يمـــــــــــــــــــــه

[عبدالمحسن الرحمه]

بسم الله الرحمن الرحيم




(( مدخــــــــــــــــــــــــــــل ))



طعناتهم ياصاحبي هدت الحال=أمشي وانا مكسور مجبور ساقه

الهم طول والحزن داخلي طال=والوقت يصفقني بكل اصطفاقه

هذا الزمن لوعه وضيقه وغربال=شوك الزمن ينساق لي وسط باقه

الدمع فوق الخد يبطي ولازال=وماعاد لي من حمل الأيام طاقه

ياصاحبي لا تتعب الحال والبال=الوقت هذا لاتدور صداقه

ياما خويت من الرفاقه والأشكال=ومافيهم اللي يستحق الرفاقه

راح الذي يسوا ثمانين رجال=رحل واببقى مكتوي في فراقه

ثابت غلاه بداخل القلب ما مال=والقلب مبطي له يزيد أشتياقه






((( يـــــــــــــــــمـــــــــــه )))




في كل لحظه من شقاي أعذريني=لا ذبني الهاجوس في عالم الصمت

توه بدا جو التعب من سنيني=واليا أشرقت شمس الحقيقة تكلمت

(يمه)حياتي سقمها يحتويني=ولا فيه يوم ٍمن عناها تسلمت

أصبحت في وقت القهر قسمتيني=والحمدالله غيرها ما تقسمت

قسم ٍ يعاني من هموم ٍ وديني=وتمر بي سود الليالي ولا نمت

وقسمٍ يعاني من زمانٍ حزيني=والغم يحسدني ليا من تبسمت

ما غير أفرقع في أصابع يديني=ولو الأصابع قطًّعت ما تألمت

أشدًّها هم ٍجعلني طعيني=ومن ذقت طعمه في عروقي تسممت

ما غير أصفق باليسار اليميني=وأقول ياربي لك الحمد وأنعمت

يا خالقي يا رازقي يا عويني= يا مالك الدنيا بجودك تنعمت

يا سامعٍ دب النمل والونيني=يا سامع الشكوى ولولاك ماقمت

إغفر ذنوبي قبل قطع الوتيني=يا رافع البلوى بك آمنت واسلمت