|
يامرحبا ومسهلا يبو محمد والله يالغالي البلا مني مهوب منكم وهذي حقيقه ونتم ماقصرتو جعل الشر يقصر عنكم ورذاذ ماقصرت الله يوفقها بس انا تراني عليله بعض الحيان وقول شي مهوب الي في قلبي وليتها تسامحني وتوبه ما اعود لها ونا اقول لكم الله يدحر الشيطان والله مااخليه يغلبني بحول الله وقوته |
السلام عليكم ورحمه الله وبركاته ياهلا والله ومرحبا بالغالين كلكم صغيركم وكبيركم ولا تواخذوني الا ابطيت شوي ترا فيني الي كافيني وماورا مني كلش يوجع ويالله رضاك والجنه ويالله حسن الخاتمه برحمتك ياارحم الراحمين نجي للسواليف وسعه الصدر جعل صدوركم ماتضيق من شر انا مدري وش الي فينا منول كلش نحب نصغره مدري للتمليح او مدري وشو اجل مويعينات تصغير مواعين لان عندنا في شقراء خص كلش الحمد لله صغيير ومملوح مثل بييلات فنيجيلات بويديات غضيرات بليمات صحينات برييقات دليلات سحيلات تميرات بريدقينات تفيفيحات مويزات خويخات جحيحه جريو ومريقه ورزيزه وجرييشه وسلييقه ومريقيقه ولحيمه ودجيجه حتا السياره صارت سييره ههههههههه ومثل كذا واالاولين يقولون كل صغير مملوح الا فرخ الداب حتا والله فريخ الداب وش ملحه وهو صغير جعله يموت ولا وديت شي للعجيزات تقول العجوز خذ ذيولي مويعيناتكم وحط الي معك في ذيا وذكر عند كل وحده حبل ممسوك في الغمى يعني في السقف ومربوطن فيه مثل شغيه النباطه نسميه المحجان وشوله المحجان نعلق فيه زبيل خوص ونحط فيه الي نخاف عليه من القطو او شين يلحسه مثل الابرص ولا الفويرات تصغير فاره ههههه ولا ذاك قالت حط الي معك علقه في المحجان ثمن اقعد اضحك وتقول وش فيك تضحك ياوليدي قلت ما اطوله انا صغيير وتقعد تظحك هي بعد وتقول ايه نسيت انك ما تطوله والله انك تقوا بدع ياوليدي وهي تظحك الناس منول ما ينسون بعظهم ويتعاونون ويتزاورون الا ابطو عن بعض ويدعون لبعض الاذكروهم اوالازاروهم يعني سيرو عليهم وجو يروحون الزوار تلقا اهل البيت مغير يدعون لهم والله الناس الا هلحين والخير فيهم بس اشغال الدنيا الهتهم وبعدتهم عن بعض ولا الخير ان شاء الله في الجميع الا يوم القيامه ان شاء الله تعالى بس ولو الدنيا اختلفت يالمسلمين معاد فيه احد يفقد احد ولو تبطي عنهم مايسئلون عنك انا سنه من السنين بغيت اموت ونا في البيت بالحالي ماعندي احد والجوال منتهي الشحن حقه ولا يتصل وبعيد عني بعد مقدر اصله اوجعني ظهري ويجي الوجع بدون مقدمات او علامات تدرون وشلون يجيني اصير مثل القوقعه ملتوي وعلى جنبي ويالله اقدر اتنفس ولا اقدر احرك نفسي لوشبر ويجي معه ضيقه صدرمايعلم بها الا الله سبحانه وعلى ذالحال لمده خمسه الا سته ايام مااتحرك ولا اقدر انقلب على جنبي الثاني وربي يشهد انا وشوله اعلمكم عني والله مدري ههههههههههههه بس عمر الشقي بقي ههههههههههههه والحمد لله رب العالمين ون شاء الله في ميزان الحسنات الي عند الله مايضيع نرجع لسواليفنا يومني في ريعان شبابي هههههههههه يعني يومني جذيع مهوب جذع ههههههه اذكر قالت لي بدويه ونا كنت مار من عند بيتهم او خيمتهم كنت رايح للقهاوي اجيب لستك سياره علشان اقصصه سيور للنباطه وذكر البنشر مكان محافظه شقراء هلحين وخيمه البدو كانت مكان الحديقه العامه هلحين وكان مكان الحديقه كله مليان صنادق لحوج المهم وكان عند البدويه كلب وش كبر راسه وهو وش كبره كله ومن يوم شافني ونا امشي من بعييييد وهو ينابح علي وكان مربوط هذا الي مخليني مااخاف منه ونا امشي في طريقي متجه للحميديه وهذي مزرعه قديمه نسميها الحميديه والمستشفى القديم على يميني ونا من بعيد وقرب مالي سور المستشفى وكل شوي اناظره اخاف ينطلق علي ومادريت الا يوم طلعت من الخيمه بنت حسناء ههههههه عليها برقع بس ولو حسناء هههههههههههه ثمن قالت لي يوم شافتني اناظر الكلب تبي الكلب ياولد وعلى طول قلت ايه ابيه قالت تعال خذه وبزع برايي وروح يمها مصدق اني ابااخذ الكلب ويوم جيت حولهم وهي الي تفك الكلب من رباطه وتقوله رثعان اشوه ورثعان هذا اسم الكلب جعله يرثع فيها وااشوه هذي كلمه تنقال للكلب اذا بغو يهدونه على شي يقولون له اشوه ثمن يعطيك عمره ثمن يجيني رثعان يمشي طبلونه من السرعه يتجيود عند راعيته الله لا يوفقها وتعال عاد شف سحسح ونحمد الله مهنا صراويل ولا شي كان ماسكني او عاضني الكلب ههههههههههه وتعال شفني ونا منحاش تصدقون اني اشوف اصابع رجلي الله يكرمكم قدام عيوني من قو المغطه هههههههه ومنطقه الصليب الي بين رجلي تحك في الارض من قو المغطه وكل هذا بفظل ربي سبحانه ثمن مهنا صراويل هههههههههههه ولا كان رحت من صيد امس وكل ماالتفت ولا الكلب واصلني وتزيد طبعن السرعه عندي هههههههههههه الين وصلت جدار الحميديه وطبيت معه ويرجع الله لا يوفقه ولا يوفق راعيته الي اشته علي او هدته علي - وعلى طاري ساد وبرك اذكر عجييز كانت تحول مع درجه بيتها جايه من الطايه او السطح تبي تحول للمجبب وزلقت وتدربت ظعيفه مع الدرجه ولا ردها الا المجبب ثمن قالت اقول مستدي ربي فيه وساد وبرك وحقي وماجاني وضعفتن تضعف حيل العدو وبس صاقت ظعيفه على روحها وراها تطيح هههههههههه انتم تدرون وشلون يحرجون منول على بظايعهم وذا الكلام قبل لا تجي حليوه سوق شقراء القديم نسميه حليوه - يوم السوق سوق المدينه او المجلس قبل حليوه بعض الناس يسمونه سوق المجلس لانه يمتلي من العويد الي جالسين تحت جدار المسجد الي فيه يا الله جعلهم جميع ووالدي ووالديكم ونحن معهم في الفردوس الاعلى من الجنه اللهم امين يارب العالمين انا داري اني شطحت او سهيت عن سالفتي واجد بس وش اسوي وش اسوي تجوزلي السواليف عن منول وهل منول المهم طريقه الحراج في المجلس يجي المحرج طال عمركم ويرقا على خرزتين او فرشين من الحصا ثمن يبدا يحرج ونتم خابرين شقراء منول من اغنا البلدان في الجزيره العربيه هي وبريده مشهورين بالتجاره المهم والله يعينا على المهم الا رقا المحرج يبدا يقول لا اله الا الله وحده لا شريك له صلى الله على محمد ثمن يقول من يبي الفرانسي مثل مابعنا من يبي جنيه الذهب مثل مابعنا ومن يبي العربي مثل مابعنا ومن يبي القهوه مثل ما بعنا ومن يبي الهيل مثل مابعنا ومن يبي الشماغ مثل مابعنا ومن يبي الدهن مثل مابعنا وكل الي ذكرناه هلحين يصير مصوب شحن تحت الي يحرج ودك انه هلحين كان غاره وينهبونه كله وقعد حرج على الهوا ههههههههه اجل الجنيه الذهب مكبوب شحنه وش كبرها على حصير خوص وين الي يشري بس المهم خلونا نرجع لسالفتنا منحنب وجيه جنيهات وفرانسي حدنا بيزه الحسا والا الدنقيه العن ودق رقبه بعد نرجع لسالفتنا انا وش كنت اقول ههههههههههه ايه ذكرت يقولون الاولين الخبل ماينسا سالفته هههههههه المهم الا جا مسيان ورقينا للسطح او الطايه وفرشنا فرشنا استعدادن للنوم تلقانا يالصغيرين مثل الي مرشوشين بفليت انترنح نبي المرقد الله لا يلومنا الا صرنا نقووم العصافير من صبح رب العالمين وهذا بعد الي يخلينا نرقد قبل الدجاج ههههههههه المهم تجي امي وتقعد عند الفرجه وهي فتحه في الجداربين الجيران في الطايه طبعن يسمونها الفرجه وتجي ام الجيران وتقعد وهات ياسواليف الين يسمعون ابوي ولا ابوهم يرقا مع الدرجه وهو يتنحنح ثمن تقول امي جعلها في عليين وميماتكم وكل مسلم يالله هذا حس ابونا جا حافظك الله يا خيتي ثمن تقول ام الجيران الله يحفظك وهذا بعد حس ابونا داخل مع الباب لان للبيبان الخشب منول صوت موسيقي يطلع الا هجيتا الباب ولا صكيته يجي صوت من صاير الباب وصاير الباب يالغالين هو الي رافع الباب عن الارض من تحت هذا صاير الباب وسبحان الله كل باب له صوت يختلف عن صوت الباب الثاني علشان كبر الحجم والثقل يصير الصوت مختلف ياليت بعد صوتي يظهر لكم هلحين اعرف اقلد صوت البيبان منول بس ماينكتب صوتي وش اسوي بكم ابا اعلمكم اقول ووه وبس قصرت من التعريفات والمعاني طلعن اكثر من السالفه ههههههههه الله من الموقه فيكم ياالتوالي كلش وشذا وشذا او انتم ما قلتوشي مدري بس حسيت كذا هههههههههه وفي النهايه اقول - سبحان الله والحمد لله ولااله الا الله والله اكبر عددخلقه وزنه عرشه ورضا نفسه ومداد كلماته |
السلام عليكم ورحمه الله وبركاته بسم الله صلى الله على محمد ياالله تحييهم كلهم صغيركم وكبيركم وذكركم ونثاكم وليا حيا كثر وراكم ماتردون على سواليفي ان غبت قلتو وينك ون جيت وسولفت عليكم ماتردون علي :anger2: اقول يالغاليه رذاذ طلبه سامحيني والله العظيم انه ضايق صدري عليك ومتحسف ونا شايب وعلوم ظهري ماتسر وضايق صدري منه وتخيلو يقولون الدكاتر ترا في اي لحضه ممكن ماتقدر تمشي وتصاب بشلل نصفي وش يبي يصيرخاطر الواحد اكيد ضايق هماي اقول في قصيده لي الله من قلبن همومه تمسه مس الرشا في محدبات السواني والله من قلبن غثاالبين دسه دايم يدسه خايف انه يباني يالايمي ماحسك الي احسه ولا ذقتا حر المطرق الي كواني اخاف يومن مقدر السوق اعسه تعوقني رجلي من الي بلاني مابي انا الكرسي ولابي امسه موتي ولا يشفق عليه زماني سحاب شقراء الله يعين على ذا الدنيا نجي للسواليف منول اذكر الا سير احد على احد ثاني ولا لقاه يقوم المسير ويربط قطعه قماش في الباب ولا يحط كسره عود علشان الا شافه بعدين يقوله تراي مريت عليك ولا لقيتك والماريه رابط قماش في عروه الباب ولا ذاك يقول راعي البيت اثره انت ونا اقول منذا الي مار علي ورابط قماش على عروه الباب تراهذي طرق التواصل الاجتماعي منول :038: اقول ياالطلعه التاليه او يالتوالي ياعيال النعمه ترا ماعندنا منول شناط نحط فيها ملابسنا وغراضنا الا جينا نسافر مافيه الا قطعه قماش نفرشها في الارض نسميها لفافه او بقشه هههههه ونحط عليها مقاطعنا ترانا منول مانسميهن الثياب نسميهن مقاطع ومفردهن مقطع ودك عاد تشوف ذاالملابس شهب ولهب ولالبستا الثوب يالله ياصل نص الساق كنك من قوم عاد ههههههههههه والكموم بعد ماننقض الرفاعه تاصل نص ذراعك تخيل تصيرالكبكات عند مرافق يديك :p (18): ونمشي عادي ولا تسمع الا صرقعه النعال الزنوبه او ام صاروخ وخص الا قصينا قطعه لستك حق كفر السياره ونحطه تحت الزنوبه علشان ماتنحل وتقطع بسرعه ولا مشيتا تعال اسمع الصرقعه ونت تمشي امحق من صاروخ تصدقون الشوك العاقول يخترق ام صاروخ وتدخل الشوكه في رجلك بس عادي مافيه احد يمشي الا تلقا معه منقاش للشوك وشبريه يعني سكين صغيره وفيه ناس يسمونها مبرات ولها عده استعمالات بس يالله الدنيا عبر وفيه شي ثاني بعد اذكر العجيزات والعويد منول الا خافو ينسون شي يقومون العجوز تعقد طرف شيلتها والعويد يعقدون طرف الشماغ علشان الا جا بعدين وشافو ذا العقد يقولون وش انحن عاقدينهن له اكيد فيه شي خايفين ننساه ثمن يقعدون يديرون الفكاير الين يذكرون العود الا ذكر وشو علشانه عاقد شماغه يقول اعقب مابغيت اذكره هههههههههههههه والعجوز الا ذكرت تطق على رجلها وهي تقول شاعوف يطيرالعدو بغيت انساه وكثر العجيزات منول تربط مفتاح بيتها في طرف الشيله علشان ماتظيعه ذهينات بعد اذكر مره رحت اسير على عجوز ومعها عودها ولا عندهم عيال بالحالهم في البيت ويوم جيت عند البيت ولا هذا الشايب جالس عند الباب يتشمس وسلم عليه وشلونك يبو فلان بشرني عنك قالي انا بخير ونعمه لو ذا العجوز مهيب عندي :a_laugh2: قلت افا يبو فلان هذي الغاليه قال كان غاليه عندك ولا انا لا والله وقلت وينها اجل ابا اسلم عليها قال شفها رابظه كنها بقره في بطن البيت تدور الشر والعيش المر ودخل يم فلان يم فلان قالت يالبيه تعال انا فيذا وروح يمها وسلم عليها وشلونك بشريني عن صحتك قالت طيبه لو حصان بليس مهوب عندي :a_laugh2: ويدخل الشايب ويجي عندنا وقلت وراكم هلحين مغير كلن يلفط على الثاني تقل ضب توه مصيود قال الشايب انشدها هي عندها العلم قلت يم فلان وشو الي حاصل قالت ان لسانه يلوط اذانه يوم اوحاني اكلم على اخيتي الي ماعندي الا الله ثم هي بالدنيا قال الشايب اي والله عجبه انا الي شاري التلفون بدراهمي ابيه لي ماشريته لك انتي وختك ثمن قال خل اعلمك بالعلم الي ماينسكت عليه ابد قلت وشو العلم قال تراها تكلم بالتلفون في تالي الليول انا موحيها كم مره وهي توصوص وهي في حجرتها وتصك الباب بعد تخاف اني اوحي شي من يصبرعلى هذا قلي :new12: وقبلي اسمعها تقصد قصيد وتقول حسبي الله على الي حال دوني ودونه هههههههههههه قلت ايه اثره كذا ورص يد العجوز وقولها منهو صحيبك علميني منتيب تلعبين يم فلان وتقعد تحقرص وتغنج وهي تقول خله يدري لا يحسب مهنا الا هو ههههههههههه تعرف تحره العجوزمهيب لعب ثمن قلت لها بعذره الا زعل وهذي علامه ان ابو فلان يغار عليك ويحبك قالت حبته القراده لا يحبني ابد قال الشايب انت توحي وشي تقول ثمن قال انا هلحين منيب متعدي الين تجيب تلفوني وقول للعجوز عطيه تلفونه ونا ابا اجيب لك واحدجديد غيره هلحين بس لا يدري عنه قالت العجوز شفه في حجرتي خله ياخذه ويصك عليه ويشبع فيه وجيب الجهاز وعطيه الشايب ويلف عليه سلكه ويروح ويصك عليه في حجرته قال هلحين ارضا وهويحسب الي يكلم الجهاز بالحاله على نياته ثمن جبت للعجوز جهاز ثاني وهو مايدري شكلي خربت العجوز وسع الله صدوركم يالغالين وفرج همومكم وغفرلذنوبكم ونا معكم جعلكم ماتشوفون شر وسبحان الله العظيم وسبحان الله وبحمده عددخلقه وزنه عرشه ورضا نفسه ومداد كلماته |
السلام عليكم ورحمة الله وبركاته
مرحبا بالشيخ سحاب قصص في منهى الروعة و سرد عفوي جميل و ممتع بس لو ماعليك أمر تغير لون الخط الى اللون الغامق عندي لك قصة جميلة بس الوقت لا يسمح الان لكن ابشر يا سحاب من تحصل الفرصة بكتبها لك عنوانها انه مرة انا و رجال شرواك نوينا نشري حاشي من الجنادرية اذا رجعت كملتها لك تحياتي تميم..... |
اقتباس:
ياهلا ويامرحبا يبو محمد ابشر اغير اللون بس السالفه هذي مقدراغير شي فيها ماعندي امكانيه التغييربس الجايات ابشر انتظرسالفتك جعلك تسلم |
السلام عليكم ورحمة الله وبركاته
حيالله الجميع هذا طال عمرك قبل عشرين سنة تقريبا كان اذا اقبل رمضان يكون فيه ازمة لحوم و بالذات المفروم للسمبوسة و الشوربة و غيرها المهم اشتركت انا و صديق في حاشي و رحنا للجنادرية و شريناه و الزول ما ربطه زين يوم حركنا جايين للرياض و تونا مبعدين شوي من المجلبة الا يوم فز الحاشي و شوي الا يوم وقف على حيله و نوقف قلت لرفيقي خلنا نغطي راسه بكيس شعير اكرمك الله و السامعين عشان كوده يهجد حاولنا ما قدرنا كان يحرك رقبته يمين و يسار و صعب تدخل الكيس على راسه .المهم ربطنا الحاشي زين و مشينا يوم دخلنا الرياض و شاف الزحمة و هو يطب من الونيت. نبي نوقفه عجزنا عنه كنه في مضمار سباق الجنادرية شافنا عسكري من الحرس رايح لدوامه قال بيفزع لنا وهو يمسك الحاشي مع ذنبه عشان يوقف و يحط رجله الحاشي زود و العسكري ماسك ذنبه ويركض وراه و العالم تضحك و نلحقه بالسيارة و نحده على جدار النفق و نوقفه و نحاول فيه لين جدعناه في حوض الونيت سنامه تحت و رجوله فوق وهات يا ضحك من العالم اللي رايحه لدواماتها في السايد الثاني و نربط كل رجل في جهة و راسه و رقبته طالعه من فوق التنده و يالله قويناه المهم ونروح لبيت رفيقي بندخله الى العصر الين نشوف قصاب يذبحه . يوم دخلناه في بيت رفيقي اثاريهم مربين دجاج يوم شافه الدجاج يوم بدت المسرحية الثانية صياح و كل دجاجة على جدار. رمضان و الناس نايمة و فضيحة. وحنا دايخين من التعب و الصيام و بيت رفيقي كبير و حوشهم مضمار صار الحاشي يركض و الدجاج زاد هباله يحسبونه يلحقهن و خذ يا ضحك |
للحديث بقية في وقت ثاني
|
ههههههههههههههههههههه كني اشوفه سنامه تحت ورجليه فوق سالفتك ماودي تقضي يبو محمد انتضر الباقي جعلك تسلم |
نكمل على بركة الله :
صليت العصر و رحت لصاحبي عشان ناخذ الحاشي للمسلخ و طريقنا مع الدائري الجنوبي و كله تريلات و قلابيات و خلاطات الاسمنت يوم دخلنا وسط الزحمة انفجع الحاشي و طمر من الونيت و خذ يا مطارد بين السيارات و اللي يحد واللي يحاول يمسك و محد قدر عليه نشيط بالحيل . اذكر شخص اردني يقول ما تعرفون للابل قلت افزع تكفى و اول ما حاول يمسكه وهو واقف بين السيارات جته رفسه في صدره بغى يطيح قال شو هاظ يا زلمة وركب سيارته وهج و يفزع لنا ثلاثة يمنيين نشاط ما شاءالله عليهم و يربطونه و نركبه في الونيت ونروح للمقصب و اول ماشاف الدم جاه حالة هيجان و كل من قرب منه رفسه و اخر شي قصاب يمني محترف ختل له ختل و نحره بسكين تلقط الحب على قولة الشيبان يعني سنينة بالحيل و انتهت المغامرة على خير و سلامتكم..... |
اسلم يا سحاب هات ما عندك من علوم
|
نلتقي بعد الصلاة بحول الله
سلام |
وين راح الشايب سحاب الله يرده بالسلامة
|
هلا ومرحبا يبو محمد عزالله انه حسر بكم ذا الحاشي وخذ حقه منكم هههههههههههه سالفتكم هذي كنها سالفتنا ونا توني جذع على وقت بيوت الطين انت خابر كل بيت فيه بقره هي السوبر ماركت او البقاله للبيت وذا جت العطله حقه المدارس نسميها العطله الطويله نجي انا وهلي على ددسن غماره وحده للرياض وطبعن البقره هي الاوله نحطها بالصندوق ونركب معها انا وخواني ونروح للرياض المهم يوم وصلنا وجينا نبي ننزلها وذكر في شارع العطايف وهي الي تنطلق وتنحاش ونت خابر الرياض منول والزحمات الي فيه شي مايصدق وهي تركض بين السيارات ونحن وراها تقل مهبل ونطلقو هههههههههه ولا يردها الا شارع الخزان ونحن وراها حدها حدها ولا نمسكها الا عند حديقه الفوطه ونجيك نمشي ونحن ماسكينها نزهو بالفرح والفخر معنا بقره وش تبي بعد اكثر هههههههه والناس تمشي ورانا تقول موكب ونستاجر حوش عند خبابيز ونحطها فيه |
انا كتبت رد و مدري وين راح
على طاري البقرة. اذا انحاشت مالها حل تقوم تعنفص و ترفس و ياويل اللي يقربها زمان كانت البقر و الغنم تسررح في الشوارع مع الناس و الامر عادي اذكر بقرة مدري وش جاها و انطلقت الى فيه بيجو لجيراننا وهي تصدمه و تدخل جنبه البابين و قامت تركض كن ما صار شي طبعا يخلونها تسرح عشان تكرم تعلف من الزبايل . و اذكر عمال النظافة كانوا عمانيين و معهم العربية حقت عمال البناء الخضراء ام كفر واحد و كانوا يكبرون حوضها بصناديق البرتقال ام اسيام صناديق قديمة انقطعت الان من السوق عشان العربية تشيل اكثر كمية عزكم الله من الزبايل و اذكر بعضهم معه حمار و نفس طريقة العربية يحط كراتين على الخرج عشان يحمله اكثر اما راعي القاز اليماني عربة يجرها حمار تكرم و السامعين و اذا مر مع الحارة نفتح الحنفية حقت برميل القاز و ننحاش و خذ يا مطارد و راعي الهريسة في صينية فوق راسة ولازم جمرك او نحوس شغله |
صباح الخير يا سحاب
ليش ملبد ؟ |
لاهي مع الربع اجل هههه
|
العم سحاب والأخ تميم صراحة سواليفكم ما تمل بيض الله وجيهكم في الأيام الماضية انشغلت فالمعذرة واصلوا الكل متابع هذه الموضوع الذي يعتبر بالنسبة للكثير هام جداً لأنه يذكرنا بالماضي . تحيتي وتقديري ولكم مني أحلى تثبيت وباقة ورد :038: :ordh::ordh: تحيتي وتقديري |
هلا ومرحبا يبوسيرين وين الغيبات يالغالي الحمد لله على السلامه |
اقتباس:
المثل يقول البخيل من بخل بجاهه هذي سوالف زمان و الكل يحن للماضي الجميل و يجب تداولها لكي يعرف البعض ما ضينا الجميل و بساطته لكن عندي كيبورد ماكل سمسم و غاص و الحرف كود بشاكوش عشان يكتب و حالتي حالة كود اقلبه عشان يطيحن حبات السمسم ولي شهر على هالحال صاير زول ههه لكن ابشر بعزك.صحيح مشغول مع الفيلا الجديدة لكن بحاول اسرق بعض الوقت لكم |
يا سحاب ترى الواتس اب مجاني و رقمي عندك له شهرين خلنا نتواصل واتس اب عشان فيه سوالف ما تصلح بالعام يعني خذ و خل وان بغيت شطة و كتشب
|
[align=center]هلا بالغالين ومرحبا
انتم خابرين منول كل بيت فيه بقره لانها هي السوبرماركت كلش منها الحليب واللبن والزبد والروب او الزبادي المهم عندنا بقره جرسيه ههههههههههه ذيك الي تجي وش كبرها بس رجلينها صغيرات والمهم بعد انها غثتنا تثاغي طول الليل ماخلتنا نرقد ونتم خابرين وشي تبي جزر بلا جزر مار ماعندها في احد الا بغت الثور وهي تثاغي مثل الي تقول ودوني لبونا ودوني لبونا تقصد الثور قالي ابوي ياملا الفردوس يالله ياسحاب نبي نربط البقره ونوديها للثور عاد بقر شقراء كلهن رجلهن ثور في مزرعه اسمها الحميضيه جنب البيوت مهيب بعيده ويربطها ابوي بحبل يجي له خمسه امتار او اكثر وبوي يقولي جودها ونا ابوك لياها تنطلق وقوم من زود الحرص وربط الحبل في يدي كله اخاف انها تنحاش انتم تسمعون بشوط البقره ههههههههههههههههه وهي تصير مربوطه طول السنه ولا انطلقت من رباطها اللهم عافنا تنطلق وهي رافعه ذنبها بسرع شي ويوم فتح ابوي الباب حق الحوش ونحن نبي نزف البقره مثل العروس وهي شافت الباب مفتوح ولا ماشافته وهي تنطلق ونا وراها اصلن الحبل مربوط في يدي وين ابا اروح ونا عاد عصقول يعني نحيف وهي الي تجرجرني ونا على بطني وغبرتي واصله السماء وبوي يركض وراي وكل من شافني يركض وراي ونا صاير كني ثوب مافيه احد يعني قماش بس وتزلطت سيقان سلوا هههههههه اعاني روحي وتقطع ثوبي كله مني ولا وشوله اسوي عنتر عند ابوي وربط الحبل في يدي وفي الاخير ونا بين الحيات والموت مسكوها رجال ويوم خذت نص ساعه وياصلني ابوي وهو يقولي عساك سالم قلت لا انا سحاب وش سالم سالم تبن بوجه العدو حتا في راسي فلقه ويصب الدم [/align] |
اذكر اذا بغوا الثور يلقحها يحطون راسها في شغنة اثلة مثل حرف في v و يسقطون خشبه بين الاثلة و قرونها عشان ما تتحرك و يصير الثور يرجع ريوس عشرين متر و يجيك منطلق للعشيقة و كان فيه مصري حان البقرة يوم شاف الثور يرجع و يجي مسرع و قام الخبل و طلع في وجه الثور يبيه يهدي سرعته قام الثور و شاله سماء مترين فوق عقبها المصري ما صار يحضر التلقيح يقول شفت الموت
|
سحاب عساك عرفت تفتح الخاص؟
|
السلام عليكم
الحمد الله على السلامه شاعرنا الكبير .. سحاب الخير . وعودا حميدا انشاء الله تقبل مني كل الوود والتقدير لشخصك الكريم |
وعليكم السلام ورحمة الله وبركاته
حياك الله شاعرنا عايد بالنيابة عن شايبنا سحاب شكله لقط العجوز وسرى وياها حدى الشعبان يلقطون فقع ههههه مع انه موجود تحت بس ما رد قت ارد عنه و المعذرة |
هههههههه والله إني مت ضحك أجل الصعيدي ما قدر للبقره ههههههههه يتورالي يا عم سحاب إن ظهرك بأسباب شوط البقره هههههههههههه يـا سـحــاب الـيـوم مـا ضـاق المكان فـــيـك والـمـجـلـــس بـدونـك يـنـدثـر الـبـس الـبـشـت وتـحـصـن باللســان واقرى بعض الذكر وانفث في الصدر أنـت شــــيـخ ونــادر بـهــذا الـزمـان والـحـسـد في الناس يـفـقـدك الـعـمـر يـطـــرح الـنـاقــه وتـغـلـيـهـا الجفـان مــا تـفــوق الا وعـظـامـك في الـقـبر :ordh: |
عـندك اسـلـوب الـسـوالف نـادر وحلـو وفكاهي لا سـمعت السـالفـه منك ارمي كل اللي في يديّه انجذب لك كني مسحور أو طفل شــاف الملاهي أو رضيع وعينه في عين امه في صبح وعشيّه كيف يـا شـيخ الـقـضـية تـرفـع بـغــدر الشفاهي مـا دروا في حـيـلـة الـمـحــتال لا حـــسّ بـأذيّـه الـعــذر مــا هــو بـعــذر والحكم متسرع وواهي والـتـهـم تـرمى مـثـل رمـيـك رصــاص البندقيّه وانـبـرى منهـم بـنـاخي فـيـه مـن زود الـتـباهي الـعـجـب والـسـلـطـويه تـرمي ابـن آدم ضـحـيّه الـحـيـاه اخــذ وعـطـا دام الأمــر دون الـنـواهي لا تـشـب الـنـار وتـثـور وتجي مـنـك الـخـطـيّـه ارفــع ايـديـك وبـأعلى الـصـوت اشـكي للألاهي هـو نصــيرك لا ضـعـفـت وجـاك منهـم مظلميّه واسـئـلـه يـا شـيـخ يكفـيك المشـاكل والـدواهي مـا خـفي منهـا ومـا يظـهـر قـبل وقـت الـمـنـيّه :ordh: |
اقتباس:
اقتباس:
هلا عايد بشرني عن صحتك يابعدي عسا امورك طيبه ارجو من الله ذالك اسفرت ونورت شرفتني لا عدمتك |
اقتباس:
هلا يبو محمد ومرحبا اعلمك بعدين ان شاء الرحمن الرحيم :a_laugh2: |
اقتباس:
ياهلا ومرحبا جعل ربي مايحرمني من محبتك امين جعل ربي يرفعك بعلا مكان بعالي الفردوس وحظك مندثر يانظيف الروح والقلب والبنان جعل يومي قبل يومك بالقبر ودي اكتب اكثر بس عندي ناس اشغلوني هههههههههه |
انا معلمكم يومني مواجر شايب يبني عندي جدار طايح في نخلي في شقراء المهم اني واجرته يجي ويخلط الطين مع التبن في وجه العدو وجاني الشايب وبدا يخلط الطين ونا عندي غنم نجد يجيلهن 70 راس ومعهن خروف بس ذاك مهوب خروف ذاك اسد غضنفر تصدقون اني ماامشي الا ومعي جيلون ورابط فيه حبل ورابط فيه عود علشان الا جاني يركض اهوشه بالجيلون وقعد اضرب في الجيلون الين يخاف وبعض المرات والله ماعنده فيني ولا في جيلوني ولا يردني الا وحده من النخل ارقا وخليه وبعض المرات يقعد في حوض النخله يبيني بس احول يوسع صدره علي هههههههههه المهم جاني الشايب وبدا يخلط الطين ونا الله يغفر لي ماعلمته عن الخروف ونا جالس منيب بعيد عن الشايب وشوف الخروف يناظر الشايب وهو جايه من وراه والشايب مطمن يخلط الطين علشان يبي يلبن ثمن الا يبس اللبن يبني ويجيه الخروف يمشي الف من وراه ولا درا الشايب الا الي يهبده مع مقعدته ويدخل راس الشايب الا حد الكتوف في خلطه الطين ههههههههههههه ويوم طلع راسه ولا وش اشوف مافيه ملامح ابد ونسدح من الظحك السالفه اطول وبعدين اكملها |
يالله تحييهم اذكر ونا في نخلي في شقراء كل من جاني مسير وجا يبي يروح مالقا نعاله ههههههههههههههه ونا شكيت في العامل ولا وشو ذالي يجي وياخذ النعال ولا ندري عنه قلت للعامل تعال وين وديتا نعالي ونعال الرجال قال انا مافيه معلوم وكل من سير علي يروح لبيته حافي ههههههههههههههههه ونا مثلهم اجل شاري تكرمون نعال باتا وتنسرق وبس ماجاني النوم ذيك الليله متحسر على الباتا تذكرونها الباتا :a_laugh2: وقعد اتصيد للسروق وشتري باتا ثانيات وحطهن عند الباب وتوزا ابا اشوف السروقي منهو:z-attack: ومادريت عقب ساعه الا بالسلوقي يعني كلب يجي من برا المزرعه ويعض النعله ولحقه وهو مايدري من بعيد وشوفه يحفر في الرمل ويدفنهن هههههههههههههههه لا يالجعري هذا ونا قبلي احطله اكل وماء تاليها يسرق نعالي ونعال ضيوفي وروح ولقا كل النعال مدفونه وطلعهن كلهن صرت كني باسط بنعال من كثرهن ههههههههههههه وعلم ربعي كل واحد يجي يشوف نعاله وياخذهن وكلهن لقيتهن الا نعالي الباتا مالقيت الا وحده عجزت القا الثانيه لا يالحرمي يالسلوقي ترا منول اول ماجت نعال البلاستك طلعت اشاعات يقولون تراها تسبب الصرطان هههههههههه ومنول اذكر في شقراء وذكر يوم توه ميت الملك فيصل الله يرحمه يعني مهوب شي بعيد مره مسكو واحد من اهل شقراء كان معه رادو صغييير وقبله حاطه عند اذنه اكيد صوت الرادو ضعيف او ان سمع الرجال ضعيف ويمسكونه يقولون يخابر مع اسرائيل ههههههههههههههه وكبر اعدائنا منول ابليس وسرائيل هذولي هم الي غاثينا :wallbash: تصدقون اول ماطلعت الروادو كانت من اكبر المحرمات في شقراء لانهم يقولون ان الي صانعه ابليس يبي يلهي المسلمين عن الذكر والصلاه ترا كلامي واقعي صحيح انه مايصدق بس هذا واقعنا منول وكثر بعد بس خلوني ساكت ولا فيه اشياء اكود من الرادو :038: وكانت الروادو يهربونها تهريب هي والتتن :icon30: هلحين شوفو في القصيم سيارتين الا هلحين موجودات في حوش الحبس مصادره بسبب تهريب التتن |
ههههههههههههه ذكرتنا في أحسن شبشب في الثمانينات ههههههه وصراحة تصرف غريب من الكلب وش لاقي في الشباشب هههههه الـعـبـر تنجي ابـن آدم مــا تـقــدمـهم ضـحيّه لا تـخـوض وتنثر الدم واحـترم نفسـك شـويّه مـا نبي الـبـيـت يتهدم وتـنـدم وتبكي الخطيّه مـا نـفـع شـيخ ومقدم سـلـطـتـه والـعـنـتريّه :ordh: |
شكرا لك سحاب شقراء متابعين ومستمتعين
وجزاك الله خيرا كـل ماسـولـفــت في ذيـك السـنين ماضي الاباء والـوقـــت الــقـديــم جا لها في الـقـلـب تذكار وحـنـين ياعسى من مات بجنات ونـعيـم |
اقتباس:
انا من عيال ادم وبي شعور وبي حميه وطيبتي شفهاترادم وماتطيع الشور بيه ومن دنق يلقاالعوادم ومن رفع نارن لظيه لوتصير للناس خادم جك اذيه من اذيه سحاب شقراء |
اقتباس:
امين يالغالي الركام الله يغفر لهم ويرحمهم ويرحمنا الا صرنا الاماصارو اليه ياجعل ربي يسعد قلبك ويمتعك متاع الصالحين |
ابو محمد له فقده او مع السحاب ويطارد المطر ارجو له الصحه والسعاده الي تغمر قلبه |
هلا ومرحبا بالغالين فيه سالفه حصلت لناس رايحين يقنصون ارانب وذا الكلام موووووبطي قبل يمكن 70 سنه وحولها المهم راحو للمكان الي فيه ارانب وحطو عفش الرحله في غار مهوب بعيد وخلو واحد منهم يجلس يسوي العشا لهم والباقين راحو يصيدون ارانب الرجال الي جالس يسوي العشا جالس في باب الغار والغار كبير وداخل في وسط الجبل من طوله المهم الرجال قاعد يطبخ وينفخ ولا درا الا بذيك الجنيه طالعه عليه من وسط الغار وجالسه تدلع لسانها عليه وهي في مكان قريب منه ولها شوشه منتفشه وتروع الرجال شافها ولا ماشافها وهو يجيك منطلق على رجليه ركض يصيح على ربعه الجنيه الجنيه باغي يزوغ عقله وينهبل ههههههههههههه الله لا يلومه المهم جو يمه ربعه وقعدو يقرون عليه ويسمون عليه وقالو وش الي حاصل قال الي حاصل طلعت علي جنيه ولها شوشه منتفشه وتروع وتدلع علي بالسانها ههههههههههههه ولا فيهم رجال كبير شوي يعني في الستينات وحولها وقال تعال وريني الجنيه ويوم وصلو الغار ولا هذيهي في مكانها ويقرب منها كبيرهم وهو يقول وش انتي يالماخوذه ويقرا من كتاب الله ايات ويقرب زود يوم نحاشت داخل الغار ولا عشاهم زاهب بس هي نكدت عليهم وقال كبيرهم تعالو يالربع نبي ناكل عشانا ونغير المكان ويوم نكبو العشا ومادرو الا يوم جتهم مره ثانيه وقربت منهم وهم ياكلون ويقوم الشايب وينكب لها رز ولحم ويحطه في صحن ويوديه حولها وهي الي تجي وتاخذ الصحن وتاكل الي فيه كله هههههههههههه جوعانه ضعيفه وينزلون من الغار ويروحون للشعيب تحت الجبل ويجون عند ذيك الشجره وينزلون اغراضهم وشوي ولا فيه شايب جايهم ويسلم عليهم وقالهم ياجماعه الخير ماشفتو بنت مجنونه هنيا قالو الا بلا شفنا جنيه في وسط الغار هذاك قال هذي مهيب جنيه هذي بنتي مجنونه وكنت رابطها عند بيت الشعر ورحت للحلال ويوم عودت مالقيتها فكت رباطها ونحاشت ونا من الصبح ونا ادور عليها ويروح الشايب يم الغار وشوي ولاه جاي يمشي ورابط الجنيه بحبل وهي تمشي معه |
السلام عليكم ورحمة الله وبركاته اخواني واخواتي الأعزاء الله يجعل اوقاتكم كلها هناء ومسرات طبعا اخيكم متابع معكم من قديم لكن بدون مشاركات واليوم حبيت أشارك معكم بهذه السالفه متمنياً ان تحوز على رضاكم --ْ قبل كم سنه كنا ثلاث أشخاص اصدقاء مع بعض دائما وبيننا ميانه كبيره وساكنين في احد المدن من مدن مملكتنا الحبيبه طبعا اثنين متأهلين وثالثنا عزوبي وفي يوم من الايام صاحبنا العزوبي عزمنا على الغدا ولزّم علينا وقلنا له تم والله يقويك عقب صلاة الظهر جيناه بشقته طبعاً لحاله ساكن وقعدنا نتقهوى ونسولف والكاتم يدهر بالمطبخ وشوي يقوم للمطبخ يبي ينكب الغدا .. تاخر علينا ونسمع القربعه .. رحنا للمطبخ وش السالفه يابو فلان قال القدر انكسرت عروة طباقته حاولنا به وجبنا زراديه ومفك ونقعد كلنا نغلغل هالقدر نبي طباقته تنفك وعجزنا عنه قلنا له .. اتركه وابشر بالعوض ونروح لاي مطعم ونجيب منه غدا قال ابد ما أتغدا الا من اللي بها القدر ان شاء الله رفيقنا عنيد وراسه يابس . ويقوم العنيد ويلقط القدر ويلهلمه بهكالجريده وقال تخاوونن والا تحترونن قلنا الا نخاويك لكن وين قال بس امشو ركبنا السياره وقعد يفتر بنا بهالشموس وهالحر كانت الساعه حول ثنتين ونص قلنا انت وين تبي وش تدور قال ابي بنشر .. هاه هاه وش تقول .. بنشر قعدنا نراعي بعضنا وقمنا نضحك المهم لقينا محل البنشر ودخلنا عليه بقدرنا طارة عيونه البنشري وتفتحت مناخره ولسان حاله يقول هذولا وين الله حذفهم علي وبعذره الناس تدخل عليه بكفر وحنا بقدر قال البنشري وش تبون قلنا نبيك تفك لنا طباقة هالقدر ماقصر البنشري ثبت القدر واستسلم القدر لكن وشو عقبه وتجيه كم صقعه بالليور والمطرقه لين تخلخلت الطباقه قلنا بس .. بس .. يكفي ونعطيه 5 ريال حق بنشرالقدر ونلهلمه بجريدته وننكس للشقه وندخل ونحط الغدي ونقعد ناكل وكركرتنا يوحيه كل الجيران ونقول بالغدي ونخلي الصحن يلق مايبي غسل يبي رفع بدروج المطبخ ونلتفت للقدر القضيه ونستدنيه وناكل الحكاكه وحنا نكركر وما مر علي بحياتي ألذ من غدا هكالقدر اللي طعمه بالراس الى هالحين وسلااااااامتكم غفر الله لي ولكم وللمؤمنين والمؤمنات والمسلمين والمسلمات محبكم النبهاني |
حياك الله أخوي النبهاني بين أخوانك ههههههه لو أنا من البنشري اترك البنشر واهج ههههههه أقرب شي بيتبادر لذهني هو أن هذا القدر فيه متفجرات هههههههه مثل ما حصل في أمريكا حيث استخدم قدر الضغط في التفجير لكن أبو يمن ما عنده لو تجيب له سكود هههههههههه أمتعتنا بهذه السالفة وأعتقد لازال في جعبتك الكثير فلا تبخل بما لديك وشكراً لك تحيتي وتقديري وهاي ورده :ordh: |
| الساعة الآن 06:53 AM |
Powered by vBulletin .
جميع الحقوق محفوظة © لشبكة ومنتديات البراري 2010