|
متعك الله بالعافيه يالنبهاني ههههههههههههههه ذكرت واحد نفس سالفتكم طابخ في قدرضغط والظاهر صناعته ايراني او صيني المهم انه انفجر القدر ولا تشوف الا علوب الحبحر يتدودلن من السقف والرز صاير مثل رشه الجدران ههههههههههههههههههههه فكه الله انه مهوب عنده يوم ينفجر |
بسم الله صلى الله على محمد الابذكر الله تطمئن القلوب لااله الا الله وحده لا شريك له يالله تحيي الغالين كلكم صغيركم وكبيركم ذكركم ونثاكم وليا حيا كثر وليا كثر تنثر هذي السالفه على شرف الغالي تميم بن محمد - ابو محمد جعل ربي مايحرمني من محبته امين ترا الواحد يالغالين ايام الشباب يجي منه بعض الامور بس لا تبنون عليها الا هلحين ذاك وقت وطيش خل اعلمكم انا يومني توي غض يعني صغير ياربيه ماودي اقوله بس ابا اقوله سرقت سيكل الخبابيز ابو ثلاثه كفرات ههههههههههههههههههههه بدت العلوم الرديه تظهر هههههههههههههههههههههه انتم خابرينه يجي ثقيل كانكم تذكرونه الي يجي له صندوق قدامه وفيه كفرين وكفر ثالث يجي ورا ترا في طاش ماطاش جابو مثله القصبي والسدحان يوم انهم يبي يقدمون على الظمان الاجتماعي الشايب وولده المهم السيكل يجي ثقيل يبي واحد نشيط علشان يسوقه وهو مخصص لتوزيع الخبز منول يعني تجي للخباز وتعطيه العلاقيه حقه الخبز ثمن تقول ابي بريال تجيبه بعد صلات الفجر ويوصلونه لك يازينا ويازين شغلنا كله مهوب مثل ذا الوقت الماصل المهم مريت ولقيت سيكلهم وهم يخبزون يعني موجودين بس مراهقه وشباب ونشاط وجي وجر السيكل حق الخبابيز وركب عليه ومر من عند باب الخباز ويشوفوني اللهم عافنا وينطلقون وراي جيب السيكل ياجني جيب السيكل ياجني هههههههههههه ونا يالله اقوا ادرجه ودخل بهم من عند سكيك البيوت الطين ونتم خابرينها تجي ضيقه وذا الزيود وراي واحد منهم معه العصا حقه الخبز الي يخبزون فيها ونا جايب جهدي ولا والله هم وصلوني ولف مع ذيك السكه نسميها في شقراء سكه سبع الملاف لان كل شوي تجيك لفه المهم لفه لفتين وعلشان السيكل ثقيل وصدم في الجدار وطيح انا والسيكل وينكسر سيكلهم نصفين ياويلك ياسحاب ويلاه ونا الي انطلق منحاش والزيود وراي بس ولو علي عصاقيل يجي فيهن لهب الا اسرعت اقصا سرعه هههههههههههههه بس يالله تسامت على ذا العصاقيل هلحين من شافهن يقعد يتفكر وشلون ذا العصاقيل شايله ذا الجسم تقولي اختي مره يوم شافت عصاقيلي ياخيي مدري وشلون يشيلنك سبحان الي خالقهن ويتحملن الثقل عليهن والصدق صدق حتا انا اتفكر فيهن سبحانك ربي تصدقون بصبع السبابه والاصبع الكبير يتلاقن الاصبعين في محيط سيقاني صاير كني وزاره الداخليه من فوق كبيره ومن تحت نحيفه هذي وحده من الشقاوات والثانيه طال عمركم انتم خابرين منول كل باب بيت يكون فيه خيط تسحبه وتدخل للبيت امن وامان مانخاف يجي غريب ويدخل ابد ابد المهم تهاوشت انا وحرمه وهي سليطه اللسان وكل ماتشوفني تقعد تهوش علي ونا ماسويت لها شي بس فاحش عليها ابليس المهم يوم مريت من عند باب بيتها ولاها واقفه في الباب وتقولي وش تبي انت هلحين جاي من عند بيتي قلت هذا السوق مهوب بيتك وتحلتني بعصا معها وضربتني مع ظهري قلت والله ماخليها وكان عندنا في شقراء البقر يمشن في الشوارع تقول افلام الامريكيه من كثرهن ويجي ذاك اليوم ويجي حول سبع بقر وقوم وفتح باب بيت الحرمه ودخلهن عليها ومعهن ثور بعد وصك الباب عليهن مراهقه مراهقه ههههههههههههههه ومادريت الا بالحرمه تطلع من بيتها وهي تقول الحقوني يالمسلمين ههههههههههههه راثعن فيها البقر وسط بيتها ونتم خابرين البقر الا استنكرن المكان يجيهن حاله نفسيه المهم يوم طلعت الحرمه من بيتها هي ومعها بزرين وتشوفني ثمن قالت والله انه كله تحت راسك ياحصان بليس انا ياسحسح حصان بليس وراحت وعلمت ابوي علي وقالت له ترا ولدك مدخل علي في بيتي بقر عبد كلهن وعبد هذا واحد من اهل شقراء عنده بقر واجد جعله للجنه البارده المهم مسكني ابوي ورنني الين قلت التوبه ههههههههههههههه شباب ومراهقه بس تراي هلحين دابه سليمه امشي مع الساس وقول يالله السلامه وسع الله صدوركم يالغالين بالعافيه وجمعنا في واسع رحمته ووالدينا وكل مسلم وسبحان الله العظيم وسبحان الله وبيحمده عدد خلقه وزنه عرشه ورضا نفسه ومداد كلماته |
من أبيات الشاعر عبدالله بن محمد الصبي، المتوفى عام 1371ه عن عمر يقارب 71 سنة، رحمه الله وهو شاعر معروف من أهالي شقراء
ياحيسفا ياداري اللي غدت قوع تلاوحوها بالعتل والفواريع أطول خشبها قايسه مايجي بوع واقصارها كنه عظامة كراسيع دار أولين كنها بيت جربوع نصف مداخيل ونصف مطاليع مانيب عن تصريف داري بممنوع احطها حيشان والا مرابيع والله لولا الحبل مثني ومربوع على السواعد ليتين بتربيع لاقول :يادلال بالسعي منفوع لي منك مجهودك ولك مني البيع |
عبدالله الصبي أنموذجاً
تنوع أغراض الشاعر دليل على تمكنه ..وإبداعه ناصر الحميضي الشاعر الموهوب تتحرك قريحته وتتأجج في مواقف عديدة تعرض له طوعا وأحيانا قسرا، تكون بالفعل مؤثرة تدفعه إلى أن يعبر عن شعوره بقصيدة أو أبيات تدل على تفاعله مع الحدث. ومن المعروف أن الحياة كلها مليئة بالمواقف وأبرزها مواقف السفر والفراق، والفقر والحاجة، وتفرق الأصحاب، وبعد الديار وتذكر الأهل وأيضا ما يستجد في حياة الشخص من وظيفة وعمل وشراء ملك جديد أو بناء دار أو تجديد، وأيضا رغبة الشاعر في الفكاهة وتقديم ما يبهج نفوس الحضور ويرسم الابتسامة على وجوههم وأيضا تلبية موهبته الشعرية. بعض الشعراء يغلب على شعرهم غرض واحد بينما يتنوع طرح البعض الآخر بحيث تجد كل الأغراض في ثنايا قصائده. نتناول هنا شيئا من أبيات الشاعر عبدالله بن محمد الصبي، المتوفى عام 1371ه عن عمر يقارب 71 سنة، رحمه الله وهو شاعر معروف من أهالي شقراء هذه الأبيات لا تتحد في غرض واحد ولكنها تعطي فكرة واضحة عن تنوع الظروف وتجاوب الشاعر مع جميع تلك الظروف بقريحة معطاء وموهبة تستجيب لأي طارئ في حياة الشاعر. فعندما بدأ الترميم في داره، وصارت ركاما متهدمة وسقطت جدرانها القديمة وأبوابها وأخشابها البالية، نظر إليها وللعمال في أيدهم ما بين فاروع وعتلة يهدمون الدار فقال : ياحيسفا ياداري اللي غدت قوع تلاوحوها بالعتل والفواريع أطول خشبها قايسه مايجي بوع واقصارها كنه عظامة كراسيع دار أولين كنها بيت جربوع نصف مداخيل ونصف مطاليع مانيب عن تصريف داري بممنوع احطها حيشان والا مرابيع والله لولا الحبل مثني ومربوع على السواعد ليتين بتربيع لاقول :يادلال بالسعي منفوع لي منك مجهودك ولك مني البيع قال القصيدة وهو يتحسر ويتحسف على داره التي أجبرته ظروف ترميمها على هدمها وتغيير الكثير فيها وخسارته أيضا في مثل هذا الترميم، فقد أشار في هذا البيت إلى تحمله الديون والمطالب. هذه الدار التي انشغل الشاعر في حينه بما جرى لها وأخذت من اهتمامه الكثير حتى صارت هاجسه، وقال فيها قصيدته تلك، حظيت اليوم بعناية المهتمين بالترميم والسياحة وجمال القديم وإظهاره بالصورة الحسنة لكي يكون نموذجا يعكس حياة الأمس. لقد تم ترميم دار الشاعر عبدالله الصبي بشقراء، بشكل لو رآها اليوم لم يكتف بقصيدة واحدة تعلن فرحته بالمشهد الذي بدت به، حتى أن بعض قصائده صارت على باب داره وكأنها تعيد ذكرى هاجسه الذي آلمه يوم هدمها وترميمها الأول . وفي غرض آخر يقول الشاعر من قصيدة مدح وثناء في الملك عبد العزيز: قبل أبو تركي وحنا مع الدرب المتاه في سواريت الجفا بين ماسور وقتيل شيخنا لازال يرفع لنا طيّب نباه حطه الباري على نجد واطرافه وكيل وغالبية الشعراء ومنهم الشاعر الصبي كتبوا عن الفقر، فمرة يتم تخيل الحوار بينهم وبينه، ومرات قالوا عنه مباشرة موضحين المعاناة التي تصيبهم من الفقر والحاجة وهي أشهر ما يعاني منه أهالي البلاد الصحراوية في زمن مضى، وقولهم ذلك ليس من باب التشكي فقط بل من باب الفكاهة أحياناً، وأحيانا من باب المشاركة الاجتماعية لمن حولهم وهم يعلمون أنهم فقراء فيكون لقصائدهم القبول والجماهيرية. هذه أبيات للشاعر مشيرا إلى الفقر وأنه يسكن داره قد آلف البقاء بها يقول فيها: الفقر فوق جدار داري بنى دار مستانس ماجاه مني مناكير دار أولين كلها عش وغبار كن السحا فيها محامل عصافير هذا القول في وصفها والفقر فيها قد بنى له دارا واستقر بها عنده. وأما موقع داره فإنه يصفه بالخطر من السيل ويعترض على من بناها بجانب بئر المسماة (القرشا) فيقول: يبني بها بيت على جال مهيار دار على القرشا خشبها جذامير و(القرشا) بئر واسعة تقع دار الشاعر قريبة منها، فالبئر إلى الشمال منها بأمتار، يتجه السيل إليها وتعد مصرفا له، وهي بالفعل بئر منهارة الجوانب السفلية منها وفيها خطورة على الدور التي بجانبها، مع أن خطر البئر ليس على داره وحده بل هناك دور في موقع أخطر منها لكنه في حاجة للبحث عن أي شيء يصف به داره يقلل من شأنها، وامتدادا لما قاله عنها: دار أولين، يعني قديمة من زمن الأجداد الأولين، وخشبها جذامير وهي الأخشاب الضعيفة المشابهة لعسبان النخل اليابسة، كما ذكر السحا ويعني بالمسمى هذا (الخفافيش ) واحدتها سحاة، أو خفاش، وهي مبالغة من الشاعر حيث يقول أنها قد وضعت أعشاشها في داره بشكل يشبه أعشاش العصافير، وكلها أوصاف تقترب من التصوير الفكاهي والشاعر يحب هذا النوع من الشعر والغرض الذي يظهر في بعض قصائده سواء عن داره أو عن نفسه ووصف بعض ما يقوم به. كما قال في أحد أبياته مخاطباً رفاقه وهو في الكويت عندما جاءهم يتبع صوتهم ويريد مشاركتهم في مكان يسمى الصيهد: سمعت الرد في الصيهد وجيت اعدي لكم وانقز كما الكتفان وقت الصيف تعجبني تناقيزه والكتفان المذكور هو نوع من صغار الجراد يمشي بالقفز، وقد عبر عنه الشاعر بالنقاقيز مشبها المشي والقفز منه بذلك الكتفان في مشيه وقفزه. والشاعر له تجارب كثيرة، كما أنه محب للعلم والمعرفة، وأكثر أسفاره كانت للكويت والبحرين لطلب الرزق فعمل في الغوص ووصف البلاد الذي سافر إليها فقال: رماني ردى حظي على شرق الأسياف على ساحل البحرين نوخ مراحيله إذا جاك في تال زمانك سموم جاف ونجد بتالي الوقت قلت محاصيله ترحلت من دار لدار بها ميلاف ولا كل من ساقه زمانه بيافي له وله قصائد في الجانب الحماسي والفخر كثيره. وله في الحنين وهو في الكويت قصيدة فيها اشتياق للرفاق الذين كانوا يجتمعون قبل السفر يقول منها: أنا على الفرقا كثير التحاسيف وحسايفي مثل الجراد التهامي والقلب ترعاه الهموم المراديف رعي الدبا الكتفان خضر النوامي مدخل دار الصبي بعد الترميم القرشا بئر تصريف السيول [/QUOTE] |
الأبيات والصور أثرت الموضوع وجعلت الصورة تقرب في مخيلتنا عن ماضي الأجداد يا ليت إذا لديكم المزيد فلا تبخلوا به علينا شكراً لكما تحيتي وتقديري :ordh: |
ابشر يبو سيرين بس عسانا نلقا شي |
[align=center]السلام عليكم ورحمه الله وبركاته
اذكر يومني صغير كان عندنا شاة غنمه يعني وكنت اقول هذي لي انا بس واعتني فيها وانا اللي احلبها ولا احد يلمسها غيري المهم كان عندنا يوم من الايام ناس مصبحين عندنا وشلون مصبحين يعني يجون من الصبح بدري عندنا ولا يروحون الا في الليل وهذي عاده طيبه كانت بين الناس اول بس هالحين انقطعت كل دلا يخاف على بيته لا يتوصخ من البزور اجل وشوله تشتري اثاث غالي وتصك عليه ما علينا من ذا بس المهم اصبحوا عندنا هكا اليوم ونصير مبسوطيييين على الاخر كلنا لا كبيرنا ولا صغيرنا مبسوط المهم كان عندهم بنات قدي واكبر مني بس ماشاء الله حلوات الله يوفقهن ويستر عليهن المهم ههههههههه وقفوا لحظه تبي تقولون سالب قلوب العذارى تراي استحي واجد ويجيني موقه بعد هههههه يوم جو اصير انا مولم اغراضي اللي نلعب بها خرابيط يامصاقيل يادبق يانباطه مهنا شي يسوا بس كانت تعني لنا الشي الكثير في وقتها المهم جلست العب معهم في الحوش عندنا نلعب الصقله بالمصاقيل واللي يحب بين انه يحب المهم ونلعب وتخليني بنتهم انا اللي افوز لوهي فايزه تقول خلاص انت اللي فزت علي يالله نعيدها ماتبيني اهون عن اللعب المهم قمت اتميلح عندها لاني دريت انها تحبني من نظراتها لي كل ما التفت القاها مركزه علي تناظرني ياحظي منول وهالحين لا ان شاالله مهوب ياحظي ههههه المهم قلت لها تصدقين اني اعرف احلب الشاة قالت وشلون قلت تعالي اوريك واوديها عند الشاة مهوب شاه ايران لا غنمه عندنا المهم واجيب ذيك الغظاره وادلي احلب الشاه وتعجبت بنت الحلال من البطولات وقلت بعد تدرين اني اعرف احصد بالمحش واروح واوريها وشلون احصد بس ماعندنا الا ثيل تحت العنبه وقعدت احصدشوي قالت ياحظك كلش تعرفه المهم البنت نظراتها لي احرجتني وادلي ادور شي التهي فيه معاد اقدر وصلت حدي وهي معي من وين مااروح لزقه بس لوتخف علي من النظرات كان احسن قلت لها تصدقيني بعد اني اعرف ارقا النخل واجيب تمر قالت ترقا النخله بعد وتجيب منها تمر قلت ايه بس ماعندنا في حوشنا نخل ما عندنا الا عبريه قلت خل اوريك وشلون ارقا النخله بس ابا ارقا العبريه كنها نخله ناظريني وانا اللي اتشعلق يعني ارقا على جذع العبريه وكل شوي التفت عليها واقول شفتيني شفتيني ومستمر ارقا وكل شوي اقول لها شفتيني وش رفعي وهي تعجب وانا ابي الفكه من النظرات اللي خلتني ملح وارقا زود المفروض انه يكفي معاد بقى شي واصل اخر العبريه وانا كل شوي شفتيني وفجأه وبسم الله واخبط من اعلى العبريه واجيك ملوي بس رحمني ربي بالثيل اللي تحت خفف المصيبه ومن يوم طحت قعدت على حيلي وقلت شفتي وشلون طبيت وانا مدري وين انا فيه بس من الروعه والفشله وتحدث الكارثه وتخمني وهي تصيح وتحببني وش عليكم مني ياللي تغارون هههههههههه بس ترانا بزور وتقعد تقول وش جاك وانا اقول ماجاني شي بس ما اقوا امشي تقحطرت رجلي ههههههه ومصر ما فيني شي واعربد الكلام عربده مدري وش انا اقول اذكر اني قلت لها تعالي اقعدي عندي على الثيل وانا مدري وين انا فيه كل الدنيا تدور عندي بس الفشيله كايده وانا جالس وممدد رجلي كن ما فيني شي واذكر اني قلت لها جيبي لي ماء ابا اشرب دايخ وتروح وتجيب لي ماء واشرب واشتر شوي بس الطيحه كايده كل الدنيا تون عندي ثم حس امي جعلها في الجنه وكل مسلم تناديني تقول ياسحاااااااب قلت سمي قالت تعال ابيك وانا امك قلت طيب وانا فيني اثار الطيحه كلش يوجع بس ما ابي البنت تدري وش فيني والا ودي ان ما عندي احد في صيحه تبي تطلع بس مستحي واجي اقوم ماش ما قويت ابي مساعده قلت للبنت وهي ضعيفه مرتاعه قلت تعالي قوميني ما ابي امي تدري ثم يدرون عني كلهم وتفشل المهم قلت ساعديني كن رجلي راقده من القعده وانا اكذب من الطيحه وتجي وتخمني وتقومني وجه لوجه وش عليكم مني هههههههههه ترانا بزور المهم واروح لامي قلت يمه يوه قالت تعال قلت لا تعالي انتي وتجي ياملا الجنه واعلمها اني طايح وترتاع علي بس قلت لها لا يدرون قالت امي مايخالف والبنت معي ودمعتها في عينها ومن الحب ما بكا ههههههه[/align] |
ههههههه اضحك الله سنك ياسحاب
|
اقتباس:
ياهلا ويامرحبا يالغالي حارب هههههههههههههه شفتا وش سوتبي بنت الحلال :038: شرفتني شرف الله مقامك |
السلام عليكم ورحمه الله وبركاته ابا اسولف عليكم اوسع صدوركم جعلها ما تظيق ترانا منول الا جت الساعه 7 المغرب تلقانا في سابع نومه وخص في الصيف يازين ذيك الايام وبس هههههه ايه نرقد من يوم يقول الله اكبر المغرب ويمكن قبل بشوي نرقد قبل الدجاج ونقوم قبل العصافير اجل مثل ذا الوقت الي معاد ندري وشوالمغرب من الفجر هذا بلانا وهذا شقانا :a_laugh2: وتلقانا مفرشين في الطايه او السطح فرشنا من مسيان او عقب العصر يمكن بعد يالتوالي تقولون وشو مسيان ههههههههه ويازين بعد الا صرتو في العطله الطويله هذا اسمها منول مدري عنكم هلحين وش تسمونها بس الظاهرذا السنه تبي تصير العطله طويه مثل منول لانها من 19 شعبان الين 17 ذلحجه اربعه اشهر بالتمام المهم الا صرنا في العطله وجو عندنا احد من القرايب من الرياض نجلس نسولف في الطايه وكل واحد يقول له قصه او سبحونه وذكر مره من المرات جلست اسبحن عليهم عن الجن وكان فيه بزور ومادريت الا بالي يصيحون قلت وش فيكم وش فيكم هلحين تصيحون قالو خايفين من الجن هههههههه الله لا يلومهم جايين من الرياض يبي يوسعون صدورهم ونا متقعد لهم بالجن هههههههههههههه وثر ابوي جعله للجنه يوحيني ونا اسبحن عليهم وكان السطح مقسم بجدران ومادريت الا ببوي يقولي سحاااااب ونا قلت سم ونا اتنافض:p (18): ثمن قالي ورا ماتاكل تبن وتسكت روعتهم لياني اجيك واطا في بطنك قلت طيب طيب ابا اسكت وخيط اثمي بس يامصل واحد راقد جنبي كل شوي يضحكني وكل شوي يضحكني ونا مغير كركركركر ونتم خابرين عاد الواحد الا صار ماوده يضحك يضحك غصب عليه ومادريت الا ببوي قايم وجاي يمي وهو يقولي انت ماخليتنا نرقد انت وكركرتك ويلخني لختين مع وجهي ويردحني بيده يوم شنقلت من قو الردحه حتا يومنه يردحني وهو يقولي حه حه ثانيه وخمد الين الصبح ياحيله الله اسبحن عليهم وونسهم والنهايه كفوف ولخلخه هههههههههههههههههههه تصدقون عاد ان فيه عجوز قبلي اشوفها راكبه على حمار عندهم وطايره عجتها :z-attack: ولا قلت لها وين تبين تروحين يم فلان قالت ابا اروح للبلاد يسمون الديره و البيوت منول والي حولها يسمونها البلاد وهلحين مصيفه في سويسرا امنت بالله وعليه التكلان من على ظهر حمار الا جبال سويسرا وهنا موقه بعد الا جيتا تكلمها وتقولك انا في سريسرا ولا قلت لها وشذا الشغل يم فلان ماخفتي يخفس بك ربي من على ظهر حمار وقبلي اشوفها عليه وعاصبه راسها بالشيله الا طائرات جامبو مدري وش فيني اليوم على العجيزات ونا عاد احبهن ههههههههههههههههههههه وبس قظت سواليفي الله يجعل قلوبكم جميع ما يجيها لا هم ولا حزن ويجعلكم من اسعد خلقه هذا حقكم علي اللهم امين بس عساها جازن لكم ولا يازيني ساكت هههههه وفي النهايه اقول سبحان الله والحمد لله ولا اله الا الله والله اكبر عدد خلق ربي |
السلام عليكم ورحمه الله وبركاته يالله تحييهم وليا حيا كثر هذي يالغالين سالفه حاصله يومني بزر صغير مره يعني توني على قولتهم حواقه شوفو بس كيد الحريم لبعظهن :anger2: المهم اروح لم ناس عندهم في بيتهم العب مع ولدهم المهم يوم رحت ذاك اليوم ولا ولدهم رايح مع ابوه ومافيه الا امهم مهيب عجوز لا توها صغيره شوي وكنت ما اطق الباب ابد اسحب الخيط حق الباب اللي يفتح الباب وادخل راعي محل ههههههه بس توي صغيير المهم شافتني امهم داخل وهي تحبني هههههه وش عليكم مني الا حبتني هههههههه بعد ابا اعلمكم الا شافتني مقبل عليها بأعلى صوتها تقول لي هلا ومرحبا لو عند رجلها وولدها بعد بعض الناس يبي يغار ههههههه بس تراي حواقه يعني بزر واذا هلت بي تجيني ذيك الموقه اللي ما عمري حسيت فيها يازين ذاك الشعور بس راح واستحي وادلي اناظر في الارض من الحياء المهم يوم دخلت وشافتني قالت لي تعال ياسحاب ابا اقولك شي واروح واجلس جنبها وكانت فارشه بسط زي الفرشات هالحين اللي ينجلس عليهن بالمجبب وحاطه مراكي شكلها يبي يجيهم احد المهم رحت وجلست جنبها قالت لي اسمع وانا امك يبي يجيني حريم جايين من الرياض من اهل شقراء بس ماسكنوها المهم يبي يجيني حريم بعد اشوي ولا همب عارفينك من انت ولده واذا نشدوك من انت ولده قل ولد فلانه تعاني نفسها علشان نبي نلعب عليهم انا واياك والاياك تقول مانيب ولدها قلت طيب واذكر عطتني حلاو ساعات ذاك الزين اللي يتهتم وقالت لي اقعد فيذا لاتروح قلت طيب المهم يوم خذنا وقت والا الباب حسه يطق قالت لي سحاب قلت سمي ياحليلي مؤدب اقول سمي مهوب مثل بعض الناس اقول هاه هههههههههه المهم قالت لي رح افتح الباب وتعال اركض بسرعه وجلس جنبي قلت حاضر ياخالتو اكذب ههههه قلت طيب المهم واروح وافتح باب السوق ولاهن خمس حريم وارجع اركض واجلس جنبها جنب راعية البيت المهم تقوم وتستقبلهن تقول لهن يالله تحييهن والايا حيا كثر حيالله من جانا ولفانا المهم جلسوا وهي قد ولمت القهوه المهم جلسوا يتقهوون ويسولفون وكنها داريه عنهن انهن يبي ينشدنها عني ويقولن من ذا وليده المهم فيهن وحده شيطانيه بين عليها ملوسنه هي اللي متصدره المجلس بالحكي وكن بينها وبين راعية البيت وقفة نفس اشوف مناظرعيونها فيه حقران لراعيه البيت المهم قالت لي ذا الملوسنه تعال يا ولدي واقوم واروح لها وتحبني وتجلسني عندها قالت وش اسمك قلت سحاب قالت من انت ولده قلت ولد فلانه اللي هي راعية البيت قالت ذا الملوسنه ماسنه الله انك ولدها وكنها تبي تحر راعية البيت قالت راعية البيت وراه ماسنه الله يافلانه عسى ماشر ان شالله واقوم انا واجلس عند راعية البيت خفت بدت المناوشات وتمييل الخشش:in_love: قالت الملوسنه والله مهوب لك ولا هوب حولك قالت راعية البيت وراه مهوب لي ان شاالله قالت الملوسنه مانيب ناسي عبارتها ذي ابد قالت الملوسنه ما خبرنا الترنج يحمل عنب :p (18):هههههه ويضحكن الحريم على ذا الكلمه وتصوق راعية البيت شكلها بينها وبين الملوسنه شي مبطي ولا عرفته انا الا من تالي اللي هو الملوسنه كان خاطبها رجل راعية البيت ولا كتب الله نصيب بينهم المهم وتقوم راعية البيت وتحببني عندهم طبعا بزر وتقول هلا بوليدي اللي ابوه فلان وتنهبل الملوسنه شكلها تحب رجل راعية البيت بس فكه الله منها المهم وتحتر من قول يا ولد فلان وانا ساكت مغير خايف من الهواش وتقوم الملوسنه قالت اسمعيني عاد مالت عليك وعلى رجلك ذاالقزم ههههههه وذا الولد قصي يدي انكان انه لكم انتي شيفه وابوكم اشيف الله يحوم كبودكم و الشرهه مهوب عليك على اللي يجيك في دارك وتروح وتطلع ويلحقونها الباقين تفركشت العزيمه وقالت راعيه البيت لهن الله لا يردكن بس ترا رجلي معاهدني مهوب باغي غيري لو في الجنه مايبي الا انا بس تبي تحرالحرمه الملوسنه ههههههههههههه منيب اقول لكم بعض الحريم الله يكفينا شرها الا غارت ولا زعلت وبس خلصت السالفه ولا اقول الا سبحان الله والحمد لله ولا اله الا الله والله اكبر عدد خلقه ورضا نفسه وزنه عرشه ومداد كلماته |
ههههههههه صراحه سواليفك عن النساء خلتني أنصدم ... لأني ما كنت أتوقعهم بهذه الدرجة ولا تنسى ترى اللي قالت لك قول انك ولدي تصرفها في حيلة ومكر وهي من بيتت النية السيئة لفض هذا المجلس يعني كانت ناوية تقلعهم من البداية وهم جايين زايرينها !! عموماً الله يكفينا الفتن ما ظهر منها وما بطن الحريم اللي مع الملسونه ذكروني بالبطانة الفاسده هههههههههههههههه وفقك الله يا عم سحاب وانت ابونا ونحبك حب ما يعلم به إلا الله وإن شاء الله ما حصل في السابق ما هو إلا من حبك وسيرجع البقية كما كانوا وأنا على يقين من ذلك لأن معدنهم طيب تحيتي وتقديري |
السلام عليكم ورحمة الله وبركاته
كيف حالكم يالربع اثاريك اطخم يا الشايب و الحريم طايحات عليك ليت من لحق عليك يومك صغير يصور معك |
اقتباس:
هلا ومرحبا يبو سيرين جعل ربي يحبك وملائكته امين |
اقتباس:
هلا بالي زعل علي بس تراي احبك ولوك زعل :hlaqla: ايه مملوح يومني صغييير بس ابوي يقولي لا تماشي الي اكبر منك ولا تصور مع احد :a_laugh2: تراي مهديك السالفه الي قبل قبل هذي هههههههههههههه عطني راسك يبو محمد وهذي حبه عليه :clap: ومدامك رضيتا خلني اركب حصاني ورقص عليه :z-attack::z-attack::z-attack::z-attack::z-attack: |
اقول يالغالي الركام فيه شي يجذبني لك مدري وشو والله العظيم اني صادق |
هلا يا شيخ سحاب
لا زعل ولا شي و الله. بس اشغال مع البيت الجديد تخبر يوم يبون سمنت و يوم حديد ويوم بلك و خلها عل ربك |
اقتباس:
الله يجعله منزل مبارك يبو محمد وجعل ربي يسمح امرك ويرزقك ويسعد قلبك |
أخوي تميم شف هذا عله يفيدك فيما أنت مقدم عليه https://www.youtube.com/channel/UCIS...FNF0W-A/videos وأسأل الله لك التوفيق والسداد |
اقتباس:
فعلا كنت محتاج لمثل الرابط هذا لعمل الاساسات و مكافحة النمل الابيض الف شكر لك و عقبالك بالقصر الكبير و لا ننسانا اخونا العود سحاب و عودته المبهجة |
اقتباس:
هههههههههههههه انا منيب عود انا رابط فرامل عند الستين وخربت العداد الي يعد السنين منيب متعديها ابد اذكر جدي جعله للفردوس الا سئلته كم عمرك يقول 40 سنه ولانيب متعديها ههههههههههههوهو يوم يتوفا ابو 117سنه ونا عاد ابا اطق الرقم القياسي واخذه من جدي ههههههههههههههه |
السلام عليكم ورحمة الله وبركاته
|
طيب يا ولد شقراء ليش ما ترد السلام ولا عشان قلنا شايب يعني ههههههه
|
اقتباس:
ههههههههههههههههه توي شفته وعليكم السلام ورحمه الله وبركاته يبو محمد |
اقتباس:
لا تقول ماعرفت له عشان لا ادق سلف الموتر ولا اقف الا عند بابك انهج علي |
بسم الله صلى الله على محمد الا بذكر الله تطمئن القلوب لا اله الا الله وحده لا شريك له يالله تحييهم وتخليهم لعين ترجيهم هذي اغلب ايامي من اصبح الين امسي ذكرت شي ذكرت يجي في الرادو منول -- يوميات ام حديجان في ليالي رمضان -- تذكرونها يالصغيرين مثلي وذكر بعد برنامج يجي الصبح الي يقول الارض الطيبه ثمن يغنون ويقولون احرث وزرع ارض بلادك بكرا تنبت خير لولادك ههههههههههههههه نبدا بالسوالف من اصبح الين امسي اطلعت للنخل من الفجر طال عمركم اروح اجمع ليمون ابو زهيره من تحت الشجر علشان ماياكلنه الغنم تصدقون اني منول اخذ اليمونه ومسحها بقشرها وحطها في اثمي وهقشها ثمن اروح اشغل المكينه البلاكستون الهنديه يازينها ويازين صوتها له رنه في مسامعنا وحنه والله يكون في عوني كان الوقت وقت شتا وبررررد ومربعانيه اقعد اهندل في المكينه يجي ساعه ماتطيع تشتغل علشانها بارده وقبل اشغلها لازم اعبي البرميل حقها ديزل اشفط من البرميل الكبير نسميه ابو ثنعش المهم اشفط بلي وعبي تنكه وبعض المرات اشرق بالديزل وشرب منه شوي هههههههههه وش اسوي غصب ثمن تحمر عيوني بسم الله علينا المهم املا التنكه وروح اصبها في خزان المكينه ثمن ازييت المكينه كل هذا قبل التشغيل ثمن ابدا اهندل المكينه بعدماادهن عمود الهندل بشوي زيت علشان يزلق معي الهندل بسرعه وجلس اهندل المكينه الين حول ماينقطع نفسي الين تشتغل والهندل ترا فيه خطر الا ماسحبته بسرعه الا بدت تشتغل المكينه يمكن ينطلق من يدك ويهبدك ولا مافي عينك القطره يعني يمكن يموتك كلش رعب تبي ولا طر للي خلقك هذا بعد ان ما انفصخ السير وتجلس تلبس الحذاف السير وهذا فيه خطر انه يصفقك السير ويجدعك في وسط القليب بس ربي يسامت علينا ولا صرنا مثل مااقولكم ايام شتا وبرد يازين المبرد حق المكينه يصيرحار ويدفي بعد اخليه يصب علي المهم كل هذا والغنم مابعد طلعتهن هههههههههههههه يبي يموتن من الجوع ونا طالع من صبح رب العالمين علشانهن اطلعهن ههههههههههه ولا امتلت الجابيه بالماء رحت وطلعت الغنم شوفو يالغالين خل اعلمكم بشي ونتم تعرفون بس زود المكان الي يصب فيه صباب المكينه نسميه اللزا ثمن يمشي شوي في ساقي ويصب في الجابيه هي الي نجمع الما فيها منول ونفتحه الا بغينا نروس يعني نسقي اي جهه من جهات النخل المهم اجلس في النخل من شقه النور الين يغاب النور ونا الفلاح القدير اروس يعني اسقي النخل وحصد الزت ههههههه وش اسوي ماينكتب يعني البرسيم وكان فيه شات تبي تالد اولدها عادي طبيب نساء وولاده مهوب الشافعي احسن مني الي موت نص اهل شقراء وهو سباك وكان فيه عنز تبي من يقلم اضافرها هههههههههههه يعني ضلوفها طوال اقصهن بمحش لان الا طالن ضلوف العنز او الشات والضلوف يالتوالي هي مثل الضفور عند البشركلش يبي من يترجمه لكم يالتوالي المهم الا طالن الضلوف معاد يقون الغنم يمشن زين الين نقصهن يعني مثل الي يقولون في المشاغل هلحين منكير وبنكير ههههههههههه ولا جا مسيان يعني عقب العصر وذن المغرب اقوم وطفي المكينه ودخل الغنم وروح مشي داخل للبلاد وكل الحيايل والحيطان الي امشي معهن مشهورات بالجن بسم الله علينا بس منول مانعرف الخوف ولو حنا بزور منول نمشي في سكيك ظلما ماتشوف يدك وعادي وهلحين لو يطفا الكهرب في الليل تسمع بعض الناس فيه الصيحه والبكاء من الخوف وهم كبار ههههههههههههههه ثمن اروح للبيت ثمن تقولي امي كان انحن في ايام الصيف والحر سحااااب ياسحااااب ونا صايربتاع كله من يد نشيط الا يد نشيط ماخلق الا سحاب ثمن اقول لمي لبيه ياروح وعمر سحاب ثمن تقولي تكفا ياوليدي ارق للطايه وفرش مراقدنا ثمن اطمر كني حصان يصهل بعد ورقا مع الدرجه هههههه اجل تبي ترقا مع وين اعاني روحي هههههه ولا ناوي بالزانه تطمر تراي اكلم نفسي المهم ارقا ولقا المراقد محطوطات في كسره الدرجه يعني في النص وشيلهن للطايه وفرش البسط قبل كلش ذيك الي تجي مخططه بزرق وحمرالظاهر مافيه الا ذا اللون منول المهم افرش البسط ثمن احط المطارح فوقهن ثمن احط الشراشف فوق المطارح ثمن احط الوسايدالي مكتوب عليها صباح الخير ولا سمعت صوت امي ياملا الفردوس ترقا مع الدرجه هي وخواتي اقوم ونسدح على المراقد كلهن علشان اخذ البروده حقتهن اتدربا من مرقد الين مرقد واخذ البراد ولا رقت امي ولا معها ذيك السحله المعدن مليانه ماء للي يبي يشرب وكلنا نشرب منها مهوب مثل ذا الوقت الي الولد مايشرب في الكاس الي شارب فيه ابوه وتقوم امي جعلها للفردوس وتغطي السحله الي فيها الماء بشيله لياه يجي ابرص ولا قطو ولا شي من خشاش الارض ويشرب منها لان منول كل الارض تدبي من خشاش الارض وذكر بعد الا منا تسدحنا على مراقدنا نشوف الغيم يتشكل على نور القمر بشكال واجد مره مثل الغنم ومره مثل البقر ومره مثل القطاوه ومره مثل خروف السله هذي الي اذكرها قعدت اصيح صياح يوم صار الغيم مثل خروف السله ونا مدري وشو خروف السله بس اهلنا منول يخوفونا يقولون لا تروحون للقليب لياه يطلع عليكم خروف السله يخوفونا علشان مانطيح في القليب ونحن دلوخ نصدق كلش تصدقون بعض المرات ونحن نايمين في الطايه ماندري الا بالسماء تمطر علينا وذكر اني اتغطا بالشرشف الي يجي مقلم يعني مخطط بخطوط عريظه سماوي وبيض ولازم يصير فيه رسمه ورد المهم الا تغطيت والسماء يرش علينا اذكر منيب اطيع اقوم وحول تحت انوم في المجبب الين يركخ الشرشف بالمطر - دمعت عيني مدري وشبلاي وفيه شي بعد اذكر منول يقولن امهاتنا يالله ارقدو لياه تجيكم عوافي الله ثمن نقعد ننتفض من الخوف من عوافي الله ونرقد غصب وبعض المرات نقعد نصيح خايفين من عوافي الله ولا الا قال الواحدشي مهوب زين قالت امه له قل استغفر الله قبل لا تطيح عليك المقرصه الحاميه ثمن علا طول استغفر الله استغفر الله ونحن ننتفض من الخوف وناظر للسما لياها تطيح المقرصه الحاميه ولا علا بالي الا المقرصه حقه امي الي تقرص عليها الله يرحم والديني ووالديكم ويسكنهم الفردوس الاعلى من الجنه امين ويجمعني وياكم في الفردوس بس ترا مافيه سواليف هههههههههههههه وفي النهايه اقول لااله الا انت سبحانك اني كنت من الظالمين تراي منيب نشيط يعني تعيبان ولا عاد في العمر كثر مامضا يالله حسن الخاتمه كان ودكم تدعون لي بظهر الغيب ولا بالي تبون بس لا تخلوني ولكم بالمثل |
طيب ليش سفهتني و ما رديت علي؟
|
اقتباس:
الله يسفه الي يسفهك يبو محمد بس اكون منيب موجود بس |
ههههههههه يا حلو الحياة من أول ... ولو انها تعب وشقا ولكن مع حياة الهوان اليوم ... يا زينها ... تحس انك تنفع نفسك وأهلك وربعك وتحس بالعزة والكرامة مهوب مثل هالحين .... لأنه للأسف اليوم يأتي للبلد الغريب ويعطى الكاش ويأمر وينهي عليك ويسكن ويركب سيارات أحسن مما تملك للأسف ... تروح السوق تلقاه بوجهك تروح المستشفى تلقاه بوجهك تروح أي مكان تلقاه بوجهك ... انها حياة الذل والمهانة والهوان .. ويمكرون ويمكر الله والله خير الماكرين .... ولكن هذه الحياة الدنيا ولولا دفع الله الناس بعضهم ببعض لفسدت الأرض ... ولابد للأمر أن يستقيم مرة أخرى . ذكرتني بالشرشف المقلم ... مثله كان عند الوالد الله يرحمه وكان إذا الجو حر ... طبعاً ما كان فيه مكيفات كان الله يرحمه يرش الشرشف ماء ويتلحف به . حياه في منتهى البساطة ولكن ما قلت لنا أيهما تفضل اليوم يا عم سحاب وأنت من عايش تلك الفترة ؟ |
اقتباس:
والله العظيم يبو سيرين كل كلامك هو الي في خاطري وكنه انا الي كاتبه وتنشدني عن الافظل والله العظيم ان الماضي افضل بملايين المراحل وين منول وهلحين منول يبو سيرين للحيات منول لذه وسعاده ونشراح في الصدر وسئل الشياب عنها وهلحين نحمد الله ونشكره على النعمه بس لذه الحيات راحت ونشراح الصدر راح ونشد الشياب والعجيزات |
السلام عليكم ورحمة الله وبركاته
|
عليكم السلام ورحمه الله وبركاته هلا ومرحبا يبو محمد |
السلام عليكم ورحمة الله وبركاته هلا ومرحبا بالشيخ سحاب يالله انتحيه ومثلها لإخونا تميم الله يتمم عمارته على خير ويعينه ويبارك فيها :ordh: :ordh: :ordh: |
بسم الله صلى الله على محمد الا بذكر الله تطمئن القلوب لا اله الا الله وحده لا شريك له السلام عليكم ورحمه الله وبركاته اخواني اخواتي الغالين كلكم وربي يشهد اني احبكم في الله وبااعلمكم بشي تراي ونا اكتب انقر مثل نقر الدجاج للعيش يعني اكتب بصبع واحد عجزت اعرف بصابعي كلهن بس احمدو ربكم اني معرف بصابعي كلهن كان ماتلقون مكانن تردون علي فيه هههههههههه ابا املا كلش ههههههههه وهذي سالفه حاصله لي ونا توي صغيييير منيب كبير اتركم معها عساها ترسم البسمه على وجيهكم الطاهره وهذي سالفه مانيب ناسيها ماحييت اذكر وحده بنت مهيب عجوز ذا المره دخلت نخلهم وانا مانيب كبير واشوفها تلقط ليمون ابوزهيره واللوميه او الشجره طايحه على الارض يعني ملامسه الارض يعني نصها تقريبا والنص الاخر مرتفع شوي والقاها تلقط لومي وهي تحبي على ركبها المهم اخذت عسيب نخل لقيته طايح وجيتها من وراها ماشافتني هذا المزح هالحين واكلخ عليها واخرفش بالعسيب وتاقف من الروعه وهي تصرخ يمه يمه وتصير وسط الليمونه الشجره يعني ماتقوا تتحرك وصبت اذانها ووجها دم الضعيفه وابحل بها وانا توي صغير مانيب كبير وتجلس تصيح وتنافض من الروعه تقول مشبوكه في الكهرب هههههههههههههه وانا غشي عليها من الضحك من هبالي وهي اكبر مني واجلس اكسر الغصون حقة الليمونه الين طلعتها وتمسكني وهي تقول ونا بنت ابوي هههههه و تغولني غول وتحوسني حوس وتاطا في بطني مانيب ناسيها ذيك البنت ما حييت مردغتني مردغه الين غنا حمار بطني والاعتراف بالحق فضيله يانشطها اجل ترفعني وتخبط بي ايه بنت فلاليح وش عليها تصدقون حمقت هالحين هههههههه بس عزالله ان ابوها جاب بنت ماهيب بنت وبس الا رجال ذيك فعايل رجال ههههههههههه اخاف انها من المتابعين للسباحين وتبي تعرفني ههههههه اتحداها هالحين تمد يدها علي هههههه وشو عقبه الله ستر علي صرت احلم فيها في الليل جلدتني الين صرت مثل البطانيه الله من النشاط ماشاء الله عليها المفروض ذيك في المصارعه الحره تبي تاخذ الحزام على طول ابد تشوفون المصارعه اللي في التلفزيون مثلها بالظبط تشيلني فوق وتخبط بي كم مره وانا اذا قومتني تبي تسوي حركه ثانيه اقوم اطاوعها اصلا مدري وين انا فيه مستسلم واختلطت اموري في بعضها وتكرمون بولت على روحي منها بس عزالله انها خذت حقها وحق غيرها مني اخاف انها هالحين تقرأ ومبسوطه باللي سوته فيني هالحين تلقونها يدق لها الماء والتمر يعبطونه لها اكيد مالها ولاسن اصلا تبي تصير مهذريه ههههههههه تراها يوم تطقني ابا اعلم عليك تراها دوبيييييه هالحين خذت حقي ههههههههههه هالحين الله يمتعها متاع الصالحين وابا اقولك شي يالعجوز الله يحللك ويبيحك مني بس مهوب حق ولا هوب واجب اللي سويتيه فيني انتي توحين والله مدري يالله حسن الخاتمه تلقونها مهذريه هههههههههههههه هذا كانها حيه هههههههههههههه مابعد قوه الا ضعف هههههههههههههو وكانها ميته الله يغمد روحها في الجنه والله يحللها ويبيح منها وسبحان الله وبحمده وسبحان الله العظيم -- عدد خلقه وزنه عرشه ومداد كلماته ورضى نفسه |
بسم الله صلى الله على محمد الا بذكر الله تطمئن القلوب لااله الاالله وحده لا شريك له يالله تحيي الغالين كلكم صغيركم وكبيركم ذكركم ونثاكم منول يالغالين الا دخل وسم الامطار وقالو بكرا دخول الوسم تمطر الليله مايبطي المطر ابد وهذي رحمه ربي بعباده سبحانه هوعارف ان عباده بحاجه للمطر وهو ارحم الراحمين يقومون الناس منول في دخول الوسم ويروحون يبعلون وشلون يبعلون اعلمكم يالطلعه التاليه وشلون ياخذون معهم قمح يعني عيش وكلن على قدر استطاعته مهناش منول الدنيا فقر ويطلعون للبر ويحرثون الارض وينثرون العيش ويدفنونه ثمن يامر ربي سبحانه السحاب ويجي ويسقي زرعهم ثمن ينبت وهم ماتعبو فيه لا يسقونه ولاشي وفي الناس منول ذمه وخوف من الله يعني الا مر راعي البعارين وراعي الغنم يبعدونهن عن زرع المسلمين ولو ماعنده احد ولا سنبل وستوا يجون هم وعيالهم وحريمهم ويحصدونه ثمن يذرونه ثمن يطهرونه ثمن يجرشونه ثمن يخبزونه وياكلونه تدرون سنه من السنين يوم ابطا عليهم المطر صار سعر العنز بعيالها 5 ريال وقل بعد خل اعلمكم بذا السالفه فيه ناس عندهم مزارع حول بعض وتجي ذيك السنه القحط وماجا فيها مطر وبدت زروعهم تيبس وسبحان الله العظيم وتجي ذيك السحابه المحدوده ترعد وتبرق وتمطر على مزرعه في وسط المزارع وتسقيها الين ارتوت والمزارع الي حولها ماجاهن ولا قطره وتعجبواهل المزارع منذا الشي الي حدث وراحو لراعي المزرعه وقالو له وش انت تسوي يوم ربي مسقي مزرعتك من بد مزارعنا قالهم راعي المزرعه ابد والله انا معاهد نفسي ان ثلث العيش لي ولعيالي وثلثه الثاني اوزعه على الضعوف الي في الديره والثلث الثالث ابيعه وشتري فيه قالو بس هذا هو السبب ونحن ناكله كله ولا نتصدق بشي منه سبحانك يااكرم الاكرمين وخذو ذا السالفه بعد عن الزرع والمزارع انتم تخبرون ان العيش مايسنبل ويستوي الا في وقت المراويح السحاب وغلب مطرها برد ولا قدر الله وضرب العيش وهو حول حصاده خلاص يروح تعبك كله لان العيش كله في الارض من ضرب البرد وفيه واحد قبله يدعي ربه يالله تسلم عيشنا من البرد يالله انك ترحمنا وتجي ذيك السنه ويحصد عيشه ويو حصده وحطه في صوامعه او غرفته وتجي ذيك السحابه ترعد وتبرق ويناضرها راعي المزرعه وهو يقول تظارطين ولا ماتظارطين العيش وحصدناه وسبحانك ربي وهي تجيه السحابه بمر ربها وهي الي تنهمر امطار طوفانيه على مزرعته وتجرف المزرعه وبيته الي فيها وتواسيه بالارض وصوامعه شالها السيل وخلت المزرعه مجرا للسيل يعني مثل الوادي ولا عاد تصلح ينزرع فيها ابد يجب ان نتئدب مع الله في القول وفي العمل هذا الي جناه على نفسه ولا وشوله يستهزي بئايه من ايات الله سبحانه المفروض انه يحمد الله ويشكره انه حصد عيشه ولا جاه شي هلحين يالله لا عيش ولا بيت ولا مزرعه اذكر سنه من السنين ونا في نخلي او مزرعتي الي في شقراء يوم توي جاي ابا اشغل المكينه البلاكستون الهنديه ويوم توي جاي ولا فيه ساقي عقب جدي جعله للفردوس بانيه من فروش الحصا ولا فيه الثعلب المكار بس انحن نسميه ابا الحصين او الحصني المهم ذيك السنه سنه غلث يعني سنه ينمرض فيها الثعالب ويصير همه انه يعض احد بس المهم يوم جيت عند الساقي ولاه جاي يبي يلف وسط الساقي ونشب فيه وكان ابوي معي جعله للفردوس ويوم شافه قالي ياسحاب ارق ونا ابوك على النخله اخاف يعضك وخلني انا وياه ابا اموته ويجيب ابوي ذيك الماصوره وهو الي يجلده الين مات وترا يالغالي هذا وقت بدايه طلوع خشاش الارض مثل الداب والعقرب وهن اخطر شي انتبهو الا رحتو للبر او صرتو في المزارع ترا كلش يجهش وبس قظت سوالفي الي مثل وجهي بس وش تبوني اسوي وكملت ودملت وركبت حميرها وشنقلت الله يجمعني وياكم في واسع رحمته ومغفرته ووالدينا وجميع حبايبنا وسبحان الله وبحمده سبحان الله العظيم عدد خلقه وزنه عرشه ورضا نفسه ومداد كلماته |
السلام عليكم ورحمة الله وبركاته مسيت بالخير يا عم سحاب .... كيف الحال وين تميم غايب ما أشوفه عساه طيب ..... الايام هذي كأن فيه عج في الديره ... ولكن يـا مـا سـلـكـنـا الــدرب بالعسـر واللين /// مــا هـمـــنـا لــو مـــر بـرق وعجـاجه مـا هـمــنا لـو كـــــان فــيه الـشـياطـين /// لــو كـان فــيه الصاحي والا الدجـاجه نمشي ولا نرضى بسوى الطيب والدين /// لا شــافــنـا الـطــاغي يـــدور هجـاجه أنا أقرى سواليفك لكن أحيان ما يكون عندي الوقت أرد فاضطر إني أأجل الرد لين أفضى فلا تواخذني ولكن تأكد إن الكثير متابع لسواليفك وعلومك الطيبه ههههههههه ههههههه تبي الصدق والله في سالفة البنت اللي عند شجرة الليمون حسستني وكأنك بالشام مو بشقرا هههههههههههههههه ما شاء الله ليمون ونخل وجو لطيف ووجه حسن ههههههههه :ordh::ordh::ordh: |
هلا ومرحبا يبو سيرين ياماحلا دنياي في دارنا الطين عايش ووقتي صافين بي مزاجه واليوم دار الوقت والناس دارين والشكوا لله ماعرفنا خراجه العلم ظايع ويابسات البساتين والليل مظلم ما ينور سراجه سحاب شقراء |
ياحمامن يغرد بالحوني هاظني صوتكي يالراعبيه هم يبوني ولا مايبوني علمهم عند علام الخفيه سحاب شقراء |
السلام عليكم ورحمه الله وبركاته تصدقون ان الغنم منول ما بقالها الا شوي ويتكلمن منول كل بيت فيه غنم ولا جاء الصبح فتحوا لهن الباب اللي عنده 4 واللي عند 5 واللي 6 المهم اغلب الناس يفتحون لهن البيبان الصبح ويروحن لحالهن سبحان الله العظيم الين حوش الشاوي ما معهن احد الا جاء الصبح ويلاك تشوفهن في الشوارع يتلاقن مع بعض كنهن رايحات للمدرسه هههههه المهم يجتمعن كلهن عند بيت الشاوي اذكر بيته في السكه اللي تجي هالحين من شارع فيصل وتدخل على سديره بيته في طرف الشارع وسبحان الله العظيم يجتمعن غنم المسلمين في وقت شبه واحد ثمن يسرح بهن الشاوي واذكر معه وانتم بكرامه حمار ضعيف ورانا نقول ونتكلم بكرامه مخلوق من مخلوقات الله عز وجل المهم يركب الشاوي حماره والغنم كثر التراب تمشي وراه ويسرح بهن ولا جاء حول المغرب ولاه جاي وسبحان الله العظيم كل غنم ناس يروحن لحالهن يعني كل غنم بيت يروحن لحالهن وشلون يدلن سبحان الله العظيم واذا وصلن بيت اهلهن اما يلقن الباب مفتوح ويدخلن والا جلسن عند الباب يثاغن يعني يا اهل البيت افتحوا لنا الباب والله اني صادق ويحصل احيانا حالات عشق بين الغنم وتروح غنمه حقت ناس مع غنم ناس ثانين ثمن يجلس راعيها يدور عليها تدرون وشلو يدور عليها يمشي في السكيك ويقول بصوت عالي يامن عين الشاه جزاه الله خير كانها شاه والا يقول من عين العنز الصمعا جزاه الله خير يوصف غنمته الاي يدور عليها وتحسبون الناس الا سمعوه طنش لا ما فيه طنش والله اني صادق الا سمعوه كلن يطمر ويروح يشوف غنمه لياها معهن يازين منول تدرون ان منول الا قالوا بكرا يدخل الوسم وسم المطر طبعا انها تمطر في ذيك الليله مجازيهم ربهم بحسن النوايا وطهاره القلوب ما فقدنا نزول المطر الا في ذا السنين والا منول ما نعرف دخل الوسم عساه يمديك تنزل اللي في سطح دارك والا جاه المطر تراهم منول يستغفرون الله واجد والاستغفار هو باب الرزق بالمطر والمال والعيال الله يحسن خاتمتنا الهتنا الدنيا عن الاخره الله المستعان |
يا هلا يا عم سحاب طيب هالحين لو تفك الشبك للغنم تشرد ولا عاد ترجع هههههههه ما أدري الفرق عن أول حتى في البهايم ههههههه صدق والله يعني تحس من القصص إن الاختلاف في كل شيء ... أنا أعتقد إن الناس أول فيهم بساطة لدرجة أن البهائم تفهمهم وتحن عليهم بعد لأنهم من أول مو بس يعطيها الأكل والماء فقط وإنما ممكن يحضنها ويتكلم معها وينام معها بعد من بساطتهم بعكس اليوم صاحبها يعطيها العلف وهي تعرف إنه ما أعطاها إلا لمصلحة فقط وليس رحمة منه .. هذا غير البيئة اللي يحبسونها فيه واللي لا تلائم كائن حي مهما كان وهذا مصداقاً لكلام الرسول صلى الله عليه وسلم عندما أخبرنا أنه في آخر الزمان الحيوانات المفترسة تصبح وديعة ولا تأذي الناس وهذه فائدة القصص التي تفضلت بها يا عم سحاب لأنها تعطينا تصور دقيق عن ما وصل إليه الناس اليوم من أنانية وجشع لدرجة أن الحيوان اليوم غير الحيوان بالأمس . فسبحان الله خالق كل شي شكراً لك |
| الساعة الآن 08:23 AM |
Powered by vBulletin .
جميع الحقوق محفوظة © لشبكة ومنتديات البراري 2010