من مطبخي/ حياكم على سمك مشوي

[سراب]

السلام عليكم ورحمة الله وبركاته

كيف احوالكم يالغالين
من يومين سويت سمك مشوي بالفرن وقلت لازم تشاركوني الطبخة
وصورتها بالخطوات
مالكم بالطويلة اترككم مع الصور

بداية نوع السمك هامور وزن 3 كيلو
مشوية ومحشية

الطريقة بالصور

نغسل السمكة وننظفها تمام

وبعدين نشطبها بالسكين من الداخل علشان تتشرب التتبيلة

وبعدين نعصر ليمونة ونخلطها بتمر الهند بعد تذويبه وفصين ثوم ونخلطهم بالخلاط

ونصب الخلطة على السمك ونتركها حوالي 10 دقايق

افضل استعمال الملح الصخري (ملح البحر الطبيعي ) ونطحنة يدوي لين ينعم ونحطه عالسمك

نجهز البهارات من الاعلى بزار سمك -فلفل اسود-كمون -ثوم بودرة-كاري ابو سفينة

نخلط البهارات حتى تتجانس

ونتبل فيها السمك

نحط السمكة على شبك الفرن ونخلي بالفرن صينية تحتها بالضبط علشان اللي ينزل منها

نحط السمكة بالفرن ونشغل بس من فوق

في هالوقت على ماتبلش تستوي السمكة نجهز الحشوة وهي عبارة عن
بصل اخضر -فلفل بارد وحار- حبة طماطم -شبنت وبقدونس

وبعد ما نقطعها نجهز تتبيلتها وعبارة عن

ليمون اسود مطحون -ملح-ليمون -زيت زيتون

وهذا شكل الحشوة النهائي

الحين نرجع للسمكة وبعد مرور حوالي 10 دقايق وهي بالفرن نجهز زيت زيتون وفرشاة وندهن فيها سطح السمكة علشان ما تنشف بالفرن

وبعد ما تحمرت السمكة من الداخل

نحط فيها الحشوة

وبعدين نقفلها

لين يحمر الجنب وبعدين نقلبها عالجنب الثاني لين تتحمر ثم نحطها بصحن التقديم ونزينها وانا جهزت معاها خلطة الثوم بالمايونيز والزبادي وهذا شكلها بعد ما استوت

زوووووووووووم

ويا حلاتها مع خبز الصاج او خبز التنور وانا ماكان عندي غير الصاج

وصحة وعافية على الجميع
ولوكانت على فحم بتكون الذ
وهالوزن من السمك يكفي لحوالي 5 اشخاص

اتمنى تكون عجبتكم