه في بيت وااقسم بربي حتا لوي اعرف البيت يحرم علي اطق الباب وطالبه بفلوس وربي يشهد على كلامي بس اخطا في حقي وحرجني عند الثاني الي يبي الفلوس وضيق صدري ولوه قالي اطلب ربك مااملك المبلغ كان اهون علي والدنيا تحظر وتغيب ولا هوب قبل تجي في يدينا الدراهم احيان وحيان ماتطيع تجي الا بالجهاد واليوم لي ثمان طعش سنه ومازلت انتظر بس اني اتصل عليه ماسنه الله ان جابها ولا مهيب اغلا منه عندي والزمن غير طباع اهله سبحانك اللهم وبي حمدك اشهد ان لا اله الا انت |
هلا ومرحبا بالغالين كلن بسمه خفت اموت ونا ماعلمتكم بذا السالفه ههههههههههههههههه منول نرقد من مسيان ويمكن ماتعرفون مسيان يالتوالي يعني عقب العصر نسميه مسيان كلش تبون له ترجمه ياعيال الهمبر قع على قوله رفيق لي هههههههههههههه نرجع لسالفتنا ونرقد في الطايه يعني السطح يعني العليا هههههههههه انحن نسميه منول الطايه او العليا ولا جينا نرقد ونحن بزور وتصير داااايخين خلقه تجي جدتي ولا امي جعلهم للفر دوس ومهاتكم قولو امين تراي احب امي هههههههههههههههه لي كم قصيده فيها ياملا الجنه وقول للي امه او ابوه حي طع شور من شار عليك برررررر فيهم وشلهم بعيونك تراهم مايتكررون بالدنيا ولا لهم عوض فالله الله بسعادهم وتراهم يحبون تقليب الذكريات القديمه وتلقاهم يظحكون بعد جعل ربي مايحرمهم الفردوس كلهم ونحن معهم وذرياتنا امين وذكر كم بيت وقول فيه يومك ترا عندي حياتي هنيه ينور علي البيت مابه ظلامي ولا قلت يمه قلتي لبيه ليه لا يابعد من حج وصلا وصامي ولاظاق صدري مدت الكف بيه كم ليلتن في حظنها النوم جاني وصلو على المختارنور البريه الي بنوره نقتدي من الظلامي المهم تقعد امي تسبحن علينا ذا السبحونه وغيرها بعد هذي سبحونه النباقات سبع بنيات النباقات سبع بنيات راحن ينبقن وشو ينبقن يعني يجمعن النبق والنبق الي هو العبري المهم يوم وصلو السدره او العبريه ولا ها وش كبرها ومليانه نبق الي هو العبري ولا البنيات كل وحده لا بسه لبس واحد بس يعني وحده لا بسه صريويل يعني صروال بس انتم خابرين لازم نصغر كلش ههههههه ووحده لابسه فنيله وحده لا بسه عبيه يعني عبات ووحده لا بسه شيله وحده لا بسه نعيلات كم طلعن ذولي مدري المهم الاان تموسبع بنيات والسابعه مفيصيخه يعني ما عليها شي وش اسوي هذي السبحونه هههههههههههه المهم يبون وحده ترقا العبريه علشان تجدع عليهم العبري قالو ارقي يم عبيه قالت اخاف تنشق عبيتي وتطقني امي قالو ارقي يم صريويل قالت اخاف ينشق صريويلي وتطقني امي وقالو ارقي يم نعيلات قالت اخاف يتقطعن نعيلاتي وتطقني امي قالو ارقي يم شيله قالت اخاف تنشق شيلتي وتطقني امي قالو ارقي يم فنيله قالت اخاف تنشق فنيلتي وتطقني امي قالو ارقي يم قحفيه قالت اخاف تنشق قحفيتي وتطقني امي قالو ارقي يا مفيصيخه هي عاد الي ما عندها شين ينشق ههههه ورقت المفيصيخه يوم رقت وبدت تهز العبريه ويبطبط ذاك العبري الي وش كثره وش زينه الا يوم جاهم السعلو يمشي بسم الله علينا وينحاشن البنيات ويروحن لبيوت اهلهن ومفيصيخه فوق العبريه والسعلوتحت العبريه وقالها السعلويا مفيصيخه قالت هاه يعرف اسمها بعد هههههههههههه قال تعالي ابا اكلك قالت افتح اثمك ابا اطب فيه ويوم فتح اثمه وهي تجدع فيه هكا القدر وياكله ثمن قالت افتح اثمك ابا اطب فيه ويفتح اثمه السعلو وهي تجدع فيه ذاك الصحن وهو يبلع الصحن قالت افتح اثمك ابا اطب فيه وهو يفتح اثمه وتجدع فيه هكا المقص ويعترض المقص في حلقه ويموت السعلو وتقوم مفيصيخه وتحول وتروح لهلها يوم راحت لهلها وتعلمهم ويطلعون اهلها ويروحون يبي يشوفون السعلو ويوم وصلوه ولاه وش كبره وميت ويقوم ابو البنت المفيصيخه ويشق بطن السعلو ويلقون وسط بطنه ذهب ويلقون وسط بطنه كلشي ما صار سعلو طلع بنك الراجحي هههههههههههههه المهم ما علينا ويغنيهم الله لانهم هم افقر ناس في القريه هما بنتهم مفيصيخه ويغنيهم الله ويشترون بيت ويشترون مزرعه ويشترون سياره روز رايز هههههههههههه اكذب ما عندهم سيارات بس حبيت ارسم الظحكه هلى وجيهكم الطاهره وبس ههههههههههههه ماشاء الله طلعت العبريه كلش فيها ههههههههههههه هذا مطبخ بيت مهوب عبريه ههههههههههههههه وطلع السعلو مستودعات كلش في بطنه ههههههههههههه وفي النهايه اقول سبحان الله والحمد لله ولااله الا الله والله اكبر عدد خلقه وزنه عرشه ورضا نفسه ومداد كلماته |
اقتباس:
صح لسانك يا عم سحاب شاعر جزل الله يعطيك العافية ولا يحرمنا منك يـا شـيخ عـندي أنت تسـوى قبيله ما اوفيك لـو قلت البيوت الجـزالي لجلك تـهــون نـفـوس عندي ثقيله واصـبر على بلـواي بـأول وتــالي خيلي مــع الـبـيـدا يسـابـق صهيله وحــد ســيفي ينتصـر في الـقـتالي ما اخوض فيها في الأمور الهزيله ولا شـغـل بـالي رخـــوم وحــثـالي أمشي على درب الفخـر والفضيله وخـاوي قـروم وشـيوخ ورجــالي :ordh: |
اقتباس:
هههههههههه :038::038: هههههههههه :038::038: يا عم سحاب بعض الناس ياخذ القليل عشان ما تحسبه عليه دين هههههه يعني يبيك تنساه ... هذا الأمر للأسف يحدث عندنا بكثرة يطلبك ميه ميتين ألف ألفين إلى عشرة .... وانسى بعدها دراهمك هههههه أنت في نظر اللي تطلبه دراهمك هذي ... انسان ما تستحي ولا فيك خير ولا انت الصديق الوفي ولا الكريم هههههههه للأسف هذه ثقافة جيلنا الحالي ولازم في هذا الوقت تأخذ بالمثل اللي يقول ( إن لم تكن ذئباً أذي أكلتك الذئابُ ) كلمة ( أذي ) إضيفت بعد أحداث 2001 هههههههههههههه الله يعوضك دراهمك والزمن هذا اللي يعمل أقل مجهود يلقى دراهم فما يحتاج تضيع دراهمك مع كل من هب ودب إلا شخص يعز عليك وفعلاً محتاج مساعدة وانت مطلع على ظروفه فهنا يأتي دورك وواجبك . تحياتي لك يا عم سحاب والله يوفقك دنيا وآخر ويجمعنا مع الحور العين :ordh: |
هذي قصيده لي شايلها وميض الصاعقه جعل ربي يسعده تبون الصدق يالغالين وربي يشهد تراي اكتب القصيدات اوسع فيها صدري وصدور ربعي وقول الي في خاطري بس مهوب لجل يقولون لي شاعر ونا ادري الشعر يبي وزن ومعنا وقافيه ونا من جنبهن قبلي كسور همن في قلبي لو قسمته على الناس تسمع جميع الناس منه يصيحون قصيده- سحاب شقراء شيله وميض الصاعقه جعل ربي يسعد قلبه راعي الغيبات https://cdn.top4top.net/d_fa390538e41.mp3 … … ----------------------------- اذكر في بداياتي يوم توي بادي اعرف للكمبيوتر امتحني واحد قبله يخرب علي وهو من الي يقولون هكرز بس حسربي وبشكل يومي وبالساعه بعد الله يسامحه وخرب علي كلش صرت مكتب شي وقالي واحد من الي يحبوني وسمه فهيد -- وينك ياسحاب ماتكتب شي من زمان ونا الي اصوق على المفسد وقلت يافهيد لهانا عن الحق ذا الهيش الظايع الي ظايعاتن دروبه يافهيدولد الاش يحتاج بخشيش يقول تحدوه العرب ومادروبه والله ون زود علي التشاويش لفظح مقامه بين جلده وثوبه الله لا يلومني ولا وش عليه من شايب يكتب ويسولف ولا يخطي على احد بس بلوا ثمن كتب لي امسح ابياتك وعاهدك ما اسوي لك شي ومسحتهن ومن بكرا تسلط علي هههههههههههه تصدقون انه يخلي المنتدى يقبس مثل فليشر السياره هههههههههههههههه بس حمق الناس الي يحبوني وعلموني منهو وعرف ابوه وجده وعطوني رقم جواله وكتبت له قصيده ورسلتها له وبينت له سالفه عن جدانه قبل لا ينولد وحذرته يفكني من شره وبشركم من يومها ماشفته الله يحلله ويبيح منه ويسامحه |
عز الله انك صدقت بعض الناس بلوى ما يجد نفسه إلا في أذية الناس ولكنهم مثل الرياح التي تحمل روائح القاذورات إذا ابتعدت عنهم أمنت أذيتهم وصديق تعرفه وتعرف طيبه وترتاح له في هذا الزمن عض عليه بالنواجذ تحياتي لك يا عم سحاب ولا تحرمنا منك والله يوفقك دنيا وآخره |
الشيله رااااااااائعة جداً الله يعطيه العافية وميض الصاعقة ياليت يا عم سحاب لو تخليه يشيل قصائد أخرى مناسبة لصوته |
اقتباس:
والله اني قايل له وشال هذي لاظاق صدري يهل الدمع من عيني غصبن بلا طيب همومي يوم اكابدها وصيح كني غريرن ماله معيني ابوه ميت مع امه في حرايقها ابكي وشاهق وزود الهم مضنيني شفها دموعي على الخدين مدرجها وميض وينك عليك الحال مشقيني لوحيت صوتك يسلي الروح ويطربها يالله طلبتك رجيتك لا تخليني عبدك دخيلك عظيم الشان فرجها مافيه غيرك رجيته ونت كافيني يسامع الي في بطن الحوت يلهجها سبحان ربي عدد كل الموازيني وعداد خلقه وسبحان الي حاسبها وباقي القصيده وعجبتني وعجبت غيري جعله يسلم وشال بعد من يامن الدنيا تصيبه بالوهام مسكين منهويفتح الهم بابه قبلك كثير وبعدك اكثر من العام ومحدن تهنا في الزمان بشرابه الين قلت اكتب ودمعي وسم بخدي وسام وثري انا المصيوب ونتي مصابه وكلهن اذكر حطيتهن في البراري بس بعظهن معاد يشتغل مدري وراه الله عاد من زين القصايد هههههههههههههه بس توسع الخاطر بالنسبه لي |
السلام عليكم ورحمه الله وبركاته هلا بالغالين ابا اقولكم سالفه هكا الرجال اللي معه بندق ام فتيل القديمه كان يمسحها وهو معشيها يعني مجهزها للرمي وثارت البندق في وجهه ولعبت في حنوكه وبغا يموت الظعيف و لا هنا منول طب وتشاوى الرجال نجاه الله سبحانه بعد سنين بس قبله اذا شفته والاه متلطم بشماغه لان حنكه او الفك السفلي طاير وقبله جعله في الجنه يسعبل وقبله متلطم بشماغه المهم قال لواحد ابيك تروح معي لم قريره لا نها مثره عليه البندق حتى في الكلام قال لواحد ابيك تروح معي لم يعني ام لم قريره علشان نخطب بنتها قريره يعني نروح لم منيره علشان نخطب بنتها منير قال الر جال الي هو يبيه يروح معه يبو فلان هلحين ابوها وخوها مهمب فيه اصبر الين يجون ونروح لهم ان شاء الله قال الي يبي يخطب مانيب ثابريعني منيب صابر قوه هلحين وراحو ومنول الباب حق القهوه مطرف يعني ما يصكونه في النهار وطقوا الباب وقال يم قريره يم قريره يعني يم منيره قالت ام منيره يالله تحييهم منول الحرمه سنعه كنها رجال ولا ام منيره وبنتها منيره في القهوه يتقهوون قامت منيره وتوزت ورا الباب وجو الخطاطيب قالت الام يالله تحييهم قال ما فيه الى سلاقك يم قريره يعني مافيه الى سلامك يم منيره جايين نخطب بنتك قريره لي وتكلمت منيره من ورا الباب من هول ماتسمع وقالت الله لا يجعلك حظ لي بالدنيا ورد عليها على طول وانتي القراري ياقريره يعني ونتي القماري يامنيره وطلعوا هوشه من اولها ههههههههههه ونتهت السالفه يالغالين ونا الي قايلي عنها الرجال الي راح معه بلسانه جعله للجنه |
يا الله حي العم سحاب تو ما نور المنتدى هههههههه والله يا علوم الاولين فيها نكته غير طبيعية هههههه هالحين ما عاد فيه إلا قال الهندي وقال الباكستاني من كثرهم !! على طاري الزواج .... حسب ما سمعت من شيبانا أنه البنت من أول ما تطول في بيت أهلها يعني على طول تزوج .... إذا سمعوا إن فلانه تطلقت أو مات رجالها تنافسوا عليها يبون يتزوجونها لكن هالحين العوانس مالين البيوت الله يفرج همهم والشباب حالتهم حاله احدن مبتعث واحدن في البيت ما لقى وظيفة واحدن مبتلى في المخدرات وكلن في حال الله يغير الحال حفظك الله ورعاك يا عم سحاب تحيتي وتقديري |
اقتباس:
هلا ومرحبا يبو سيرين الدنيا ونا اخوك تغيرت وتغيرو اهلها وصارت الحياه مافيها لذه مثل منول ونشد الشيبان عن لذه الحيات منول رغم الجوع والكد بس لها طعم ثاني ونشراح في الصدر وهلحين على قولتك مافيه الا الهندي والباكستاني نجيبهم وهم اجهل الجاهلين ونعطيهم رواتب مايحلمون فيها ومع هذا ينحاشون ونت مالك قبيل |
🔹رسالة من مغترب من ديار نجد إلى أهله🔹 ؛ هذا نصها ؛ فتأمل تصويره لأحوال أهل زمانه المعيشية بلهجته العامية الدارجة :
" السلام عليكم ورحمة الله وبركاته ومغفرته ومرضاته. مشينا من عندكم خبركم حادرين مع الربع، نمشي في البراد ونقيّل وقفة الشمس، ونمشي اذابرّدنا، ونسري أول الليل، ثم نمرح، وإلى تريقنا عقب الفجر سرحنا وما وصلنا الاعقب عشرين ليله مَشْين على رجلينا خبركم المطايا ضعيفة يالله تشيل الزهاب ماتنطح نركبها، والمرعى قليل ولقينا ديرة عجيبة عندهم شي يسمونه خبز لا هو قرصان ولامراصيع، ولاتزينه الحريم في البيوت يزينه رجال بعضهم عجم في دكاكين فيها تنور كبير ويبيعونه على الناس بيع وزين ياكلونه يغطِّونه اما على بلول والاعلى حليّبه والاعلى حلو يسمونه شاهي والشكر سكر والطبيخ رز اسامي عجيبه، والي اعجب ويهوّل سرج تشب بليّا قاز، وحديد في الجدار يصب ماء، وحديد في السقف يهب هواء، ونشدنا مطوعهم عسى مهوب هذا سحر؟ وقال لا هذا كرهب، وفي ذمته. واشتغلنا من يوم وصلنا، وعندهم نعم، عندهم تمر يتصارخ من زينه، والحمدلله ماقاصرنا الاشوفتكم والجماعة والديره. الله الله من يوم تسيلون وتردّ الرّكايا تكزّون تخبرونا نسند لكم، واحرصوا على ملاقط الجمّه، وبدّو النخل الصغار الي ماأخذ على الهمال لايموت، واجمعوا الجمّه في اللّزاّ ثم افجروا المطلاع ونقذوا النخل لاتنقز قلوبه، واشذبوا العسبان اليابسه اخف لها، والمعز والشياه الي مافيها مناح طلعوها للبر مع عميلنا لاتهلك من الجوع، والفصلان ان كان خلص العلف الي في الصّفه بيعوها على القصّاب مادام انها مرغوبة، واحرصوا على ابوي وامي واخوي وعمي خصوهم بالأكل الزين، ودحوم يودي ابوي كل وقت للمسجد قبل الأذان، والعبدي يودي عمي، وعثيمين يودي اخوي يقضبون يديهم لايروحون لحالهم ابد خطر عليهم يطيحون، وقهوتهم وقدوعهم هم وامي تزهبونها لهم تالي الليل قبل الفجر، وريوقهم عقب الصلاة، وغديّهم عقب الظهر، وعشاهم قبل المغرب، ولا يخلى من سمينه وقريعات ومايتيسر وياصلكم مع الجمّال ابوعلي اربع وزان قهوه ووزنة هيل ووزنة مسمار عويدي وخمس وزان شكر وكريتين شاهي وابوعلي يعرف يسكب الشاهي قند، يعلمكم تصليحه وايضا قطيمة طبيخ تحطون منه ذواقه في العيد، والقادم في هذا الزاد كله الوالدين والعم والاخ الله يحسن خاتمتهم، وايضا طاقة قماش مريكان وململ وبفته وجلال وغطوة وشيله لأمي ولك ولجارتنا العجيز ولاتنسون تذوقون جيرانا يا مطبوخ او ني، وحليب المنايح القادم فيها ابيي وامي وعمي واخيي والفاضل لكم. وعباتي المزويه علقوها في الوتد لاتحرق ومن احتاج لها منكم اوالجيران فيلبسها، وبشتي الوبر حطوه على المسطاح عن الحرق ويصير لبوي وعمي واخوي اذا احتاجوا له يلبسونه، وانتيِ يا ام سعد تحتسبين الأجر في خدمتهم وابشري بالأجر والدعاء مني ومنهم وبرّ عيالك وبناتك. واحرصوا اذاجاء مطر لاحظوا المثاعب عن السدد وخوش الجدران، والبقرة الدبساء اذا ولدت احرصوا لاتروم ولدها وان بغت ترضّع روحها فحطوا فيها سواجير عن الرضاع، وزبدها اجمعوه للحنيني في الشتاء، ولازم تروّحون لي خط تخبروني عن احوالكم واخباركم مع اول واحد يحدر يمّنا و يكتبه واحد ينعرف خطه ترى الخط الي روحتوا عفنا مالقيت احد يعرف يقراه يقولون هذا جرة نمل مهوب كتابه، وتراي موزين ريال فرانسه في فاغرة الرّوشن وريال عربي في سقف بيت الدرجه لا تاخذونها الا عند الحاجة الكايده مثل مشترى ناقة للسقي او بقرة للدواس عقب ما تشاورون الوالدين والعم واخوي فهم ابخص، والمحال لاتغفلون عن دهنها والغروب ربصوها قبل السقي افطنوا لها لاتشنن وتكسر، والعراص من يوم تشوفون الحيا مقبل افتحوها ونظفوها هي والوظايم ولاتقطع الحبوس يطلع السيل من النخل، والخدمه اجمعوها من كل الحوشه وطلعوها وكودوها واسقوها كل يوم حتى يستوي اطيب له وانفع للنخل، والا احتاج جارنا للحمار فلاتردونه عطوه يقضي لزومه وان احتاج فزعه فلا يخلونه العيال يفزعون له ليل او نهار مثل ما انتوا خابرين حاله وحيد يرحم وجار له حق علين كبير هذا ولا ودي اطول عليكم وعلى الكيتب سلموا على كل اهل الدار خصوص الوالدين والعم والاخ والجيران والجماعه من عندي الربع ومعزبنا يسلمون وانتم سالمين والسلام." هذه الرسالة تحكي أحوال بعض أجدادنا قبل أكثر من ستين عاما للعظة واﻻعتبار ؛ فالحمد لله على نعمه التي لا تحصى . |
الله الله الرسالة فيها كثير من المعاني ووصف دقيق لحالهم هاك الزمان بين طيات الكلمات يبين مدى الحب والألفة ... والخوف على بعض مهو مثل هالحين الله يخلف فيها أيضاً الكثير من المسميات المندثرة أغلبها لم أعرف معناها والله مدري وين بيوصل حال العرب لا بد من وقفه جادة والنظر في وضعنا اليوم وتدارك الأمر فيه حديث عن الرسول صلى الله عليه وسلم أنه في آخر الزمان يكثر الخبث واللي يشوف البنقاله والهنود اليوم يقول بلا تردد صدق رسول الله فهم من أتى بالخبث لجزيرة العرب غش وسرقة ومخدرات وسطو وكل ما يخطر على البال !! الناس كانت لا تعرف شي واليوم المسلم يخدع المسلم ولا يأمنه على نفسه للأسف بسبب ما بثوه هؤلاء الأجانب من أفكار هدامة عمرو بن لحي أتى بالشرك لجزيرة العرب وله يوم القيامة عذاب عظيم كما قال الرسول صلى الله عليه وسلم وكذلك سيلقى من أتى بالخبث لجزيرة العرب والله أعلم شكراً لك يالركام |
اقتباس:
ياملا العافيه يالركام ترانا منول مانسميها رساله نسميها خط ههههه وتلاحض في كلامه راحه بال وسعه صدر وخوف من الله سبحانه وتلاحض النفس الطيبه والبرفيمن حوله وخوفه عليهم لا ينقصهم شي رغم الفقر وكانت بعض بيوت الطين يسكنها ثلاث وربع عوايل مع بعض يكونون قرايب طبعن وتكون المساحه للبيت 70 مترثمن يقولون بيت كبير وتطارد فيه البعارين من كبره وسبحان الله العظيم مبارك الله في المنازل ومكبرها في عيون عباده وهذا شي انا مريت فيه وشفته بعيوني نعم هي البركه الا جعلها الله سبحانه في المنازل او في المال او في العيال تشوفها اضعاف مضاعفه الله لا يحرمنا البركه في كل شي ولا يحرمنا رحمته التي وسعت كل شي |
هذي سالفه واحد يقول فيها مساكم الله بالخير اليوم يا اخواني عندي لكم قصة حصلت لي شخصياً قبل عدة سنوات.. كنا نسكن في أحد القرى القريبة من الرياض وهذه القرية أصبحت مدينة كبيرة الآن .. كانوا الناس يبنون مراح الغنم أو الشبوك بالقرب من القرية ومعظم هذه الشبوك تكون في الجهة الغربية من القرية وكانت الشبوك شبه متباعدة وموقعها على جانب أحد الأودية الكبيرة اللي يمر بجنب القرية وكان كله تغاريز .. كنت ماشي بسيارتي الصغيرة مع أحد الردميات اللي تباري للوادي ولكن بمسافة عنه وأنا ماشي على مهلي لفت إنتباهي (حمار) أعزكم الله كان متمدد على جنبه في وسط الوادي وكان يحاول الوقوف ولكنه لايقدر دققت النظر فيه ولاحظت أنه مقيد فيه شيء يعيقه.. أشفقت على هذا الحيوان المسكين وقلت بروح اشوف وش في ذالحمار.. سيارتي صغيرة ومستحيل تطلع من الردمية لو شبر.. وقفتها على الردمية ومشيت على رجولي تقريبا حوالى 100 الى 150متر مع المنطقة الرملية المحيطة بالوادي لين وصلت الحمار.. يوم شفت حالته قلت حسبنا الله ونعم الوكيل كان في رجوله دم لأنه مربوط بأسيام كثيرة.. رجعت لسيارتي وجبت الزرادية وقصقصت الأسيام كلها وخبطت الحمار عشان يقوم ابي احتفل بإنتصاري وبشوف الحمار وهو واقف على رجوله عشان أخلي مسؤليتي أمام الله.. المهم بعد الخبطة الثالثة على فخذه براحة يدي فز الحمار بشكل غريب فنهض بسرعة ووقف على رجوله (ففرحت).. هو بس قام الله لايوريك وهو يعطيني رأسة ينقز فوق ويخبط على يديه ويلوي رأسه ويفغر فمه بيعضني كني أشوف سنونه الآن.. حاولت فيه لاوالله مافيه طب فسفان ومصمل يعضني.. حطيت رجلى لم سيارتي ياجماعة الخير ويصير يحدني عنها حد يبيني.. حسيت بكم عضة وأنا أركض وكانت كل عضة تزود من سرعتي ولكنه ماتمكن زين مني.. المهم ويقعد يرددني لين خلاص إنقطع نفسي والحمار ولا همه خلاص أنا وصلت حدي بطيح سيارتي منا حوله طردني عنها.. وربي يجيب لي راعي ذيك السيارة هايلوكس أثره يشوفني وهو عند غنمه يوم شاف الدعوى طولت وهو يجي.. كأنه نازل علي من السماء(بغيت أروح طعام جحوش) وهو يحول بيني وبينه بالسيارة والحمار تنجن جنونه يبيني تقول بيني وبينه ثأر.. المهم قرب الرجال مني ونقزت معه في الحوض وتركت الحمار النذل ومشي بي لين وصل عند سيارتي وكا ميت من الضحك.. قال خلك أنت وش تبيبه هذا الحمار كان وش حليله وكان عند غنمنا ولكنه من مدة صار يعض الناس والغنم والحالة اللي فيه ماهي سعار وانما هي حالة تصيب الحمير وترى اللي رابطه في الشعيب أنا وأبوي كنا نخطط نشيله ونقلعه عنا بعيد بس أنت قلبك حنين ووداك في داهية.. أنا ماقلت ولا حرف مقدر منقطع نفسي طاردني مسافة ماهي بسيطة النذل هذا وأنا جالس أفكه بشويش عشان معوره.. وهذا جزاي منك يالحمار صدق إنك حمار.. |
يا هلا ويا مرحبا يا عم سحاب حياك الله صراحة أستغرب من هالحمار ... يعني حالته غريبه ما قد مر علي حمار مثله يمكن عضه كلب والا حالته النفسية سيئة جداً الحيوانات تعاني في بلدنا ... وبعد ما شفت مقطع اللي يضرب الحصان على راسه لين مات واللي يحرقون الحيوانات في الأقفاص وأنا غاسل يدي من العالم كلها يعني إذا كان في أرض الحرمين وأرض العروبة يحصل مثل هذا فماذا بقي في العالم والله يا أمور أصبحت ترفع الضغط تشوف مقاطع وتصرفات هالناس تستغرب لكن ما نقول إلا الله يصبرنا ويختم لنا بخير تسلم يا عم سحاب حفظك الله ورعاك تحيتي وتقديري |
هلا ومرحبا يبو سيرين انت خابر الدنيا فيها الطيب وفيها الخيب بس لله الحمد مجتمعنا الطيب فيه هوالي طاغي وهذا من فظل ربي سبحانه الله يهدي ظال المسلمين |
صدقت يا عم سحاب حفظك الله ورعاك |
اقتباس:
تسلم يبو سيرين الغالي |
يـا سـحـاب العمر مـا بقى فيه قدر الذي قد مضى ،،، الذي قد مضى ،،، الذي قد مضى والـشـقــــا للذي يـنـشــد الـــدنـيـا وتـغـرّه فتونها مـا بقى أرض مثل ارض اجـدادنا الـزمان انقضى ،،، الـزمان انقضى ،،، الـزمان انقضى والـشـقــــا للذي يـنـشــد الـــدنـيـا وتـغـرّه فتونها والله يعين من يغصب القلب في شي ما به رضى ،،، شي ما به رضى ،،، شي ما به رضى والـشـقــــا للذي يـنـشــد الـــدنـيـا وتـغـرّه فتونها :ordh::ordh: |
اقتباس:
توي شفت ابا ارد عليك بس بعد شوي انشاء الله تعالى هلحين صفقت المعزبه تبيني اوديها انت خابر عاد مانبي نزلهم والعمر مقفي وكلش مقفي ههههههههههههه |
ممداني الليله على الرد ولاكن بكرا كانا من الحيين انشاء الله تعالى |
حي الله شايبا الغالي
من طول الغيبات جاب الغنايم كل التحايا |
اقتباس:
ياجعل والديك ونت معهم للفردوس امين اسفرت ونورت |
لا تنشدني وشذي هذي الي تشوف وبس ههههههههههههههههههه يابوسيرين السنين الماضيه قد طوينا حبالها ماتعود ولو تصيح صياح بمر ربي ماتعيد اسئل الله يجعل ذنوبنا قدتم غفرانها يالله اني طالبك ونت للعقده حلالها تعطي برايك ماتشاور قريبن او بعيد اسئل الله يجعل ذنوبنا قدتم غفرانها كل ماذكر بالحد لي فراش اموت بجالها ترجع النفس الشقيه على مس القديد اسئل الله يجعل ذنوبنا قدتم غفرانها طالب الي يعلم الغيب وكل احوالها نافخ الروح الكريمه وحنا له عبيد اسئل الله يجعل ذنوبنا قدتم غفرانها الله الي يعلم الغيب ومسقي جالها جل منهويعلم الكون كله ويستزيد اسئل الله يجعل ذنوبنا قدتم غفرانها سحاب شقراء ابو سيرين حاولت اسوي مثلك وطارت الفكره اول مره اكتب كذا اما ابياتك لو توحاني تسمعني ونا اديونها بطول الصوت من زين الصوت بعد كني احرج في المقيبره ولا في الجفره عند الديانه هههههههههههههه |
حي الله العم سحاب صح لسانك على الأبيات أنا لقيت لي ناس يغنون على لحن وغنيت الابيات على لحنهم هههههههه |
السلام عليكم ورحمه الله وبركاته يالله تييهم كلهم صغيركم وكبيركم ذكركم ونثاكم وليا حيا كثروتنثر وتزبر بعد بسم الله نبدا كنا في رمضان انا وشايب معي من سنين وبنين وبيه يجلس عندي لانه يوسع صدري ونا اوسع صدره جعله في الفردوس بس ذا الكلام مبطي وهوتوه متزوج ونا مابعد تزوجت ولا صلينا التراويح اغصبه يروح معي للبيت ولا نروح لشعيب الغدير وهذا الكلام في شقراء المهم نروح للشعيب الي قبال المستشفى ونسهر فيه على الرمل ويصير الشعيب مليان ناس جالسين فيه يصير براد وينامون فيه بعض الناس الين الفجر المهم الرجال توه متزوج ونا غاير منه تراي امزح ما غرت بس مالي غناه عنه ابد وكم يوم الا قلت تعال معي ياعود بليس يقولي والله يا المره ان تزعل وتوروح لهلها وهو ما اعرس الا وهو عود جن جعله في الجنه ذا الكلام يوم قفوله البيبان بالمجرى يعني من خشب ومفتاح الباب من خشب بعد وهو يشبه لحد كبير فرشاه الاسنان تقريبن وهويجي بطول شبراو اطول شوي ولا جينا نفتح الباب منول ندخل ايدينا مع الكوه وندخل المفتاح في المجراء من منداخل مال المجرا مدخل غير الكوه وذكر بعد مهوب ينفتح بسرعه بعد نقعد نغلغل فيه الين يفتح هذا بعد ان كان منكسر شي من السنون حقه المفتاح لانها من خشب اقرب مال السنون شكل عودان الكبريت هذا اقرب وصف لسنون المفتاح منول المهم كان ذا العود رفيقي يدفن المفتاح حول الباب في الساس ولا جا ياخذه ويفتح الباب به لان منول ما نا خذهن معنا يغثننابالشيل ونخاف يغدن يعني يظيعن المهم وجي ذيك اليله واخذ المفتاح حق المجراء لا ني عارف وينه يدفنه فيه وحطه في مخباتي ويوم صلينا الاخير ونا الي اعزم فيه ابا اعشيه ونا داري مهوب طايع لانه يقولي تبيني اقابل نطفك ذا الشينه وخلي الزين في الدار ما يخسا الا انت يعانيني وترا ذا الكلمه احسن كلامه لي من العياره المهم قلت له بصرك رح لحرمك ون طرالك تجي او اشتهيتا مراصيع تعال لمي انا في القهوه ابا اقعد ويروح ونا اروح للبيت وجلس في قهوتي ومفتاحه معي وذا الكلام في رمضان ويوم خذ له كم ساعه ولا الي يصوت لي قلت له اقلط يالله انك تحييه ماشاء الله اجل نثرت الداب سمها وجاعت وجيتا تلحوس عندي قال ما يخسا الا انا قلت وراك قال المفتاح غدا ولا لقيته حرثت السوق الي حول الباب بيدي الين هلكت ولا لقيته مدري ويني مغديه فيه قلت خل اعشيك هلحين وقعد عندي كذب علي وكذب عليك ونوسع الصدر ونروح ندوره انا وياك قال ما ابي عشاء انا واعدهم الليله نبي نقطع راس بليس بس غدا المفتاح ونا اعلق عليه وقول له والله لو بليس منطول لك انت وشهابك لو يشوفك بليس تلطم كان عليه شماغ وطمن راسه ونحاش مدري وش مخلي بنت ها الاحلال تاخذك ونت ما فيك اي صفه زينه الا والشهاده لله انك ما تخلي صلاتك وذي بعد مالك منه فيها كانك ولد ابوك لا تصلي بعد ونا حاط في راسي ذيك الليله احرمه بس لعانه مني بس ونوروح ونحاول في المجرا ماطاع ونا اعرف افتح المجرا لو ظاع مفتاحه وهو يدري عني بس سويت نفسي ما قويت افتحه الين اذن التالي ومسكنا لليوم الثاني وصلينا الفجر ونا الي ابعد عنه شوي وحلت عليه مفتاح الخشب قلت هلحين ما يخالف لو تروح وترقد في بيتك ويلحقني كنه مهبول قدام الرجاجيل الي طالعين من المسجد تحسب ان الر جال مغير يتحمدون ونفوسهم شينه مثل ها الحين لا يجلسون يقولون عليك به جوده جوده لا تخليه الين رحت لعود وقلت له تراي في ظلالك وفي حماك يبو فلان ثمن يدافع عني وتمظي الدنيا على العابدين كنها ما جت ونصيحتي لكم يالغالين على قد ما تقدرون تاخذون الامور ببساطه وسعه صدر ويكون بينكم وبين ربعكم مزح كلن على قدر تحمله منهم لا تمر دنياكم بضيقه ونكد وتراي انا مبلي بالعيون الي كثر بليس ولا خليت احد مارحت له وكلهم يقولون مزبور الين اذانك عيون كان الله في عونك هذي كلمه الشيخ العمري الي يقراء ما علينا بس يمكن يقول احد منكم مهوب باليد نوسع صدورنا صحيح خاصه المعيون بزوده والمنفوس الله يحفظكم منهن جميع ومن كل شر والي يحس بظيق لحد البكاء احيانن ولا هوب عيب يصيح الرجال لو تصيح لحالك الا حسيتا بضيقه مهوب لا زم تكتم الضيقه تراه مهوب احسن لك قل ليش لان الله يحفظكم اخبث الامراض تصيب الانسان بسبب كتم الاحزان وعدم اظهارها خذو تجربه عشرات السنين ومعاصر ها الشي ولا كان مدري مثلكم المهم الي يحس بشي من التكه والظيقه نصيحه لوجه الله اختم سوره البقره كل يوم واذا ما شفتا الفرق بعد توفيق الله قل سحاب يكذب وجعله في ابليس ههههه وسوره البقره يمكن تقولون طويله ويمكن ما للواحد خلق نكون صريحين انحن بشر وش نسوي نقراء شوي الين نحس اننا خلاص وقفو وكملو بعد ساعه مثلها الين تقظي سوره البقره يا جعلكم ما تشتكون من شر لا صغيركم ولا اوسطكم ولا كبيركم اللهم امين |
محدن لفاني ولا سير عليه وللعود حقن مايجيه انقطاعي جالس اسولف مع همومي سويه يالله عساها ماتخيب المساعي قالوتسولف وقلت وش في يديه والي مضامنساه لوهوسماعي يسرحبي الهاجوس دنيا خفيه وعيش ماضي الوقت وعيني تراعي وسج سجاتن تجيني قويه يالله دخيلك مالنا اليوم راعي باكراموت ثمن تحسف عليه والله ماتلقا احد بالوساعي ربي عطاني الطيب مع صدق نيه والي في قلبي اعلنه لك وشاعي سحاب شقراء |
صح لسانك ياشيخ سحاب ..
الله يعطيك طولة العمر يارب .. ومبروكين عليكم الأمطار .. الله يجعلها دايمه يارب .. |
اقتباس:
اسفرت ونورت يارذاذ الغاليه ياجعل ربي يسعد قلبك في الدارين وجعل الحزن مايعرف دروبك امين يارب العالمين اسعدتي قلبي بطلتك الله يسعد قلبك |
يــــا عـمـي الله يـعـلــــم بـالـلي فــيـه انــــا بــــدونــك بــــلا مـعـنى وداعي يـــوم الـعـلـوم الـقـــديـمـه والـهـويـه وســط المجـالـس تـواجـه الاندفـاعي غــذيـت فـكـري وقـــــويـت الـحـمـيـه زرعـت فيني الأمــل واحلى الطـباعي يـــا شــــيخ والله صـحـبـتـكـم مــزيـه مـنـك الـسـوالـف لهــا طـعـم ومتاعي نـتـذكـر الـمـاضي والـقـســوه شـويـه تـغـمـــرنـا في طـيـبـك لـحـد النخاعي يـوم اقـرى مـنـك الـسـوالـيف الـثريه كني اســتمع لـك في بـرنـامـج إذاعي واقــــول يــــا الله في الــدنـيا الـرديه تحفظ سـحـاب وتـطـيـل العـمـر باعي :ordh: |
ياجعل والديك للفردوس يبو سيرين تسلم على ذا الابيات عنـدي ابو سيرين ظلن وفـيـه انعم بظله وخاطري بالتساعي ياشيخ دنـيانا عـليــنا قـويـه العزم طايح ودربها بالرفاعي يالله تبعـدها اليالـي الشقـيـه وتظلنا بظلك بيوم المساعي وتجعل لنا الفردوس دارن هنيه وتمتع الشيبان بطيب المتاعي سحاب شقراء |
بسم الله صلى الله على محمد الا بذكرالله تطمئن القلوب -لااله الا الله وحده لا شريك له يالله تحييهم كلهم كبيركم وصغيركم ذكركم ونثاكم وليا حيا كثر وتنثر بعد اليوم ابا اعلمكم بشي مايخطر على بالكم معلمني عنه رفيق لي وهوشايب كبر جدي هههههه الي يسمعني يقول كني في مهادي انا توي صغيييير شايبنا هذا من اهل حريملاء وكلكم تعرفون حريملا وهلها ونعم فيهم جميع اهل طيبه وفزعه وطاعه جعل ربي يسعدهم جميع ويكفي ان فيهم الشيخ القظيبي الي يقراء على الناس بدون مقابل جعل شايبهم الي ميت للجنه وجعل ولده للفردوس نجي للسالفه تصدقون ان فيه كنيسه بين حريملا والقرينه الي جنبها وكانو يسمونها الكنيسه بالتصغير وكان فيها راهب طبعن ذا الكلام قبل الاسلام وبعثه رسولنا محمد صلى الله عليه وسلم وااثارها لازالت باقيه وهل حريملا والقرينه يعرفونها وبعد طلوع الاسلام يقول الشايب ان اتلا خبرالناس بالراهب انه راح يمشي مع احد الشعبان الين اختفا ولا يدرون عن مصيره هو مات هو راح لمكان ثاني يعني مايدرون هو في بير ولا في بطن ذيب - انا خابره ولا في بطن بعير بس البعير ماياكل البشر عندي سالفه حاصله في حريملا بعد ومعلمني واحد من الاثنين عنها هذي سالفه واحد حلم بكنز ولا جسر يروح بالحاله يحفرالكنز ويجي في باله واحد من ربعه يثق فيه وراح يمه وطق عليه الباب تالي الليل وطلع عليه الرجال سلامات يبو فلان عسا مافيك شي قال الله يسلمك مافيه الا اني حلمت ومنول يقولون موقض بحلم مايقولون حلمت المهم علم رفيقه بالسالفه وقال انه في مزرعه قديمه ونه في ظلال الزرنوق عصيركني اقول لغز للطلعه التاليه هههههههه الزرانيق الجدران الي تجي على القليب او الركيه او البير الي تبون منهن صح ويعلقون فيهن السواني او المحال ويطلعون الماء يقول رحنا في ليلنا وحددنا ضلال الزرنوق عصير وبدينا نحفر يقول حفرنا مثل جفره الزيت حقه السيارات بعمق متر يوم قصرنا من الحفر قلت لراعي الحلم ترا الصوت في الليل يسري وينسمع ظرب الار ض طبعن ذا الكلام من 60سنه مهوب شي قريب المهم قاله رفيقه وش رايك نروح ولا صلينا الفجرومع شقه النور نجي ونكمل قال راعي الحلم شورك وهدايه الله ميخالف وراحو وكلن راح لبيته ويوم اصبحو وراحو للمكان لقو مكان الكنزموجود بس الكنز ماخوذ ومن علامات مكان الكنز يكون فيه رمل ويكون عليه رماد وكثره رماد الحطب علشان يحافض على الماعون الي هو فيه ماياكله الصدا وعادتن تكون يادله القهوه كانه شوي ولا مصخنه وهذي بعد وسط مهنا كبر ولا عطايا الرحمن حجري والحجري يالغالين مصنوع من النحاس وكنا نجيبه من الهند وهو قدر كبير ياخذ بعيرين في طبخهن وعندي الين هلحين حجريين عقب جدي جايبهن من الهند -ترا جدي مالقا فيهن كنوز ان بعض الظن اثم ههههههه وخل اعلمكم بذا السالفه الي حاصله في شقراء ايام بيوت الطين والناس الطيبين فيه عجوز الظاهر انها تاعي نوح عليه السلام من كبرها ههههههههههههه المهم العجوز جالسه في حوش بيتها توها متروشه وقاعده في الشمس وكلامي ايام البرد المهم وهي تكرد في سحله راسها مافيه الا ثلاث شعرات منا وثلاث مناك وتكده بالمشط الخشب وهي تقصد بعد وتقول يبو قذيلن مثل ذيل الحصاني الله يجعلها للفردوس تمني رويحتها المهم كل ماناظرت يم الجدارالي قبالها فيه شي يكسر الشمس في عيونها مثل كسره مرايه ومنول نسميها منظره وكل ماناظرت للجدار تشوف ذالي يكسر الشمس وتقوم وتروح يمه وتحك الجدار وكل ماله يكبر الين طلعت لها دله حقه القهوه مليانه جنيهات ومبنيه في الجدار ونتم خابرين منول مهنا بنوك مافيه الا بطن الارض هو الي مايعلم بشي ويموتون اهلها وهم ماعلمو عنها وتصير كنوز جعل ربي يوقظني بحجري وبشرو بالعطايا مني وشقراء في قديم الزمان من اغنا الديار هي وبريده بالقصيم ايام الفقر اجل يكبون جنيهات الذهب على حصير خوص شحنه في وسط سوق شقراء - وجنبهن حصير خوص ثاني كابين عليه فرانسي ومثله عربي مصوبينهن صوب او شحن ويجي المحرج ويرقا على حصاتين ثمن يقول بسم الله صلى الله على محمد ثمن يبدا بالحراج ويقول من يبي جنيه الذهب مثل مابعنا من يبي الفرانسي مثل مابعنا ومن يبي العربي مثل مابعنا ومن يبي الهيل مثل مابعنا ومن يبي القهوه مثل مابعنا ومن يبي الشماغ مثل مابعنا ومثل كذا يحرجون ودك انه هلحين كان ماتدري الجنيهات منهي في يده هههههههههههههه تراي احب امزح معكم ولا حنا في نعمه تبي شكر نعمه الامن لله الحمد والشكر ثمن لولات الامر جعل ربي يخليهم لنا ويجزيهم عنا بالفردوس وعندي سواليف واجد عن الكنوز الي لقيت في شقراء تصدقون كنت اسولف عن الكنوز وجاني تهديد من ناس يقولون انتبه تجيب طاري او تذكر اسماء الي لاقينهن لا تلوم الا نفسك ومافاقدك الا عيالك يعني يبي يذبحوني ان علمت ونا مهيب عادتي اذكر احد بسمه هذا رزقه من ربه وكلن عساالله يرزقه ماحست احد وربي يعلم بس يوم جاني ذا التهديد ولوه جايني بصيغه محببه يكون احسن للقبول ورديت عليهم منيب راعي فظايح ون جاني تهديد مره ثانيه ورب الكعبه لجيب الاسماء رباعيه بعد هههههههههه وبس قظت السواليف الله يجمعنا مع والدينا وذرياتنا وجميع حبايبنا في الفردوس الاعلى من الجنه امين وفي النهايه مانقول الا ربي لا تحرمنا رضاك وعفوك ياارحم الراحمين وا سبحان الله العظيم - سبحان الله وبحمده عدد خلقه وزنه عرشه ورضا نفسه ومداد كلماته |
الا قريتو ردو علي ولا سكت اتهدد بعد ههههههههههههه صدق ردو عسا الرده ماتجيكم يالحباب - وش يدريني كان سكاتي احسن |
اجل ياويلكم مني ان رديتو |
معك ياسحاب وكل ماتكـتـبه نقراه
سـوالـيـف ناس ماشبـعـنـا نرددهــا ترانا نـحـب الماضي وذكره وطرياه ونبي منك تكتب كل قصة وتسردها |
| الساعة الآن 03:13 PM |
Powered by vBulletin .
جميع الحقوق محفوظة © لشبكة ومنتديات البراري 2010