الرجال طيور توصـف للحـرار

فتى الرابيه · 2011-07-02, 02:27 AM

الشاعر الكبير - مرشد البذال رحمه الله
------------------------------------

الرجال طيور توصـف للحـرار=وكل طير فـي جناحينـه يطيـر
وين طير يحتري له كـل جـار=ووين طير يذعره صوت الصفير
وين طير لا نهض شـق الستـار=وين طير مايصيـد إلا الشريـر
لو تقـول إن الشجاعـة بالطيـار=كان فضلنا القطا عن كـل طيـر
النداوي له علـى الفعـل اقتـدار=والحمامـة بالمحـارم تستـديـر
وإن جهلت الزين والجنس الدمـار=انشد اللي فـي معرفتهـن خبيـر
افتهـم منـي كـلام باختصـار=فرق بين الصوف من سلك الحرير
وفرق بين الحب ونخال الشـوار=أصلهن واحد لاشك الـذوق غيـر
ربعة الطيب تزيـدك بانتصـار=ترفعك رفع العمـد بيـت نظيـر
والردي عرفه مثل بيـر هيـار=تنقبـر فيهـا ويدفنـك الحفـيـر
حقة الطيب تجيـك مـن الفقـار=والردي يعطيك كرسـوع البعيـر
لاترابـع واحـد بالعهـد بــار=وإن وفا مرة فهـو خيـر كثيـر
التجـارب خلهـا لـك مستشـار=لاتبي غير التجارب لـك شويـر
لاتجـي مدخـل يدينـه بالخبـار=مالقى صيدة لقـى داب ضريـر
وانت في نفسك عليك الـدور دار=لاتحسـب إنـك مخلـى يافقيـر
وقر العالـم وتلقـى لـك وقـار=وإن حقرت ا حقرت لو إنك أميـر
والشرف لايستوي فيـه انهيـار=الشرف هو مقضب السيف الشطير
والقناعة مرجلة والضعـف عـار=واطلب النجدة من الوالـي القديـر
لاتجـي للنـاس طلباتـك كثـار=كل ديـوان تجـي يمـه مغيـر
ماخبرنا في هل الشحـذة تجـار=غير فقره كل نفـسٍ لـه تعيـر
خل عز النفـس للعـورة ستـار=لو فراشك في طرف بيتك حصير
وانت للعـودة إلـى الله بانتظـار=واحـد مالـه وكيـل ولا مديـر
مـدة الله تمتلـي منهـا النـقـار=تجعل الغـدران بالملـزم تحيـر
تجعل الوادي مريـف بالخضـار=عقب ماهو يابس قشعـة هشيـر
الكريم معـان والفـارس مجـار=مدي الواجـب ونطـاح الذخيـر
والغنـى بالـذل مافيـه اشتهـار=والفقـر بالعـز لأمجـادك يثيـر
منزلك بالذل فـوق أعلـى منـار=ينتفضل عنـه مسكـان الحجيـر
مرقدك بالعز فـي حـزم القـرار=ينتفضل بالمعـزة عـن سريـر
الغنى بالنفـس ماهـو بالصـرار=كم غنـي كـن ماعنـده دخيـر
كم فقير في ثقيـل الحمـل ثـار=وكم غني سمعتـه سمعـة فقيـر
لا تقول فلان يملـك لـه عقـار=ليش أنا ما أدركت مثله وأصيـر
واحد معطي ماهـو فيـك غـار=لاتجي لأحوال خلـق الله نظيـر
ولاتقول الوقت لايحنـي صطـار=ضربة خلـت دماغـي يستديـر
غيرك الدنيـا تلوحـه بالحجـار=لين صار الدم من خـده خريـر
ضامـت الدنيـا مدللـة البكـار=نازلين القفـر لـو جاهـم نذيـر
وانكشف برق مثل لـون الشعـار=يذكر الغزاي به عشـب وغديـر
جلعوا لـه مالهـم غيـره مـزار=في جهـام كنـه الصيـد المذيـر
وإن مشورك بالسلف والنشر سار=زمة الحيـران زاهيهـا النشيـر
حاسبيـن للجـهـاد وللمـغـار=والبنـادق ماتخـبـى بالجفـيـر
كان شاط الهوش شيطات العشـار=جتـك أواليـد تعـزوا بالفطيـر
موتة عن قولـة الخفـرات نـار=العـذارى ماتعشـق اللـي ينيـر
وينهم هالحيـن مامنهـم سمـار=ماتشوف إلهـم ورود ولاصديـر
مالـت الدنيـا عليهـم بانكسـار=عقب مايضهد دبشهـم كـل بيـر
عقب شرب الدر من سور الحوار=هاجروا بالمدن يشرون العصيـر
والدبور إليا طبـخ قـدره وفـار=ذوب اللي فيه من حامي السعيـر
لذة الدنيـا مثـل لعـب القمـار=لو جمعت المال شف تالي المصير
لوجمعت من الذهب حمل القطـار=عند نزع الروح ما أنتب له دبيـر
صار بين الوارثين بـلا مشـار=انعزل حق الكبير مـن الصغيـر
وانت حقك خامـةٍ عشريـن وار=حقتـك هـذي ولا فيهـا خشيـر
فصلوا منهـا حزامـك والـوزار=وأقرشوا بك يم مثـواك الأخيـر
وانسدحت من الفضا في وسط غار=يطردك منكـر وقدامـك نكيـر
واهني اللي مشى طلـق الشكـار=سالم من ظلم عمرو ومن عميـر
لـوه بالدنيـا بحـالات خطـار=يرتجي بالآخـرة فرحـة نظيـر
مـن رحمـه الله وقبلـن العـذار=رحمة الله تغفر الذنـب الخطيـر
والأثيم من الصراط أقرش وعـار=إن سلم من ويل طـاح بزمهريـر
يـا إلهـي كـان مالـي إقتـدار=ألتجي في رحمتك وأنت المجيـر
الشباب أقفى وأنـا بآخـر نهـار=وأرتجي فزعتك يانعـم النصيـر
-----------------------------------------------------

تحياتي للجميع