هاذي اخواني في هذا الصرح الشامخ مساجله شعريه بين عمتي شفاها الله وبين ابن العم الذي هو دائما ما يثيرها ويتحداها لكي تظهر شعرها بعد ان اعتزلت وكبرت في السن (هو في المناسبه ابن اخيها وابن للشاعر الكبير عمي سعود الدخيل رحمة الله عليه ) وهو ايضا شاعر يشار له بالّبنَان
(( واعتذر من الجميع فقد سمحت لنفسي بحذف القصيده الاخيره في المساجله وحفظها حتى حين الرجوع اليها ))
في المناسبه هذه المساجله قيلت وعمتي على السرير الابيض بالرياض بعد ما اجرت عمليه تكللت ولله الحمد والمنه بالنجاح وزارها ابن اخيها الشاعر سعد وكان به ريحة طيب دهن عود على مااظن ورفظوا دخوله عليها
فبداء قائلا يخاطب عمتي
قال الذي في سوق الامثال لادش
يصرف جنيهات ً ماهي خردة قــــروش
على صعيبات المعاني له اسوتـــــش
يفره بفكرٍ به العرف منقوش
في راس عسرات المراقي بنى عش
صم الصخر عشه ماهو خوص عشعوش
سيله ليا من هاج قش الحصى قش
مثل القدر مايمنعه كل دنوبوش
طفقٍ ودفقٍ وعمقٍ يبدا أوله طش
وأتلاه يدعي نايف القور ممشوش
هذا وأنا همي على القلب عشعش
من عملية عمتي صرت مربوش
كن البثن من بسرة الكبد ينهش
والا ينوش القلب مع ثومته نوش
ياعمتي جو الزيارة مشوش
والباب دونه صف حراس وجيوش
من جاء يزورك لازم أول يفتش
ياكثر ماقالوا معك ريح حبشوش
مير أصبري ليما بقاز أتروش
ثم أتسبع بالتنــــر تقل مبلوش
أنتي وأنا مثل أطرمٍ صاح لأطرش
دوني ودونك خمسة أبواب والحوش
ياباب كنك بيت جنٍ يوحش
له مدةٍ مامر مع سوقه طروش
ياعمتي قلبك على اللوم يعطش
والماء يلبد صوفك ان صار منفوش
بينت لك عذري وأنا ما أعرف الغش
وأظن زود الكرب هو سبة البوش
وأن ما عذرتي نقلب المدح بك حش
لاصار حكمك ضدنا حكم قرقوش
اللي يجي حدي وثم يتحرش
والله ماخلي به على العظم عرموش
آطا على راس الحنش كل ماوش
كني على المسمار مطراق شاكوش
وأنتي يطيح اللي براسك وينفش
مير اقبلي عذري وجوزي عن الهوش
هذي بيوتي صلبةً مابها هش
وان ماكفن عندي مغطى ومفتوش
ـــــ ردة العمة وضحى الدخيل العواد أطال الله بعمرها تقول ـ
والله من شيٍ تهيض من الجش
لولا ضلوعي لمته كان لاطوش
أحس قلبي بالضماير ينهش
مما جرى كنه مع العرق منتوش
هاض الغرام اللي من الصدر يجهش
باقصى ضميري صار بالصدر مبقوش
أسبابه اللي قام يكذب ويبطش
زود على كذبه شرى الكذب بقروش
قلبك يابو مشعل كثيرن به الغش
ومن لايثمن هرجته صار مغشوش
أخوك جاني حيث قلبه لنا هش
عساه يسلم لي ويسلم له الغوش
ترى المغطى خير ماله يفتش
لاتخفي أسرارك ترى السر مفتوش
وش في قليل الفود يبي ينهش
يبي ينهشني وهو صار منهوش
يسبنا ثمين يقعد يحارش
يشذب من عضوده وبالسب منهوش
يامعسر الطاروق أبا لشكم لش
وخزامٍ بخشمك وأباحوشكم حوش
عندي بحر ماهوب يكمل ولانش
تلعب به الامواج بالصدر ويجوش
يقول أنا فيكم لزومن بعرمش
هو منغلث والا به العقل مربوش
يقول أبا كلكم وأنا باتعيش
وأنا كليته حدر الاضراس مجروش
وكاد أكلته مير بغيت أطرش
لحمه نشب بالحلق والعظم مطشوش
أمسك حدودك ياسعد قبل تبلش
أخاف تبلش ثمن تضيع بالطوش
لولاك ولد أخوي لاقول حر أش
حكم ضميرك لايجي بيينا هوش
آطا على راس الحنش ماتوحش
وآطا على روس الثعابين وأدوش
والديك الى لجلج يقولون له كش
لاكثر اللجة حجر له بعشوش
والله لاصيدك صيدة لوتفرفش
وأني لاحطك بالقفص وأنت مدهوش
نتفت راسك ياسعد نتفت البش
وأنتف شعر راسك وألبسك طربوش
مارضى عليك خلاف مابيك تدهش
وأقول باسم الله عسا مانت مدغوش
الباب مفتوحٍ ومن جالنا دش
اللي يجي يدخل له الزل مفروش
اخوتي واخواني اعذروني لحذف القصيده الرد الثالث فقط لكي لا اطيل عليكم
اخوكم ومحبكم الذئب الرمادي / العواد
بعض المفردات اعرف انها غير مفهومه للبعض ومن اراد ان يسئل عن اي مفرده فانا حاظر وفي الخدمه سوا كان على العام او رساله خاصه
2012-11-05, 11:52 PM
مساجله شعريه بين وضحى الدخيل شفاها الله مع والد العم ابن اخياها
العرض العادي
