" نسبها لاهلها "

[عبدالعزيز الشاطري]

[align=center]

الشعب ظامي تحت وبل المخيله
لو سيلها فالارض غطّى جبلها

يمشي مع الوديان يابس صميله
ما بلّ كبده لو طوارف بللها

ينشد عن المرباع وآآ عزتي له
والارض قدمه خضرةٍ ما يصلها

كله من اللي يدّعي بالفضيله
وبْغير اساميها نسبها لاهلها

اللي يحط مزاين البل وسيله
لامواله اللي من دنسها غسلها

واللي رفع سعر المعيشة ف ليله
حتى غلاها مانفعنا بدلها

واللي يغطي ساهر بكل حيله
ياخذ دراهمنا بعد ما ختلها

واللي تخيّر فالمهار الاصيله
واسرج حصانه واستباح وقتلها

لو الذيابه ما رضت بالفشيله
مير البلا فانيابها وش دخلها

قدامها الحصني ويومي بذيله
ويحوشها حوش الغنم مع فحلها

والامثلة واجد وهذي كفيله
للعاقل اللي فكرته ما عقلها

تبقى نتايجها علينا ثقيله
وْلا كل واحد فالخلايق جهلها

وْنبقى على رجوى الغيوم البخيله
لو سيلها يزداد عشنا بْوحلها

من يوم تنشى النفس عاشت ذليله
صمّا وبكما والغبن مرتحلها

والعين عميا ما تشوف الرذيله
واللي عماها من وجعها كحلها

واليوم قول الحق كالحنظليله
من ذاقها يصبر عليها .. واكلها



وسلااااااااااااااااااااااااااااااااااااااااااامتكم






[/align]

[سراب]

صدقت شاعرنا لافض فوك
ابيات تحكي واقع مرير استجد بيننا
ولاحياة لمن تنادي

فالك التوفيق في الدارين

[وقاد]

صح لسانك وصدق بيانك ..

ابداع من مبدع ..

تحياتي وسلامي لك

[رذاذ]

حـروفكـ مختلفـة عن سآئـر الحروف ..
و نبض قلمكـ يضخُّ حبـر الإبـدآع و الجمـآل ..
لله درُّك من شاعر ،، تكتبُ مايُحاكَ في قلوب الجميــٓع ..
عبدالعزيز الشاطــري
سلمـت لنـآ تلكـ الأنـآمل التي ترجمـت الإبـدآع حـرفاً متناغماً ..
أنـآر اللـه دربكـ و قلبكـ على ماكتبت ..
وتقبل مروري المتواضع في طيّآت متصفّحك

رذاذ

[محمد المقاطي]

عبدالعزيز الشاطري
صح لسانك ، ماقلت الا الصواب

الشعب ضامي تحت وبل المخيله
لوسيلها فالارض غطى جبلها

تصوير ومعنى من شاعر متمكن ، ومدخل بديع للقصيدة
شكراً لتواجدك وجزالتك
لاهنت

[غانم الضومري]

الشاطري ..
قلم حر .. يكتب مايمليه فكره الناضج . حروف جميله مباشرة دون تكلف
مبدع .. جريء . واثق .

دام نبضك ..

سلمت ياابا عزااام

تحيتي

[عبدالمحسن الرحمه]

الشعب ظامي تحت وبل المخيله
لو سيلها فالارض غطّى جبلها

يمشي مع الوديان يابس صميله
ما بلّ كبده لو طوارف بللها

صح الله السانك محبوكة حبك لا فضفوك
أجدت تصوير واقع نعيشة