قصيدة رثاء في مزن البرد غفر الله له

[وادي الرماديه]

هذه محاولة متواضعه مني لكتابة قصيدة في رثاء اخي المتوفى ابو خالد (مزن البرد) رحمه الله تعالى واسكنه فسيح جناته , وارجو معذرتي ان شاب القصيده بعض النقص او الضعف فهي المحاولة الاولى لي في كتابة هذا النوع من الشعر

يالله ياللي لجلك نحج ونصوم
ياواحدٍ نرجيه ليل ونهاري

تغفر لمنهو مات والاجل محتوم
وماقدر المعبود للعبد جاري

مات وتوارى واعلن غيابه اليوم
وامسى على قبره تهب الذواري

غاب وترك في القلب حسرات وهموم
والموت لِشّعُور البشر ما يداري

ومن فقد ابوخالد جفا عيني النوم
هول المصيبة حار فيه افتكاري

مرحوم ياراع المواجيب مرحوم
راح وترك خلفه ضعوف صغاري

يا حيسفي ياخوي ياخيرة القوم
للمرجله ذكراك تبقى شعاري

للضيف عز وللمهمات شغموم
وللجار والاقراب نعم المزاري

خدم بلاده في الحرس وقت معلوم
ومن دون بيت الله داس المحاري

وفي المنتدى كون صداقات وعلوم
مسيرة ابداعات ياهل البراري

وما جاه من ربه مقدر ومقسوم
وعسى له الجنه مقام وداري