ليه السكوت ومنطقك شهد وأطعم ،،، يمطر على كبدي .. برد من فراتك

[رذاذ]

،،،،،،،
،،،

يا مشرق افراحي .. ويا مغرب الهم
************ خذني كلام وبعثره في سكاتك

ما طيق صمتك سم .. وان قلت لي سم
************ كلمه تبعــثرني بالاربع جهــاتك

ليه السكوت ومنطقك شهد وأطعم
************ يمطر على كبدي .. برد من فراتك

كانه تغلّي .. يا غلا روحي إرحم
************ موتي دنا .. لا فرّح الله وشــاتك

وانه زعل فرقا عليَّ ترحّم
************ وِاقرأ عليَّ الفاتـحه في صلاتك

عاشق .. واحسّك .. في شراييني الدّم
************ والقلب دقّــاته .. تدفّـــق غلاتـك

على هوى كيفك يِكيّف ويغتمّ
************ مشاعـري من وين ما جيت جاتك

إن تبتسم حتى .. جروحي تبّسم
************ واموت لو دمعــه .. تكدّر صَفَــاتك

وان صحت لك مشتاق .. دمعي تكلم
************ ويقول خَلّ العـين تحكـــي شكاتــك

طبعك اذا عاتبت خِلّـكْ تِلعثَم
************ ماادري معه .. وشلون تقضي حياتك

هذا كلام الدّمع والخافي أعظم
************ ما حد مسوّي .. في حياتي سَواتك

لا تلومني والحُسن في حُسنك إلتم
************* جتني على ذوقي .. وصايف حلاتك

الليل من رمشك سواده تلثّم
************* والصّبــح وجهه مكتسي من بهاتك

والزهر يستنشق من انفاسك الشّم
************* والورد إلاّ الشوك .. خالف سماتك

والشوك ماهو عيب في الورد يِنْذَم
************* لكنّــك منــزّه وكامــــل صفـــاتك ...

وكانك تريد تشوف من وصفي اعظم
************ شف نفسك بعيني وشوف ايش فاتك

يمكن تصدّق كم انا فيك مغرم
************ وتصدق ان عينك لقلبي عَصَــاتك

فيها سِحر هاروت من غير طلسم
************ وفيها دوا من غير تنطق شفــاتك

هيّا إرقني .. من قبل لا اموت تندم
************ ترا القصاص أحيــان تأنيب ذاتك
،،،،،
،،،


مما رآق لي
للشاعر الأستاذ / عبدالله صالح العمري