والله مانسى نظرتك يوم قفيت.......

[نديم المجره]

والله مانسى نظرتك يـوم قـفيـت = إليـن تنسـى كـل امٍ ضـنـاهـا

لو شفتني من نظرتك كيف سويت = والله إن تمنى قبل هذا عماها

حسبي عليك ارسلتها ماتـوانيت = احرقت قلبي وسط حامي لضاهـا

فـجـرتها بالـقـلب مـثـل الدنامـيـت = الله واكـبـر كيـف قـلـبـي قــواهـا

والرِجل كنك ناثرٍ حدرها الزيـت = الرِجـل عيـت لا تثبِت اخـطاهـا

النظرة اللي في مداهـا تهقويـت = عدت على الهقوات قـوة مداهـا

والمشكله لا ابديت فيها ولا اخفيت = عجزت احدد يالغضي محتواهـا

وراك من بين المخاليـق لديـت = دمرت قلبٍ سالـيٍ عن هواهـا

ياليتني عن نظرة العين صديـت = ياليت ربـي فكنـي من بلاهـا

وانا الذي عن مارد البيض كفيت = رميت دلوي والرشا من وراهـا

استغفرالله والي العرش والبيت = من نظرةٍ بان الخلل من رداهـا

الحمد لله كل ماصبحت وامسيت = نفسي عن دروب الرذيله حماها

احمد بن عبدالرحمن العريفي
(نديم المجره)