آخر قصيده للشاعر المرحوم بإذن الله
مرشد البذالي
قالهـــــا وهــو في المستشفـــى آخــــر ايامــــه
يحّول أشوف الحق جتني طروشه
جتني مطاليبه وانا عنه منحاش
اليوم كن بداخل الصدر هوشه
مثل اختراش الريم في داخل الجاش
يالله عسى عطفك ولطفك نحوشه
يالله بحسن الخاتمه عند الاقراش
دنياك لو تعطيك زين المعوشه
تالي سوالفها تعود على ماش
ياما خذينا بأول العمر شوشه
وياما مشينا في مظاهير وأدباش
في خايعٍ وبل الثريا رشوشه
نجن الزبيدي في صحاصيح ودشاش
وياما جلسنا مع مرودع نقوشه
في سهلةٍ ماحدرنا زل وفراش
في وسط روضٍ مخضراتٍ خفوشه
نبته جديد ومبعدينٍ عن الطاش
نبنوب لا خبله ولا أهي مخروشه
عنق الفريد ان ذيره زول حشاش
قامت تخاطبني بنفسٍ هشوشه
بس الكلام وعرضه أبيض من الشاش
باسرار في وسط القلوب مخشوشه
بين الثنين ولا درى عنهن الواش
ربعة وفا ولا السلب ماننوشه
ماني لوجه معذب الحب خماش
واليوم مالي مع هل الصيد نوشه
عطيتها غيري بلاسوم ببلاش
عند الطبيب وصار عندي وحوشه
ومن الإقامة صابني خوف وخراش
ذالحين شفني جالسٍ عقب دوشه
أصلب عضاي وكن بالجسم هشهاش
خليت ديواني ومجلاس حوشه
عقب المعزة ساكنٍ دار الإنعاش
والنفس ضاقت عقب ماهي بشوشه
مثل المقيم اللي على نو مطراش
ملتقى العواد
2012-11-29, 06:23 PM
آخر قصيده للمرحوم مرشد البذالي
العرض الشجري