السلام عليكم ورحمة الله وبركاته
تحية طيبة لكم جميعا
قصيدة تعبر عن مضمونها
أتمنى تجد قبولكم ورضاكم
/
قالوا مهوجس وين نيات الأسفار ..؟
لسويسرا والا للندن وباريس !!!
حجزت والا توك بعمس الأفكار
يا شيخ عجل خل عنك الهواجيس
رح للطبيعة والمطر وأرض الأزهار
الصيف صح هناك غيم ونسانيس
سافر وغير جو مع عبر الأقطار
ترى السفر للروح فله وتنفيس
قلت الوناسة والسفر صحبة أخيار
في صحصحن ما دوجوه المفاليس
عشبه من وسوم المخاييل نوار
يشوق قلب اللي يحب النواميس
يا حلو فيه عصير لا شبت النار
والبرق جاله بالمناشي مقابيس
قفره تشابك من مغاشين الأمطار
ما فيه ليله ما رعوده مراجيس
الله على كيف ٍ يعدلونه بهار
ريحه علاج المذهبين المعاميس
ما صفت دلاله على قز ووجار
جمره محاطيب العروق الميابيس
يا حلو بخدوده تساجيع الأطيار
لا فرعت شمسه على غيمة قبيس
وبيوت تباع الحياء مد الأنظار
على رفاع البيد بنيت مماسيس
الله على نشر العرب وسط الاقفار
في مهمهن ذوده شباع ومراويس
وضح ٍ تسر العين خلفات وبكار
تلفت شبوح اهل النظر والعواسيس
مع قول ما شاء الله يطيبن الأسبار
تفلح بذكر الله فسيح المجاليس
يطرب بريفه كل هاوي وصقار
لا من لقى فيه الحباري مكانيس
لا هد من كفه معاطيب جسار
سوه على خرش الخروب الملابيس
يطيب فال اللي تنشمى على الكار
لا صاد واستناس وصف القرانيس
في خايعن ما حدد بشبك وجدار
شوفه يجيب العافية والتوانيس
قلته وانا مع غايتي وافي أشبار
الحق هوى نفسي بعرف ومقاييس
أطلق عنان الخاطر بكل معبار
ما خلي هجوسي عطاش ومحابيس
اطرق هواها واتمثل بالأشعار
اروي ظمأ القيفان جزلات أحاسيس
ولا أشفق على اللي قالها قبل بيطار
شيلت وحفظت في بياض الكراريس
شاعر وأمثل حالتي سر وجهار
قصايدي ما هن هزال ومهاسيس
من بنك عرفي اصرف القاف دولار
تاج الذهب يزهى الجزال العطاميس
على النقاء دايم معانيّ حضار
شمخ النوايا ما تعثر عواكيس
عن الهدف ما زل بالشوف واحتار
مشاعري للكيف دايم مهاويس
على الشرف ومزارق الطيب يندار
فنجالها لا صب يجلى التعاميس
وصلاة ربي عد ما نبتت اشجار
على نبي ٍ ما بهديه تداليس
عبدالله الحربي
2014-08-26, 10:02 PM
طراة الوقت
العرض العادي
