وش احسن موتر بالبر ؟؟

[مضيع]

السلام عليكم يا شباب
انا محتار وش اشتري سيارة للبر !!!
اكثر الشباب يقولون عليك بالجيب الشاصي
بس انتم وش رايكم به ؟؟
طيب واذا جزمنا عليه وش اللون برايكم الزين ؟ وش المواصفات الزينه ؟ خليجي ولا سعودي ؟
المهم انا ابي منكم الرد المفيد وشكرا لكم

[أبو خالد]

وعليكم السلام ورحمة الله وبركاته
أولا أخي صلي صلاة الإستخارة
"""""""""""""""""""""""""
أنا ما عندي خبرة في ذي الشغلات ولا كان قلتلك

[عبد الله الحقيل]

وعيكم السلام ورحمة الله وبركاته :

الصراحة كانك منتب راعي حلال ( غنم أو بل ) فتراه ما يصلح لك أبد أبد مركب دمار وما ياخذ الا قشك واذا جا يركب معك أحد يحرجك مع انك دافع عليه هاك العدة
وأنصحك بالجيب الباترول تراه شي شي شي .

[الشيخ]

وأنا الشيخ

أقول أركب مع ربعك وخل عنك السياقة في البر

ووفر على نفسك سيارة

وكانك جازم عل سيارة فعليك بالشروكي (( ترى ابو ناصر أبخص)) الى هو هادي

[معدي المرقاب]

نعم اخوي الشيخ

قم للشروكي وفه التبجيلا

شروكي وبس

[حـاتـم]

هلا أخوي الغالي

شكلك اول مره تطيح فالبر

وماعندك خبره فالجيوب

أخوي الغالي اذا طلعاتك كثيره واكثرها نفود عليك بالباترول

واذا طلعاتك قليله وكل شهرين تطللع مره وفالديره اكثر عليك بالاندكروزر

مع اني انا افضل الباترول في كلا الحالتين

لاني اخف نفس من الاندكروزر


وشكرا

أخوك / حاتم

[منصور المناع]

أخوي مضيع سيارات البر واجد بس حسب نوعية الاستخدام

يعني مثل الشاصي ما يخدم الا اثنين بالكثير ويصير ماغير لتحميل الاغراض والحطب ويوم تكشت تلقاه ما يتحرك من مكانه علشان الماء عليه والاغراض ودايم يربطك بأنك اول من يطلع من ربعك وما غير يدورونك وين انت تعال يالله خل نحمل الاغراض .ولو يجي نقطة مطر بحلت بروحك وين تقعد وانت بعيد بالصمان او الدهناء .

لكن لوكان معك جيب صالون الباب خلفي شنطه كان تلقاك اغراضك مرتبه في الخلف واذا كشت تلقاك مبسوط معك اربعه راكبين والسواليف زينه والى وقفت صفيت اغراضك على باب الشنطه والى جاء النوم ما يحتاج خيمه والا ازعاج سدح المراتب وتصير تقل بفندق واذا جاء التمشي تلقاكم اربعه او خمسه تمشون ومبسوطين مشاء الله الي يشوفكم يقول جالسين بديوانيه .وبعدين تراه يأخذ اغراض واجد بالخلف مثل الماء والحطب والعزبه كامله يعني يشيل اغراض خمسه سته بالراحه والحطب تقدر تحطه فوق وتقدر تركب له توانك حتى يشيل ماء حق خمسة ايام على الاقل .اسأل مجرب تراه سيارة بر صيف وشتاء

مقتبس بتصرف

[هاوي بر]

اقول غير الهيلكس والربع


لا دور

ــــــــــــــــــــــــــــ

[عبدالهادي المفرج التميمي]

معد اقدر اقووووول شي

وكل واحد يقول اللي هو مجربه

انا ما جربت الباتروووووول ولا الاندكرووزر

لكن الشروكي حطه على يمناك وبس

مشكووووووووووور




سلام

[عزيز]

اهم شي يالغالي السواق
البدوي يلاحق حلاله بددسن حوض بدون دبل وما عمره غرز