مما راق لي / قصيدة بعض البشر ....... أخوكم المحب / الوااا(بالله)اااثق

[الوااا(بالله)اااثق]

بعض البشر لا قال كلمه سمعناه
وبعض البشر ما نسمعه لو ينادي

وبعض البشر لو غاب لحظه فقدناه
وبعض البشر لو غابت سنين عادي

وبعض البشر لا راح عنّا لحقناه
لو بينا وبينه ثمانين وادي

وبعض البشر لو ما قعدت انت واياه
ان قلت : وينك ؟ قال : بين الايادي

وبعض البشر في ساعة الفود نلقاه
وبعض البشر لا فادنا ولا استفادي

وبعض البشر مركى هل الطيب مركاه
وبعض البشر مركاه بين النوادي

وبعض البشر دايم على الخير مسعاه
وبعض البشر مسعاه خبص العبادي

وبعض البشر ما يندرى وين ممشاه
مثل الفحل لا صار وقت الهدادي

وبعض البشر واللـــه لو يسرح بشاه
الا يغدي ولا يندرى وين غادي

وبعض البشر لو مات عايش بذكراه
وبعض البشر ذكراه وقت الحدادي

وبعض البشر عقب العزا بيوم ننساه
وبعض البشر نلبس عليه السوادي

وبعض البشر روس العلالي توطاه
وبعض البشر من قاع وادي لوادي

وبعض البشر ما تنطق العيبه اشفاه
وبعض البشر العيب امر اعتيادي

وبعض البشر نص الدلو صعب يملاه
وبعض البشر محيط هندي و هادي

وبعض البشر ما يغيّر الوقت مبداه
وبعض البشر مـ يعرف معنى المبادي

وبعض البشر لا هدّ ما الله اهداه
هدات صقر مكيس وقت الهدادي

وبعض البشر بين الحضر والبدو تاه
لا اهل الحضر عرفوه ولا اهل البيادي

وبعض البشر في سوق الاجواد تلقاه
ما يسوى قرش ونص حسب اعتقادي

وبعض البشر والله والله والله
لو ينشرى بمليون تشريه عادي

هذي هي افعال الزمان وسواياه
الدون دوني والريادي ريادي

الكفو يلقاله خوي كفو يكفاه
واللا الردي يزبن على كل حادي

المرجله والطيب والدين والجاه
أجناد للي ما لقاله جنادي

واللي قضب حبل المراجل بيمناه
لو هو على راس النقب ما يدادي

ويلاه يابعض الرجاجيل ويلاه
راحت وعَـقب النار دايم رمادي

هذي عطايا اللي كثيره عطاياه
من يوم درو السيل شق البلادي

وما كل من عدا عن السيل عداه
ولا كل من صوب على الصيد صادي

واللي رمى كلمه على غير معناه
مثل الطلق من بعد ضغط الزنادي

واللي زرع بذره من الخير يجناه
ولكل بذرة خير موسم حصادي

ويلي شريت الجدر خلك من غطاه
الجدر ما يركب بدون الهوادي

ويلي اتمنى الشي ليه اتمناه
رزقك وعمرك عند رب العبادي

من عز نفسه وين ما راح يلقاه
ومن باعها باع الركب والعتادي

صحيح ان النفس دايم مبدّاه
وصحيح مايبدا على النفس بادي

بس البلى للي زمانه تولاه
وانه بوادي وابن عمه بوادي

[ابو سلطان العتيبي]

وما كل من عدا عن السيل عداه
ولا كل من صوب على الصيد صادي
واللي رمى كلمه على غير معناه
مثل الطلق من بعد ضغط الزنادي

بيض الله وجهك اخي ابو عبد العزيز
على حسن الاختيار

ودي واحترامي
-

[بقآيآ .. حرف]

هذي هي افعال الزمان وسواياه
الدون دوني والريادي ريادي

الكفو يلقاله خوي كفو يكفاه
واللا الردي يزبن على كل حادي

سلميت يمينك أخي الغالي
أبو عبد العزيز
أختيار موفق لا عدمناك
كل التحايا

[عذب الاحساس]

مشكورعلى النقل الرائع والمميز