قصيدة الشاعر حامد بن حمود الأحيمر
بدر لامن جاك من ( جاك شيراك) = علم وخبر يابدر عجّل وهاته
عن العديم اللي سهر لاعدمناك = في راس ( برج إيفل ) كسر حايماته
شفني تراني يابدر بـ آتحراك = كلّه سبب معزّته .. من غلاته
قلّه يامرشد عقب حامد تباطاك = حتى الفرنسي قمت أتابع قناته
ولا آعرف حتى إسم إيميله هناك = حتى آتصل به لو ما آعرف نشاته
هذاك ابوتركي وهذاك هذاك = النادر اللي نادراتٍ صفاته
الطيب به منّا ومنّا ومنّاك = يعني جمع بالطيب أربع جهاته
وأكبر دليل إنه مسمّي على ذاك = إبن بنش والله من طيب ذاته
أنشهد إنه للشراكيك فكّاك = يفك قفلٍ محكمه مقفلاته
والوقت لو الوقت حدّك على أقصاك = في حزةٍ ياكبرها معضلاته
تهون لامنّه فزع كبر بلواك = ألا وتصغر لاوصلته وجاته
يشوش لاقالوا له إفلان ينخاك = من الضفر والله ليقطع صلاته
يفداه خبلٍ في الرياجيل نمّاك = ويفداه خبلٍ جاذباته خواته
وانا ترى بقول لك شئ يخفاك = حتى لو إنك قلت ورنا ثباته
خبري بعمّك للشياهين شبّاك = والله يستر من فرنسا وبناته
يابدر إبن غازي ترى علمنا إعفاك = عجلٍ علي لاجاك علمه وهاته
حامد بن حمود الأحيمر
رد الشاعر بدر غازي الشاطري
من هاجسٍ يغلوا بما دون الإشراك = مؤمن بربّه في جميع إحركاته
من هاجسي لبيه لبّاك مولاك = ياصاحبٍ مارافق أهل الشماته
ياحامد إبن حمود عوّدت يمناك = على الوفا وشايبك هذي وصاته
حمود شايبنا عسى اللاش يفداك = زرع وطيبك ثمرةٍ من نباته
ماعندي إليا جيتني غير حيّاك = في مجلسٍ ماهوب يهتزْ ثباته
في مجلس ( أبويه ) وذولي وذولاك = يفدون أبوي ولاتهون إمنياته
أرسلت قافك وأستعديت بإدراك = والرجل يلقى من يمينه نجاته
تنشد عن اللي بسلم الأجواد خاواك = ومن طيب راسك حافظٍ ذكرياته
عمّي عزيز الأصل والفصل شرواك =ا لليْ الوفا يمشي بفيّة عصاته
تدري وأنا أدري إنه وسط ديرة إعداك = شعبٍ حياته ماتباعد مماته
و(شيراك) وعياله .. على راسهم (جاك) = يفدون عمي .. لوْ ماهم مناته
وكانك تبا إنسيّر فلا أحدٍ تعدّاك = ومعنا ياحيّ اللي يعنّي خطاته
شروى ولد ناصر ليا منْ خاواك = فعله يطابق هرجةٍ من شفاته
ويقعد وراء من يشذب خطاي وخطاك = اللي ماتآصل للسما طايراته
وعن القَنَص بعضه فلا يوزم إشباك = وعمّي جزال الصيد واللهْ مافاته
والله يرد اللي على الطيب خاواك = وراعي الوفا ما أحدٍ نسى ذكرياته
2012-05-23, 11:18 AM
قصيدتين جميلتين من الشاعر حامد حمود الأحيمر والشاعر بدر غازي الشاطري
العرض العادي
