سحاب شقراء -سواليف الاولين ايام بيوت الطين والحياه الطيبه

[سحاب شقراء]

يامرحبا ومسهلا يبو محمد

والله يالغالي البلا مني مهوب منكم وهذي حقيقه

ونتم ماقصرتو جعل الشر يقصر عنكم

ورذاذ ماقصرت الله يوفقها بس انا تراني عليله بعض الحيان وقول شي مهوب الي في قلبي وليتها تسامحني وتوبه ما اعود لها


ونا اقول لكم الله يدحر الشيطان والله مااخليه يغلبني بحول الله وقوته

[سحاب شقراء]

السلام عليكم ورحمه الله وبركاته
ياهلا والله ومرحبا بالغالين كلكم صغيركم وكبيركم
ولا تواخذوني الا ابطيت شوي ترا فيني الي كافيني وماورا مني كلش يوجع ويالله رضاك والجنه ويالله حسن الخاتمه برحمتك ياارحم الراحمين
نجي للسواليف وسعه الصدر جعل صدوركم ماتضيق من شر

انا مدري وش الي فينا منول كلش نحب نصغره مدري للتمليح او مدري وشو اجل
مويعينات تصغير مواعين لان عندنا في شقراء خص كلش الحمد لله صغيير ومملوح مثل بييلات فنيجيلات بويديات غضيرات بليمات صحينات برييقات دليلات سحيلات تميرات بريدقينات تفيفيحات مويزات خويخات جحيحه جريو ومريقه ورزيزه وجرييشه وسلييقه ومريقيقه ولحيمه ودجيجه حتا السياره صارت سييره ههههههههه ومثل كذا واالاولين يقولون كل صغير مملوح الا فرخ الداب حتا والله فريخ الداب وش ملحه وهو صغير جعله يموت ولا وديت شي للعجيزات تقول العجوز خذ ذيولي مويعيناتكم وحط الي معك في ذيا وذكر عند كل وحده حبل ممسوك في الغمى يعني في السقف ومربوطن فيه مثل شغيه النباطه نسميه المحجان وشوله المحجان نعلق فيه زبيل خوص ونحط فيه الي نخاف عليه من القطو او شين يلحسه مثل الابرص ولا الفويرات تصغير فاره ههههه ولا ذاك قالت حط الي معك علقه في المحجان ثمن اقعد اضحك وتقول وش فيك تضحك ياوليدي قلت ما اطوله انا صغيير وتقعد تظحك هي بعد وتقول ايه نسيت انك ما تطوله والله انك تقوا بدع ياوليدي وهي تظحك الناس منول ما ينسون بعظهم ويتعاونون ويتزاورون الا ابطو عن بعض ويدعون لبعض الاذكروهم اوالازاروهم يعني سيرو عليهم وجو يروحون الزوار تلقا اهل البيت مغير يدعون لهم والله الناس الا هلحين والخير فيهم بس اشغال الدنيا الهتهم وبعدتهم عن بعض ولا الخير ان شاء الله في الجميع الا يوم القيامه ان شاء الله تعالى
بس ولو الدنيا اختلفت يالمسلمين معاد فيه احد يفقد احد ولو تبطي عنهم مايسئلون عنك انا سنه من السنين بغيت اموت ونا في البيت بالحالي ماعندي احد والجوال منتهي الشحن حقه ولا يتصل وبعيد عني بعد مقدر اصله
اوجعني ظهري ويجي الوجع بدون مقدمات او علامات تدرون وشلون يجيني اصير مثل القوقعه ملتوي وعلى جنبي ويالله اقدر اتنفس ولا اقدر احرك نفسي لوشبر ويجي معه ضيقه صدرمايعلم بها الا الله سبحانه وعلى ذالحال لمده خمسه الا سته ايام مااتحرك ولا اقدر انقلب على جنبي الثاني وربي يشهد
انا وشوله اعلمكم عني والله مدري ههههههههههههه
بس عمر الشقي بقي ههههههههههههه والحمد لله رب العالمين ون شاء الله في ميزان الحسنات الي عند الله مايضيع


نرجع لسواليفنا
يومني في ريعان شبابي هههههههههه يعني يومني جذيع مهوب جذع ههههههه اذكر قالت لي بدويه ونا كنت مار من عند بيتهم او خيمتهم كنت رايح للقهاوي اجيب لستك سياره علشان اقصصه سيور للنباطه وذكر البنشر مكان محافظه شقراء هلحين وخيمه البدو كانت مكان الحديقه العامه هلحين وكان مكان الحديقه كله مليان صنادق لحوج المهم وكان عند البدويه كلب وش كبر راسه وهو وش كبره كله ومن يوم شافني ونا امشي من بعييييد وهو ينابح علي وكان مربوط هذا الي مخليني مااخاف منه ونا امشي في طريقي متجه للحميديه وهذي مزرعه قديمه نسميها الحميديه والمستشفى القديم على يميني ونا من بعيد وقرب مالي سور المستشفى وكل شوي اناظره اخاف ينطلق علي ومادريت الا يوم طلعت من الخيمه بنت حسناء ههههههه عليها برقع بس ولو حسناء هههههههههههه ثمن قالت لي يوم شافتني اناظر الكلب تبي الكلب ياولد وعلى طول قلت ايه ابيه قالت تعال خذه وبزع برايي وروح يمها مصدق اني ابااخذ الكلب ويوم جيت حولهم وهي الي تفك الكلب من رباطه وتقوله رثعان اشوه ورثعان هذا اسم الكلب جعله يرثع فيها وااشوه هذي كلمه تنقال للكلب اذا بغو يهدونه على شي يقولون له اشوه ثمن يعطيك عمره ثمن يجيني رثعان يمشي طبلونه من السرعه يتجيود عند راعيته الله لا يوفقها وتعال عاد شف سحسح ونحمد الله مهنا صراويل ولا شي كان ماسكني او عاضني الكلب ههههههههههه وتعال شفني ونا منحاش تصدقون اني اشوف اصابع رجلي الله يكرمكم قدام عيوني من قو المغطه هههههههه ومنطقه الصليب الي بين رجلي تحك في الارض من قو المغطه وكل هذا بفظل ربي سبحانه ثمن مهنا صراويل هههههههههههه ولا كان رحت من صيد امس وكل ماالتفت ولا الكلب واصلني وتزيد طبعن السرعه عندي هههههههههههه الين وصلت جدار الحميديه وطبيت معه ويرجع الله لا يوفقه ولا يوفق راعيته الي اشته علي او هدته علي -

وعلى طاري ساد وبرك اذكر عجييز كانت تحول مع درجه بيتها جايه من الطايه او السطح تبي تحول للمجبب وزلقت وتدربت ظعيفه مع الدرجه ولا ردها الا المجبب ثمن قالت اقول مستدي ربي فيه وساد وبرك وحقي وماجاني وضعفتن تضعف حيل العدو وبس صاقت ظعيفه على روحها وراها تطيح هههههههههه

انتم تدرون وشلون يحرجون منول على بظايعهم وذا الكلام قبل لا تجي حليوه سوق شقراء القديم نسميه حليوه - يوم السوق سوق المدينه او المجلس قبل حليوه بعض الناس يسمونه سوق المجلس لانه يمتلي من العويد الي جالسين تحت جدار المسجد الي فيه يا الله جعلهم جميع ووالدي ووالديكم ونحن معهم في الفردوس الاعلى من الجنه اللهم امين يارب العالمين انا داري اني شطحت او سهيت عن سالفتي واجد بس وش اسوي وش اسوي تجوزلي السواليف عن منول وهل منول المهم طريقه الحراج في المجلس يجي المحرج طال عمركم ويرقا على خرزتين او فرشين من الحصا ثمن يبدا يحرج ونتم خابرين شقراء منول من اغنا البلدان في الجزيره العربيه هي وبريده مشهورين بالتجاره المهم والله يعينا على المهم الا رقا المحرج يبدا يقول لا اله الا الله وحده لا شريك له صلى الله على محمد ثمن يقول من يبي الفرانسي مثل مابعنا من يبي جنيه الذهب مثل مابعنا ومن يبي العربي مثل مابعنا ومن يبي القهوه مثل ما بعنا ومن يبي الهيل مثل مابعنا ومن يبي الشماغ مثل مابعنا ومن يبي الدهن مثل مابعنا وكل الي ذكرناه هلحين يصير مصوب شحن تحت الي يحرج ودك انه هلحين كان غاره وينهبونه كله وقعد حرج على الهوا ههههههههه اجل الجنيه الذهب مكبوب شحنه وش كبرها على حصير خوص وين الي يشري بس المهم خلونا نرجع لسالفتنا منحنب وجيه جنيهات وفرانسي حدنا بيزه الحسا والا الدنقيه العن ودق رقبه بعد نرجع لسالفتنا انا وش كنت اقول ههههههههههه ايه ذكرت يقولون الاولين الخبل ماينسا سالفته هههههههه المهم الا جا مسيان ورقينا للسطح او الطايه وفرشنا فرشنا استعدادن للنوم تلقانا يالصغيرين مثل الي مرشوشين بفليت انترنح نبي المرقد الله لا يلومنا الا صرنا نقووم العصافير من صبح رب العالمين وهذا بعد الي يخلينا نرقد قبل الدجاج ههههههههه المهم تجي امي وتقعد عند الفرجه وهي فتحه في الجداربين الجيران في الطايه طبعن يسمونها الفرجه وتجي ام الجيران وتقعد وهات ياسواليف الين يسمعون ابوي ولا ابوهم يرقا مع الدرجه وهو يتنحنح ثمن تقول امي جعلها في عليين وميماتكم وكل مسلم يالله هذا حس ابونا جا حافظك الله يا خيتي ثمن تقول ام الجيران الله يحفظك وهذا بعد حس ابونا داخل مع الباب لان للبيبان الخشب منول صوت موسيقي يطلع الا هجيتا الباب ولا صكيته يجي صوت من صاير الباب وصاير الباب يالغالين هو الي رافع الباب عن الارض من تحت هذا صاير الباب وسبحان الله كل باب له صوت يختلف عن صوت الباب الثاني علشان كبر الحجم والثقل يصير الصوت مختلف ياليت بعد صوتي يظهر لكم هلحين اعرف اقلد صوت البيبان منول بس ماينكتب صوتي وش اسوي بكم ابا اعلمكم اقول ووه وبس قصرت من التعريفات والمعاني طلعن اكثر من السالفه ههههههههه الله من الموقه فيكم ياالتوالي كلش وشذا وشذا او انتم ما قلتوشي مدري بس حسيت كذا هههههههههه

وفي النهايه اقول - سبحان الله والحمد لله ولااله الا الله والله اكبر عددخلقه وزنه عرشه ورضا نفسه ومداد كلماته

[سحاب شقراء]

السلام عليكم ورحمه الله وبركاته
بسم الله صلى الله على محمد


ياالله تحييهم كلهم صغيركم وكبيركم وذكركم ونثاكم وليا حيا كثر

وراكم ماتردون على سواليفي ان غبت قلتو وينك ون جيت وسولفت عليكم ماتردون علي

اقول يالغاليه رذاذ طلبه سامحيني

والله العظيم انه ضايق صدري عليك ومتحسف
ونا شايب وعلوم ظهري ماتسر وضايق صدري منه وتخيلو يقولون الدكاتر ترا في اي لحضه ممكن ماتقدر تمشي وتصاب بشلل نصفي وش يبي يصيرخاطر الواحد اكيد ضايق هماي اقول في قصيده لي

الله من قلبن همومه تمسه
مس الرشا في محدبات السواني

والله من قلبن غثاالبين دسه
دايم يدسه خايف انه يباني

يالايمي ماحسك الي احسه
ولا ذقتا حر المطرق الي كواني

اخاف يومن مقدر السوق اعسه
تعوقني رجلي من الي بلاني

مابي انا الكرسي ولابي امسه
موتي ولا يشفق عليه زماني

سحاب شقراء

الله يعين على ذا الدنيا

نجي للسواليف


منول اذكر الا سير احد على احد ثاني ولا لقاه يقوم المسير ويربط قطعه قماش في الباب ولا يحط كسره عود علشان الا شافه بعدين يقوله تراي مريت عليك ولا لقيتك والماريه رابط قماش في عروه الباب ولا ذاك يقول راعي البيت اثره انت ونا اقول منذا الي مار علي ورابط قماش على عروه الباب تراهذي طرق التواصل الاجتماعي منول

اقول ياالطلعه التاليه او يالتوالي ياعيال النعمه
ترا ماعندنا منول شناط نحط فيها ملابسنا وغراضنا الا جينا نسافر
مافيه الا قطعه قماش نفرشها في الارض نسميها لفافه او بقشه هههههه ونحط عليها مقاطعنا ترانا منول مانسميهن الثياب نسميهن مقاطع ومفردهن مقطع ودك عاد تشوف ذاالملابس شهب ولهب ولالبستا الثوب يالله ياصل نص الساق كنك من قوم عاد ههههههههههه والكموم بعد ماننقض الرفاعه تاصل نص ذراعك تخيل تصيرالكبكات عند مرافق يديك ونمشي عادي ولا تسمع الا صرقعه النعال الزنوبه او ام صاروخ وخص الا قصينا قطعه لستك حق كفر السياره ونحطه تحت الزنوبه علشان ماتنحل وتقطع بسرعه ولا مشيتا تعال اسمع الصرقعه ونت تمشي امحق من صاروخ تصدقون الشوك العاقول يخترق ام صاروخ وتدخل الشوكه في رجلك بس عادي مافيه احد يمشي الا تلقا معه منقاش للشوك وشبريه يعني سكين صغيره وفيه ناس يسمونها مبرات ولها عده استعمالات بس يالله الدنيا عبر


وفيه شي ثاني بعد اذكر العجيزات والعويد منول الا خافو ينسون شي يقومون العجوز تعقد طرف شيلتها والعويد يعقدون طرف الشماغ علشان الا جا بعدين وشافو ذا العقد يقولون وش انحن عاقدينهن له اكيد فيه شي خايفين ننساه ثمن يقعدون يديرون الفكاير الين يذكرون
العود الا ذكر وشو علشانه عاقد شماغه يقول اعقب مابغيت اذكره هههههههههههههه
والعجوز الا ذكرت تطق على رجلها وهي تقول شاعوف يطيرالعدو بغيت انساه
وكثر العجيزات منول تربط مفتاح بيتها في طرف الشيله علشان ماتظيعه ذهينات بعد

اذكر مره رحت اسير على عجوز ومعها عودها ولا عندهم عيال بالحالهم في البيت ويوم جيت عند البيت ولا هذا الشايب جالس عند الباب يتشمس وسلم عليه وشلونك يبو فلان بشرني عنك قالي انا بخير ونعمه لو ذا العجوز مهيب عندي قلت افا يبو فلان هذي الغاليه قال كان غاليه عندك ولا انا لا والله
وقلت وينها اجل ابا اسلم عليها قال شفها رابظه كنها بقره في بطن البيت تدور الشر والعيش المر

ودخل يم فلان يم فلان قالت يالبيه تعال انا فيذا وروح يمها وسلم عليها وشلونك بشريني عن صحتك قالت طيبه لو حصان بليس مهوب عندي

ويدخل الشايب ويجي عندنا وقلت وراكم هلحين مغير كلن يلفط على الثاني تقل ضب توه مصيود قال الشايب انشدها هي عندها العلم
قلت يم فلان وشو الي حاصل قالت ان لسانه يلوط اذانه يوم اوحاني اكلم على اخيتي الي ماعندي الا الله ثم هي بالدنيا قال الشايب اي والله عجبه انا الي شاري التلفون بدراهمي ابيه لي ماشريته لك انتي وختك
ثمن قال خل اعلمك بالعلم الي ماينسكت عليه ابد
قلت وشو العلم
قال تراها تكلم بالتلفون في تالي الليول انا موحيها كم مره وهي توصوص وهي في حجرتها وتصك الباب بعد تخاف اني اوحي شي من يصبرعلى هذا قلي
وقبلي اسمعها تقصد قصيد وتقول حسبي الله على الي حال دوني ودونه هههههههههههه
قلت ايه اثره كذا ورص يد العجوز وقولها منهو صحيبك علميني منتيب تلعبين يم فلان وتقعد تحقرص وتغنج وهي تقول خله يدري لا يحسب مهنا الا هو ههههههههههه تعرف تحره العجوزمهيب لعب ثمن قلت لها
بعذره الا زعل وهذي علامه ان ابو فلان يغار عليك ويحبك قالت حبته القراده لا يحبني ابد
قال الشايب انت توحي وشي تقول ثمن قال انا هلحين منيب متعدي الين تجيب تلفوني
وقول للعجوز عطيه تلفونه ونا ابا اجيب لك واحدجديد غيره هلحين بس لا يدري عنه
قالت العجوز شفه في حجرتي خله ياخذه ويصك عليه ويشبع فيه
وجيب الجهاز وعطيه الشايب ويلف عليه سلكه ويروح ويصك عليه في حجرته قال هلحين ارضا وهويحسب الي يكلم الجهاز بالحاله على نياته
ثمن جبت للعجوز جهاز ثاني وهو مايدري شكلي خربت العجوز

وسع الله صدوركم يالغالين وفرج همومكم وغفرلذنوبكم ونا معكم جعلكم ماتشوفون شر

وسبحان الله العظيم وسبحان الله وبحمده
عددخلقه وزنه عرشه ورضا نفسه ومداد كلماته

[تميم بن محمد]

السلام عليكم ورحمة الله وبركاته
مرحبا بالشيخ سحاب
قصص في منهى الروعة و سرد عفوي جميل و ممتع بس لو ماعليك أمر تغير لون الخط الى اللون الغامق
عندي لك قصة جميلة بس الوقت لا يسمح الان لكن ابشر يا سحاب من تحصل الفرصة بكتبها لك
عنوانها انه مرة انا و رجال شرواك نوينا نشري حاشي من الجنادرية
اذا رجعت كملتها لك
تحياتي
تميم.....

[سحاب شقراء]

المشاركة الأصلية كتبت بواسطة تميم بن محمد

السلام عليكم ورحمة الله وبركاته
مرحبا بالشيخ سحاب
قصص في منهى الروعة و سرد عفوي جميل و ممتع بس لو ماعليك أمر تغير لون الخط الى اللون الغامق
عندي لك قصة جميلة بس الوقت لا يسمح الان لكن ابشر يا سحاب من تحصل الفرصة بكتبها لك
عنوانها انه مرة انا و رجال شرواك نوينا نشري حاشي من الجنادرية
اذا رجعت كملتها لك
تحياتي
تميم.....

ياهلا ويامرحبا يبو محمد
ابشر اغير اللون بس السالفه هذي مقدراغير شي فيها ماعندي امكانيه التغييربس الجايات ابشر

انتظرسالفتك جعلك تسلم

[تميم بن محمد]

السلام عليكم ورحمة الله وبركاته

حيالله الجميع
هذا طال عمرك قبل عشرين سنة تقريبا كان اذا اقبل رمضان يكون فيه ازمة لحوم و بالذات المفروم للسمبوسة و الشوربة و غيرها
المهم اشتركت انا و صديق في حاشي و رحنا للجنادرية و شريناه و الزول ما ربطه زين يوم حركنا جايين للرياض و تونا مبعدين شوي من المجلبة الا يوم فز الحاشي و شوي الا يوم وقف على حيله و نوقف قلت لرفيقي خلنا نغطي راسه بكيس شعير اكرمك الله و السامعين عشان كوده يهجد حاولنا ما قدرنا كان يحرك رقبته يمين و يسار و صعب تدخل الكيس على راسه .المهم ربطنا الحاشي زين و مشينا يوم دخلنا الرياض و شاف الزحمة و هو يطب من الونيت. نبي نوقفه عجزنا عنه كنه في مضمار سباق الجنادرية شافنا عسكري من الحرس رايح لدوامه قال بيفزع لنا وهو يمسك الحاشي مع ذنبه عشان يوقف و يحط رجله الحاشي زود و العسكري ماسك ذنبه ويركض وراه و العالم تضحك و نلحقه بالسيارة و نحده على جدار النفق و نوقفه و نحاول فيه لين جدعناه في حوض الونيت سنامه تحت و رجوله فوق وهات يا ضحك من العالم اللي رايحه لدواماتها في السايد الثاني و نربط كل رجل في جهة و راسه و رقبته طالعه من فوق التنده و يالله قويناه المهم ونروح لبيت رفيقي بندخله الى العصر الين نشوف قصاب يذبحه . يوم دخلناه في بيت رفيقي اثاريهم مربين دجاج يوم شافه الدجاج يوم بدت المسرحية الثانية صياح و كل دجاجة على جدار. رمضان و الناس نايمة و فضيحة. وحنا دايخين من التعب و الصيام و بيت رفيقي كبير و حوشهم مضمار صار الحاشي يركض و الدجاج زاد هباله يحسبونه يلحقهن و خذ يا ضحك

[تميم بن محمد]

للحديث بقية في وقت ثاني

[سحاب شقراء]

ههههههههههههههههههههه كني اشوفه سنامه تحت ورجليه فوق
سالفتك ماودي تقضي يبو محمد

انتضر الباقي جعلك تسلم

[تميم بن محمد]

نكمل على بركة الله :
صليت العصر و رحت لصاحبي عشان ناخذ الحاشي للمسلخ و طريقنا مع الدائري الجنوبي و كله تريلات و قلابيات و خلاطات الاسمنت يوم دخلنا وسط الزحمة انفجع الحاشي و طمر من الونيت و خذ يا مطارد بين السيارات و اللي يحد واللي يحاول يمسك و محد قدر عليه نشيط بالحيل . اذكر شخص اردني يقول ما تعرفون للابل قلت افزع تكفى و اول ما حاول يمسكه وهو واقف بين السيارات جته رفسه في صدره بغى يطيح قال شو هاظ يا زلمة وركب سيارته وهج و يفزع لنا ثلاثة يمنيين نشاط ما شاءالله عليهم و يربطونه و نركبه في الونيت ونروح للمقصب و اول ماشاف الدم جاه حالة هيجان و كل من قرب منه رفسه و اخر شي قصاب يمني محترف ختل له ختل و نحره بسكين تلقط الحب على قولة الشيبان يعني سنينة بالحيل
و انتهت المغامرة على خير و سلامتكم.....

[تميم بن محمد]

اسلم يا سحاب هات ما عندك من علوم