قالوا حكوبك قلت وش هم يقولون

[فتى الرابيه]

من نوادر الشاعر مرشد البذال - رحمه الله


قالوا حكوبك قلت وش هم يقولون
وش قيل فينا يالوجيه الفليحه
شوفوا مرد الهرج وش هم يطرون
حتى نعرف مزوره من صحيحه
كان الكلام من المعادي على هون
بعض المسبه بالمجالس مديحه
تجيه عربان(ن)من الله يخافون
عن الظليمه ينصحونه نصيحه
لوكل خلق الله على الحق يمشون
كان النفوس من الخطى مستريحه
كم واحد(ن) بعروض الاجواد مفتون
وهو اسلومه يفضحنه فضيحه
وكم واحد(ن)يطعن وهوفيه مطعون
يذم ريح الناس والشين ريحه
بعض كلام الناس تهمات وضنون
قول(ن) تنميه الوجيه الوقيحه
والظلم لوفازوا هله مايدومون
راع الظليمه لاتباطى مطيحه
والناس هذي الناس من عصر ذالنون
كل(ن)على دربه ركابه مشيحه
مقروديامن بدل اللون باللون
بعض الكلام يحرفه عن صحيحه
والصدق هو والكذب ماهو بمقرون
كان انها تدرس بلهجه فصيحه
مايمدح الرجال بالشكل واللون
ابحث معه لينك اتعرف القريحه
تراك تعرف عنه وانتم تهرجون
يبينلك من كل جود(ن) نضيحه
المستريح اللي من الشك مامون
مع كل خلق الله علومه مليحه
كم واحد(ن)حي(ن)له الناس يثنون
واليا توفى قالوا الله يبيحه
وكم واحد لوهو بالاحاد مدفون
ذكراه عند الناس بيضا صفيحه
وكم واحد يجمع ملايين وخزون
مال(ن)تنميه اليدين الشحيحه
لاتشكره رملى ولافك مديون
ولاحل مشكلة النطيح ونطيحه
ولاله على جاره من الفضل ماعون
لوان جيرانه تشوف الذبيحه
وكم واحد جيران بيته يحمدون
للجار ريف وللجماعه منيحه
وكم واحد من المعادي يخافون
زبن المخيف اللي كثير(ن) فحيحه
ربعه نهارالضيق فيه يتذرون
لاجا نهار(ن)فيه لجه وصيحه
وبعض الرجال ابهم شريفين وعفون
كلن على ماقال يرجع لكيحه
وبعض الرجال بضحكهم يستغلون
يجيبها من نوع زلقه بطيحه
هذاك بين له من الهرج مدفون
خله الياشافك يزين سميحه
الهرج له نقال والرد للشون
مزح الجزع يثر بكبدك جريحه
هذا وانا ماني من الناس ملسون
لاشك ارفض من تزايد جميحه
قلته وكل الناس غيري يقولون
راع الظليمه لاتبطا مطيحه
--------
تقبلوا تحياتي