سحاب شقراء -سواليف الاولين ايام بيوت الطين والحياه الطيبه

[رذاذ]

صح لسانك ياعمّ سحاب ... على الأبيات الجميله ..
وسلما يمينك على القصص الفريده ..
ماأوجعتنا روسنا .. وإحنا نقرأ ونستانس ..
إنت ماشاءالله لاقوة الا بالله شايله همك وشلون تكتب كل ذا ...
شوي شوي على إصبعك .. الله يعطيك الصحه والعافيه ...

[أسير العاطفه]

السلام عليكم ورحمة الله وبركاته
أسعد الله صباحكم بالخير والمسرات
صح لسانك وسلم بنانك اخوي سحاب على هالقصص والحجاوي استمتعت بالقصص رغم اني دمعت عيوني من كثر القرايه او مدري يمكن اني صحت وانا مادريت ذكرتنا سنين الطفوله ( ياعمرا ) ذكرتني بسحبنا للجوالين وجريد النخل نشيل العسيب وندفها نحطها سياره الله من مره ومره دقرت لها بحصاه والا حفره وارتكزت في بطني
اجل قيض وبيض صعو وخرفشان ههههههه ذكرتني بالحجيج يحطون على السياره علم المملكه كشعار انهم حجيج
ويجيبون معهم حلاو وخرفشان وقريض وبرزان (زميره) ودربيل صغير صور مكه ههههههه
الله يالدنيا يازين الحياه هكا الحين دنينات ولعب حدل والغميمه اخوي سحاب حكحكت الماضي في اذهاننا الله يسعدك دنيا وآخره هكالحين الشقاوه آخذه حقها فينا الشماغ تلقاه متقطع مع الاطراق من كثر الملاسط
تذكر كموم يدين الثوب تبلص على الشمس وكامشه الى نص اليد من كثر المناشق واللطخ ههههههههه
اخوي سحاب لاتطلع فضايحنا كلها جب سطر واطمر سطر هههههههههه
الله يوفقك ويستر عليك اخيرا لقيت صديقيني مبطي يومني صغير هههههههه
استمتعت بالمتابعه والقصص الشيقه رغم ان عيوني تنفخن صارن تقل عيون جربوع من كثر القرايه
بانتظار المزيد من القصص وفقك المولى لمايحب يرضى
تحياتي لك

[سحاب شقراء]

المشاركة الأصلية كتبت بواسطة أسير العاطفه

السلام عليكم ورحمة الله وبركاته

أسعد الله صباحكم بالخير والمسرات
صح لسانك وسلم بنانك اخوي سحاب على هالقصص والحجاوي استمتعت بالقصص رغم اني دمعت عيوني من كثر القرايه او مدري يمكن اني صحت وانا مادريت ذكرتنا سنين الطفوله ( ياعمرا ) ذكرتني بسحبنا للجوالين وجريد النخل نشيل العسيب وندفها نحطها سياره الله من مره ومره دقرت لها بحصاه والا حفره وارتكزت في بطني
اجل قيض وبيض صعو وخرفشان ههههههه ذكرتني بالحجيج يحطون على السياره علم المملكه كشعار انهم حجيج
ويجيبون معهم حلاو وخرفشان وقريض وبرزان (زميره) ودربيل صغير صور مكه ههههههه
الله يالدنيا يازين الحياه هكا الحين دنينات ولعب حدل والغميمه اخوي سحاب حكحكت الماضي في اذهاننا الله يسعدك دنيا وآخره هكالحين الشقاوه آخذه حقها فينا الشماغ تلقاه متقطع مع الاطراق من كثر الملاسط
تذكر كموم يدين الثوب تبلص على الشمس وكامشه الى نص اليد من كثر المناشق واللطخ ههههههههه
اخوي سحاب لاتطلع فضايحنا كلها جب سطر واطمر سطر هههههههههه
الله يوفقك ويستر عليك اخيرا لقيت صديقيني مبطي يومني صغير هههههههه
استمتعت بالمتابعه والقصص الشيقه رغم ان عيوني تنفخن صارن تقل عيون جربوع من كثر القرايه
بانتظار المزيد من القصص وفقك المولى لمايحب يرضى

تحياتي لك

هههههههههههههه الله من الفظايح يالغالي هههههههههههه

منيب معلم احد بشي يفشلنا ههههههههههههه

شرفتني شرف الله قدرك ومقدارك يالغالي

[سحاب شقراء]

المشاركة الأصلية كتبت بواسطة رذاذ

صح لسانك ياعمّ سحاب ... على الأبيات الجميله ..

المشاركة الأصلية كتبت بواسطة رذاذ

وسلما يمينك على القصص الفريده ..

ماأوجعتنا روسنا .. وإحنا نقرأ ونستانس ..

إنت ماشاءالله لاقوة الا بالله شايله همك وشلون تكتب كل ذا ...

شوي شوي على إصبعك .. الله يعطيك الصحه والعافيه ...

يا هلا ومرحبا بالغاليه رذاذ

الله يطول بعمرك يالغاليه

ههههههههههههه امين الله يستر على ذا الاصيبع

شرفتيني يالغاليه شرف الله مقامك

[سمو المشاعر]

هههههههه هي جات على الطقطقة والهمزة
طبخ وكنس وغسيل خخخخخ ويوم احتدم الامر
بيرجع ملكية العصمة
الله يسعدك يبدو والله اعلم حبيبنا داخل بالعقد السادس العمر كله إن شاء الله كشفناك صح!!

ما عليك سولف كلنا في الهوا سوى متقاعدين
والبقية في الطريق قادمون سيلحقون بالركب عن قريب ..


تحيتي

[سحاب شقراء]

المشاركة الأصلية كتبت بواسطة سمو المشاعر

هههههههه هي جات على الطقطقة والهمزة
طبخ وكنس وغسيل خخخخخ ويوم احتدم الامر
بيرجع ملكية العصمة
الله يسعدك يبدو والله اعلم حبيبنا داخل بالعقد السادس العمر كله إن شاء الله كشفناك صح!!

ما عليك سولف كلنا في الهوا سوى متقاعدين
والبقية في الطريق قادمون سيلحقون بالركب عن قريب ..


تحيتي

ياهلا ومرحبا ومسهلا بالعود ههههههه

انا يالغالي رابط فرامل على ال خمسه وثلاثين منيب متعديها ابد ابد هههههههههههه
انا طالع على جدي ياملا الجنه واصل للميه وكل ماسئلته يقول 90
شرفتني يالغالي شرف الله قدرك ومقدارك

[سحاب شقراء]

السلام عليكم ورحمه الله وبركاته

ياالمسلمين يازين الشباب زيناه والله اني صادق ياليت الواحد مايتعدا عمره عن 30 سنه يبتل الين يموت وهو ابو 30 سنه هههههههههه انتم تدرون ان اهل الجنه الله يجعلنا منهم كلنا ووالدينا وذرياتنا وحبايبنا جميع اللهم امين انتم تدون ان اعمارهم 33 سنه كل الي في الجنه وما يتعدون ذا العمر ابد سبحان ربي عدد كل شي بس عليكم بعامود الدين الي هي الصلاه لا تخلونها ان صلحت صلح الباقي وبدونها مايصلح شي يقولون الاولين عن الصلاه
1- نور في الوجه
2- سعه في الرزق
3- طول في العمر
وهي احب الاعمال الى الله سبحانه وتعالى

ولا تذكرون احد الا بالخير - ونتبهو يالغالين اعراض المسلمين لا تقربونها لا بزين ولا بشين تراها عند الله عظيمه
وحصنو انفسكم كل ما اصبحتو ومسيتو بئايه الكرسي والمعوذات جعلكم ما تشوفون شر كلكم ولامن تحبون تراها تحميكم بعد الله سبحانه من كل شر

===

من 60 سنه او اكثر يعني في دخول المربعانيه والبرد الشديد يبدا المشق يعمل عمايله ههههههه تمتلي يدينا ورجلينا وخدودنا بالمشق ههههههههههه والمشق اعتقد انه جفاف يصيب الجلد من استعمال الماء البارد ايام البرد الشديد وتعال شف صياح البزور منه ولا جا مسيان يعني قبل النوم يقعدن الحريم يدهنن رجلين ويدين عيالهن وخدودهم باالكريم زان وهو الدهون الي متوفر منول ولا ابو فاس وذا دهون بعد ويقومن بعد ما يدهنن رجلين عيالهن يجيبن كيس باغه ويدخلن في كل يد وكل رجل كيسه ويربطنهن علشان يلين الجلد ولا يتشقق وطول اليل ماتسمع الا خرفشه اكياس الباغه
وذكر بعد الا قمت من النوم مقوا افتح عيوني ابد اقعد اتلمس الجدران ولا ادري الا براسي خابط في الساريه والساريه هي العمود الي تشيل البيت منول نسميهن سواري ويصيرن في وسط المجبب وبعض الحجروهن عمدان مبنيه من حصى ونسميه خرزالسواري شكله دائري من تحت الين السواتسيف ههههههه ماعرفت اكتبها المهم مدري الا براسي يخبط في الساريه ويصعرر راسي من قو الظربه والسبب الي يخلي عيونا ماتفتح هو الغمص شين يصيب العيون منول ماده تفرزها العيون مثل الشمع وتشبك هدب العين مع بعض ونقعد نشيله ويوجع بعد ولا يروح الين ما يبقا ولا رمش في العين يطلع الواحد احمص مافيه ولا رمش الله يرحم الحال منول وبس -
ولا جانا مطر وغلب الامطار تجي منول في الليل ولا طوول المطر علينا يصيرون الناس خايفين من بيوتهم لياها تطيح -
انتم دارين ان فيه سنه من السنين استمر المطر 58 يوم متواصله ولا شافوالناس الشمس ابد وسموها سنه الهدام والحمد لله شقراء ما طاح فيها بيوت واجد والي تظررو كثير اهل بريده في القصيم هم الي طاحت عندهم بيوت واجد الله يغمد ارواحهم في جنات عليين ويبدلهم عن ما صابهم بالفردوس الاعلى من الجنه ووالدينا وكل مسلم -

ترا اهل شقراء يحبون اهل القصيم كلهم والله اني صادق شي اعرفه ومتوكد منه -

مره قالي ثلاثه من العيال الي كبري ذاك الوقت الله من زين الحكي اكيد انهم كبري هلحين هههههههههههههههه قالو وشرايكم نطلع كشته ونسوي عشا ونتعشا ووافقنا كلنا وتفقنا ان نكبس كبسه على الحطب جذوع اثل بس كلش زين منول المهم نسوي رز مع تونه ونتواعد في مكان بين النخيل اقرب مالنا مزرعه العليا حقه سعد ابن خضير ياملا الجنه البارده والله كنه قدامي هلحين الله يغفرله ووالدينا وكل مسلم المهم مزرعه العليا ورا ظهورنا وحنا جالسين في حياله مافيها نخل ولا شي اسمها الطالعيه وحد يسميها الزوه حنا جالسين في علو الزوه ونا طالع على رجلي من عند المسيل الين وصلت ولقيتهم فيه اشوا لانهم طالعين على ددسن ابو واحد منهم وكان فيه كلاب كل شوي هاده علينا ونرجمها بالحصى الين تبعد ولا هدن علينا الابعد ما حطينا القدر بين حصاتين وشبينا الضو المهم ونتعشى وكانت القبله فيها بروق مولعه سحاب مقبل علينا ونا اشوف العيال بينهم شي يوصوصون بينهم لمحتهم كم مره كن فيه امر يبي يسوونه المهم يوم بدا السحاب يمطر والكلاب تنبح والبروق تبرق وتروع صواعقها ويقومون العيال ويتطامرون في الددسن وينحاشون عني هههههههههههه اوريكم هين وياقفون من بعيد ويقولون رح ارجع على رجليك بس انتبه لا تزلق ولا يعضك كلب تراهن مسعورات قلت تكفون وقفو قالولا مناب موقفين تذكر يوم انحن نسبح في منحات الوسيطى وتجي تاخذ ثيابنا وتخلينا نجي نمشي قدام الله وخلقه ما علينا الا صراويل هههههههههههههههه هذي بدالها ويروحون ويخلوني ما عندي الى باقي الضو وبدت تطفي والسما تمطر ونا الي انطلق ركض ودخل مع نخل العليا وكان مافيه باب بس مكان الباب موجود الي يطلع على الطالعيه وحاطين فيه جذع اثله عن الحمير لياها تدخل المهم وطلع مع الباب الثاني ولا الكلاب واصلاتني ركض بس فكني الله ان فيه باب وصكه وركض مع ذاك السوق ولف يمين ويجيني المسجد الي بين مزارع العليا والوسيطى وركض الين جيت على دباب مغيليثه هذا اسمه وش اسوي تراه موجود الا هلحين وتمشي عليه السيارات وهو كبري صغير يمشي معه السيل ومنول نسميهن دباب مدري وراه وروح مع شعيب المسيل ويوم دريت ولا هذولي المقاريد يمشون بددسنهم والددسن حق ابو واحد منهم بعد قالو جالسين نحتريك خفنا عليك من الكلاب ان انحن شفنا براهيم الغبيوي الله يجعله للجنه ونه قال لنا ترا الكلاب الي في الرحبه مغلوثه انتبهو منها وخفنا عليك ولاي امشي ونعالي في يدي قلت اجل خفتو علي هاه انتم دارين ماردهن عني الا باب نخل ابن خضير جعله للجنه ولا كان صرت من صيد امس ولا وقفت الركض الا فيذا قالو وحده بوحده قلت هين يجيبكم الله ههههههههههه وتمضي الدنيى على العابدين والله غفور ورحيم سبحانه-

انا سويت لي ثلاث عمليات في المستشفى في وقت واحد بس منيب معلمكم وشي هههههههه المهم وطلع من المستشفى ويفرشون لي عيالي فراش في الصاله تحت علشان الاجاني احد يزورني اصير قريب - الله يكفينا شر ها الدنيا ما جاني احد ولا زارني احد ويوم جا نهار رابع ويضيق صدري وتدمع عيني ورا محد جا يزورني وقول لعيالي شيلوفراشي معا د ابيه- وروحوعني ابا اجلس لحالي


وقولي كم بيت من خرابيطي ونا ظايق صدري وقول فيها



يــااللــه صـــندوق الحشــى ضاقــت ركونـــه

وضاقـــت علي الوسيـــعه وقلــت عزالــــــي

يــااللــه يـاللـــي تعلــم الحــال وشلونــــــــــه

مـا غيـــرك أحـــد,ن يفــرج ظــيقـــة البـــــالي

أحـــس بــهموم ثــقل طويـــق مـــازونـــــــــه

تبـــرك على الــقلــب ومنـــها الدمــع همــالي

قـــالو ســـحابن ثقــــيل وتبــــرق مزونــــــــه

قلــت إيـــه مــا تدرون عـــن لاهـــب الصـالي

ذا البــاب صكــوه و طــلـبه لا تهـــجونــــــــه

خـــلوني أبكـــي واهـــل الدمـــــع بلحــــالـــي

أحـــس أنـــا بشـــئ أنتـم مــا تحـــسونــــــــه

وبطـــوح الصــوت كنــي مـن العــقل خـــالـــي

ســــــــمو عليــــــه و قـــــلبـــي لاتـــلومونــــه

ودعـــوا لـي الــلـه أهو للغــــيث نـــزالــــــــي

سحاب شقراء


ونا ياالغالين لو اجلس اسولف عليكم ما قظت سواليفي -


قولو امين الله يوسع صدوركم بالعافيه ويجعلكم من اسعد خلقه هذا الي في قلبي لكم -

وقولو امين بعد مر ه اخرا الله يختم لنا ولكم ولوالدينا جميع وذرياتنا وحبايبنا بالفردوس الاعلى من الجنه وكل مسلم اللهم امين

خل اعلمكم بشي ما تعرفونه تراي اكتب بصبع واحد يعني انقر مثل ما ينقر الدجاج العيش والله اني صادق وحمدوربكم اني ما اعرف اكتب بصابعي كلهن كان ما تلقون شي فاضي هههههههه

وفي حفض الله جميع

سبحان الله وبحمده - سبحان الله العظيم - عدد خلقه وزنه عرشه ومداد كلماته

[راع العرض]

الله يعطيك العافيه عمنا سحاب على هالسوالف وصح لسانك على القصيده

[سحاب شقراء]

المشاركة الأصلية كتبت بواسطة راع العرض

الله يعطيك العافيه عمنا سحاب على هالسوالف وصح لسانك على القصيده

يالله تحييه هلا ومرحبا راعي العرض

شرفتني شرف الله مقامك يالغالي

[سحاب شقراء]

السلام عليكم ورحمه الله وبركاته


فيه ربع واجد يعني بشكه كبيره وكلهم اهل خير وصلاح ودائما يحبون يخيمون مع بعض ويمزحون مع بعض ويسوون مقالب في بعض والكلام هذا في الرياض المهم خيمو سنه من السنين في البر اكيد مهمب مخيمين في الديره هههههه
لا تواخذوني يالربع المهم طقوا خيام في ثمامه الرياض يعني حطوا لهم مخيم ودلو يطلعون فيه المهم والله يعينكم على المهم فيه مجموعه طلعوا ذاك اليوم بدري شوي يبي يسوون الغداء او العشاء للباقين
المهم وهم في الطريق لقو غرشه حقه سكار اللي تجي من برا المملكه طبعا الغرشه فاضيه قد قحنت او قد شربت المهم خذوها ومروا على البقاله وخذوا انواع البيره اللي تباع عادي ما فيها شي وراحوا للمخيم وسوو بريق شاهي وصبوه في غرشه السكار وصارت الغرشه كنها مليانه المهم وفرشوا في وسط الخيمه سماط وحطوا البيره دار ما دار على السماط وحطو غرشه الشراب في وسط السماط يبي يلعبون على اخوياهم اذا جو يسوون انفسهم سكرانين المهم سمعوا السيارات جت حقت ربعهم المهم جلسوا يسوون انفسهم سكارى يالله الواحد يقوى يتكلم مع رفيقه ويوم دخلوا عليهم ولاهم مهمب ربعهم ولاهم الشرطه العسكريه ويحشرونهم بالرشاشات هههههههههه المهم ويمسكونهم ويحملونهم في الجيوب حقت الشرطه العسكريه يابن حلال يابن حرام ماينفع والله العظيم انا نمزح مع اخويانا وشوفوا اللي في الغرشه قسم بالله انه شاهي ولاسرت جميع المحاولات المهم كلموا على عملياتهم او مركزهم وبلغوهم انهم مسكوا 8 اشخاص معهم مسكر وعيا يشمه العسكري المهم يقول لي واحد يوم سمعنا الظابط يكلم من مركز عملياتهم وقال من اللي معك ياعسكري قال معي ناس كفشناهم في مخيمهم ومعهم مسكر المهم قال الظابط ماهو عملك تداهم المخيمات ولا تبلشنا مع خلق الله هذا مهوب من اختصاصنا واطلق سراحهم قال العسكري ماني مطلق سراحهم قاله الظابط امر عسكري اطلق سراحهم وعندك حجز ثلاثه ايام متواصله في المركز هههههههه جت على راس العسكري وجاء الفرج من رب العالمين سبحانه خلهم يلعبون مره ثانيه وقام العسكري ووقف وقال لهم انزلوا ونزلهم ورفض يوصلهم مخيمهم
هذا الا قالو بعض المزح مهوب زين