قــصـة الشايب والـــوايت

[ام الدانه]

الشايب والوايت

يسولفون عن شايب نوى يشتري له وايت ( تنكر ماي ) علشان يسقي الحلال , وهالشايب متقاعد

وشاريله رعية غنم

وفوقها خمسين ناقه , فأخذ يجمع له دراهم لين صار عنده حول الخمسة وثمانين ألف ريال

فقام و توكل على الله وعزم يروح يدور له وايت.

صدفه و هو يمشي إلا ذيك الناس مجتمعة في أرض فضاء كبيرة ولآَ حولهم وايت واقف.

عجب خوينا

الشايب نظر هالوايت وهو ماشاء الله يبرق من بعيد ووقفته شي عجيب , قال بس لقيناه خلني اروح

أوصلهم وأشوف كم هو واصل سومه و إذا هم حادينه اشوف كم هو عليه.

وصل عندهم الشايب ووقف يسمعهم يحرجون , وأستانس بالحيل لأنه ماهو بغالي.

ولا ذاك الرجال

ماسك الميكروفون ويحرج 50,,52,,55,,ومن قال زود ,

قال الشايب بس شكلهم يحرجون على الوايت ولا هوب بغالي وإن شاء الله يكون من نصيبي.

ودخل معهم بالحراج ,,,56,,,ويزودون...ويزود...ويزودون...ويزود.

المهم وصلوه 75,,,قام خربها وقالهم ,,,80

هو قالهم ,,80,,يوم طخوا كلهم و سكتوا..!..وهجدوا..!!..والتفتوا عليه!!!

يناظرونه..و يناظرون بعضهم..يوم تغامزوا ونقزله واحد منهم.. وسحبه على جنب

وقاله شف يا رجال أنت باين عليك أبن حلال وطيب بالحيل , وش رايك لو نعطيك شيك

بمليون ريال ذالحين ,,ذالحزه

بس مانشوف وجهك واقف معنا بالحراج .

انصدم الشايب ..أفتر راسه شوي وقال هااااا..وش السالفة..؟؟؟

مليون ريال ..وليه..؟؟

قال له الرجال (خويهم) بس خذ هالشيك وتوكل على الله والله يستر عليك ولالك بالطبخه.

وش اسمك ؟؟. عطاه أسمه وكتب له الشيك بمليون ريال وصرف الرجال من الحراج وهو مايدري

وش السالفه!!!.

طيب وش العلم علمني ..؟؟

علمه بالعلم. أثر ذا الجماعة يحرجون على المخطط وواقفين بالصدفة جمب الوايت اللي

جايبينه يرشون به الأرض علشان يحرجون.

والحراج من اليوم بــ 56 مليون و 75 مليون..وابو الشباب (الشايب) خش عليهم عرض

ولايدري وش العلم.

وهم بعد أخترشوا شوي يحسبونه هامور وبيلطش عليهم المخطط ..قاموا صرفوه بمليون ريال..

وهو ماصدق. طاير من الفرحه,,مليون,,ويقول بخاطره

عجزت وأنا اجمع خمسة وثمانين ألف ويجيني ذا الرزق من الله

فسبحان الله مقسم الأرزاق على عباده.

الرزق مثل الأجل يتبعك

******

الله يرزقنا بمخطط بالغلط.

ام الدانه

منقول

[كمال البدور]

قصة جميله اختي ام الداني
بس لي طلب شو االمقصود بالوايت عندكم
تقبلي مروري

[الاطلسي]

يعطيك عافيه فعلا الشايب غشيم واللي مايدري مايدري
ارزاق يادنيا ويقولون كلن على همه سرى وانا على همي سريت
شاكرلك ع الموضوع

[ام الدانه]

المشاركة الأصلية كتبت بواسطة كمال البدور

قصة جميله اختي ام الداني
بس لي طلب شو االمقصود بالوايت عندكم
تقبلي مروري

هــلا وغـــلا اخوي كمال

يسعدني مرووورك والف شكرلك والله يعطيك العافيه

الوايت حافلة كبيرة يوضع بها الماء

دمت بخيررررررر

[ام الدانه]

المشاركة الأصلية كتبت بواسطة الرااقي

يعطيك عافيه فعلا الشايب غشيم واللي مايدري مايدري
ارزاق يادنيا ويقولون كلن على همه سرى وانا على همي سريت
شاكرلك ع الموضوع

هـــلا واللــه اخوي الرااقي وين الغيبات مامريتني من زمان

مشكووور على مرووورك العطــر شرفتني واسعدتني والله يعطيك الف عافيه

ودمــت بكـل حـب وسعـادة