.... (( شح الأياام ) ....

[بقآيآ .. حرف]

عن(شح الايام)..لاتنشد قديم الشعور
قدام تسمع جوابي..من حروف اليباس
كذبة وعدّت كتبها الهم بين السطور
تشبه كثير…لحكايات السهر والنعاس
من سبّق العذر ما حسّب لضيق الصدور
ومن سبّب الجرح ما دور عفو والتماس
كذبة وصارت وطن ولها بصدري جذور
صنعت منها عمر قادم..وحطيت ساس
ولفتها..يوم كنت أعشق وقلبي غيور
يوم إني اسمعه واشوفه بكل الحواس
في وقتها..كنت راضي وأقبل بأي دور
إنسـان طيب ويحتـاج ل شـوية حماس
كنت اكره الانتظار وكـان دمـي يفور
كنت اكره الخوف لكن كنت خايف وحاس
إنْ قلت بامرها يعني مجرد مرور
في ليلة بردها ما يحتويه اللباس
يمرني طيفها ظلما ولا فيه نـور
نفس الألم في تفاصيله..ونفس المقاس
لو حصّل الصبح من كفه طريق العبور
ما مات في قيده الموحش ولا جاه باس
ما دامني من هواه أجمع فتات وكسور
بكسر يدين الظما قبل اكسره كاس كاس
قبل التفت له..ويذبحني بنظرة غرور
قبل انكسر من تعب قلبي بلحظات ياس
غمض عيونك..وسافر مثل كل الطيور
ولا تجيني..وتنشدنـي على أي اسـاس
سافر وتبقى ليالينا تلف وتدور
ناسٍ شكت هَم وتعافت من الهم نـاس
هذا غيابي.. له أسباب وحضوري حضور
روّحـت مرفوع راس وجيت مرفوع راس

شعر- سعود الخزمري