سحاب شقراء -سواليف الاولين ايام بيوت الطين والحياه الطيبه

[أبو سيرين]

يـا عـم سـحـاب الله يمسيك بالخـير
نبي مـن المـاضي علوم وسواليف

تشغلني عـن همي ولا افكر اكثير
ولا أشغل النفس بغرام ومواليف

[سحاب شقراء]

المشاركة الأصلية كتبت بواسطة رذاذ

الله .. الله .. الله
سواليف .. وقصايد .. وسراويل
هههههه
الله يسعدك ياعم سحاب
وصح لسانك ولسان أبوسيرين
وبحضور سموّ المشاعر إكتملت السعاده هنا ..
الله يحميكم جميع يارب ..


رذاذ

ياهلا ومرحبا بالغاليه رذاذ

الله يحفظك من كل شر

[سحاب شقراء]

المشاركة الأصلية كتبت بواسطة أبو سيرين

يـا عـم سـحـاب الله يمسيك بالخـير
نبي مـن المـاضي علوم وسواليف

تشغلني عـن همي ولا افكر اكثير
ولا أشغل النفس بغرام ومواليف

جيتك يبو سيرين اسرع من الطير

والحب خله وخلنا بالسواليف

[سحاب شقراء]

السلام عليكم ورحمه الله وبركاته

هلا ومسهلا بالغالين عساكم ما تملون مني وتقولون شايب وعطيناه وجه ههههههههههههه

هذي سالفه صايره ونا صغيييير ايام بيوت الطين فيه ناس جايينهم من الرياض اقربا لهم
وكلهم حريم وبنات وبزور بس وكان راعي البيت رايح يم بعوله وشي البعول هي يالغالين يروح الرجال لاي منطقه في البر ويحرثها والبرمنول مهوب لحد المهم يحرثه ويبذر فيها عيش قمح يعني ويكون هذا الكلام على وقت دخول الوسم يعني وسم الامطار ولا جا المطر ينبت العيش ولا سنبل يحصدونه ويدوسونه ويذرونه ويطيبونه ويجرشونه وياكلونه هههههههههههه شوفو كم مرحله قبل الاكل المهم ها الناس ابوهم مهوب فيه والبنات والحريم ماخذين راحتهم وكانو فارشين فرش في الحوش حقهم وجالسين وتفقو يجيبون قدوره وصحون وتنك ويطقون سعه صدر بس كان في اخر الحوش بقرتين وش كبرهن المهم جابو ادوات السامري وبدو يطقون ويرقصون ولا يرقص فيهن الا ثلاث بس دوووووبيات مره مايصلحن للرقص ابد ويردحن ردح ما تحس الارض تحتك تهتز شي فوق الوصف لا وفيهن وحده تقول للثانيه تعرفين تجيبين ذا الحركه وهي تختبص برجليها من تحت بسرعه يعني هذي حركه ولا اكبر راقصه تجيبها الله يرحم الحال وبس لوتشوفون الي انا شايف حرمتو الرقص تحريم المهم وردح وطق بها التنك والقصيد بيت واحد من الشعر والشطر الثاني بعد غلط المهم مادرينا وذا الكلام في الليل في اول الليل يعني مادرينا الا الي جايه تمشي طبلونها وحده من البقر قطعت رباطها وجتنا تركض ويختبصون الحريم ويغمى على ثنتين منهم والبقره كل ما وصلتنا خافت ورجعت بسرع شي اكيد انها خافت من الرقاصات تصدقون ان الي ير قصن اكبر من البقره هههههههههههه المهم ويجي ابو الجيران ومهم يوم سمعو الصيحه وش فيكم وشفيكم يحسبون شاب فيهم ضو قالو البقره منطلقه وفيه ثنتين مغما عليهن وشوا ويجي ابو الجيران ويمسك البقره ويربطها ويصحن الي مغمى عليهن ويدلي ابو الجيران يهوش على الحريم يالي ما تستحن ياللي ماتخافن الله يوم غاب فلان عن بيته تسوون كذا يا ناقصات العقل والدين والله لوني ماتعوذت من ابليس اني اعطي كل وحده مسطه بها العصى الي في يدي يالله ادخلولياني هلحين افك رباط البقرتين الثنتين كلهن وخليهن يتهبدنكم
اجل هذا ردح اوادم والكلام هذا طبعن للشايب اجل هذا ردح اوادم والله الذي لااله غيره ان الارض تهتز ون بيتي يهلهل علي تراب من ها الردحي ويتفشلن الحريم وخص الي كانن يردحن تبون اوصف لكم اجسام الحريم الثلاث الي يردحن تشوفون المصارعه اليابانيه تشوفون ذوليك الي يتصارعون ما عليهم الا صراويل وهم كبر الفيله ابد الخالق الناطق من الرقاصات الثلاث اجل وحده منهن تسوي حركات برجليها تعجز بالباقيات لوهم مار قالو نبي نسوي حلبه مصارعه وتصارعو كان اهون اما يرقصن مهوب يم سنع ابد ههههههههه

[بقآيآ .. حرف]

ماشاء الله تبارك الله
العم سحاب
لوجودك ولسواليفك رونق ومذاق خاص
أسال الله أن يديمك ويحفظك
كل التحايا

[أبو سيرين]

هههههههه

الله يوسع صدرك يا عم سحاب مثل ما وسعت صدورنا

الا ما قلت لنا يا عم سحاب كم من عمرك قضيته في هالفترة

أقصد قبل لا تتغير حياتكم لما هي عليه اليوم

يحليلهم من أول البقر معهم في البيت هههههه

تحيتي وتقدبري

[سحاب شقراء]

المشاركة الأصلية كتبت بواسطة بقآيآ .. حرف

ماشاء الله تبارك الله
العم سحاب
لوجودك ولسواليفك رونق ومذاق خاص
أسال الله أن يديمك ويحفظك
كل التحايا

جمل الله حالك ورفع قدرك يالغالي

شرفتني شرف الله مقامك

[سحاب شقراء]

المشاركة الأصلية كتبت بواسطة أبو سيرين

هههههههه

الله يوسع صدرك يا عم سحاب مثل ما وسعت صدورنا

الا ما قلت لنا يا عم سحاب كم من عمرك قضيته في هالفترة

أقصد قبل لا تتغير حياتكم لما هي عليه اليوم

يحليلهم من أول البقر معهم في البيت هههههه

تحيتي وتقدبري

ابو سيرين يالغالي

كل بيت منول فيه بقره هي السوبر ماركت
منها الحليب
ومنها اللبن
ومنها الزبادي او الروب
ومنها الزبد

وش تبي اكثر منذا

يعني يبو سيرين تبي تقول ان ماعندكم بقره في بيتكم مستحيل الا كانكم ساكنين البر
البدو ماعندهم بقر ماعندهم الا بعارين وغنم والبقر عند الحضر

ابو سيرين منول يقولون بيت مافيه بقره مافيه ثمره

[أبو سيرين]

المشاركة الأصلية كتبت بواسطة سحاب شقراء

ابو سيرين يالغالي

كل بيت منول فيه بقره هي السوبر ماركت
منها الحليب
ومنها اللبن
ومنها الزبادي او الروب
ومنها الزبد

وش تبي اكثر منذا

يعني يبو سيرين تبي تقول ان ماعندكم بقره في بيتكم مستحيل الا كانكم ساكنين البر
البدو ماعندهم بقر ماعندهم الا بعارين وغنم والبقر عند الحضر

ابو سيرين منول يقولون بيت مافيه بقره مافيه ثمره

أها

لكن أنا اللي أعرفه إن النياق إذا ما تسرّح حليبها مرض ... يعني غير صحي واعتقد البقر كذلك وما كنت متصور إن البقر يتم في البيوت منول !! كنت أعتقد عند ناس معينين يعتنون فيها ويشترون الناس منهم الحليب والجبن وغيره .

[عايد]

كل الشكر لك متعك الله البعافيه