قاصمة الظهر.......

[نديم المجره]

صاحبي وقـف جـزاك الله خيــــر
انزل وأذن نبـي نصلـي العصـــر

لقضينا الفرض سو اللـي يصيـر
الصلاة ابدا علي مـن كـل امـــــر

خلنـا نرتـاح أتعبنـا المسـيــــــر
طََوَل المشـوار والسكـه وعـــــر

ودنا نجلس علـى جـال الغديــــر
وانتمتـع بالربـيـع وبالـزهـــــــر

ريحة القيصوم والشيـح العطيـر
تنعـش اقلـوبٍ توطاهـا الكـــــدر

خيمةٍ بالبـر مفروشـه حصيـــــر
تسوى عندي فلةٍ وسـط الخبــــر

شب نارك دامنا وقـت العصيــــر
بهر الدلـه وقـرب لـي التمــــــــر

آه من جرحٍ لجا باقصى الضميـر
مايطيـب الجـرح والدنيـا قهـــــر

والقهر لصـرت محتـاج لحقـيــــر
حاجتـك عنـده ولا عنهـا مفـــــــر

وانت مضطرٍ ولا لك مـن مطيَـــر
هـذه والله قاصـمـة الظـهـــــــــــر

يتركـك تمشـي بخـطٍ مستديـــــــر
لا قضـى اللازم ولا قـدم عــــــذر

وان نخيته جاك مكسوفٍ حسيــر
وان بدا له غـرةٍ منـك .. غـــــدر

وانهزم عنـك مثـل زول البعيــــر
مرخيٍ راسـه تقـل يتبـع اثــــــــر

تزكـي الاحـرار لصـاح النذيـــــــر
لنخيت الحـر جـا يهـدر هـــــــــدر

يرتكي للحمل لـو حملـه عسيــــــر
مايمل الحمـل لـو حملـه كثــــــــــر

وان زبنته خايفٍ بـه مستجيـــــــر
دون عمرك حـط مالـه والعمـــــــر

وش يجيب السيف للموس الشطير
ذا لقص الراس وذا لقص الشـعـــر

لايغـرك منظـر العـود النظيــــــــــر
كل عـودٍ يرجـع اصلـه للـبــــــــــذر

وان بدا لك لازمٍ لو هـو صغيـــــــر
قبل اخذ الشور والعـزم استخـــــر

شف حبال الليف مع كثر الجـرير
شق دربه في جلاميد الصـخــــــر

وان وصلت لقمة الـتـل لاتسـيـــر
ماورى القمـه تـرى الا منحـــــدر

والعوافي نومـةٍ عقـب الاخيــــــــر
فوق طعسٍ ناعـمٍ رملـه حمــــــــر

احمد بن عبدالرحمن العريفي
(نديم المجره)