[ يالله بنو ٍ بارقه له رفاريف ]

[صبح المطر]

السلام عليكم
ومساكم الله بالخير
وأسأل الله أن يغيث البلاد والعباد
قصيدة أتمنى أن تنال الرضى والإعجاب
ودمتم بحفظ الله

/

يالله بنو ٍ بارقه له رفاريف ** يحن رعاده وتسمر بروقه
بأمر الله الخالق ولي التصاريف ** بأول جباه الوسم يالله تسوقه
من ناوة ٍ ما هي على حسبة الصيف ** وسم ٍ يشق البيد وابل حقوقه
مزنه نصوب وبالمناشي مراديف ** راع الولع لا شاف برقه يشوقه
نوده صباء ما به عسام وعواصيف ** راكد خياله ويتوالى صدوقه
وقعه على جرد الفيافي مجاريف ** يركب رفاع الجال ماه ويحوقه
تصير وديانه كما غبة السيف ** يكبر على وصف الشفوق ويفوقه
يأخذ شهر رجعه يهل التهاتيف ** يحيي مهاشيم الوقوت المحوقه
على ديار ٍ شوفها قمة الكيف ** هي غايتي والقلب وجده يتوقه
لا ربعت من رايحات المقانيف ** وزانت سبور اللي يحس بزهوقه
يا نجد برحابك تزين المشاريف ** والعشب توه زاهي ٍ في سموقه
وطيرك يردد في سماك الغطاريف ** فوق الخضار اللي نديه عروقه
وريح الخزامى مع نسيم الهفاهيف ** هي منوة العاشق وسلوى خفوقه
يا حلو لا منك عقدت المهاييف ** يم الفياض الزاهيه والطلوقه
وشبيت نارك والدلال المهاديف ** على جذى جمر ٍ سناه وشروقه
شروق ضوء الشمس ما هو سناء طيف ** في خايع ٍ يجلا عن البال ضوقه
مع خوة قروم ٍ تسد المواقيف ** رجالهم بالطيب يصعب لحوقه
ودارت مع الفنجال حلو السواليف ** وكل ٍ على غاية مرامه وذوقه
هاذي حلاة العمر قبل الصواديف ** والعمر لا بد الليالي تعوقه
وغبر الليالي يكسرن المجاديف ** كم واحد ٍ لوعات بقعاء تبوقه

عبدالله الحربي