العنوان : الليل يا خالد الشاعر : محمد الأحمد السديري .. يقول :

[ذيب النفود]

العنوان : الليل يا خالد
الشاعر : محمد الأحمد السديري ..

يقول :

إن صار زود المال بيدين الانذال=== حنّا من المعروف تندا يدينا

وان كانهم شرهوا على طيب الافعال===حنّا وردنا جمامها وارتوينا

وان فكّروا للجود يمشون رحّال===حنّا قبل يمشون يّمه خطينا

يا ما لبسنا للشرف كل سربال===وعلى البسيطة للفضيلة مشينا

في دوحة العربا لنا مجد وظلال===وحنّا على در المكارم غذينا

لو نجمع اللي فات منا من المال===إن كان شيدنا القصور وبنينا

نعطي ولا نتبع عطانا بالاقوال===ونبذل ونسكت كننا ما عطينا

وان باعوا الشيمة بدينار وريال===حنا دخلنا سوقها واشترينا

نطلع لها لو هي على روس الاقذال===لو هو عسير ٍ دربها ما انثنينا

بافعالنا نرسم دروب ٍ للاجيال===إلي نساها غيرنا ما نسينا

أسود سادات ٍ تسجل للاشبال===فضايل ٍ شمنا لها واهتدينا

بيض ٍ نسجلهن جديدات وسمال===حفايظ ٍ لاحفادنا اللاحقينا

نصبر على الشّدات لو شيلنا مال===لو سال دم دفوفنا ما شكينا

نخاف يلقى سدنا كل ختّال===ويبني هزيلات المعاني علينا

الليل يا خالد على والدك طال===وهنّيت ناس ٍ بالكرا نايمينا

يا عز راسي شفت ما خبث البال===شي ٍ يهوّل شيّب الجاهلينا

شي ٍ من اسبابه يشيب بالاطفال===فطّر خشوم مهجرعات الحنينا

أدير قالات ٍ عريضات وطوال===قالات خلنّ المخفىّ يبينا

منهن رزين العقل بالوقت يهتال===بوقت ٍ عبوس ٍ فطّن الغافلينا

وقت ٍ من اسبابه شكى كل ريبال===نصبر ونسكت كننا غايبينا

الناس بالأيام راحل ونّزال===تفجعهم الدنيا وهم دالهينا

وحيات رب ٍ نزل آيات الانفال===عالم خفايا نية الحاقدينا

ما اترك طريق العدل في كل الاحوال===لو يرحل المريخ للفرقدينا