حنا والجيران

[شيخ المنتدى]

السلام عليكم ورحمة الله
الله يسلمكم باتكلم عن نفسي وعلاقتنا مع جيرانا . انا اصلا من احدى بلدان سدير وعايش وساكن في حي العزيزيه في الرياض
الشارع اللي فيه بيتنا بالكامل عماني واخر بيت جهة المسجد خالي اخو امي
وحولنا زهارنه وغمد وناس من الخرج واثنين من الزلفي
كل يوم احد - اوروبيين على غفله خخخخخخخ - بعد المغرب اجتماع جماعة المسجد كل مره عند واحد
مذن المسجد ابو خلف الزهراني والله والف نعم رجال طيب وكبير في السن وراعي طاعه ماشاء الله عليه
هذا شغلنا دايم واذا غاب احد لازم يبلغ واحد يقول للجماعه انه مسافر او عنده شغل
يعني متكاتفين وعايشين بخير والحمد لله وكاننا ايام زمان على قولة الكبار
الشيء الغريب ان البعض من سكان الرياض يقول انه مايعرف جاره ولا يعرف اسم المذن او الامام في مسجدهم يقول يركع الركعتين ويهرب ما يشوف احد
ياساتر وش الفايده من الجيران صايرين كانهم في بر مااحد يعرف احد
الله لا يبلانا
للجار حق على الجار ما ينتهي ابدا حتى اذا مات لازم يمشي في جنازته وما ينساه من الدعاء
الرسول صلى الله عليه وسلم يقول : مازال جبريل يوصيني بالجار حتى ظننت انه سيورثه
الكلام كثير عن جيراننا وحارتنا لكن ماابي اكثر عليكم
ان شاء الله اقول في المرات القادمه
وصلى الله على محمد واله وصحبه وسلم
اخوكم في الله
شيخ المنتدى