سحاب شقراء -سواليف الاولين ايام بيوت الطين والحياه الطيبه

[سحاب شقراء]

السلام عليكم ورحمه الله وبركاته

هلا بالغالين



ابا اقولكم سالفه هكا الرجال اللي معه بندق ام فتيل القديمه كان يمسحها وهو معشيها يعني

مجهزها للرمي وثارت البندق في

وجهه ولعبت في حنوكه وبغا يموت الظعيف و لا هنا منول طب وتشاوى الرجال نجاه الله سبحانه

بعد سنين بس قبله اذا شفته والاه

متلطم بشماغه لان حنكه او الفك السفلي طاير وقبله جعله في الجنه يسعبل وقبله متلطم بشماغه المهم قال

لواحد ابيك تروح معي لم قريره لا نها مثره عليه البندق حتى في الكلام قال لواحد ابيك تروح

معي لم يعني ام لم قريره علشان نخطب بنتها قريره يعني نروح لم منيره علشان نخطب

بنتها منير قال الر جال الي هو يبيه يروح معه يبو فلان هلحين ابوها وخوها مهمب فيه اصبر الين يجون ونروح لهم ان شاء الله قال الي يبي يخطب مانيب ثابر يعني صابر قوه هلحين وراحو ومنول الباب حق القهوه مطرف يعني ما يصكونه في النهار وطقوا الباب

وقال يم قريره يم قريره يعني يم منيره قالت ام منيره يالله تحييهم منول الحرمه سنعه كنها رجال
ولا ام منيره وبنتها منيره في القهوه يتقهوون قامت منيره وتوزت ورا الباب وجو الخطاطيب قالت الام يالله تحييهم قال ما فيه الى سلاقك يم قريره يعني مافيه الى سلامك يم منيره جايين نخطب بنتك قريره لي
وتكلمت منيره من ورا الباب من هول ماتسمع وقالت الله لا يجعلك حظ لي بالدنيا
ورد عليها على طول وانتي القراري ياقريره يعني ونتي القماري يامنيره وطلعوا هوشه من اولها ههههههههههه
ونتهت السالفه يالغالين ونا الي قايلي عنها الرجال الي راح معه بلسانه جعله للجنه

[رذاذ]

ههههه
الله يسعدك ياأبونا سحاب ...
والله كل الضيق والتعب ننساه لما نجي هنا ..
وسعت صدورنا بسواليفك المميزه .. الله لايحرمنا منك .. ويعطيك طول العمر يارب

[سحاب شقراء]

المشاركة الأصلية كتبت بواسطة رذاذ

ههههه

المشاركة الأصلية كتبت بواسطة رذاذ

الله يسعدك ياأبونا سحاب ...

والله كل الضيق والتعب ننساه لما نجي هنا ..

وسعت صدورنا بسواليفك المميزه .. الله لايحرمنا منك .. ويعطيك طول العمر يارب

ياهلا ومرحبا رذاذ الغاليه

جعل ربي يسعد قلبك امين

شرفتيني شرف الله مقدارك

[سحاب شقراء]

السلام عليكم ورحمه الله وبركاته

يالله تحييهم وليا حيا كثر وليا كثر تنثر وليا تنثر تزبر ههههههه هذا كلام العجيزات منول

اذكرمن سنين وبنين ونا صغير فيه ناسن ساكنين في وسط نخلهم ومنول كل النخيل ساكنين

فيها اهلها المهم اهل النخل الي اقصد عند هم دجاج والدجاج لمهم الكبيره يعني للجده يسمونها منول امنا الكبيره وكان جنب النخل حقهم سوق يمشون معه الناس يعني طريق بس يسمونه منول سوق المهم ونا امشي مع السوق هذا ومادريت الا امهم الكبيره وهي عجوز وتعكز على عصا من كبرها وهي تفتح الباب الي يدخل على نخلهم باب خشب مهوب كبير المهم وتناديني تقول تعال ياوليدي ابا انشدك ورجع لها قلت وش تبين قالت مننت وليده قلت انا ولد الفلان مهيب عاده اعلم بس قد رحت لهم مره انا وبوي جعله للجنه وكل مسلم المهم قالت لي ونعم بك وبهلك قلت طيب معرف وش اقول بزر بزرت عيون العدو هههههه
ثمن قالت لي انت ما قد شفتا احد من ها العيالين معه دجاجه وش كبرها قلت لا ماشفت احد
قالت علمني وشرط لك شرطن وش كبره قلت ولامره شفت احد العيالين معه دجاجه قالت لي تعال ورني عيونك ونا اقرب منها وبزر عيوني عليها علشان تدري اني معرف شي عن دجاجتها قالت والله مدري عنك ثمن قالت فيه دجاجه لي فاقدتها من مبطي ولانيب اسميها الا ام الفراخه من كثر ماترجن ونالي حد ومد ماشفتها ونت خابر الدجاج يطلع من تحت الباب قبل وخاف ان احدن مسكها وخذها قلت انا مدري المهم قامت توصفها لي وتقول ان علمتني وينها فيه او منهو الي ماخذها والله اني لعطيك دجاجتين من عندي ومعهن ابوهن تعاني الديك وهذي عرقتك ان جبتلي علم يعني اجرك ان علمتني من الي ماخذها المهم وروح وبعد كم يوم ونا امشي مع نفس السوق الي فيه نخلهم وفي اخر السوق هذا فيه نخل بس اهله مهمب فيه يعني شبه همال ماسكن فيه احد المهم ونا امشي في ها النخل ولا يوم طلعت علي دجاجه وش كبرها وراها فراخه وااااجد وتنحاش عني وتدخل تحت ذيك النخله الي تحتها فراخه نخل صغيرات انا شفتها ولا ماشفتها ونا الي اروح اركض اسرع شي لم العجوز وفتح باب نخلهم ونا اركض وقول لم عيالهم وين امكم الكبيره وينهي ابيها ولاها جالسه جنب بيت النخل حقهم قالت تعال تعال انا فيذا قلت لها لقيتها لقيتها قالت وشي قلت دجاجتك الي وش كبرها ومعها عيال واااجد قالت بعدي وليدي بعدي هذا والله القرم والقرم مدحه يقولونها الاولين منول بس ما تكل عيش ههههههه ينقطع قلبك ونت قرم ولا فيه فايده ههههههه المهم وهي تاخذ عصاها وتجي وراي ومعها بزورهم ونروح لم النخله ويالله قدرنا نطلع الدجاجه وعيالها ونسوقهن يعني نكش الدجاجه وعيالها الين دخلناها في نخلهم واقف عند الباب ابي العجوز تقولي شي ابيها تعطيني شي وهي مغير يالله لكا الحمد الي عقلها وطايره من الفرحه قلت انا يوم شفتها تبي تبعد عني قلت ابي الدجاجتين وبوهن هماك تقولين الا لقيتها ابا اعطيك دجاجتين وبوهن قالت صك الباب وحافضك الله يالله صكه ورح لهلك بس ما عندي دجاجن لحد وخلي الباب ما صكيته من الزعله وروح ونا منول النباطه قبلها معلقه في رقبتي والمخابي مليانات حصى ونا الي استقعد لدجاجها هماهن قبلهن يطلعن من تحت الباب حق النخل حقهم وصير مالي هم من اصبح الين امسي ونا فيذاك السوق وكل ما شفت من دجاجه طالعه بالنباطه ولا تخيب نبطتي ابد بعظهن يموت على طول وبعضهن يصير يرفس وكل ما صدت شي من دجاجها ما اخذه لا اقوم وحلته في نخلهم الين جا يوم من الايام ويوم نبطت ذيك الدجاجه وجي اركض ابا ارجمها في نخلهم الايوم طلعت علي العجوز من ورا الباب اثرها تبي تعرف من ذاالي يصيد دجاجها ويرجمه في نخلهم المهم وهي تطلع علي وهي تومي بعصاها والله لو امسك اني لطقك يالي فيك ما يخطيك ونحاش يوم جيت للبيت ولاها رايحه وشاكيتني على ابوي الله يرحمه وكل مسلم ويوم توي داخل ولا ابوي يقول انت ما تقولي وش جايك على دجاج الفلان يومك تموتهن بنباطك قلت مهوب انا ونا اكذب بس خفت من الطق قال ابوي الا انت وتراها جايتن امهم الكبيره وهي الي شاكيتك ونها تقول شايفته بعيوني وهو ينبط دجاجي ولا والله ابوي صامل على الطق ونحاش ويوم خذت يجي ساعتين ونا اجي للبيت ولا ابوي مهوب فيه طالع ونا اروح لمي جعلها للجنه وكل مسلم وعلمها وهي بعد زعله علي تسمعني وش اقول وهي مسويه نفسها زعله ويوم علمت امي بكلش وش سبب اني انبط دجاجها يوم اشوا التفتت يمي قالت حتا ولو ما عطك شي مهوب حق ولا هوب واجب ونا امك تنبط دجاجها هذيهي رايحه وشاكيتك على ابوك ومن بعدها معاد رحت ولاعاد جيت دجاجها بس الي موتهن يجي 6 غير الي مصوبات الله يغفر لها ويرحمها وميمتي وبيي وخيي وجدي ونا بعد وكل من يقرا او يسمع

من قال لها تاعدني وتخلف ههههههههههههههههه

وش رايكم والله انا اشوف اني منيب اقشر

ونتم وش تشوفوني تكفون علموني مهوب انا صادق منيب اقشر

الله يجمعنا وياكم ووالدينا وجميع حبايبنا في الفردوس الاعلى من الجنه امين يارب العالمين


وفي النهايه ما نقول الا

الحمد لله ولااله الا الله والله اكبر

عدد خلقه وزنه عرشه ورضا نفسه ومداد كلماته

[سحاب شقراء]

فيه مرررتن رحت للعجيز راعيه الكليجا وقوم ورجف الباب برجلي ونا اقول يم فلان يم فلان بعلا الصوت ونتم خابرين بيبان الخشب اول يبيلها طق بقوه

ولا حسها تقول الله لا يهبلنا بسم الله علي عظيم اسمه

ثمن قالت ادخل جعلك للدخيل هبلتني ونا قاعده احبل للفار وقوم ودف الباب ودخل قالت بشويش لا يطلع للباب حس انتم خابرين بيبان اول يطلع للصاير حق الباب صوت الا هجيناه او فتحناه وصك الباب بشويش ولاها تشر بيدها لي تقولي بشويش وهي جالسه في عتبه الباب الي يدخل للمجبب او وسط البيت وهي تناظرشين منداخل يعني في وسط البيت ونا مدري وش عندها كنها تصييد لشي وجي جنبها وقول وشو وشفيك قالت ما فيني شي وكلامنا بشويييش يالله تسمعه ولا معها في يدها حبل طرايد مربطتهن مع بعض قلت وشذا الي معك قالت اقولك اسكت بس خلني ابا امسك ذا الفار الي عندي ولا ها حاطه مطبخيه او قدر كبير ومنكسته لم الارض يعني اثم القدر يم الارض ورافعه جهه منه وحاطه عود صغير ورافعه به القدر ورابطه في العود الحبل الي معها وحاطه كسره كليجا وكسره بسكوت تحت القدر وقولها وراك جادعه ذا الكليجا ماتبينها هههههههه وتلتفت على وقالت لي ترا ان ما سكتا ابا اغولك غول يعني تبي تدحوسني في حوشها قلت وراه وتخبطني بيدها وهي تقول اسكت ولا اظهر عني ههههههههه ثمن ظاق صديرها علي يوم تظربني بيدها وقالت ابا اعلمك انا من الصبح ونا على ها الحال ذاالفيران ماخلني ارقد ساعتن عند رجلي وساعتن عند يدي وساعتن عند راسي وساعتن يشبني ونا راقده يعني يرقن عليها وعجزت عنهن اخلي باب الحوش مهجوج يعني مفتوح طول الليل ابي كود ذا القطاوه يدخلن وياكلن ذا الفيران الي ماليانتن داري منهن ولا طاعن يدخلن ذا القطاوه جيداتن على دجاجي بس ونا هلحين حابله لهن ابيهن يدخلن تحت القدر علشان اسحب الحبل ويطيح العود ويطبق عليهن القدر وقظبهن يعني تمسكهن ذهينه بعد مهيب لعب هههههه جعلها للجنه وميمتي وبيي وخيي وجدي ونا ونتم ووالديكم وكل مسلم هههههههههه

المهم ونقعد على هاالحال يجي ساعه او ساعتين وهي مغير تقول ظربتن تظربهن ذاالفيران ذهينات بعد ما طاعن يجن و يدخلن ياكلن كنهن داريات عني اني ابا اقضبهن ويوم درينا وتجي فاره تمشي طبلونها يعني مسرعه مره وتدخل تحت القدر وتجي وراها وحده ثانيه وونحن الي يشوفنا يقول يبي يصيدون غزال ههههههه المهم تقوم وتجر الحبل الايوم طبق عليهن القدر هلحين وشلون تبي تمسكهن هههههههه وتقعد تقول انا وشلون ابا اقظبهن يعني امسكهن قلت مدري قالت ان رفعت القدريبي ينحاشن ثمن قالت او اخليهن تحت ذاالقدرالين يموتن قلت مهنب ميتات هماك جادعه لهن كليجا وبسكوت
يبي ياكلن الين يشبعن قالت بعد اخاف انهن ينجسن في وسط قدري ونا اقول اي والله هههههههه شفتو ذاالعقول ولا وشلون ينجسن والقدر محطوط على اثمه الا يوم احترنا ما ندري وش نسوي قالت لي تعال ياوليدي وخلك مع ذا الجهه ونا ابا اجي مع ذاالجهه وبا افتح ذاالخيشه ويدخلن فيها قلت طيب المهم وتمسك الخيشه وهي تدخلها عليهن بشويش وما دريت بسم الله علي الرحمن الرحيم الا يوم قامت تطامر هي ونا اقول وش فيك وش فيك وهي مثل الي يردحون في العروس اويرقصون وفيهم زيران او جن ونا اقول وش فيك وهي تقول ظربتن تظربهن ياربيه ياربيه وهي تنفض كمومها وثوبها ياملا الجنه ولا هنا صراويل ولا شي وهي مع قوه المطامر ونفض الثوب طلع كلش كلش بس تراي صغيييرماعني غطا ههههههههههه وهي مغير يربيه يربيه يالله غربلهن تدرون وش الي صار دخلت الفاره مع كم ثوبها على بطنها على ظهرها وهي مغير تطامر ونا والله قعدت اظحك وش اسوي لوكم شايفينها قلتو الله لا يلومك لو ظحكتا رافعه ثوبها ههههههه باغيه تفصخه وهي ما عليها شي غيره وشوا مادرينا الا الي ترصع في الارض وتروح وتدخل في شق في الجدار يعني طاحت من ثوبها والثانيه قد راحت من يوم رفعت القدر بس انا شفت لي شوفه فيها ولا ادري وشي يوم انها تطامرهههههه وترفع ثوبها تدرون وش شفت شفت ولد يتدودل في العجوزهههههههههه ونا تراي توي صغير يعني على نيتي المهم وتقعد على حيلها وتقولي تكفا ياوليدي جبلي في ذا الغضيره ما من الزير ابا اشرب لياه يغما علي دايخه ههههه وروح وجيب لها ماء من الزير وبالي منشغل على ذاالولد الي يتدودل بين رجليها مدري وش بلاه ماطلع يوم شربت الماء وتشتر شوي وهي تناظرني وتظحك قالت اجل نحاشن ذا الفار قلت ايه ودخلن فيذا الجحر او الشق الي في الجدار قالت انت ماتقولي وراك ما ظهرتا عني في الحوش وخليتني افصخ ثويبي بدال ما اطامر كني مهبوله قلت ما قلتي لي اظهر يعني اطلع كان طلعت ما ش انا بالي مع ذاالولد الي ناشبن فيها من تحت وراها ما طلعته المهم قالت اجل شفتا كلش قلت وشو احسبها تبي تعلمني عن سالفه ذاالولد الي يتدودل قلت ايه قالت وشنت شايف قلت انا شفت ولدك فلان علشاني اسميها بسم ام فلان قلت ايه وراك ماسكته ما تخلينه يطلع ويكبر يوم غشيت علي من الظحك وتخمني وتحبني قالت هذا الي انت شفتا هذا مهوب ولد لا هذا يسمونه بعج الي يجي في الواحد الامنه شال شين ثقيل يطلع له مثل هذا لاني شايله شين ثقيل وطلع بس تراه ونا امك مهوب ولدي فلان وهي غشيه علي من الظحك وتقولي والله انك تقوا بدع
ثمن قالت لي ابا اطلبك ياوليدي طلبه قلت وشو قالت لا يدري احد عن ذا الي شفتا لاياهم يتطنزون علي الحريم وتصير فيني عياره قلت طيب قالت تعاهدني قلت وشلون يعني ونا توي صغير مدري وش معنا تعاهدني قالت عطني يدك وعطيتها يدي قالت قل والله اني ما اعلم احد قلت والله اني ما اعلم احد قالت امسح يدك على وجهك ومسحت يدي علا وجهي قالت خلاص ربي شافك انك معاهدني قلت طيب ابي كليجا وهي تطمر وتجيب لي كليجا وتجيب لي ماء من الزير كله علشان ذاالبعج لياني اعلم احد وصدقوني ان هذي اول مره اعلم بهذا السر علشانكم ماتعرفونها منهي وعلشانها ماتت من سنين وبنين جعلها في الفردوس الاعلى من الجنه وكل مسلم وبس قضت ذا السالفه

سبحان الله وبحمده سبحان الله العظيم عدد خلقه وزنه عرشه ومداد كلماته

[راع العرض]

الله يوسع صدرك ياعمنا سحاب ويطول عمرك على طاعته

[سحاب شقراء]

المشاركة الأصلية كتبت بواسطة راع العرض

الله يوسع صدرك ياعمنا سحاب ويطول عمرك على طاعته

ياهلا ويامرحبا ومسهلا

ياجعل ربي يسعد قلبك ويجعلك من اسعد خلقه امين يارب العالمين

شرفتني شرف الله قدرك ومقدارك

[سحاب شقراء]

السلام عليكم ورحمه الله وبركاته
عسا ماتملون مني



خل اعلمكم مرتن جيتها العجوز راعيه الكليجا ونا صغير منيب كبير دايم اتلحوس عندها ابي كليجا ههههههه وش اسوي جوعان ولا هوب والله كله جوع بس الي يصير عند الناس اطعم هههههه وكليجاها وش طعمه المهم جيتها هكا اليوم وطق الباب عليها قالت من عند الباب قلت افتحي انا سحااااب بغيت اقول انا حجاب هههههه قالت يالله انك تحييه هلا بوليدي ولا هيب تقول يالله انك تحييه الا كانها تبي مني شي اعاونها عليه هههههههههههه يعني راعيه مصالح الله يغمد رويحتها الفردوس الاعلى من الجنه وميمتي وبيي وخيي وجدي وخيتي الي تقراء ونا ونتم ووالديكم وكل مسلم المهم دخلت ولا ها طالعه استاده وشلون استاده لان الي يبني منول بالطين يسمونه استاد ولا ها قاعده تخلط طين من البخل مهيب مواجره احد هههههههه يعني تخلط شوي مهوب واجد قالت جابك الله ياوليدي ابيك تعاوني ابا ابني بيتن للدجاج صغير لان القطاوه كلن نصهن قلت طيب وتقعد في وسط المكان الي تبي تبني فيه واللبن بتشدييد النون ادهرنا ابشركم باللغه المهم اللبن الي تبي تبنيبه عندها تقول انه جايبه لي ابن حلال وبيه يبنيه وعيا وني قلت ابا ابنيه انا ويا وليدي سحاب الا جا وهي تكذب وش يدريها اني ابا اجي بس تقوله لي كذا تبيني اموق المهم ودلي تحط لبنه وهي قاعده على حيلها لانها دوبيه شوي ما تقوا تاقف واجد المهم ونا ادلي اشيل من الطين وعطيها وتحط لبنه وفوقها طينه وكل لبنه فوقها طينه وزي كذا الين سوينا اربعه جدران بس صغيرات يعني ارتفاع الجدار يجيله متر وكل جدار يجي طوله متر يوم قضت الاستاده بانيه الجدران والله لو تشوفون ذاك البنا ان تمزع بطونكم من الظحك ههههههههههه المهم يوم قضينا تدرون وش صار ههههههههههه نست تحط باب هههههههههههههه وهي ما قوت تطلع منه هههههههه صايره في وسطه قالت هلحين انا وش يبي يظهرني قلت مدري وقالت الله لا يعميني اجل ناسيه الباب ما حطيته ههههههههههه ونقوم ونقض الجدار علشان تضهر امحق من استاده وتقولي لا تجدع اللبن لياه يتكسر ونهد جدار وتطلع ونقعد نبنيه ثانيه وتحط لهن باب حق الجصه حقه التمر بابن يجي صغير وله مجرا ويوم قضينا وقولها عندك كليجا قالت ياحر بطنك هههههههه قلت جايع وتروح وتجيب لي اربع قرصان وتاكل هي واحد ونا بلعت الثلاثه كلهن وشرب عليهن ما من الزير جايبه زيرن وش كبره غير الي جدعته يوم اركب على تيسها وجدعه انا وياه ههههههه قالت عاد هلحين ابا اطلبك طلبه قلت وشي قلت ابا اروح انا وياك لحد ها الحيطان ونجيب لنا كم عسيب علشان نطم بيت الدجاج قلت يالله قوه ونروح لذاك النخل وناخذ كم عسيب ويجي راعي النخل وينطلق عليها هههههههه من قالك تاخذين من عسباني قالت محد قالي يالله دخيلك يبو فلان تهوش علي علشان عسبان نخل قال ما هشت بس لوك معلمتني مهوب تدخلين في نخلي وتخمين عسبان وبس وشوا ما خالف ونجيك مع ذا السكيك نجر العسبان غبرتنا واصله السماء وترانا كلنا حافين ما علينا تكرمون نعال مار ما نعرفهن ههههههههههه ونروح لبيتها ونطم بيت الدجاج يوم قضينا قالت لي عاد انا ابا اروح لفلانه اتقهوا عندها ونت رح لبيت اهلك ههههههه قلت ابي كليجا قالت ما والله اعطيك شي تراك ابلشتني انت والكليجا رح بس لبيت اهلك وخلني اروح قللت معها يوم قضت الحاجه هههههههههههه وطلع من عندها اول مره اطلع من عندها ما تهاوشنا وبس قضت السالفه
===

اصبرو لا تروحون ابا اسبحن عليكم ببعض السباحين الي اهلنا يسبحنون علينا منول فيهن ونحن راقدين في الطايه او الصطح الي تبون كلهن واحد ههههههه

هذي سبحونه النباقات سبع بنيات

النباقات سبع بنيات راحن ينبقن وشو ينبقن يعني يجمعن النبق والنبق الي هو العبري المهم

يوم وصلو السدره او العبريه ولا ها وش كبرها ومليانه نبق الي هو العبري ولا البنيات كل

وحده لا بسه لبس واحد بس يعني وحده لا بسه صريويل يعني صروال بس انتم خابرين لازم نصغر كلش ههههههه ووحده لابسه فنيله وحده لا بسه عبيه يعني عبات ووحده لا بسه شيله وحده لا بسه نعيلات كم طلعن ذولي مدري المهم الاان تموسبع بنيات والسابعه مفيصيخه يعني ما عليها شي وش اسوي هذي السبحونه هههههههههههه المهم يبون وحده ترقا العبريه علشان تجدع عليهم العبري
قالو ارقي يم عبيه قالت اخاف تنشق عبيتي وتطقني امي
قالو ارقي يم صريويل قالت اخاف ينشق صريويلي وتطقني امي
وقالو ارقي يم نعيلات قالت اخاف يتقطعن نعيلاتي وتطقني امي
قالو ارقي يم شيله قالت اخاف تنشق شيلتي وتطقني امي
قالو ارقي يم فنيله قالت اخاف تنشق فنيلتي وتطقني امي
قالو ارقي يم قحفيه قالت اخاف تنشق قحفيتي وتطقني امي
قالو ارقي يا مفيصيخه هي عاد الي ما عندها شين ينشق ههههه ورقت المفيصيخه
يوم رقت وبدت تهز العبريه ويبطبط ذاك العبري الي وش كثره وش زينه الا يوم جاهم السعلو يمشي بسم الله علينا وينحاشن البنيات ويروحن لبيوت اهلهن ومفيصيخه فوق العبريه والسعلوتحت العبريه وقالها السعلويا مفيصيخه قالت هاه قال تعالي ابا اكلك قالت افتح اثمك ابا اطب فيه ويوم فتح اثمه وهي تجدع فيه هكا القدر وياكله ثمن قالت افتح اثمك ابا اطب فيه ويفتح اثمه السعلو وهي تجدع فيه ذاك الصحن وهو يبلع الصحن قالت افتح اثمك ابا اطب فيه وهو يفتح اثمه وتجدع فيه هكا المقص ويعترض المقص في حلقه ويموت السعلو
وتقوم مفيصيخه وتحول وتروح لهلها يوم راحت لهلها وتعلمهم ويطلعون اهلها ويروحون يبي يشوفون السعلو ويوم وصلوه ولاه وش كبره وميت ويقوم ابو البنت المفيصيخه ويشق بطن السعلو ويلقون وسط بطنه ذهب ويلقون وسط بطنه كلشي ما صار سعلو طلع بنك الراجحي هههههههههههههه المهم ما علينا ويغنيهم الله لانهم هم افقر ناس في القريه هما بنتهم مفيصيخه ويغنيهم الله ويشترون بيت ويشترون مزرعه ويشترون سياره روز رايز هههههههههههه اكذب ما عندهم سيارات بس حبيت ارسم الظحكه هلى وجيهكم الطاهره
وبس

ههههههههههههه ماشاء الله طلعت العبريه كلش فيها ههههههههههههه هذا مطبخ بيت مهوب عبريه ههههههههههههههه

وطلع السعلو مستودعات كلش في بطنه ههههههههههههه

وفي النهايه اقول سبحان الله والحمد لله ولااله الا الله والله اكبر عدد خلقه وزنه عرشه ورضا نفسه ومداد كلماته

[سحاب شقراء]

ذكرت شي خل اعلمكم فيه اذكر فيه عجوز لها رفيقه عجوز مثلها مدري من الي بالس بينهن يعني متسبب عليهن بالزعل وهن يحبن بعض بس ابليس حريص على ابعادهن عن بعض مايبي احد يحب احد هذا انت يابليس الرجيم
المهم فيهن وحده تحب الثانيه اكثر وقليبها ماطاوعها تصبر عنها ونتم خابرين الرفيقات مع بعضهن منول حب في الله ولله مهوب لمصالح
المهم يوم جيت عندالعجوز وسمعتني داخل بيتها قالت منذا الي فيذا قلت انا سحاب قالت يالله تحيي سحاب تعال ونا امك ابيك وروح يمها ولاها ماسكه المعصاد وتعصد الجريش في مطبخيه وش كبرها والمطبخيه هي القدر بس انحن نسميها مطبخيه وش عليكم منا بعد يالتوالي
وتقوم طال عمركم تعال ابيك توديه لفلانه وهي تنكب في قدر صغير وتملاه جريش وتحط عليه بصل ودهن يخليك تسعبل من زينه
المهم انا قلت يم فلان قالت يالبيه قلت ابا الحس المعصاد انا لا تعطينه احد غيري قالت هاك اياه ولعطه كله لا تخلي شي وسلته سلت بصابعك لا ترشخه بخشتك وتسعبل على المعصاد قلت طيب اصلن ماله داعي توصيني لاني ابا اسلته بصابعي وبا الحسه بخشتي وهي ماتدري
ويوم عطتني القدر حق رفيقتها وروح مع السكيك اسحب عصاقيلي وحافي بعد ويوم جيت عند باب العجوز وطق الباب بالحلقه السودا وهي جرس الباب منول وهي عباره عن حديده دائريه يطقون بها الباب الي يبون اهل البيت بس اياني وياك ترجف الباب برجلك ماتسمع الا الشياب يقولون كسار يكسرعظامك يالهيس الاربدي يالي ترجف الباب وتبي تجدعه من محامله
المهم والله يعينا على المهم

وطق الباب ولا حس العجوز تقول من عند الباب يالي تطقه قلت بقواصوت لي انا سحسح ادلع روحي وش عليكم مني بعد
وقالت لي العجوز ادخل الباب مجافا مطرفته اخاف يجيني احد
ونا الي ادخل والقدر على راسي لان العجوز الي عطتنيه لافته في خرقه يعني قماش ورابطته منها علشان ماينكب ومنها علشان مايبرد
ونا صاير حمير علف مالي الا المعصاد
ويوم دخلت ولا العجوز جالسه على عتبه باب المجبب ولا عودها مدد رجليه في حوش صغيروياكثر مايتزاعلون العجز والعويد منول ههههههه ويوم شافني قال الي فوق راسك وشو قلت هذا جريش من فلانه تقولي عطه فلانه حرمتك قال جريش قلت ايه قال تعال ورنيه وروح يمه ونزل القدر من على راسي وفك الخرقه او القماش الي ملفوف فيها وفتح الغطا ويقوم العود وينقث بصبعين من الجريش ويبلع وهو يقول هذا والله الجريش السنع وتاخذني الحميه انا وطبق القدر ونا اقول مهوب لك لفلانه وراك تاكله ويمسكني مع اذني ويجرني ونا اصرخ يوجع وهو يقول انت وش يدخلك لي ولا مهوب لي يالحمار المتين انا الحمار المتين وجايب له جريش
ولا حس العجوز تقول لا تمصع اذن الوليد خله قال العود ابا امصع اذنه وذنك معه بعد وسكتت ولا بم يعني ماتردها العجوز ياعمري عمر العجيزات منول لا يهشن ولا ينشن الكلمه للشياب مدري وشو الي عاقد السنتهن منول مايردن على العويد بشي يسكتن وبس
اهم شي لا يزعل اوناسيس ويطلقها وتنحرم من الميراث هههههههه وهو كله نخلتين في الحوش وحده منهن قبلها شيص ماسر فيها القاح وكان فيه شي بعد زود ياشات ولا عنزوقلتين تمر هذي التركه الله يعوضهم بالفردوس كلهم
المهم خذ القدر مني وحطه بين رجليه وقام يرشخ منذا الجريش الزين ونا ابا اطير للي خلقني قهرني عود حلاحل تصدقون منول يقولون الرجال للحريم انتي مزوده يحط فيك الاغراض ولا الا تهاوشو وحمي الوطيس قال لها تراك انتي نعله افصخها ولبس غيرها يعني اطلقك واخذ غيرك والحرمه سبحانك ربي تخمد ولا تسمع لها نفس سبحان الي مذللهن منول مثل البعارين
وبس قظت السالفه العود وكل الجريش كله والعجوز ماذاقته ونا مصعت اذاني وهيش علي بعد
اسمعوني يالمسلمين الي يبي التوفيق والرزق والسعاده لا يخلي صلاته ويبر بوالديه والله العظيم اني لكم من الناصحين برو فيهم وشيلوهم على كفوف الراحه وتتفتح لكم ابواب السماوات والارض بالخير والرزق والذريه الصالحه وقبلهن رضا ربي سبحانه

اسمعني يالي تحس بضيق ولا تحس بطفش ولا الي فيهم اكتئاب خذ الوصفه مني ويبي يعافيك الرحمن الرحيم لا تخلي صلاتك وحرص عليها
وكثرمن الاستغفار -كل ملذات الدنيا وزينتها لها باب ومفتاح الباب الاستغفارفلاتحرم نفسك من نعيمها اكثرمن الاستغفار وعد من الغفار سبحانه
ومك وبوك كانهم حيين بر فيهم وتشوف العافيه وتشوف السعاده
بس مهنا صلات وتبي السعاده مش خشتك ولا تحلم لو حلم نسو الله فاانساهم انفسهم

وفي النهايه اقول الله يجمعنا في الفردوس الاعلى من الجنه وبشروبالسواليف الي ماتنتهي
وسبحان الله والحمد لله ولا اله الا الله والله اكبر عدد خلقه وزنه عرشه ورضا نفسه ومداد كلماته

[سحاب شقراء]

والله تسولف ولا تسكت ياسحاب محد داري عنك