خويي بالبر عالة لايجمع حصى ولا يحذف حصى

[ابو البر]

وش السوات اذا صار خويك بالبر
او اخوياك ما يشاركون في نجاح طلعت بر
من ناحية المشاركه في امور الطلعه .

سؤال يا جماعه وترا وسعة الصدر على خوي ما يشارك ممكن تكون مره او مرتين او ثلاث
ولاكن انك تطلع انت وياه وكنك طالع توسع صدره وتطبخ له وهو جالس كنه حصاه .

شي مستحيل
وبعدين لايمكن انك تفقد صداقة صاحبك بسبب مثل هاذا السبب .

لاتقولون الآجابه سهله .

ابدا ماهي سهله .

عطونا راي.

[ام الدانه]

التعاون بالبر والرحلات شيء جميل ويصفي النفوس

[ابو البر]

المشاركة الأصلية كتبت بواسطة ام الدانه

التعاون بالبر والرحلات شيء جميل ويصفي النفوس

شكرا لمشاركتك يا أم الدانه
بس انا كتبت الموضوع لآن فيه ناس يا بنت الحلال اخر شي يعرفهبالبر هوالآنصاف .

رغم ان علاقتي به طول الآيام والسنين اشوفها كويسه وعاديه
بس بالبر ينقلب جحلطي هههههه ما أدري ليه .

اكرر شكري .

[ابو ديمة]

أصلا حلاة الرحلة بالتعاون بكل شي
انت حاول إنك تشركة بالعمل مثل انك تطلب منه أنه يقطع البصل إلين تخلص من تقطيع اللحم أو إنه يصلح القهوة إلين تذبح الذيبحة ومن ها الامور وأنا اخوك
وإذا بغيت تطلع في المرة الجاية سجلني خوي وأبشر بسعدك

[ابو البر]

المشاركة الأصلية كتبت بواسطة ابو ديمة

أصلا حلاة الرحلة بالتعاون بكل شي

انت حاول إنك تشركة بالعمل مثل انك تطلب منه أنه يقطع البصل إلين تخلص من تقطيع اللحم أو إنه يصلح القهوة إلين تذبح الذيبحة ومن ها الامور وأنا اخوك

وإذا بغيت تطلع في المرة الجاية سجلني خوي وأبشر بسعدك

يا ليتها يا بو ديمه على التقطيع والطبخ
اللي يضايقني اكثر انه غير منظم
يعني بقولك مثال

بقايا الآكل قشر الفواكه او الشراب البلاستيك يرميه ويقول هاذا بر
وحنا نبي نجمعه في اكياس .
يقوم قبلنا الصبح ولا يصحينا للصلاة لآن نوم بعضنا ثقيل .

لآنه ينام بدري يجبرنا نسوي العشاء بدري وحنا نبي نسهر الى عشر واحدعش.

بعضنا ما يشرب قهوه ويحب الآعشاب فهو يسوي الدله اول يوم ولا يغسلها الين حنا نكمل مشوار تجهيزها له اليوم الثاني .
فيه ثغرات با أجابتي ولاكن ودي اخلي الموضوع شكوا من حالات نمر فيها جميعا .

[برق الشتاء]

الله يهيدك أخوي
ليش انت مصعب الأمر
بكل بساطة أتركه وأمشي عنه <<< أفضل حل عندي
ولا ليش احنا طالعين البر
دام بيقعد زيه زي الحصا

[ابو البر]

المشاركة الأصلية كتبت بواسطة برق الشتاء

الله يهيدك أخوي

ليش انت مصعب الأمر
بكل بساطة أتركه وأمشي عنه <<< أفضل حل عندي
ولا ليش احنا طالعين البر

دام بيقعد زيه زي الحصا

بقولك شي يا برق
هو مسجل بمنتدى البراري ولا يدري عني
وعساها توصل الرساله عدل .....ولا
با اخذ بنصيحتك على مضض

وش مضض ذي
من وين طلعت لي هههههه.


تحياتي لك .

[دندشه]

المشاركة الأصلية كتبت بواسطة ابو البر

وش السوات اذا صار خويك بالبر
او اخوياك ما يشاركون في نجاح طلعت بر
من ناحية المشاركه في امور الطلعه .

سؤال يا جماعه وترا وسعة الصدر على خوي ما يشارك ممكن تكون مره او مرتين او ثلاث
ولاكن انك تطلع انت وياه وكنك طالع توسع صدره وتطبخ له وهو جالس كنه حصاه .
شي مستحيل
وبعدين لايمكن انك تفقد صداقة صاحبك بسبب مثل هاذا السبب .

وسع صدرك اخيي ودام الرجال ما ودك تفقده بكود عليه ويعرف قيمك ويخجل من نفسه

لاتقولون الآجابه سهله .

ابدا ماهي سهله .

عطونا راي.

المشاركة الأصلية كتبت بواسطة ابو البر

شكرا لمشاركتك يا أم الدانه
بس انا كتبت الموضوع لآن فيه ناس يا بنت الحلال اخر شي يعرفهبالبر هوالآنصاف .

رغم ان علاقتي به طول الآيام والسنين اشوفها كويسه وعاديه
بس بالبر ينقلب جحلطي هههههه ما أدري ليه .

هذا اتكالي ويحب نفسه

اجتمعوا مع بعض لكم يوم وخلوه معكم واتفقوا على مكشات منا ولا منا

واطرشوا ولا تشيلونه واذا تبالش يبي يتصل يسأل عطها اياه كاتش

لقه انك كذا وكذا وكذا ........وخنا والله ملينا من فعايلك

وعلموه ان خوة الرجال شرواكم تنشرى

اكرر شكري .

المشاركة الأصلية كتبت بواسطة ابو البر

يا ليتها يا بو ديمه على التقطيع والطبخ
اللي يضايقني اكثر انه غير منظم
يعني بقولك مثال

بقايا الآكل قشر الفواكه او الشراب البلاستيك يرميه ويقول هاذا بر
وحنا نبي نجمعه في اكياس .

سو فيه مقلب واجمع اللي هو يرجم وحطها في سيارته او عند بابا بيته وكررمعه هالمعامله لاين يعرف معني النظافه مع كلمات طيبه وتوعويه

يقوم قبلنا الصبح ولا يصحينا للصلاة لآن نوم بعضنا ثقيل .

في هذي ماله حق ابد الا انه يخاف يكفخ من احد اذا صحاه فذكره بانها في ذمته

لآنه ينام بدري يجبرنا نسوي العشاء بدري وحنا نبي نسهر الى عشر واحدعش.

بعضنا ما يشرب قهوه ويحب الآعشاب فهو يسوي الدله اول يوم ولا يغسلها الين حنا نكمل مشوار تجهيزها له اليوم الثاني .

في هذي لا تسويله قهوه خله يزينها بنفسه واذا بغها مره ثانيه لا تغسل له الدله خله يغسلها بنفسه او كيفه المهم لا تغسلونها له ابد

فيه ثغرات با أجابتي ولاكن ودي اخلي الموضوع شكوا من حالات نمر فيها جميعا .

في النهايه اتمنى ان اكون قدمت لك المفيد

فحتسب الاجر من الله في اصلاح حال هذا المسكين

والله يسهل المرك معه

موفق اخوي

وتقبل مروري وتعليقاتي

دندشه

[ندى الورد]

الله يعينك أبو البر على ما بلاك فعلاً بلوى
أنا أشوف أنا كل واحد فيه يوم من ناحيه الطبخ وتنظيف الأواني والباقين يتوزعون
تنظيف المكان والصيد اذا فيه مقناص في رآى هذا انسب حل عشان ما يطبخ وأنتم تغلسون
أما عن الصلاه فما يجوز له يصلى وأنتم نائمين واين الجماعه الله يهديه

[ابو البر]

المشاركة الأصلية كتبت بواسطة قطر الندى

الله يعينك أبو البر على ما بلاك فعلاً بلوى
أنا أشوف أنا كل واحد فيه يوم من ناحيه الطبخ وتنظيف الأواني والباقين يتوزعون
تنظيف المكان والصيد اذا فيه مقناص في رآى هذا انسب حل عشان ما يطبخ وأنتم تغلسون
أما عن الصلاه فما يجوز له يصلى وأنتم نائمين واين الجماعه الله يهديه

يصادف انا نطلع ثلاثه او اربعه فقط بدون قنص
وفي هاذي الحاله تتسهل الآمور وتتنظم ولو ان الشكوى منه قائمه ولاكن تخف شوي .


المشكله تصير اكبر اذا انا انحديت على طلعت بر حسب ظروفي وفي نفس الوقت انحد عليه .
يعني تتوافق ظروفنا على البحث عن الهدؤ.
ولو يومين في الشهر .

ونسيت اقول ايجابياته بصراحه 1- في القطه اول واحد دفيع ولا يماطل .
2- سوالفه تشرح الصدر بجد .
3- ما فيه شي ما يعرف يصلحه ماطوركهرب او سياره او حتى البنادق.
المشكله فقط في انه ما يشارك في شي من ناحية التنظيم والتعاون يعني ( ثلجه).
وتقبل تحياتي .