جروحك

[غيم الطايف]

حبيبي يابعيدٍ عن عيوني في خفوقي دوم
اذا شبت بي الاشواق قل لي كيف اهجدها
يجيني ناس وتمشي ناس وانا بك هايمٍ مهموم
ولاجت حزة الهجعه يجيني ماينكدها
دخيلك طمن عيوني ترا مانمت من كم يوم
عساك اشوا عسى ياليت كلماتٍ ارددها
حبيبي ليتك الطيب حبيبي ليتي المسقوم
يكن عروق قلبي لين صحته موس قددها
حبيبي جمع جروحك وارسلها علي سهوم
ابي امشي حياض الموت ونفسي عنك اوردها
سقى الله يومك الطيب يااطيب طيب المعلوم
سقى الله بسمتك ووصوفك اللي من يعددها
لك الله لامحي البسمه من شفافي ولو جا لوم
واخلي دمعتي بالخد اذا جفت اجددها
واذا طبتي عهد مني لاخيط من القصيد غيوم
مطرها كل كلمة حب ابمطرها والبدها
واجمع بسمة الماضي وارجع زينك المرسوم
واصيغ من الفرح حله عسى احزانك تبددها
واغني لك بحور الشعر اغاني ماحواها البوم
واخلي الجن قبل الانس في حفلك ترددها


ناصر الزير