لازانيا >>أخت مبارك<<

أخت مبارك · 2010-03-15, 09:36 PM

اليوم جبت لكم اللزانيا على طريقتي ومتأكدة بتعجبكم ان شاء الله لانها سهله وخفيفة
سويتها اليوم بالدجاج لان اخر مره سويتها باللحم والليوم طلبوها مني اسويها بالدياي وطلعت صراحه
فضيعه ماشاء الله وهذي المقادير
المقادير
2 صدر دجاج كبير مفروم
بصلة مفرومة متوسطة
جزرة كبيره مقطعة صغار
3 فصوص ثوم مفرومين
ملح ملعقة شاي ونص
ملعقة شاي فلفل اسود
4 طماطات مطحونين بالخلاط
كزبرة مفرومة
فلفل اخضر رومي مفروم نص حبة اذا كبير
وحبة كامله اذا صغيره
فنيال كاتشب عشان يعطي مذاق حلو خفيف وطعم اطيب جربوها ماراح تندمون
ونص علبة صلصة طماط السعودية
علبة وحدة فقط لازانيا
مقادير البشاميل:
نص كوب طحين فاخر
نص كوب حليب بودرة
4 اكواب ماء
ملح وفلفل اسود
ربع زبدة
اخر شي نرش الوجه بجبن موزاريلا مبشور

والحين نجي لصور المقادير

احين نحمس البصل بالزيت ونحط الثوم ولين ياخذ لون شوي
ونضيف الملح والفلفل ونقلب شوي
عقب نضيف الدياي والجزر و نقلب

وبعد عشر دقايق نضيف الطماط المطحون ونقلب
ونضيف الكاتشب والمعجون طماطم السعودية

وهذا شكله بعد مانحط عليه الصلصات وونضيف احين
الكزبرة الخضرا والفلفل الرومي عشان يعطي نكهة اطيب

وحق المس بشاميلو هذي هي المقادير

وهذي البشاميلو جهزت نبيها شوي سائله مو وايد جامدة

والحين نحط شوي بشاميلو بالصينية لازم ونرص قطع اللزانيا من غير سلق معليش
معليش لاتخافون بتنضج بس اهم شي تخلونها بالفرن تقريبا 40 دقيقة على نار وسط

نضيف عليهم صوص الدجاج وعقبه شوي بشاميلو بهالشكل

ونكمل الصفات الباقيه وقبل مانحط البشميل على اخر صفه فوق ناخذ نص كوب ماء نصبه
على جوانب الطبق ولو تركزون شوي وتدققون بتشوفون حوالين الطبق في ماء و عقب نحط بشاميلو وجبن موزاريلا مبشور على الوجه ونغطيه
بقصدير وندخله الفرن على نار وسط مدة 40 دقيقة فقط وعقب نكشف القصدير ونخليه يتحمر من فوق شوي

والريحه صراحة كانت شي لايوصف خيالي حتى الشبعان وده يرجع ياكل
ونصيحة لاتقطعونها وهي حاره طلعوها من الفرن
خلوها تبرد ساعه وبعدين قطعوها
خاصة لو كانت عندكم عزايم وتبون تقدمونها للناس بشكل مرتب
وسلامتكم ولاتنسوني بدعائكم