اليوم قلبي مايبي غير فرقاك

[عبدالمحسن الرحمه]

اليوم قلبي مايبي غير فرقاك
أبشر بنفس ن ماتعرف الحسايف
خلك على دربك ونهجك وممشاك
نفسي عزيزة و النوايا نضايف
دور على غيري يحفظك ويرعاك
وانا على وصلك من العام عايف
الي متى تبيني أجلس برجواك
ويش أنت من كثرة تغليك شايف
كان أنت تحسبني مديم أتمناك
هذاك مبطي يوم حنا ولايف
ماتطلبه ياصاحبي قلت لك جاك
فتحت لك في وسط قلبي مضايف
واليوم راح الوقت ماعاد نبغاك
قويت قلبي ياعديم الوصايف
علم ن أقوله ياصلك ويتعداك
على النقا مانيب والله خايف
شرواي ماتلقى ولاقيت شرواك
خذها صريحه مالحقني حسايف
خرجت لك من داخل القلب أبنساك
ركايبي من عقب حبك نكايف
مافيه مخلوق ن يسوي سواياك
عسى يلوفك من عنا الوقت لايف
مسحت حبك ياحبيبي بيمناك
وأول ووضعك ياأدعج العين كايف
اليوم ماتطري على البال ذكراك
نحرت حبك بالسيوف الرهايف
ماعاد لي يازين رغبه بلامك
راسي عن الي عافني دوم نايف