شبكة البراري

  #1  
قديم 2015-10-10, 10:43 صباحاً
سحاب شقراء سحاب شقراء غير متواجد حالياً
شــــاعــــــر
وسام التميز الذهبي:  - السبب: نظير مشاركاتكم ومجهوداتكم المتميزة
تاريخ التسجيل: Nov 2012
المشاركات: 924
جنس العضو: ذكر
سحاب شقراء is on a distinguished road
BeRightBack زاوية سحاب شقراء - سواليف الاولين أيام بيوت الطين والحياه الطيبه



السلام عليكم ورحمه الله وبركاته

الا بذكر الله تطمئن القلوب لا اله الا الله وحده لا شريك له

يالله تحييهم كلهم كبيركم وصغيركم وذكركم ونثاكم وليا حيا كثر وتنثر وتزبر هذا كلام العجيزات منول

اخواني الغالين انا اشكر اداره شبكه البراري بالسماح لي بفتح هذا القسم الخاص بسواليف الاولين ايام بيوت الطين -- ووصيكم جعل ربي يحفظكم ودي تشاركوني لا تخلوني --

وترا رذاذ جعل ربي يسعد قلبها هي الي دعتني وشجعتني اني اكتب لكم

واارجو من الرحمن الرحيم ان اكون خفيف عليكم ولا تملون مني
انا هلحين شايب يالله حسن الخاتمه ودي توسعون صدوركم وتشوفون حياتنا منول والاحداث الي تحصل في ذاك الزمان الي يشتاقله كل من عاش فيه وسئلو الشياب هم يعلمونكم ترا بعظهم الا ذكر بكا
الحيات منول لها لذه وسعاده من الرحمن الرحيم سبحانه
تصدقون ان الله سبحانه موسع بيوتنا في عيوننا ومبارك فيها
بس في هذا الزمان فقدنا لذه الحياه وسعادتها صحيح لله الحمد والشكر الخير كثير بس مالها لذه
حتا البزر ابو عشر سنين تلقاه يقول طفش وملل وهو ماتحمل مسؤليه
الحمد لله من قبل ومن بعد حمدن يليق بمقامه الحي القيوم

وبس هذي المقدمه

والله العظيم اني مااعرف اكتب الا بصبع واحد ونقر على الحروف مثل نقر الدجاج للعيش


بسم الله نبدا

ياشين العجيز الا حبت شايب بس بصراحه الحب بلوا وبس هذي سالفه قعت احكحكها الين قصرت كله علشان ما تعرفون منهي راعيه السالفه جعلها للجنه وميمتي وبيي وخيي وجدي ونا ونتم ووالديك وكل مسلم

السالفه هذي حاصله في شقراء جعلها للسيل

العجوز هذي تحب عود شايب وش كبره وهي ميت رجلها من سنين وبنين ولا لها عيال والشايب ميته حرمته من سنين وبنين بس هي متولعه في ها الشايب تحبه وهو صاير شايب احلامها هههههههههه بس شكل الشايب معطيها اشكل كان معشمها بالزواج بس مدري وراه صار يتغلا عليها
الشايب عنده نخل وقبله يشتغل فيه يروس ويلقح ويحصد وكان نشيط ما عليه وهو ساكن وسط نخله في بيت طين وذا الكلام من مووووووبطي المهم ذا العجوز ضايق صدرها منه ما وفا بالوعد ولا تدري وشبلاه وش الي غير رايه ماتدري وسبحان الله معاد يواطنها وراه مدري المهم وهي تخمر ذيك القرصان يعني تخمر تصب على القرصان مرقه فيها قطيعات قرع وبيدجان وهي تقولي قوه انا وياك نبي نودي ذا الغدي لراعيه قلت ونا جايع قالت الا وديناه نبي نرجع انا وياك ونتغدا انا ونت قلت ابي كليجا - وهي من الحريم الي يسوون كليجا
قالت الا رجعنا ما كان الا خير وهي تلف القدر بلفافه قماش وتعقدها من فوق وتشيلها وروح انا وياها نمشي الين وصلنا المسيل ونبتل بين النخيل الين وصلنا نخل الرجال هههههههههه
ما وصفت وين رحنا معه اخاف تعرفون منهو هههههههههههههههه المهم ونروح ونفتح باب النخل وندخل ولا نا نشوفه في وسط نخله وهي تاقف مكانها وتنهدت ذيك التنهيده يوم شافته ههههههههههههه وقالت لي رح عطه اياه وقل هذييا غدي من فلانه وهي تسلم عليك وقله يحطه في ما عون ويعطينا ما عونا - وقالت لي بعد ارفق لا تصعفق وينكب الغدى وتصعفق معناها لا ترج الغدى وينكب قلت طيب ونا اخذه ماسكه بلفافته وروح للشايب ولاه يقولي بعدي ولدي ويوم وصلته وهو يطمن ويحبني وقالي مننت ولده قلت ولد فلان قال ونعم قلت طيب ما اعرف ارد توي صغييير وقلت له هذا غدي بالتصغير طبعن ولا هو غدا المهم قلت له هذا غدي من فلانه وهي تسلم عليك وقوله شفها فيذاك وشر بيدي وينا ضرها وقال اشوفها وقلت حط الغدي في ما عونك وعطنا ما عوننا قال انشاء الله وخذ الغدي وراح لم بيته ويوم رجع ويعطيني قديرنا وقالي قلها يا ملا العافيه يم فلان وهي مالها عيال بس يسمونها الناس ام فلان قلت طيب ونا اروح لم العجوز ويوم وصلتها قالت وش قالك قلت انه يقولي سلملي عليها وقلها ما قصرتي وهو بصراحه ما قالي سلملي عليها شكله معطيها اشكل وراد بها المهم ونرجع بين النخيل وهي الي تبي تطير من الفرح ورحنا لبيتها في الدويخل قريب من سوق المجلس يعني بين حليوه والمجلس وعطتني كليجا المهم مرت الايام وروح يمها ذاك اليوم وطقيت الباب بذيك الحلقه المدوره الحديد طق طق طق قالت من عند الباب قلت انا سحاب قالت تعال ادخل الباب مجافا يعني مفتوح ودخل عليها ولاها شكلها باكيه عييناتها حمر قلت لها وراه ضايق صدرك قالت من الدنيا ونا امك قلت لها لا تصيحين انا ابا اروح وياك للخباز وللي تبين بس لا تصيحين ثمن خمتني جعلها للفردوس وقامت تصيح وقعد اصيح انا طول بطني ههههههههههههه ونا مدري وش السالفه

قالت لي تدري ياسحاب الي ودينا له الغدا تذكره قلت فلان قالت ايه فلان كان واعدني يبي يعرس علي وهلحين سامعه انه يبي يعرس ويبي ياخذ فلانه حرمتن من الديره
المهم هي من حر ما توجس ضعيفه صارت تشعر وقالت قصيده في عود ابليس هذا ونا الحمد لله والمنه له سبحانه يومي صغير ذهيين وحفض الشعر خص وذكرت قصيدتها وقصتها وتقول في قصيدتها ياملا الجنه البارده

ظـــاق الصــدر ثم ظاق داري عليه


بسباب مـنــهــو ما يـبـيني ونا ابيه


يـمــرنـــي بالســـوق والــطالـعـيـه


ويـصـــد عـني كـني جـني مــوافيه


ودعـيــت انا الــي عالمــن بالخـفيه


يـفــــــرج لقـلبـن ظامياتــن نواميه


الـعـشــق بـلــوا والمحـبــه بلــيــه


وقلبي عسى الله ينزل الغيث ويسقيه


-----

هذي قصيدتها وقصتها جعلها للجنه ووالدينا وكل مسلم في الشايب وسلامتكم

الله يجمعنا وياكم ووالدينا بالفردوس الاعلى من الجنه امين

وفي النهايه اقول

سبحان الله والحمد لله ولا اله الا الله والله اكبر

عدد خلقه وزنه عرشه ومداد كليماته ورضا نفسه

التوقيع:
شوفوفعايل دنيتي مع سنيني ---اول صغيرالسن واليوم شايب

رد مع اقتباس
  #2  
قديم 2015-10-10, 01:00 مساءٍ
رعد الشمال رعد الشمال غير متواجد حالياً
شـــــــاعــر
تاريخ التسجيل: Oct 2008
المدينة: السعودية
المشاركات: 1,810
جنس العضو: ذكر
رعد الشمال is on a distinguished road
افتراضي

الله يسعدك ياسحاب
قصة روعة وأسلوبك بسرد القصة اروووع
الله يوسع صدرك الحقيقة موضوع جميل جدا
خصوصاً أننا في وقت الله يكفينا شره الناس ماتلقى فيهم
اللي يسولف عليك كلً منشغل في جواله وفقدنا السواليف الزينة
والقصص
وتذكر الماضي الجميل
سحاب وانا اقراء القصة وأسلوبك تذكرت واحد راعي سوالف زينه
سمعت له كم مقطع يمكن أنك تذكر قصته يوم يضرب جدته يوم ماحطت له لحمه على الغداء
ههههههههههههههههه الحقيقة صار عندي شك أنه انت ههههههه

أعجبني بيت العجييز الله يرحمه ويرحم أمواتنا وأموات المسلمين

ظـــاق الصــدر ثم ظاق داري عليه

بسباب مـنــهــو ما يـبـيني ونا ابيه


موضوع رائع وجميل بروووعة حضورك وأسلوبك
لا تبطي علينا

رد مع اقتباس
  #3  
قديم 2015-10-10, 05:34 مساءٍ
الصورة الرمزية عابر سبيل
عابر سبيل عابر سبيل غير متواجد حالياً
عضو متميـز
وسام التميز الفضي:  - السبب: نظير مشاركاتكم ومجهوداتكم المتميزة
تاريخ التسجيل: Apr 2012
المشاركات: 4,152
جنس العضو: ذكر
عابر سبيل is on a distinguished road
افتراضي

الله يسعدك شاعرنا الكبير سحاب شقراء .. نافذة جميلة وطرح رااائع يستحق التثبيت والتميز ..
فالك الجنة ،،،،

التوقيع:
رد مع اقتباس
  #4  
قديم 2015-10-10, 08:04 مساءٍ
الصورة الرمزية رذاذ
رذاذ رذاذ غير متواجد حالياً
شاعرة البراري
تاريخ التسجيل: Nov 2009
المشاركات: 2,234
جنس العضو: أنثى
رذاذ is on a distinguished road
Arrow



هنا سيكون لنا مع القصص القديمه مواعيد ،،
وسيفوح عبق ذاك الزمان الماضي ،،
هُنا سنجد جمال الأسلوب .. وصدق اللحظات .. وفكاهية السرد ،،
وطيبة قلب من حضرها وكتبها لنا ..

سحاب شقــراء ..

سيمتلىء منتدى الشعر برذاذ أحرفك الجميله شعراً ونثراً ...
وستنتعش قلوبنا وأرواحنا بمفرداتك النديّه .. وقصصك الشعريه ..

فألف شكر لك على هذا الحضور والإطراء لي بشيء لاأستحقه ..
وألف شكر لك على هذه الزاويه الفريده والمميزه كـ سحابك الماطــر ...



رذاذ

التوقيع:
رد مع اقتباس
  #5  
قديم 2015-10-10, 08:15 مساءٍ
سحاب شقراء سحاب شقراء غير متواجد حالياً
شــــاعــــــر
وسام التميز الذهبي:  - السبب: نظير مشاركاتكم ومجهوداتكم المتميزة
تاريخ التسجيل: Nov 2012
المشاركات: 924
جنس العضو: ذكر
سحاب شقراء is on a distinguished road
افتراضي

اقتباس:
المشاركة الأصلية كتبت بواسطة رعد الشمال مشاهدة المشاركة

الله يسعدك ياسحاب
قصة روعة وأسلوبك بسرد القصة اروووع
الله يوسع صدرك الحقيقة موضوع جميل جدا
خصوصاً أننا في وقت الله يكفينا شره الناس ماتلقى فيهم
اللي يسولف عليك كلً منشغل في جواله وفقدنا السواليف الزينة
والقصص
وتذكر الماضي الجميل
سحاب وانا اقراء القصة وأسلوبك تذكرت واحد راعي سوالف زينه
سمعت له كم مقطع يمكن أنك تذكر قصته يوم يضرب جدته يوم ماحطت له لحمه على الغداء
ههههههههههههههههه الحقيقة صار عندي شك أنه انت ههههههه

أعجبني بيت العجييز الله يرحمه ويرحم أمواتنا وأموات المسلمين

ظـــاق الصــدر ثم ظاق داري عليه

بسباب مـنــهــو ما يـبـيني ونا ابيه


موضوع رائع وجميل بروووعة حضورك وأسلوبك
لا تبطي علينا

ياهلا ويامرحبا ومسهلا رعد الشمال
ياجعلك ووالديك للفردوس امين يارب العالمين

انت صادق يالغالي ذا الزمن يروع صاب الناس صمت رهيب بسبب الجوالات والبرامج الي فيه

انا يالغالي ماعندي مقاطع صوتيه كلها كتابيه

وشهادتك وسام شرف جعل ربي يشرفك دنيا وااخر ه

وعلا طاري الي ضرب جدته يوم ماتعطيه لحم ذكرت سالفه صايره في احد مزارع شقراء

فيه واحد هو وبوه وعياله اثنين ساكنين في مزرعتهم على اطراف مدينه شقراء

المهم قلطو الغدا وهم بين النخل وجلسو العيال وبوهم وجدهم يجي عمره 90 او 95 سنه
ويجيهم راعي غنم وقالو له تفظل معنا اقلط الله يحييك وجلس معهم يتغدا

العيال اثنين والواحد كبر بليس ههههههه بس فيهم صح مهنا تكانه

جلس الراعي مقابل واحد من العيال وصار الراعي يمد يده جهه الولد وياخذ اللحم قال الولد للراعي وراك هلحين تاكل من شنقي يعني جهتي ونت خابر عيب يقول للظيف ذا الكلام
وقال جدهم للولد انت ورا ماتاكل من معلفك وتسكت
ونت خابر المعلف ماياكل فيه الا الحمار
نفض الولد يده وقام زعل من كلام جده

ويوم خذو شوي ولا الولد جاي ومعه خشبه او جذع شجره شايله على كتفه

وهو الي يظرب جده بالخشبه مع كتفه ولا الشايب متمدد اغمي عليه

قال الولد هلحين اجلس واكل من معلفي ههههههههههه

ودو الجد لمستشفى شقراء ونوموه يجي شهر عندهم باغي يموت ولقو التركات الي تحت الكتف منكسره وجبروه ويالله طاع يجبر انت خابر عمر 90 يبطي عظمه مايجبر يالله حسن الخاتمه

رد مع اقتباس
  #6  
قديم 2015-10-10, 08:22 مساءٍ
سحاب شقراء سحاب شقراء غير متواجد حالياً
شــــاعــــــر
وسام التميز الذهبي:  - السبب: نظير مشاركاتكم ومجهوداتكم المتميزة
تاريخ التسجيل: Nov 2012
المشاركات: 924
جنس العضو: ذكر
سحاب شقراء is on a distinguished road
افتراضي

اقتباس:
المشاركة الأصلية كتبت بواسطة عابر سبيل مشاهدة المشاركة

الله يسعدك شاعرنا الكبير سحاب شقراء .. نافذة جميلة وطرح رااائع يستحق التثبيت والتميز ..
فالك الجنة ،،،،

ياهلا ويامرحبا ومسهلا عابر سبيل

شرفتني بحظورك شرف الله قدرك ومقدارك امين

وجعل ربي يعلي شانك دنيا ودين

والرائع طلتك جعل ربي يحبك وملائكته امين

رد مع اقتباس
  #7  
قديم 2015-10-10, 08:33 مساءٍ
سحاب شقراء سحاب شقراء غير متواجد حالياً
شــــاعــــــر
وسام التميز الذهبي:  - السبب: نظير مشاركاتكم ومجهوداتكم المتميزة
تاريخ التسجيل: Nov 2012
المشاركات: 924
جنس العضو: ذكر
سحاب شقراء is on a distinguished road
افتراضي

اقتباس:
المشاركة الأصلية كتبت بواسطة رذاذ مشاهدة المشاركة



هنا سيكون لنا مع القصص القديمه مواعيد ،،
وسيفوح عبق ذاك الزمان الماضي ،،
هُنا سنجد جمال الأسلوب .. وصدق اللحظات .. وفكاهية السرد ،،
وطيبة قلب من حضرها وكتبها لنا ..

سحاب شقــراء ..

سيمتلىء منتدى الشعر برذاذ أحرفك الجميله شعراً ونثراً ...
وستنتعش قلوبنا وأرواحنا بمفرداتك النديّه .. وقصصك الشعريه ..

فألف شكر لك على هذا الحضور والإطراء لي بشيء لاأستحقه ..
وألف شكر لك على هذه الزاويه الفريده والمميزه كـ سحابك الماطــر ...



رذاذ

ياجعل ربي يزيح همك ويجعلك من اسعد خلقه امين

واالاطراء ماقلت الا الحقيقه انتي من سنه او اكثر ونتي تطلبين مني اجي وكتب

وبو سيرين جعل ربي يسعد قلبه قالي نبيك تسولف علينا جعل ربي يعلي قدره ومقداره

ونتي يالغاليه رذاذ ماقصرتي معي في جميع مشاركاتي جعل الشر يقصر عنك امين

شرفتيني بحظورك شرف الله مقامك

رد مع اقتباس
  #8  
قديم 2015-10-10, 09:07 مساءٍ
أبو سيرين أبو سيرين غير متواجد حالياً
مشرف خيمة البراري الشعبية
وسام التميز الذهبي:  - السبب: نظير مشاركاتكم ومجهوداتكم المتميزة
تاريخ التسجيل: Jun 2007
المدينة: جدة
المشاركات: 1,049
جنس العضو: ذكر
أبو سيرين is on a distinguished road
افتراضي

يا هلا والله ويا مسهلا بالعم سحاب

أنا من اليوم بسميك العم سحاب عشان تجيب لنا من قصص الأولين الله يرحمهم وتنقل لنا تراثهم وذكرياتهم وقصصهم والقصائد اللي توثق القصص

وأنا أدري ان مسئولية نقل مثل هذا التراث كبيرة جداً ولكن صدقني أنت كفو وخير من ينقل لنا الصورة خصوصاً ما شاء الله عليك عندك سعة صدر وأريحية <<< هذي عاد اسئل عنها عبد المحسن هههههه .... وعندك صبر الله يحفظك ولا يحرمنا منك ومن أمثالك

وأتمنى تركز على عاداتهم وكيف كانوا يتصرفون وتنقل لنا كل شي عنهم حتى لو استعنت بصديق ما فيه مشكلة بس أهم شي نريد منك 365 قصة في خلال سنة ما حنا طماعين ولا ودنا نثقل عليك

وجعلك ووالديك للجنة ومن يسمع

والله يحفظك من كل مكروه

,,,,,,

رد مع اقتباس
  #9  
قديم 2015-10-10, 09:14 مساءٍ
أبو سيرين أبو سيرين غير متواجد حالياً
مشرف خيمة البراري الشعبية
وسام التميز الذهبي:  - السبب: نظير مشاركاتكم ومجهوداتكم المتميزة
تاريخ التسجيل: Jun 2007
المدينة: جدة
المشاركات: 1,049
جنس العضو: ذكر
أبو سيرين is on a distinguished road
افتراضي

بالنسة للقصة جداً مؤثرة وهي تمثل الحب من طرف واحد

واعجبتني الأبيات ولكن للأسف أنت موقفك كنت تمثل فيه دور كوبارس ههههههه يعني ما حاولت تصير البطل

وبعدين هي ما شاء الله شاعره لو انها مرسله له قصيدة غزلية من اللي يحبها قلبك كان الرجال تغير وضعه ولكن يبدو لي انها أول قصيدة وآخر قصيدة هههههه

اخيراً القصة مؤثرة وتحكي واقع الحب وما يسويه في الشخص

تحيتي وتقديري

رد مع اقتباس
  #10  
قديم 2015-10-10, 10:13 مساءٍ
عبدالمحسن الرحمه عبدالمحسن الرحمه غير متواجد حالياً
شاعر
وسام التميز الذهبي:  - السبب: نظير جهودكم في المنتدىوسام التميز الذهبي:  - السبب: نظير مشاركاتكم ومجهوداتكم المتميزة
تاريخ التسجيل: Oct 2008
المدينة: الزلفي
المشاركات: 2,420
جنس العضو: ذكر
عبدالمحسن الرحمه is on a distinguished road
افتراضي

بسم الله الرحمن الرحيم

ياالله سترك وهذي قعده في هذا المحل ياسحاب نبي لنا مكيف صحراوي يهفهف علينا
ومعي حب قرع ودلة زنجبيل رطب
لا تتأخر علينا نبي قصة عجله الله لا يخلينا من قلبك

التوقيع:
رد مع اقتباس
رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
طرق مشاهدة الموضوع

تعليمات المشاركة
لا تستطيع كتابة مواضيع
لا تستطيع كتابة ردود
لا تستطيع إرفاق ملفات
لا تستطيع تعديل مشاركاتك

كود [IMG] متاحة
كود HTML معطلة
الانتقال السريع إلى

Loading...
الساعة الآن: 07:07 صباحاً

[ البحث في شبكة و منتديات البراري بإستخدام محرك البحث Google ]

Powered by vBulletin® Version 3.6.8
Copyright ©2000 - 2019, Jelsoft Enterprises Ltd.
جميع الحقوق محفوظة © لشبكة ومنتديات البراري 2010  
المشاركات أو الآراء المنشورة في شبكة البراري لا تمثل بالضرورة الرأي الرسمي لشبكة البراري بل تمثل وجهة نظر كاتبها