المتابعة اليومية لأخبار الطقس والتوقعات من (1- 7/ 1/ 2014 م )

[هنا القريات]

جعل السحاب اللي مقاديمه بروق // يمطر على نجد وعموم الجزيرة
يمطر على دار المطاليق من فوق // وبلٍ من الوسمي سيوله غزيرة

وتنبت نفود العرق والخافق يتوق // لشوف البراري والغيوم المطيرة
يا ما حلا في كل ريعٍ وزملوق // العشب الاخضر والزهور النظيرة

وياما حلا الفنجال في حزة شروق // وجمر الغضى حوله دلالٍ كثيرة
وياما حلا يا اهل الوفا شوفة النوق // بين الزهر حيرانها مستديرة

والسيل يجري بين سابق ومسبوق // ياما حلا شوفه وما ازين مسيرة
وطير السعد غنى على كل طاروق // يجذب خفوق اهل الوجيه السفيرة

وصوت ام سالم تجذب الصوت وتسوق // اعذب لحون العشق في كل ديرة
العشق يبقى بين عاشق ومعشوق // عيني لشوف البر شفقة واسيرة

فكر المولع ينتشي حيل ويروق // هجوس صقارٍ تفاخر بطيره
ذيك الديار اللي بها الزين والذوق // باشعاري وعذب القصايد جديرة

قلبي شفوق وله ملازيم وحقوق // حقٍ علي ان اطربه واستشيره
هذا مناي وكل نفسٍ لها ذوق // يالله عسى في الامر خيرٍ وخيره

جعل السحاب اللي رقى بالسما فوق // يسقي ديار اهل الوجيه السفيرة

الشاعر جعفر بن هادي القحطاني