اليوم ياعيني علامك ترفين

[فتى الرابيه]

اليـوم يـا عينـي علامـك ترفيـن = ولا نتي على العادة بنثر الدموعـي
أما يبي يلفيك علمـن مـا هوزيـن = وإلا اتذكر ما غدى مـن اربوعـي
يا كثر ما نذكر من النـاس غاليـن = حدر الثرى ما عاد فيهـم رجوعـي
راحو مراحن منه مـا هـم ملفيـن = وصارت منازلهم عذابـن للشوعـي
الله على وقتن مضي مثـل هالحيـن = ابعد علي اليوم مـن حـب كوعـي
إليـا ذكرتـه والمخاليـق غافـيـن = جريت ما يفتـح مفالـج اضلوعـي
يوم أن وقتي مقبلن يا أدعـج العيـن = عروس عشق ومعجبتهـا الدفوعـي
واليوم وقتي صـار بيـن اليهاهيـن = إليا طاب لي يومن خبث لي اسبوعي
دنيا نبـي منهـا عـدال الموازيـن = وتميل لوني في خطاهـا جزوعـي
تضحك لنـاس بالفـرح مستمريـن = وناسن تجيهـم بالكـدر والفجوعـي
وصارت بها سود المقانـع شياهيـن = وفحولهـا صـار اتبـوع التبوعـي
----------------------------
الشاعرالكبير - صقر النصافي رحمه الله