كبسة دجاج بالقصدير (لما تفك ماحتسك ) بإختصار بنتسى الرجيم :)

[اواكس]

السلام عليكم ورحمة الله وبركاته

الله يصبحكم / يمسيكم بالخيروالرضا والعافية

اليوم طال عمركم راح نعرف وش لون نظبط لنا كبسة قصدير بكل سهولة وبأقل مجهود وتعرفون الايام هذي ومع البرد ماودك تتعشى وتقوم تغسل الصحون والقدور وتتيبس يدينك مع هالبرد وخاصة انك بتحس بشبه إغماء بعد ماتضرب في الكبسة لدرجة ان ودك احد ياخذ يدينك ويغسلها لك بعد

الطريقة سهلة والنتائج فتاكة ومدمرة

المكونات

1-صحون قصدير مثل اللي تقدم بمطاعم المثلوثه
وتحصلونها بأي سوبرماركت كبير وخاصة بمحلات طريق الثمامة
الحبة بريالين ولايلعبون عليكم ويقولون لكم بأربعة ريال

2-لفة قصدير عادي

3حبات دجاج (600)ج + رز (ابو كاس)

بصل + صلصة طماطم + ثوم + فلفل رومي + بطاطس

بهارات + هيل مطحون + ورق غار + ليمون أسود

الطريقة

ناخذ صلصة الطماطم وندهن بها الصحن او حسب الرغبة للي يحبون الطماطم يكون مقطع وكلن ورغبته

نحط البصل والثوم ونوزعه على كامل الصحن وكمية البصل والثوم تعتمد على حبك لهم

طبعا ننقع الرز ونصفيه ونبدأ نفرشه فوق البصل والثوم بالطريقة التالية

وبعدها نضيف البطاطس والفلفل او أي نوع من الخضار تحب

وبعدها نحط الدجاج

والحين نبهر الدجاج ونضربه وجه هيل مطحون مع كم حبة فلفل أسود

وبعدها نضيف ماتبقى من البصل مع ورق الغار

بعد مانخلص كل شي نصب عليه مويه مغليه فوق الدجاج عشان تنزل شوي من البهارات مع الرز الين تحس المويه على نفس مستوى الرز وتداخل الرز مع الماء

الحين دور تغليف الصحن بلفة القصدير واقفاله بإحكام مثل اللي بالصوره

ونحطه على الجمر

كمية الجمر فوق القصدير تعتمد على كيف تبي الدجاج محمر او نص تحمير

ونخليه لمدة ساعة وربع

وخلال هالفترة تقهوى وعين من الله خير

والان نشيله من على الجمر وننظف القصدير من فوق

الان جاء دور انكم تكلمون احد يمر اي محل مثلوثة يجيب لكم عشا معه

لان الأكل احترق

ههههههههههههههههههههه

لا أمزح

بسم الله ماشاء الله وبالعافية ومحل مايسري يمري

الله يوفقكم جميع