سحاب شقراء -سواليف الاولين ايام بيوت الطين والحياه الطيبه

[سحاب شقراء]

المشاركة الأصلية كتبت بواسطة أبو سيرين

يا هلا والله ويا مسهلا بالعم سحاب

أنا من اليوم بسميك العم سحاب عشان تجيب لنا من قصص الأولين الله يرحمهم وتنقل لنا تراثهم وذكرياتهم وقصصهم والقصائد اللي توثق القصص

وأنا أدري ان مسئولية نقل مثل هذا التراث كبيرة جداً ولكن صدقني أنت كفو وخير من ينقل لنا الصورة خصوصاً ما شاء الله عليك عندك سعة صدر وأريحية <<< هذي عاد اسئل عنها عبد المحسن هههههه .... وعندك صبر الله يحفظك ولا يحرمنا منك ومن أمثالك

وأتمنى تركز على عاداتهم وكيف كانوا يتصرفون وتنقل لنا كل شي عنهم حتى لو استعنت بصديق ما فيه مشكلة بس أهم شي نريد منك 365 قصة في خلال سنة ما حنا طماعين ولا ودنا نثقل عليك

وجعلك ووالديك للجنة ومن يسمع

والله يحفظك من كل مكروه

,,,,,,

ياهلا ويامرحبا ومسهلا يبو سيرين الغالي

ههههههههههههههه واوك وشلون 365 سالفه ههههههههههههههه كان على طول يسوون لي اختبار الحمض النووي علشان يشوفون السلاله وشي

تراك اكبرمني بعشر سنين يقوله عبد المحسن الرحمه ههههههههههههه

وبشر ومن عيوني اعلمكم من نصبح الين نمسي وشلون حياتنا منول طبعن الشي الي مريت انا عليه من صغري الين شيبت

شرفتني بحظورك شرف الله مقامك يبو سيرين وااسعد قلبك

[عبدالمحسن الرحمه]

بسم الله الرحمن الرحيم

ياالله سترك وهذي قعده في هذا المحل ياسحاب نبي لنا مكيف صحراوي يهفهف علينا
ومعي حب قرع ودلة زنجبيل رطب
لا تتأخر علينا نبي قصة عجله الله لا يخلينا من قلبك

[سحاب شقراء]

المشاركة الأصلية كتبت بواسطة عبدالمحسن الرحمه

بسم الله الرحمن الرحيم

ياالله سترك وهذي قعده في هذا المحل ياسحاب نبي لنا مكيف صحراوي يهفهف علينا
ومعي حب قرع ودلة زنجبيل رطب
لا تتأخر علينا نبي قصة عجله الله لا يخلينا من قلبك

هههههههههههههههه اليوم مايصلح المكيف الصحراوي الظاهر ان البحر قارب عند الرياض كلش رطوبه

ياهلا ويامرحبا ومسهلا بالغالي عبد المحسن الرحمه

ابشر بالسواليف الي توسع الصدر علشان تشوف وشلون الشجاعه الي فيني تحسبوني خواف
ونا شجاعتي تطلع في المواقف الصعبه بس

ابشر من عيوني منيب مبطي

[سحاب شقراء]

السلام عليكم ورحمه الله وبركاته


اذكر من زمااااان مره ونا صغيييير مره فيه عجوز لا تقولون وراك على العجز الله لا يخلينا منهن ويرحم الميت منهن ويسكنه الفردوس الاعلى من الجنه ويخلي لنا الي حي منهن من الي مايحب العجيزات كلهن ملح وقبله المهم هذي سالفه ابا اقولها لكم بعد ماراجعتها عده مرات علشان محد يعرفها لامن قريب ولا من بعيد المهم كنت انا عندها يوم من الايام في بيتها ونا صغيييير ما يتغطون عني الحريم المهم ذا العجوز جعلها للجنه وكل مسلم وطبعن ذا الكلام ايام بيوت الطين قبل الكهرب وقبل كلش وكنا في وقت الضحى يعني الصبح وكنا جالسين على حصير من خوص النخل قالت لي اقول ياوليدي ودي اتروش وغسل رويسي حاطه فيه حنى لو تروشت ياوليدي تبي تصب علي قلت ايه اصب عليك وتقوم وتدخل حطب وتشب الضو تحت ذاك القدر الي مقعد على حصاتين وفيه ماء وذا الكلام ايام برد تبيه يحمى الماء شوي وكان حول القدر الي مشبوبن عليه مغسل ويطلع ماه مع مزغار ويصب في حويط جنبهم المهم يوم حمي الماء شوي وهي تعطيني مثعوبه ذاك القدر الي له ثعبه مثل ثعبه الدله هذي يسمونها مثعوبه وتملاها ماء وقالت تعال ونا امك صب على رويسي بشويش وتجلس على خرزه ذيك الحصاه حقت السواري المهم قالت يالله ونا امك صب علي بشويش ولا هنا شمبو ولا شي مغير ماء بس وهي عليها ثويب اخضر فيه وريدات حمر صغيرات اذكره كنه قدامي هلحين ياملا الجنه وهي تقوم وتخر شيلتها وتقولي يالله صب علي ونا امك بشويش وكان معها مشط خشب كان تذكرونه يالصغيرين الي كبري ههههه
وتقعد تفرك في رويسها وهي مغير صب وقف لا تصب وهي تكرد في راسها تبي علشان يروح الحنى وهي تغني مانيب ناسي وشي تقول ابد تدرون وشي تقول وهي تكرد في راسها تغني وتقول ابو جديلن يغذا بالشمطري ابو جديلن يغذا بالشمطري وصب لا تصب ويوم قضت المثعوبه وروح للقدر وغرف منه ماء بذيك الغضيره وجيبه وصب عليها وهي مغير ابوجديلن يغذا بالشمطري ولا وش ها الجديل الي يغذا بالشمطري ثلاث شعرات مهناش حات رويسها ياملا الجنه ولها قرينين مثل ذنب الفاره وهي تقول ابو جديل يغذا بالشمطري وصب ولا تصب وقضت المثعوبه الثانيه وروح للقدر وغرف منه ماء اثره صار يطبخ الضو تحته ونا مااعرف لشي بزر وجيب المثعوبه ويوم صبيت على راسها الا يوم شهقت ضعيفه حرها الماء وتهوش علي وراك تصب علي ماء حار انا وش دراني بزر هي الي ما اخرت الحطب والضو من تحت القدر المهم قضينا وااول مره اشوف عجوز تروش بثوبها هههههههه اذكرها ذي وذكر وحده ثانيه قد تروشت بثوبها بعد المهم وتجر الحصير وتحطه في الشمس ونا قاعد عندها وتقعد تكد ذا الشعرتين وترا اثمها مافيه ولا سن عجيز كبيره وتقعد تمشط راسها في الشمس ثمن قامت تحط الديرمانه وقالت لي شف ياوليدي الا جاء فلان رجلها عود كبر جد جدي الاجا ابيك تقولي وهو يوحي اليوم وش زينك يم فلان بس لا يدري اني قايله لك شي وعطيك شرط وشزينه قلت طيب ويوم قرقع الباب جاء رجلها ونا على طول اقول وش زينك يم فلان وتطق رجلي وتقول اصبر الين يدخل مهوب هلحين وراك عجل قلت طيب ويوم دخل العود وهو يتعكز على عصاه قال السلام عليكم وقلنا وعليكم السلام قال ماشاء الله اليوم سحاب عندنا يالله تحييه قلت طيب مدري وشلون ارد بزر قالت العجوز قل الله يحييك يبوفلان وقلت الله يحييك يبوفلان وقالت قم حب راسه وقوم احب راسه ويقول بعدي ولدي بعدي والعجوز حاطتني مرسال الحب هي تبي شي ونا بزر مدري وهي تهمزني وتهمزني وعودها جالس عندنا في الشمس انا نسيت الوصات ثمن سمعتني في اذني قالت هماي اقولك الا جاء قل وش ها الزين وعلى طول اذكر قلت وشها الزين يم فلان اليوم وش زينك وهي تحقرص وقالت وشو زينه ونا امك تبي ذا العود يقول شي تبيه يطري شي وهو مغير يسحب عصاه على اصابع رجله ويتبسم ثمن قال ايه ام فلان زينه من عمرها وكل ماتكبر تزين زود قالت الله يسلم حالك يبوفلان ثمن قال العود قم ونا ابوك جبلي شين اتوسده انا اليوم طايح ويوجعني ظهري وجعن وش كوده يالله اني وصلت الدار من الوجع ههههههههههههه
يبي يفك روحه ههههههههههههههه هو عرف وشي تبي هههههههههههههه والعجوز يوم سمعت ذالحكي تخم رويحتها وتروح تدخل في المجبب زعله وحسها تحضرم مدري وشي تقول شكلها زعلت وكل شوي اوحيها تكلم وتحنتم على روحها ونا قاعد عند العود في الشمس انا قمت وجبتله شي يتوسده ويوم عطيته اياه وهو يقضب يدي وقالي بشويش وين راحت قلت قاعده في المجبب قال وشي تسوي قلت ماتسوي شي بس تحكي ونا مدري وشي تقول قلت وراها زعلانه قال الشايب هذا شين تبي تعرفه الا كبرتا ان شاء الله وعزالله اني كبرت وعرفته هههههههههههه الله يغمد رويحاتهم الجنه وميمتي وبيي وخيي وجدي ونا ونتم ووالديكم وكل مسلم

سبحان الله العظيم سبحان الله وبي حمده عدد خلقه وزنه عرشه ومداد كلماته

[أبو سيرين]

العم سحاب والأخ تميم

صراحة سواليفكم ما تمل بيض الله وجيهكم

في الأيام الماضية انشغلت فالمعذرة

واصلوا الكل متابع هذه الموضوع الذي يعتبر بالنسبة للكثير هام جداً لأنه يذكرنا بالماضي .

تحيتي وتقديري

ولكم مني أحلى تثبيت وباقة ورد




تحيتي وتقديري

[سحاب شقراء]

هلا ومرحبا يبوسيرين وين الغيبات يالغالي
الحمد لله على السلامه

[تميم بن محمد]

المشاركة الأصلية كتبت بواسطة أبو سيرين

العم سحاب والأخ تميم

صراحة سواليفكم ما تمل بيض الله وجيهكم

في الأيام الماضية انشغلت فالمعذرة

واصلوا الكل متابع هذه الموضوع الذي يعتبر بالنسبة للكثير هام جداً لأنه يذكرنا بالماضي .

تحيتي وتقديري

ولكم مني أحلى تثبيت وباقة ورد




تحيتي وتقديري

المشرف الفاض ابو سيرين
المثل يقول البخيل من بخل بجاهه
هذي سوالف زمان و الكل يحن للماضي الجميل و يجب تداولها لكي يعرف البعض ما ضينا الجميل و بساطته
لكن عندي كيبورد ماكل سمسم و غاص و الحرف كود بشاكوش عشان يكتب و حالتي حالة كود اقلبه عشان يطيحن حبات السمسم ولي شهر على هالحال صاير زول ههه
لكن ابشر بعزك.صحيح مشغول مع الفيلا الجديدة لكن بحاول اسرق بعض الوقت لكم

[تميم بن محمد]

يا سحاب ترى الواتس اب مجاني و رقمي عندك له شهرين خلنا نتواصل واتس اب عشان فيه سوالف ما تصلح بالعام يعني خذ و خل وان بغيت شطة و كتشب

[سحاب شقراء]

[align=center]هلا بالغالين ومرحبا

انتم خابرين منول كل بيت فيه بقره لانها هي السوبرماركت
كلش منها الحليب واللبن والزبد والروب او الزبادي
المهم عندنا بقره جرسيه ههههههههههه ذيك الي تجي وش كبرها بس رجلينها صغيرات
والمهم بعد انها غثتنا تثاغي طول الليل ماخلتنا نرقد
ونتم خابرين وشي تبي جزر بلا جزر مار ماعندها في احد الا بغت الثور
وهي تثاغي مثل الي تقول ودوني لبونا ودوني لبونا تقصد الثور

قالي ابوي ياملا الفردوس يالله ياسحاب نبي نربط البقره ونوديها للثور عاد بقر شقراء كلهن رجلهن ثور في مزرعه اسمها الحميضيه جنب البيوت مهيب بعيده
ويربطها ابوي بحبل يجي له خمسه امتار او اكثر وبوي يقولي جودها ونا ابوك لياها تنطلق وقوم من زود الحرص وربط الحبل في يدي كله اخاف انها تنحاش

انتم تسمعون بشوط البقره ههههههههههههههههه
وهي تصير مربوطه طول السنه ولا انطلقت من رباطها اللهم عافنا تنطلق وهي رافعه ذنبها بسرع شي
ويوم فتح ابوي الباب حق الحوش ونحن نبي نزف البقره مثل العروس
وهي شافت الباب مفتوح ولا ماشافته وهي تنطلق ونا وراها اصلن الحبل مربوط في يدي وين ابا اروح ونا عاد عصقول يعني نحيف وهي الي تجرجرني ونا على بطني وغبرتي واصله السماء
وبوي يركض وراي وكل من شافني يركض وراي ونا صاير كني ثوب مافيه احد يعني قماش بس
وتزلطت سيقان سلوا هههههههه اعاني روحي
وتقطع ثوبي كله مني ولا وشوله اسوي عنتر عند ابوي وربط الحبل في يدي
وفي الاخير ونا بين الحيات والموت مسكوها رجال ويوم خذت نص ساعه وياصلني ابوي وهو يقولي عساك سالم قلت لا انا سحاب
وش سالم سالم تبن بوجه العدو حتا في راسي فلقه ويصب الدم [/align]

[الركام]

موضوع مميز وسوالف شيقة واسلوب فيه ابداع
جزاك الله خير ياسحاب شقراء
ومشكور على طرح هذا الموضوع
واصل ونحن معك متابعين